“Jehovah Sevem Laef blo Mifala”

Lo 2005, wanfala woman lo India wea nem blo hem Sowbhagya hem lusim hasband blo hem lo dae. Hem lukaftarem gud thri year old dota blo tufala, Meghana. Bat Sowbhagya stragol for provaedem wat tufala needim.

Bat worse go moa, pipol rejectim Sowbhagya. Famili blo hem treatim hem and dota blo hem olsem beggar, and olketa evritaem talem hem dat tufala kamap burden for olketa. From Sowbhagya needim comfort, hem start for attendim wanfala church lo ples wea olketa stap, bat pipol hia lukdaonem hem tu bikos hem poor. Sowbhagya start for lukaotem wanfala waka mekem hem savve lukaftarem hemseleva and dota blo hem. Nomata hem traem best, hem no savve faendem eni waka.

Sowbhagya sei: “Mi feel hopeles, so mi disaed for suisaed. Bat mi luksavve if mi dae, laef blo dota blo mi bae worse go moa. So mi disaed for endim laef blo mitufala evriwan.” From hem feelim dat no eniwan lovem hem and hem feel iusles, Sowbhagya go for peim poison.

Taem Sowbhagya travel go bak lo haos lo train, wanfala Jehovah’s Witness wea nem blo hem Elizabeth meetim hem and tufala start for story. Sowbhagya storyim dat hem no waka, and Elizabeth sei lo hem dat bae hem faendem eni waka for hem. Elizabeth talem tu dat hem go for wanfala Bible study. Sowbhagya sapraes bikos hem go lo church staka taem, bat hem no herem dat pipol savve studyim Bible. Elizabeth invaetem Sowbhagya for kam visitim hem mekem hem savve moa lo wat nao wanfala Bible study.

Taem Sowbhagya arrive lo haos, plan blo hem for suisaed still stap. Bat wanfala relative tekem Meghana for go aot, so Sowbhagya disaed for weitim dota blo hem for arrive bifor hem savve karemaot datfala plan.

Lo datfala taem nao hem disaed for visitim Sista Elizabeth, wea welkamim hem and story kaen lo hem. During datfala visit, Elizabeth showim hem datfala buk Wanem Nao Really Samting wea Bible Teachim? And Sowbhagya laekem datfala chapter wea garem title “Wea Nao Olketa wea Dae Finis?” Hem interest lo disfala chapter bikos hasband blo hem just dae nomoa. Lo datfala day, Sowbhagya acceptim for studyim Bible.

Elizabeth invaetem Sowbhagya for wanfala convention wea kamap lo week bihaen, and Sowbhagya acceptim tu. Datfala program barava motivatim hem, so hem laek for kamap wanfala Jehovah’s Witness. And taem hem go bak lo haos from datfala convention, hem kasem wanfala job.

Sowbhagya continue for studyim Bible. Distaem, instead for hem laek for endim laef blo hem, hem garem reason for laef. Hem baptaes, and bihaen dota blo hem, Meghana tu hem baptaes. Distaem, tufala evriwan regular pioneer, and Meghana waka olsem wanfala remote volunteer lo wanfala transleison office lo India.

Sowbhagya and Meghana barava hapi dat Elizabeth story witim Sowbhagya lo train, showim interest lo hem, and story lo hem abaotem truth! And tu, tufala barava tinghae lo help blo Jehovah. Meghana sei: “Sapos mitufala no savve abaotem truth lo datfala day, olketa berem mitufala longtaem finis. Distaem mitufala hapi tumas. Mi and mami blo mi barava luk forward for taem wea bae mitufala hagem dadi blo mi moa, teachim hem abaotem Jehovah, and talem hem hao Jehovah sevem laef blo mitufala.”