Talem Dat Iu Lovem Olketa

Ong-Li hem wanfala Jehovah’s Witness lo Bulgaria. Hem conductim Bible study witim wanfala woman wea nem blo hem Zlatka, wea hasband blo hem no studyim Bible. Ong-Li sei: “Taem mitufala study abaotem famili laef, mi storyim why hem important for talem lo marit partner and lo olketa pikinini dat iumi lovem olketa. Zlatka luk sorre and hem talem mi dat hem never talem hasband blo hem or naen-year-old dota blo tufala dat hem lovem tufala!”

Zlatka sei, “Mi willing for duim eniting for tufala, bat mi no savve hao for talem datkaen toktok.” And hem sei tu, “Mami blo mi never talem dat hem lovem mi, and granmami blo mi never talem lo mami blo mi dat hem lovem hem.” Ong-Li showim lo Zlatka lo Bible dat Jehovah seleva talem dat hem lovem Jesus. (Matthew 3:​17) Hem encouragem Zlatka for prea lo Jehovah abaotem datwan, and for markem goal tu for talem hasband and dota blo hem dat hem lovem tufala.

Ong-Li sei: “Tufala day bihaen, Zlatka hapi tumas for talem mi dat hem prea lo Jehovah for helpem hem. Taem hasband blo hem arrive lo haos, Zlatka storyim wat hem lanem lo Bible study, dat hem barava important for waef respectim and lovem hasband blo hem. Then, hem pause lelebet and talem hasband blo hem dat hem lovem hem tumas! Taem dota blo hem kam bak lo haos, Zlatka huggim hem and talem hem dat hem lovem hem! Zlatka sei lo mi: ‘Distaem mi barava feel gud. For staka year nao mi no savve hao for expressim olketa feeling blo mi, bat witim help blo Jehovah, mi savve talem famili blo mi dat mi lovem olketa.’

Ong-Li sei moa, “Wan week bihaen, mi meetim hasband blo Zlatka, and hem sei: ‘Staka pipol talem mi dat Zlatka shud no studyim Bible witim iu, bat famili blo mifala barava benefit from Bible study blo iutufala and hem mekem famili for stap gud and hapi.’”