“Mi Bin Weitim Phone Kol blo Iu”

Lo 2010, hem firstaem wea Ed and waef blo hem, Jennie, traem phone witnessing.a Jennie sei: “Mi barava no laek for duim phone witnessing, mi talem hasband blo mi dat bae mi no duim moa datwan!” Ed tu feel olsem. Hem sei: “Mi no laekem pipol wea savve salem samting for ringim mi, and hem nao hao mi imaginim dat pipol bae ting taem mi ring for duim telephone witnessing.”

Then COVID-19 arrive, and Olketa Jehovah’s Witness stop nao for duim haos-tu-haos. Bat for obeyim komand blo Jesus, olketa gohed for talemaot gud nius, especially thru lo leta raeting and for duim telephone witnessing. (Matthew 24:14; 28:19, 20) And tu, olketa Christian meeting, and meeting for field service hem kamap lo videoconference. Wantaem lo field service, Ed garem courage for traem moa phone witnessing. Hao nao feeling blo hem taem hem redi for duim first kol blo hem? Hem sei: “Mi barava fraet so mi prea for help! Then mi ring. Lo datfala taem nao mi story lo Tyrone.”b

Tyrone and waef blo hem, Edith, stap lo wanfala rural area lo Kentucky, U.S.A. Tyrone hem 83 years old, from datwan hem no savve lukluk gud. Nomata olsem, hem acceptim Bible study. Hem savve iusim magnifying glass for read and tufala start for studyim Bible evritaem lo phone.

Abaot wan month bihaen, Tyrone and Edith start for attendim olketa meeting witim kongregeson. Bat from no eni Internet connection, olketa connect lo phone. Wat nao mekem Edith for interest?

During lo study blo Ed witim Tyrone, Jennie savve herem Edith story lo baekgraon taem hem helpem Tyrone for ansa and faendem olketa scripture lo Bible. Bat hem no barava involve lo study. Jennie sei: “Mi savve herem hao voice blo hem savve here sorre, bat mi and Ed no savve why nao hem olsem.”

Wanday, Jennie feel olsem hem laek for story witim Edith. So taem wanfala chance kamap, hem askem phone lo Ed. Then Jennie sei lo Tyrone, “Mi savve herem go voice blo waef blo iu lo baekgraon, and mi laek askem hem for readim wanfala scripture or for koment.”

Bihaen lelebet taem, Edith story kam. Hem story kwaet, and sei: “Mi tu laek for story witim iu.” Then hem sei moa: “Mi wanfala Jehovah’s Witness, and mi inactive for 40 years finis.”

Jennie barava seke and sei: “Iu wanfala sista blo mi!” And tufala start for krae.

No longtaem bihaen, Ed givim wanfala copy blo Kam Bak Long Jehovah brochure for Edith. Lo olketa week bihaen, Ed and Jennie noticim olketa positive change lo Edith. Ed sei:“Lo firstaem, voice blo hem savve here sorre tumas, bat distaem hem hapi nao.” Edith progress gud lo spiritual wei, and kamap wanfala active pablisa moa wea hapi for storyim gud nius. Hasband blo hem baptaes olsem wanfala Jehovah’s Witness lo July 2022.

Taem Ed ting go bak lo feeling for fraet wea hem garem abaotem phone witnessing, hem savve tingim tu conversation wea hem duim witim Tyrone. Lo first conversation blo tufala, Ed readim John 6:44 lo hem and explainim dat Jehovah leadim kam pipol lo truth, Tyrone agree, and sei: “Mi bin weitim phone kol blo iu.” Jennie hem hapi tu dat hem and hasband blo hem garem courage for share lo phone witnessing. Jennie sei moa: “Taem iumi traem best blo iumi for duim samting for Jehovah nomata hem hard for iumi, Hem bae blessim.”