Friday, October 16
No letem heart blo iu followim olketa wei blo hem. No followim olketa road blo hem.—Prov. 7:25.
Disfala story blo Solomon showim samting wea savve happen lo eniwan wea worshipim Jehovah. Afta samwan duim serious sin, maet hem sei hem samting wea seknomoa happen, or hem samting wea hem no expectim. Bat, if hem ting abaotem, maet hem bae luksavve dat really hem duim samfala samting wea no stret wea lead go for hem sin. Samfala samting hia, maet hem bad association, nogud entertainment, or go in person or online lo olketa ples wea no fitim olketa Christian. Maet hem stop for prea, readim Bible, attendim meeting, or share lo ministry. Olsem datfala young man wea Proverbs storyim, luk olsem hem mekem staka bad disison wea lead go lo datfala sin and hem no samting wea seke nomoa happen. Wat nao leson for iumi? Iumi mas no duim eni sin, and tu stap klia from olketa tings wea lead go lo sin. Solomon showimaot klia disfala point afta hem talem datfala story.—Matt. 5:29, 30. w24.07 16 ¶10-11
Saturday, October 17
Mifala olsem olketa clay jar, mifala garem disfala treasure insaed lo mifala.—2 Cor. 4:7.
Wat nao disfala expensive samting? Hem nao waka for preachim Kingdom message, wea savve sevem laef blo pipol. (2 Cor. 4:1) Wat nao olketa clay pot? Hem nao olketa servant blo God, wea talemaot gud nius lo pipol. Lo taem blo Paul, olketa bisnisman savve iusim olketa clay pot for karem olketa valuable tings insaed, olsem kaikai, wine, and selen. Lo sem wei, Jehovah iusim iumi for karem disfala important message blo gud nius. Witim help blo Jehovah, iumi bae garem strong for gohed faithful for talemaot gud nius. Samfala taem, iumi maet fraetem man or fraetem wei wea pipol bae les lo iumi. Hao nao iumi savve ovakamim disfala challenge? Tingim prea blo olketa aposol taem olketa bigman stopem olketa for preach. Winim wei for fraet, olketa askem Jehovah for helpem olketa for no fraet for gohed talemaot message bilong God. Kwiktaem nomoa Jehovah ansarem prea blo olketa. (Acts 4:18, 29, 31) If feeling for fraetem man affectim iu samfala taem askem Jehovah for mekem love blo iu for pipol kamap strong winim feeling for fraetem man. w24.04 16 ¶8-9
Sunday, October 18
Dadi blo mifala lo heven, mifala laekem nem blo iu for holy.—Matt. 6:9.
Love wea iumi garem for Jehovah hem muvim iumi for laek mekem nem blo hem holy. Iumi laek for part lo waka for kliarem olketa laea wea Satan talem abaotem nem blo Jehovah. (Gen. 3:1-5; Job 2:4; John 8:44) Taem iumi duim ministry, iumi laek saed witim God blo iumi, and for talem truth abaotem hem lo olketa narawan wea laek for lisin. Iumi laekem evriwan for savve dat main wei blo God hem love, wei wea hem rul hem raeteous and stret, and klosap nao Kingdom blo hem bae finisim wei for safa and mekem evriwan for kasem peace and hapi. (Ps. 37:10, 11, 29; 1 John 4:8) Taem iumi storyim olketa gud samting wea Jehovah duim lo ministry, iumi mekhae lo holy nem blo hem. Iumi hapi tu bikos iumi savve wat iumi duim hem showim iumi olketa Witness blo Jehovah. w24.05 18 ¶12