John 15:13—“No Eniwan Showim Bigfala Love Olsem”

“Man wea barava showimaot bigfala love nao hem man wea willing for dae for olketa fren blo hem.”—John 15:13, Niu World Transleison.

“No eniwan showim bigfala love olsem, hem nao for givim laef blo hem for olketa fren blo hem.”—John 15:13, New King James Version.

Mining blo John 15:13

Jesus helpem olketa follower blo hem for understandim dat love blo olketa shud strong and datwan shud muvim olketa for willing for dae for narawan.

Bifor Jesus talem olketa toktok hia lo olketa aposol blo hem, hem sei: “Komandment blo mi nao hem for iufala lovem iufala evriwan olsem hao mi lovem iufala tu.” (John 15:12) Wat kaen love nao Jesus garem for olketa? Hem unselfish love, self-sacrificing love. Taem hem duim ministry blo hem lo earth, hem no tingim hemseleva bat hem tingim need and interest blo olketa follower blo hem and blo olketa narawan first. Hem kiurim pipol wea sik and teachim olketa abaotem Kingdom blo God.a Hem even duim waka wea olketa narawan no laek duim for helpem olketa narawan. (Matthew 9:35; Luke 22:27; John 13:3-5) Bat lo John 15:13, Jesus hem tok abaotem love wea hem big go moa. Just samfala hours afta hem talem olketa toktok hia, hem showim datfala big love taem hem willing for givim “laef blo hem olsem ransom for baem bak staka pipol.” (Matthew 20:28; 22:39) Hem showim lo nambawan wei dat hem lovem olketa narawan winim wei wea hem lovem hemseleva.

Jesus lovem olketa man. Bat hem especially lovem olketa wea followim olketa teaching blo hem. Lo tingting blo hem, olketa disaepol olketa klos fren blo hem bikos olketa obeyim olketa toktok blo hem, and olketa stap witim hem taem hem kasem hard taem. (Luke 22:28; John 15:14, 15) Dastawe hem garem gudfala reason for sakrifaesim laef blo hem for olketa.

Olketa first-century Christian followim toktok blo Jesus lo laef blo olketa, and olketa willing for dae for nara Christian. (1 John 3:16) Yes, unselfish love, wea hem love wea Jesus showim hem kamap mark wea identifyim olketa tru Christian.—John 13:34, 35.

Context blo John 15:13

Lo Gospel blo John chapter 13 tu 17, iumi faendem olketa final advaes blo Jesus for 11-fala faithful aposol blo hem, and last prea blo hem witim olketa. Hem dae no longtaem afta hem talem olketa toktok hia. Lo chapter 15, Jesus showim dat olketa disaepol blo hem need for gohed garem wan mind for pruvim dat olketa follower blo hem, taem hem comparem olketa witim grape tree wea garem frut. Hem encouragem olketa for “gohed garem staka frut.” (John 15:1-5, 8) Wanfala wei for duim datwan, hem for showim self-sacrificing love for olketa narawan, wea includim for preachim message wea Jesus preachim, hem nao “gud nius abaotem Kingdom blo God.”—Luke 4:43; John 15:10, 17.

Watchim disfala short video for lukim overview blo buk blo John.