Philippians 4:8—“Evri Samting wea Tru, . . . Gohed for Tingim Olketa Samting Hia”

“So olketa brata, evri samting wea tru, evri samting wea important, evri samting wea raeteous, evri samting wea klin, evri samting wea mekem man garem love, evri samting wea fit for kasem respect, evri samting wea hem gud, and evri samting wea fit for kasem praise, gohed for tingim olketa samting hia.”—Philippians 4:8, Niu World Transleison.

“So olketa brata and sista, evri samting wea tru, evri samting wea important, evri samting wea stret, evri samting wea pure, evri samting wea mekem man garem love, evri samting wea pipol laekem—if eniting hem gud or fit for kasem praise—ting abaotem olketa samting olsem.”—Philippians 4:8, New International Version.

Mining blo Philippians 4:8

God hem interest lo wat olketa human ting abaotem, diswan hem bikos wat man ting abaotem savve leadim man for duim samting. (Psalm 19:14; Mark 7:20-23) Dastawe, pipol wea laek for mekem God hapi shud rejectim olketa nogud tingting and ting abaotem olketa tings wea hem hapi lo hem.

Disfala verse storyim eitfala type lo olketa gud samting wea Christian shud “gohed for tingim,” wea hem nao for mekem hem kamap habit for ting abaotem.

• “Tru.” Disfala word describem olketa tings wea raeteous and fit for man trustim, olsem information wea stap insaed Word blo God, Bible.—1 Timothy 6:20.

• “Important.” Disfala phrase refer lo olketa samting wea barava important. Hem no samting wea iumi shud ting nating lo hem. Taem olketa Christian ting abaotem olketa samting hia datwan bae mekem olketa laek for duim stret samting.—Titus 2:6-8.

• “Raeteous.” Disfala word hem minim olketa plan and akson wea followim standard blo God lo wat hem stret and hem no base lo wisdom blo olketa man.—Proverbs 3:5, 6; 14:12.

• “Klin.” Disfala word conveyim idea blo olketa tingting and motive wea klin and holy, no just saed lo sex, bat lo evri samting.—2 Corinthians 11:3.

• “Garem love.” Disfala word refer lo olketa samting wea barava naes, wea mekem man for garem love and no heitim narawan, kros, or againstim narawan.—1 Peter 4:8.

• “Kasem respect.” Disfala phrase refer lo olketa tings wea savve mekem wanfala person garem gud reputation and wea pipol wea respectim God hapi lo hem.—Proverbs 22:1.

• “Gud.” Disfala word minim olketa samting wea barava stret followim standard blo God. Olketa samting wea barava gud.—2 Peter 1:5, 9.

• “Praise.” Disfala word minim olketa samting wea fit for kasem praise, especially lo eye blo God. Hem includim tu olketa samting wea God duim wea olketa man fit for tinghae lo hem and praisem.—Psalm 78:4.

Context blo Philippians 4:8

Taem aposol Paul hem anda haos arrest lo Rome hem raetem leta for olketa Christian lo Philippi. Nomata olsem, olketa Bible commentator describim leta blo hem olsem wanfala “leta blo hapi” bikos lo olketa toktok wea hem iusim showim hem hapi and hem iusim staka toktok wea showim love and kea.—Philippians 1:3, 4, 7, 8, 18; 3:1; 4:1, 4, 10.

Paul lovem olketa spiritual brata and sista blo hem lo Philippi, and hem laekem olketa tu for kasem sem hapi and peace wea hem garem. (Philippians 2:17, 18) So lo last part lo leta blo hem, hem encouragem olketa for cultivatim wei for hapi, reasonable, evritaem depend lo God lo prea, and focus lo olketa tings wea mekem man garem peace lo mind and peace witim God.—Philippians 4:4-9.

Watchim disfala short video for lukim overview blo buk blo Philippians.