Revelation 21:1—“Wanfala Niu Skae and Wanfala Niu Earth”

“And mi lukim wanfala niu skae and wanfala niu earth bikos skae and earth wea stap bifor hem nomoa nao, and sea hem nomoa tu.”—Revelation 21:1, Niu World Transleison.

“Then mi lukim ‘wanfala niu heven and wanfala niu earth.’ First heven and datfala first earth hem no stap, and sea no stap nao.”—Revelation 21:1, New International Version.

Mining blo Revelation 21:1

Disfala verse iusim figurative languis for storyim dat Kingdom blo God lo heven bae replacim evri human gavman. Datfala Kingdom bae removim wicked pipol and bae rul ovam wanfala niu society blo pipol wea willing for stap antap lo rul blo hem.

Buk blo Revelation fulap lo “olketa saen,” or symbol. (Revelation 1:1) So hem stret for sei dat skae and earth wea disfala verse storyim hem no literal bat hem symbolic. And tu, samfala nara verse lo Bible tu story abaotem figurative “niu skae” and “niu earth.” (Isaiah 65:17; 66:22; 2 Peter 3:13) Taem iumi lukluk gud lo olketa verse hia and olketa nara verse lo Bible, datwan givim iumi clue for savve lo mining blo olketa.

“Wanfala niu skae.” Samtaems Bible iusim word “skae” for refer lo rul or olketa gavman. (Isaiah 14:12-14; Daniel 4:25, 26) Dastawe, wanfala buk story olsem abaotem olketa vision, “skae hem symbolically minim paoa for rul or gavman.”a Lo Revelation 21:1, “niu skae” hem refer lo Kingdom blo God. Buk blo Revelation and olketa nara buk lo Bible olketa tu story abaotem disfala gavman lo heven, wea samtaems Bible kolem “Kingdom blo heven.” (Matthew 4:17; Acts 19:8; 2 Timothy 4:18; Revelation 1:9; 5:10; 11:15; 12:10) Kingdom blo God wea Jesus nao hem King, bae replacim ‘skae wea stap bifor,’ wea hem evri imperfect gavman wea man nao setimap.—Daniel 2:44; Luke 1:31-33; Revelation 19:11-18.

“Wanfala niu earth.” Bible talem dat literal earth bae never distroe, or no eni samting bae replacim. (Psalm 104:5; Ecclesiastes 1:4) Then wat nao symbolic earth hia hem minim? Staka taem Bible iusim toktok “earth” for minim olketa human. (Genesis 11:1; 1 Chronicles 16:31; Psalm 66:4; 96:1) So “wanfala niu earth,” mas refer lo niu society blo pipol wea willing for stap anda lo gavman blo God lo heven. Datfala “earth wea stap bifor,” or human society wea againstim Kingdom blo God, bae finis.

“Sea hem nomoa tu.” Semsem olsem olketa nara samting, “sea” wea Revelation 21:1 storyim hem symbolic. Staka taem big wind savve mekem sea hem raf, datwan representim pipol wea kosim staka problem and disorder bikos olketa no savve lo God and followim olketa law blo hem. (Isaiah 17:12, 13; 57:20; Revelation 17:1, 15) Olketa ia tu bae finis. Psalm 37:10 sei: “Lelebet taem nomoa stap, and wicked pipol bae nomoa nao. Iu bae luk lo ples wea olketa stap, and bae olketa no stap lo there nao.”

Context blo Revelation 21:1

Buk blo Revelation story abaotem olketa samting wea happen during “day blo Lord.” (Revelation 1:10) According lo Bible profesi, datfala day hem start lo 1914 taem Jesus wea King start for rul lo Kingdom blo God.b Bat hem no stretawe rulim yet full earth. Samfala nara profesi talem dat condition lo world bae hem barava nogud during first part lo “day blo Lord.” Datfala period of taem nao Bible kolem “olketa last day.” (2 Timothy 3:1-5, 13; Matthew 24:3, 7; Revelation 6:1-8; 12:12) Taem olketa last day wea fulap lo trabol hem end, Kingdom blo God bae removim old symbolic skae and earth and mekem peace and wan mind stap. Then pipol wea stap anda lo Kingdom, wea olketa nao “niu earth” bae enjoyim laef and garem perfect health.—Revelation 21:3, 4.

Watchim disfala short video for lukim overview blo buk blo Revelation.