Philippians 4:13—“Mi Savve Duim Evri Samting Thru lo Christ”

“Nomata wanem samting hem kasem mi, paoa wea mi kasem from God nao hem strongim mi for gohed.”—Philippians 4:13, Niu World Transleison.

“Mi savve duim evri samting thru lo Christ wea strongim mi.”—Philippians 4:13, New King James Version.

Mining blo Philippians 4:13

Olketa toktok hia, wea aposol Paul raetem, assurem olketa worshiper blo God dat bae olketa receivim paoa for accomplishim will blo Hem.

Samfala Bible transleison sei dat Christ nao givim paoa lo Paul. Bat, datfala nem “Christ” hem no appear lo disfala verse lo olketa oldest Greek manuscript. Dastawe staka modern transleison iusim wording “wan wea givim mi strong” (New International Version), and “datwan wea hem source blo strength blo mi” (New American Bible). So hu nao Paul story abaotem lo hia?

Context showim dat Paul hem story abaotem God. (Philippians 4:6, 7, 10) Lo sem leta, Paul raet olsem lo olketa Philippians: “God . . . strongim iufala, for iufala laek duim samting, and givim paoa lo iufala for duim datwan.” (Philippians 2:13) And lo 2 Corinthians 4:7, hem raetem dat God nao givim hem paoa for accomplishim ministry blo hem. (Comparem 2 Timothy 1:8.) So, hem fitim for conclude dat Paul hem story abaotem God olsem ‘wan wea givim paoa lo hem.’

Wat nao Paul minim taem hem sei dat bae hem kasem strong for “duim evri samting”? Luk olsem olketa tings wea Paul storyim hem olketa difren challenge wea hem feisim taem hem duim will blo God. Nomata hem garem staka material samting or lelebet nomoa, hem depend lo God for strongim hem. So Paul hem lane for satisfae nomata wat nao circumstances blo hem.—2 Corinthians 11:23-27; Philippians 4:11.

Toktok blo Paul savve reassurem tu olketa worshiper blo God distaem. God bae givim strong wea olketa needim for feisim and succeed lo olketa hard taem and for duim will blo hem. God savve strongim olketa thru lo holy spirit, or active force blo hem, and tu thru lo olketa brata and sista and Word blo hem, Bible.—Luke 11:13; Acts 14:21, 22; Hebrews 4:12.

Context blo Philippians 4:13

Olketa toktok hia part lo conclusion blo leta blo Paul for olketa Christian lo Philippi. Hem raetem disfala leta lo samting olsem 60-61 C.E., lo firstaem wea hem stap lo prison lo Rome. For lelebet taem, olketa Christian lo Philippi no fit for sapotim aposol Paul witim olketa material need blo hem. Bat distaem, olketa sendem olketa gift lo Paul for helpem hem witim wat hem needim.—Philippians 4:10, 14.

Paul praisem olketa Christian lo Philippi for generosity blo olketa and hem reassurem olketa dat hem garem wat hem needim. (Philippians 4:18) Hem iusim tu datfala chance for sharem wanfala important truth abaotem Christian laef, hem nao: Evri Christian, nomata rich or poor, savve kasem tru hapi and satisfae if olketa depend lo God for helpem olketa.—Philippians 4:12.