Wat Taem Nao Olketa Raetem Story Abaotem Jesus?

Ansa from Bible

Taem aposol John raetem story abaotem Jesus, hem sei: “Man wea witnessim diswan nao hem man wea storyim diswan, and samting wea hem storyim hem tru, mekem iufala tu savve bilivim.”—John 19:35.

Wanfala reason why iumi trustim olketa story lo Gospel wea Matthew, Mark, Luke, and John raetem, hem bikos olketa raet taem staka wea lukim olketa event wea olketa raet abaotem laef yet. Samfala buk sei Matthew raetem Gospel blo hem samting olsem eit years afta Christ dae, wea hem abaot 41 C.E. Staka scholar sei olketa raetem olketa Gospel afta datfala year, bat evriwan agree dat evri buk lo Christian Greek Scriptures olketa raetem during first century C.E.

Pipol wea lukim Jesus taem hem lo earth, witnessim dae blo hem, and lukim taem hem resurrect savve confirmim dat olketa story lo Gospel hem tru. And hem isi tu for olketa talem if olketa story hia hem no accurate. Professor F.F. Bruce sei: “Wanfala samting wea mekem pipol trustim wat olketa aposol talem hem bikos olketa sei, ‘mifala witnessim olketa samting hia,’ and, ‘iufala tu savve finis’ (Acts 2:22).”