Full World Bae Garem Peace

Evriwan laek tumas for live lo world wea garem peace. Thru aot lo history, olketa world leader bin traem best for finisim olketa conflict and mekem peace. Samtaems, olketa able for duim datwan for lelebet taem. Bat sorre samting, staka taem olketa conflict happen again. Hao, enitaem world bae garem peace tu? Yes! Lukim wat iumi savve lanem from Jesus.

Wat Jesus bae duim

Bible storyim wat Jesus bae klosap for duim for mekem full world garem peace.

• “Bae olketa kolem [Jesus]. . . Prince blo Peace. And waka blo hem for rul bae kamap big and peace, bae no savve end.” (Isaiah 9:6, 7) From Jesus nao bae rul lo Kingdom blo God, hem bae establishim global peace wea bae stap forever.

• “Hem bae rescuem olketa wea poor, wea krae for help . . . and olketa wea no garem eniwan for helpem olketa.” (Psalm 72:12-14) Jesus bae iusim authority wea hem garem for establishim tru justice for evriwan, finisim evri war, violence, and safaring.

• “Nation bae no iusim sword for againstim nara nation, olketa bae no enitaem lanem moa hao for faet.” (Isaiah 2:4) Taem Jesus rul ovarem disfala earth, evri human bae lanem hao for mek peace, instead for lanem hao for faet.

For lane abaotem hao Jesus bae mekem disfala world hem peaceful lo future and hao for iu savve live lo datfala world, watchim wanfala brief video Wanem Nao Kingdom Bilong God?

Wat Jesus teachim

Even distaem, olketa teaching blo Jesus helpem staka million pipol for live lo peace. Lo famous Sermon blo Jesus lo Maunten, hem teachim olketa principle wea promotim peace lo evriday laef blo pipol. Lukim samfala example.

• “Olketa wea peacemaker, olketa hapi.” (Matthew 5:9) Jesus encouragem olketa follower blo hem for no just avoidim conflict bat for mek peace tu.

• “Firstaem, leavim sakrifaes blo iu lo there front lo altar, and go stretem datfala problem witim brata blo iu. Then bihaen, kam bak and offerim datfala sakrifaes.” (Matthew 5:23, 24) Jesus encouragem olketa wea lisin lo hem for kwiktaem stretem problem witim olketa narawan. Hem teachim dat hem important for mek peace witim others for garem gud frenship witim God.

• “Stop for judgem narawan mekem God no judgem iufala.” (Matthew 7:1) Jesus warnim iumi for no judgem others or expectim olketa for duim tings wea iumiseleva no duim, diskaen attitude hem savve kosim conflict. Instead for faend fault, Jesus teachim olketa follower blo hem for “gohed forgivim” others taem olketa mekem mistek.—Luke 6:37.

Pipol evriwea lo world applyim olketa teaching blo Jesus lo laef blo olketa. Even lo olketa ples wea violence and conflict hem big tumas, olketa lane hao for no kros taem olketa solvem problem, willing for forgive, and showim love nomata others no kaen lo iumi.

For lanem moa samting abaotem olketa teaching blo Jesus lo hao hem helpem samfala for garem peace, readim article “Hao for Garem Peace Nomata lo Taem blo War and Violent Conflict.”