Violence Hem No Permanently Solvem Problem

Staka pipol distaem biliv dat violence hem only wei for solvem conflict wea happen or for solvem problem. Bat diskaen tingting hem opposite lo olketa teaching and example wea Jesus Christ showim. Lukim samfala samting hem talem and duim.

Wat Jesus talem

Lo well-known Sermon blo hem lo Maunten, Jesus teachim dat wei for kros, raf, and violence no savve solvem olketa disagreement. Lukim samfala example.

• “Samting wea iufala laekem pipol for duim lo iufala, sem samting tu iufala mas duim lo olketa.” (Matthew 7:12; Luke 6:31) Disfala advaes wea olketa kolem lo Golden Rul,a encouragem iumi for treatim olketa narawan lo sem wei wea iumi laekem olketa for treatim iumi. Since no eniwan lo iumi laek for olketa narawan treatim iumi nogud, iumi laek traem best for treatim pipol witim respect and kaeness, even taem iumi disagree lo olketa.

• “Eniwan wea slapem raet cheeks blo iu, givim narasaed for hem slapem tu.” (Matthew 5:38, 39; Luke 6:29) Jesus no teachim dat iumi shud openem wei for olketa narawan treatim iumi nogud. Bat, hem correctim samfala rong idea wea samfala religious leader teachim dat wei for retaliate hem acceptable. Hem talem olketa follower blo hem dat olketa shud no retaliate, bat shud respond witim mildness taem pipol treatim olketa nogud.b

• “Gohed lovem olketa enemy blo iufala.” (Matthew 5:43, 44; Luke 6:27) Jesus teachim dat iumi shud kaen lo olketa wea heitim iumi or unfair lo iumi. Datwan no minim iumi agree witim nogud samting wea olketa duim lo iumi.c Bat, taem iumi kaen lo olketa wea heitim iumi, datwan maet katem daon kros blo olketa and even motivatim olketa for respond witim kaeness.

Wat Jesus duim finis and bae hem duim

Jesus teachim dat violence hem no savve solvem problem, and hem duim wat hem preachim. Lo naet wea olketa arrestim hem, wanfala lo olketa follower blo hem faet for defendim hem bat Jesus sei: “Putim bak sword blo iu lo ples blo hem, bikos evriwan wea iusim sword bae dae tu lo sword.” (Matthew 26:52) Jesus showim hem lovem olketa enemy blo hem taem hem forgivim olketa wea mistreatim hem, hem even prea for olketa!—Luke 23:33, 34; 1 Peter 2:23.

Bible promisim dat klosap nao Jesus wea hem Prince blo Peace bae finisim evri violence. (Isaiah 9:6, 7) For lanem moa samting abaotem disfala encouraging future, readim article “Hao War and Violent Conflict Bae Finis.”