Wat Nao Hem Minim for “Lovem Olketa Enemy blo Iufala”?
Ansa from Bible
Lo famous Sermon blo hem lo Maunten, Jesus sei: “Lovem olketa enemy blo iufala.” (Matthew 5:44; Luke 6:27, 35) Olketa toktok hia minim iumi shud duim samting for showim iumi lovem olketa wea heitim iumi or treatim iumi nogud.
Jesus showim hem lovem olketa enemy blo hem taem hem forgivim olketa wea treatim hem nogud. (Luke 23:33, 34) Olketa teaching blo hem abaotem wei for lovem enemy hem followim wat hem stap lo olketa Hebrew Scripture, wea olketa kolem lo Old Testament.—Exodus 23:4, 5; Proverbs 24:17; 25:21.
“Gohed lovem olketa enemy blo iufala and prea for olketa wea persecutim iufala.”—Matthew 5:43, 44.
Lo disfala article
Why nao iu mas lovem olketa enemy blo iu?
God showim example. “Pipol wea no savve tinghae and wicked pipol, God kaen lo olketa tu.” (Luke 6:35) Hem “mekem sun hem shaen lo . . . pipol wea wicked.”—Matthew 5:45.
Love savve mekem enemy for change. Bible encouragem iumi for kaen lo enemy, taem iumi duim datwan iumi “hipim olketa hot chakol lo hed blo hem.” (Prov. 25:22) Disfala metaphor hem story abaotem process for meltim rock for extractim olketa spesol metal. Lo sem wei, if iumi kaen lo wanfala person wea heitim iumi, iumi savve meltim kros blo hem and helpem hem garem olketa gudfala fasin.
Wat nao samfala wei wea iu savve lovem olketa enemy blo iu?
“Duim gud samting lo olketa wea heitim iufala.” (Luke 6:27) Bible hem sei: “Sapos enemy blo iu hem hangere, givim hem kaikai, sapos hem thirsty, givim hem samting for drinkim.” (Romans 12:20) Iu savve faendem olketa nara wei wea iu savve showim iu lovem enemy blo iu taem iu applyim datfala Golden Rul, wea sei: “Samting wea iufala laekem pipol for duim lo iufala, sem samting tu iufala mas duim lo olketa.”—Luke 6:31.
“Blessim olketa wea laekem nogud samting for kasem iufala.” (Luke 6:28) Iumi blessim olketa enemy taem iumi story kaen lo olketa and respectim olketa, even if olketa tok nogud abaotem iumi. Bible hem sei: “No changem bak nogud samting wea narawan duim lo iufala or tok spoelem man wea tok spoelem iufala. Bat iufala mas changem bak witim blessing.” (1 Peter 3:9) Disfala advaes savve helpem iumi for stopem wei for heitim narawan.
“Prea for olketa wea tok spoelem iufala.” (Luke 6:28) If wanfala person tok spoelem iu, no changem bak “nogud samting witim nogud samting.” (Romans 12:17) Instead, askem God for forgivim datfala person. (Luke 23:34; Acts 7:59, 60) Instead for pei bak, leavim datwan lo God nao for deal witim datfala person followim perfect standard blo hem saed lo justice.—Leviticus 19:18; Romans 12:19.
“Gohed lovem olketa enemy blo iufala, and for duim gud samting lo olketa wea heitim iufala. Askem God for blessim olketa wea laekem nogud samting for kasem iufala, and prea for olketa wea tok spoelem iufala.”—Luke 6:27, 28.
Mas “patient and kaen.” (1 Corinthians 13:4) Taem aposol Paul explainim mining blo love, hem iusim sem Greek word (a·gaʹpe) hem stap tu lo Matthew 5:44 and Luke 6:27, 35. Iumi showim Christian love even lo olketa enemy blo iumi taem iumi patient and kaen, no jealous, no praod, or rude.
“Love hem patient and kaen. Love hem no jealous. Hem no tok praod, and hem no haem hemseleva, hem no rude, hem no tingim hemseleva, hem no kwiktaem for kros taem narawan spoelem hem. Hem no kaontem nogud samting wea narawan duim lo hem. Hem no hapi lo samting wea no raeteous bat hem hapi lo truth. Hem savve deal witim eni situation, biliv lo evri samting, hope lo evri samting, gohed strong lo evri samting. Love no savve fail.”—1 Corinthians 13:4-8.
Hem stret for faet againstim olketa enemy blo iu?
Nomoa, bikos Jesus teachim olketa follower blo hem olketa shud no faetem enemy blo olketa. For example, taem hem warnim olketa dat enemy bae attakim Jerusalem, hem no talem olketa for stay and faet, bat hem talem for olketa ranawe. (Luke 21:20, 21) Jesus talem tu lo aposol Peter: “Putim bak sword blo iu lo ples blo hem, bikos evriwan wea iusim sword bae dae tu lo sword.” (Matthew 26:52) Bible and secular history showim dat olketa follower blo Jesus lo first century no go lo war for faet againstim enemy blo olketa.a—2 Timothy 2:24.
Tingting wea no stret abaotem wei for lovem enemy
Tingting wea no stret: Law blo God talem for olketa Israelite heitim enemy blo olketa.
Tru samting: Law no garem kaen komand olsem. Bat, Law talem olketa Israelite for lovem neiba blo olketa. (Leviticus 19:18) Hem tru, datfala term “neiba” simply minim olketa nara man, bat samfala Jew ting dat word hia minim nomoa olketa nara Jew, and olketa biliv dat pipol wea no Jew olketa enemy wea olketa shud no lovem. (Matthew 5:43, 44) So Jesus stretem rong tingting blo olketa taem hem storyim parabol abaotem gud, or neighborly, Samaritan.—Luke 10:29-37.
Tingting wea no stret: If iu lovem enemy blo iu hem minim iu hapi lo rong samting olketa duim.
Tru samting: Bible showim dat iu savve lovem wanfala person nomata iu no hapi lo rong samting hem duim. For example, Jesus againstim violence bat hem prea for olketa wea killim hem dae. (Luke 23:34) And hem heitim wei for brekem law, or sin, bat hem givim laef blo hem for olketa sinner.—John 3:16; Romans 6:23.
a Buk The Rise of Christianity wea E. W. Barnes raetem hem sei: “Taem iumi lukluk gud lo evri information wea available hem showim dat, bifor lo taem blo Marcus Aurelius [Roman emperor from 161 go kasem 180 C.E.], no eni Christian kamap wanfala soldia, and taem wanfala soldia kamap Christian, hem no gohed joinim moa military service.”