Kasem Gud Samting From Field Service Grup Arrangement

1-2. Wat nao staka pablisa talem abaotem field service grup arrangement?

HAO, iu tingim yet datfala day wea iu qualify for kamap pablisa for preachim gud nius? Hem wanfala hapi day, bikos iu joinim wanfala big grup wea worshipim Jehovah and praisem nem blo hem. (Ps. 148:​1, 2, 12, 13) Bat, lo datfala day, iu maet kamap part tu lo wanfala smol grup, wea samfala brata and sista nomoa insaed, wea hem nao field service grup. Iumi kasem komand for preachim gud nius abaotem Kingdom “lo evri ples lo earth” and field service grup wea iumi joinim helpem iumi for duim datwan.—Matt. 24:14.

² Wat nao tingting blo iu abaotem field service grup arrangement? Wanfala sista wea nem blo hem Wendy,a sei: “Disfala arrangement helpem mi lo staka difren wei lo ministry. Mi lanem olketa difren wei for preach and teach from olketa narawan, for markem and kasem olketa spiritual goal, and garem olketa gud frens. Hem bikos lo disfala loving arrangement.” Wanfala brata wea nem blo hem Rich, sei: “Hem wanfala spesol privilege for serve olsem wanfala grup overseer. Samfala pablisa savve helpem samwan gogo hem baptaes, bat wanfala grup overseer garem chance for helpem datfala person for grow lo spiritual wei afta hem baptaes.” Wanfala sista wea nem blo hem Dinah, sei: “Field service grup arrangement hem barava gud! Mi ting lo grup blo mi olsem famili blo mi.”

3. Wat nao bae iumi storyim lo disfala article?

³ Lo disfala article, firstaem iumi bae storyim waka wea grup overseer and assistant blo hem duim, and hao tufala lukafta rem olketa pablisa lo grup blo tufala. Then, bae iumi storyim wat each wan lo iumi savve duim for helpem olketa wea insaed field service grup blo iumi. Last samting, bae iumi storyim gud samting iumi savve kasem from disfala loving arrangement.

GRUP OVERSEER AND ASSISTANT BLO HEM

4. (a) Wat nao main responsibility blo wanfala grup overseer? (b) Hao nao wanfala grup overseer lukaftarem olketa pablisa insaed grup blo hem? (Lukim box “Wat Olketa Grup Overseer Savve Duim.”)

⁴ Field service grup overseer hem wanfala elder,b wea body of elders nao assignim hem for helpem olketa pablisa lo grup blo hem, for strongim love and waka blo olketa for Jehovah. Hao nao hem duim datwan? First, hem showim interest lo each pablisa lo grup blo hem. (Prov. 27:23) From hem shepherd wea kea and redi for help, hem evritaem contactim olketa. Datwan helpem hem for provaedem encouragement, comfortim olketa, and provaedem help wea olketa needim. (Prov. 12:25; Isa. 32:2; Jas. 2:​15-17) Mek-tu, hem helpem each pablisa for gohed strong lo ministry. Hem traem best blo hem for lead lo ministry, especially lo olketa weekend. And tu, hem evritaem waka witim each pablisa for encouragem and trainim hem. Samfala taem, if hem no fit for leadim grup, hem bae mek sure assistant blo hem or eni nara pablisa wea qualify for duim datwan. Mek-thri, hem helpem olketa baptaes brata for qualify for duim responsibility insaed kongregeson. (1 Tim. 3:1) Hem praisem olketa for gud waka wea olketa duim, givim kaonsel from Bible, and evritaem givim training for mekem olketa brata qualify for kamap ministerial servant and elder. Bikos datfala responsibility wea grup overseer garem hem important, body of elders chusim olketa elder wea barava qualify for duim disfala assignment.

5. Wat nao olketa challenge wea samfala grup overseer feisim?

⁵ Wanfala grup overseer savve feisim samfala challenge taem hem lukaftarem olketa pablisa insaed grup blo hem. Tingim Jörg, wanfala grup overseer from Germany, wea olsem olketa nara elder, hem tu garem tu-thri assignment lo kongregeson. Hem sei: “Hem no isi for balancem olketa responsibility blo mi. From datwan, mi faendem hem no isi for kasem goal blo mi for contactim evriwan insaed grup blo mi.” Abel, wanfala elder from Uganda wea 70-years old hem sei: “Mifala no garem staka elder and ministerial servant lo kongregeson, so olketa field service grup hem big. From datwan, Mi faendem hem no isi for shepherdim each pablisa evritaem olsem hao mi laekem.” And Obed, wanfala elder from Suriname, hem sei: “Mi laek tumas for trainim olketa narawan. Bat for duim training hem needim taem and strong, and staka taem iu no stretawe lukim result blo training wea iu givim. From datwan, staka taem mi no trainim narawan nao bikos mi busy lo olketa nara samting.” Wat nao savve helpem olketa grup overseer wea feisim olketa challenge olsem and olketa nara challenge?

6. Hao nao wei for garem olketa smol grup savve helpem grup overseer for lukaftarem olketa pablisa insaed grup blo hem?

⁶ Sapos fitim, olketa field service grup shud smol nomoa, mekem olketa grup overseer savve gud lo evriwan lo grup blo olketa and helpem olketa pablisa for gohed strong lo spiritually wei. Hao sapos kongregeson no garem staka elder? Winim for garem big grup, wea savve mekem grup overseer no fit nao for lukaftarem evriwan lo grup blo hem, body of elders savve mekem olketa smol grup, and assignim wanfala ministerial servant for lukaftarem wanfala grup for lelebet taem. Taem olketa grup hem smol, olketa grup overseer bae fit for lukaftarem gud olketa brata and sista, wea datwan hem most important part lo assignment blo olketa.

7. Lo kongregeson wea no garem staka elder, wat nao olketa grup overseer savve duim for mek sure evriwan lo grup olketa gohed gud? (1 Peter 5:2) (Lukim tu piksa.)

⁷ If iu wanfala grup overseer lo wanfala kongregeson wea no garem staka elder, focus lo wei for trainim assistant blo iu for helpem iu lukaftarem olketa sheepsheep blo God. (Readim 1 Peter 5:2.) Askem assistant blo iu for duim samfala samting. For example, samfala taem iu savve assignim hem for leadim field service grup. Iutufala savve story tugeta abaotem hao each pablisa savve kamap gud lo ministry and frenship blo hem witim Jehovah. Evritaem tekem assistant blo iu taem iu duim shepherding kol, and bifor each visit storyim wat iutufala bae duim, and afta visit praisem hem and storyim wat hem need for impruv lo hem. Gogo, assistant blo iu tu savve qualify for kamap wanfala grup overseer. (2 Tim. 2:2) Iu savve askem tu olketa mature Christian for helpem iu givim training. For example, olketa pioneer and olketa nara pablisa wea garem experience, savve waka witim olketa niu wan and olketa wea no garem experience. And olketa pablisa wea mature lo spiritual wei savve helpem olketa narawan lo hao for startim story lo ministry, duim return visit, or conductim Bible study. Distaem bae iumi storyim thrifala wei wea each wan lo iumi savve helpem evriwan insaed field service grup blo iumi.

HELPEM EVRIWAN INSAED FIELD SERVICE GRUP BLO IU

8. Hao nao iumi savve helpem evriwan insaed grup blo iumi? (Romans 1:12)

⁸ Preach witim grup blo iu. Taem iu preach witim olketa narawan lo grup, iufala savve “encouragem each other.” (Readim Romans 1:12.) And tu, for preach tugeta savve mekem evriwan lo grup for feel sef and no fraet. If waka blo iu for selen mekem iu no preach witim grup staka taem, hao sapos iu askem boss for adjustim schedule blo iu for waka? Maet hem bae letem iu for duim datwan. (Neh. 2:​4-6) If health or age blo iu mekem hem no isi for iu meet witim grup, hem gud for storyim datwan witim grup overseer blo iu. Maet hem savve mekem arrangement for iu joinim grup lo zoom witim samfala for iufala duim leta raeting or phone witnessing. Hao, iu young and garem gud health bat still faendem hem no isi for go aot evritaem lo ministry? If olsem, hao sapos iu plan for waka witim samwan lo grup blo iu each week? Maet iu need for ting abaotem wat nao important lo iu or adjustim hao iu iusim taem blo iu. (Rom. 12:11; Col. 4:5) Taem iu traem best for evritaem joinim grup, evriwan bae kasem gud samting. Prea lo Jehovah for helpem iu. Hem bae mekem iu “laek duim samting, and givim paoa lo [iu] for duim datwan.”—Phil. 2:13.

9. Hao nao iumi savve helpem evriwan lo field service grup blo iumi for lovem each other olsem famili? (Romans 12:13)

⁹ Kaen and welkamim narawan. Iumi helpem evriwan insaed grup blo iumi for lovem each other olsem famili taem iumi “kaen and welkamim” narawan. (Readim Romans 12:13.) For example, maet iumi savve iusim haos blo iumi olsem ples for grup meet for field service. Lo samfala kongregeson, olketa grup savve tek turn for invaetem and kaikai tugeta witim visiting speaker. So lo week wea olketa markem for datfala grup, samfala insaed grup savve hipap for kaikai tugeta and encouragem each other nomata if speaker joinim olketa or nomoa. Sarah, wea hem wanfala spesol pioneer hem sei: “Mi savve wari taem mi invaetem olketa narawan for kam lo haos, so mi redyim samting wea simpol nomoa. Mi trae for focus lo wei for savve gud lo olketa narawan winim for wari sapos kaikai bae fitim evriwan.” Taem iumi kaen and showim love olsem famili insaed field service grup blo iumi, iumi evriwan savve fren klos witim Jehovah and witim each other.—Neh. 8:10; Acts 20:35.

10. Wat nao iumi savve duim if iumi laek for kamap gud lo samfala part lo ministry? (Proverbs 1:5; 27:17) (Lukim tu piksa.)

¹⁰ Duim samting for kamap gud lo ministry. Taem iumi savve gud lo hao for preach and teach, bae iumi enjoyim go moa wei for duim ministry witim grup blo iumi. Which part lo ministry nao iu laek for kamap gud lo hem? Maet hem gud for askem wanfala pioneer or wanfala pablisa wea garem experience insaed grup blo iu, for helpem iu. (Readim Proverbs 1:5; 27:17.) Storyim wat iu laek kamap gud lo hem lo grup overseer blo iu. Maet hem savve helpem iu for kasem datwan. Maet iu savve askem tu olketa narawan lo grup for help. Hem nao samting wea sista Heather hem duim. Nomata hem savve shame, hem sei: “Mi askem wanfala pioneer for helpem mi duim olketa return visit. Hem barava kaen, and hem evritaem mekem arrangement for waka witim mi. Hem even helpem mi for startim Bible study witim wanfala return visit blo mi. Mi barava hapi from mi askem help, bikos distaem mi enjoyim moa ministry blo mi.” Tru nao, iumi savve helpem evriwan insaed field service grup blo iumi lo staka difren wei.

GUD SAMTING IU SAVVE KASEM FROM FIELD SERVICE GRUP BLO IU

11-12. Hao nao field service grup arrangement savve helpem iumi lo spiritual wei? Storyim experience.

¹¹ Kasem help lo spiritual wei. Each wan lo iumi savve kasem gud samting lo spiritual wei from field service grup arrangement. For example, olketa wea Jehovah tingim tumas olsem olketa widow, pikinini wea no garem dadi or mami, and olketa olo, savve kasem encouraging visit from olketa grup overseer lo taem wea olketa needim. (1 Thess. 2:8; Jas. 1:27) And tu, iumi kasem training wea iumi barava needim, lo olketa difren wei for duim disfala preaching and teaching waka. Olketa brata wea showim gud example savve kasem help for qualify for duim moa responsibility insaed kongregeson.—1 Tim. 3:10.

¹² Tingim hao Wendy wea iumi storyim finis, kasem gud samting from field service grup arrangement. Hem sei, “Bikos dadi blo mi hem againstim truth, staka taem hem no isi for mami blo mi joinim field service grup lo olketa weekend. Bat, dadi letem mi for go, so mi savve go. Wanfala olo pioneer sista nao kamap fren blo mi and helpem mi for garem skills wea helpem mi lo ministry and lo kongregeson. Mi savve tingim olketa taem wea grup overseer blo mi givim olketa loving advaes from Bible, and datwan helpem mi kam kasem distaem.”

13. Hao nao field service grup helpem iumi for kasem love and sapot iumi needim? (Lukim tu piksa.)

¹³ Kasem love and sapot iumi needim. Taem iumi “waka tugeta” lo ministry witim olketa pablisa lo grup blo iumi, bae iumi fren gud tugeta. (Phil. 1:27) Taem field service grup hem smol, datwan tu savve mekem hem moa isi for olketa wea savve shame or no getius for stap witim staka pipol for garem olketa klos fren. (2 Cor. 6:13) Iumi savve depend lo olketa fren hia for sapotim iumi lo hard taem, olsem taem iumi sik, wari tumas, or iumi sorre bikos samwan wea iumi lovem hem dae. (1 Thess. 5:14) For sure, iumi bae barava needim go moa olketa gud fren lo future. (Matt. 24:21) Olketa problem blo iumi maet no finis, bat hem bae moa isi for iumi deal witim datwan, taem iumi savve olketa brata and sista wea lovem iumi stanbae for helpem iumi.—Prov. 17:17.

14. Hao nao field service grup blo iumi helpem iumi lo taem blo disaster or emergency?

¹⁴ Kasem help lo taem blo disaster or emergency. Iumi kasem help wea iumi needim from field service grup blo iumi lo taem blo wanfala disease outbreak, natural disaster, and medical emergency. For example, lo each kongregeson, Kongregeson Service Komiti witim olketa grup overseer, mekem wanfala plan for helpem olketa wea garem spesol need. Olketa grup overseer savve contactim each famili lo grup blo olketa for lukim wat nao olketa needim, olsem saed lo medical, kaikai, wata, ples for stap, and kaleko mekem olketa savve provaedem relief supply. Tru nao, field service grup blo iumi barava lovem and kea for iumi!

15. Wat nao mekem iumi evriwan lo organization blo Jehovah for wan mind?

¹⁵ Olsem iumi storyim finis, organization blo Jehovah hem barava big tumas. Part blo organization wea stap lo heven garem staka billion faithful angel. And nara part wea stap lo earth hem garem winim naen million pipol wea worshipim Jehovah and namba hia gohed grow each day. (Zech. 8:23; Rev. 5:11) Evriwan wea worshipim Jehovah wan mind for talemaot disfala gud nius abaotem Kingdom blo God lo staka pipol! (Rev. 14:​6, 7) Iumi evriwan laek for barava kasem gud samting from field service grup arrangement, wanfala arrangement wea helpem iumi for praisem Jehovah witim full heart blo iumi.—Ps. 111:1.