Hao for Keepim Frenship blo Iumi Witim Olketa Brata and Sista

1. Wea nao iumi savve faendem olketa tru fren?

LAEF lo olketa last day savve mekem man stress tumas. Bat laef bae hard go moa if iumi no garem olketa tru fren. Jehovah savve lo diswan, so hem givim olketa tru fren midolwan pipol blo hem, wea datwan hem wanfala blessing. (Ps. 119:63) Iumi part lo wanfala spiritual famili wea lovem each other.

2. Wat kaen frenship nao iumi laek for garem witim olketa brata and sista?

² Iumi laek for garem kaen frenship wea iumi klos and fren gud witim olketa brata and sista blo iumi. Iumi no just laek for savve lelebet nomoa lo olketa. Iumi part lo wanfala spiritual famili wea lovem Jehovah and Jesus, and love hia mekem iumi for wan mind. (John 13:35) Bat frenship blo iumi witim olketa brata and sista hem no savve kamap seleva nomoa. Iumi need for duim samting for fren klos witim olketa. And from iumi evriwan no perfect, samfala taem iumi savve feisim olketa challenge wea savve affectim frenship blo iumi witim olketa.

3. Why nao hem no isi for fren klos witim olketa brata and sista?

³ Maet iumi feel klos lo samfala winim olketa narawan. Why nao olsem? Maet hem bikos iumi interest lo olketa sem samting, or maet hao iumi ting and duim samting hem semsem. Bat maet iumi faendem dat for keepim frenship blo iumi witim olketa nara brata and sista hem no isi. Samfala taem, iumi maet no agree witim each other, and diswan savve affectim wei wea iumi klos lo each other. Maet from hao iumi ting and duim samting hem difren, datwan mekem iumi no interest for spendem taem witim olketa tu. And if wanfala brata or sista blo iumi hem garem serious sik or problem saed lo feeling, samfala taem datwan savve affectim frenship blo iumi witim hem. Lo disfala article, bae iumi storyim hao example blo Jesus savve helpem iumi for keepim frenship blo iumi witim olketa brata and sista taem iumi feisim olketa challenge. Bat firstaem, bae iumi lukim hao olketa spiritual quality savve helpem iumi for keepim frenship blo iumi witim olketa brata and sista.

OLKETA SPIRITUAL QUALITY HELPEM IUMI FOR KEEPIM FRENSHIP BLO IUMI

4. Hao nao iumi savve strongim frenship blo iumi?

⁴ For strongim frenship blo iumi witim olketa brata and sista, iumi shud luk lo gud saed blo olketa. Wei for spendem taem witim olketa brata and sista savve mekem iumi for tingim olketa gudfala wei blo olketa. Aposol Paul barava laek for stap witim olketa brata and sista blo hem. Hem raet olsem for olketa lo Thessalonica: “Mifala barava traem best for kam lukim iufala.” (1 Thess. 2:17) Staka faendem dat wei for story witim olketa narawan feis tu feis savve strongim go moa frenship blo olketa. Iumi garem staka chance for duim datwan taem iumi share lo ministry, attendim olketa meeting, assembly, and convention tugeta. Bat just for associate witim olketa narawan bae no stopem olketa problem wea savve affectim frenship blo iumi witim olketa.

5. Wat nao savve helpem iumi for keepim frenship witim samwan nomata wat nao happen? Storyim example. (Colossians 3:12)

⁵ Olketa spiritual quality savve helpem iumi for keepim frenship blo iumi witim samwan nomata wat hem happen. (Readim Colossians 3:12.) Taem iumi mekem grow wei for hambol, patient, kaen, and for tingim narawan, iumi savve winim olketa challenge wea savve spoelem frenship blo iumi witim narawan. For example, lo sem wei wea engine blo car needim oil for hem ran gud, iumi needim olketa spiritual quality for helpem iumi stap gud witim olketa narawan. Bae iumi storyim thrifala samting wea savve affectim frenship blo iumi witim olketa brata and sista. Taem iumi storyim olketa samting hia, iumi bae discussim hao wei for followim example blo Jesus olsem for hambol, patient, kaen, and for tingim narawan bae helpem iumi for gohed kamap tru fren for olketa narawan.

TAEM IU NO AGREE

6. Hao nao wei for no agree savve affectim frenship blo iumi witim narawan?

⁶ Why nao datwan hem wanfala challenge? Taem iumi no agree witim each other, each wan maet ting idea blo hem nao stret. Imaginim tufala brata no agree witim each other abaotem wat nao best wei for organizem field service grup blo olketa. Each brata ting idea blo hem nao stret. Lo kaen situation olsem, hem isi tumas for wei wea tufala no agree lo smol samting olsem for kamap worse and affectim frenship blo tufala. Tufala maet letem wei for praod affectim tufala. If tufala no story tugeta and stretem datwan, maet tufala bae start for feel nogud lo each other. Gogo, datfala smol samting nomoa maet mekem tufala avoidim each other, and then, end ap tufala no fren nao.

7. Wat nao Jesus duim for teachim olketa disaepol dat olketa need for hambol mekem olketa savve deal witim wei for no agree?

⁷ Lane from wei wea Jesus hambol. Hem teachim olketa disaepol dat olketa need for hambol mekem olketa savve deal witim eni wei for no agree wea kamap. For longtaem lelebet olketa disaepol bin argue abaotem hu lo olketa nao hem important. For aotem datfala tingting wea olketa growap witim, Jesus explainim lo olketa dat olketa need for ting lo narawan olsem hem winim olketa. (Matt. 20:​25-28) Yes, hem teachim olketa hao for hambol. Even lo datfala naet bifor Jesus dae, hem “showim example” for olketa lo wei wea hem hambol and wasim feet blo olketa, wea datwan hem waka blo wanfala slave. (John 13:​3-5, 12-16) Taem hem duim datwan, hem showim olketa hao for keepim frenship blo olketa witim each other. If olketa ting lo narawan hem winim olketa, hem bae moa isi for olketa acceptim tingting blo narawan. Olketa bae faendem hem moa isi for gohed fren klos nomata taem tingting blo olketa abaotem wanfala samting hem no semsem.

8. Hao nao wei for hambol savve help for keepim frenship witim olketa brata and sista taem wei for no agree kamap? (Colossians 3:13) (Lukim tu piksa.)

⁸ Hao nao iu savve keepim frenship blo iu witim olketa narawan? Wei for hambol bae helpem iu for forgetim nomoa eni smol samting wea iu no agree lo hem and redi for forgivim olketa narawan. (Readim Colossians 3:13.) Wei for hambol savve helpem iu chus for no duim eni nogud samting taem iu no agree witim narawan, wea datwan mekem iu gohed fren gud witim olketa. (Ps. 4:4) Even if iumi talem samfala toktok wea no kaen lo each other, remember dat iumi evriwan savve talem samting wea iumi regretim bihaen. (Eccl. 7:​21, 22) Hem gud for tingim, ‘Wat nao important, frenship blo mitufala or for mi forcem dat tingting blo mi nao stret?’ Iu savve chus for just acceptim tingting blo narawan. No letem wat iutufala no agree lo hem for affectim iu or storyim datwan moa lo narataem.

9. Hao nao wei for hambol savve helpem iu taem wei for no agree hem gohed stap between iutufala? (Proverbs 17:9)

⁹ Wei for hambol savve helpem iu taem wei for no agree hem gohed stap between iutufala. No argue for pruvim dat tingting blo iu nao stret. (Readim Proverbs 17:9; 1 Cor. 6:7) Goal blo iu hem for keepim frenship blo iutufala. Staka brata and sista keepim frenship blo olketa taem olketa go and stretem problem witim fren blo olketa. (Ps. 34:14) Iu savve sei olsem: ‘Iumi tufala bin fren for longtaem. Hao if iumi tufala story abaotem wat hem happen?’ Redi for talem dat iu tu kosim wei wea iutufala no agree, talem dat iu savve hem feel nogud and then sei sorre lo hem. And if brata or sista blo iu tu sei sorre, hambol and forgivim hem. (Luke 17:​3, 4) Remember, goal blo iu hem no for pruvim hu nao stret and hu nao rong, bat for stretem wei wea iutufala no agree and for keepim datfala frenship.—Prov. 18:24.

OLKETA WEI BLO IUMI HEM DIFREN

10. Wat nao savve mekem hem no isi for keepim wei for fren klos witim olketa brata and sista?

¹⁰ Why nao datwan hem wanfala challenge? Iumi maet faendem hem no isi for keepim wei for fren klos witim olketa brata and sista wea wei blo olketa hem difren from iumi. Wei blo samfala maet mekem iumi for feel nogud. Olketa narawan maet wei blo olketa strange lelebet, maet bikos pipol treatim nogud lo olketa lo bifor, or olketa kam from culture wea pipol no free for storyim feeling blo olketa or pipol wea savve story tumas. Or maet iumi difren, maet iumi man for story, bat olketa nomoa.

11. Wat nao Jesus duim for keepim frenship witim olketa wea wei blo olketa difren from hem?

¹¹ Lane from wei wea Jesus patient. Jesus keepim frenship blo hem witim olketa wea wei blo olketa difren from hem. For example, aposol James and John laekem pipol for tinghae lo tufala taem tufala ask for kasem hae position insaed Kingdom. (Mark 10:​35-37) Bat Jesus hem difren, from hem hambol, hem lusim hae position and privilege blo hem lo heven for kam lo earth. (Phil. 2:​5-8) Tingim, dat wei blo olketa hem barava difren. Nomata olsem, Jesus hem patient witim James and John and olketa narawan.

12. Wat nao helpem Jesus for patient witim olketa fren blo hem?

¹² Jesus no expectim olketa fren blo hem for evritaem duim stret samting. Jesus savve wat James and John askem showim wei for laek winim narawan, hem tingting wea olketa nara disaepol tu garem. (Mark 9:34) Jesus tu growap lo sem religious environment olsem olketa. Lo dat taem, olketa religious leader mekhae lo wei for garem bignem and hae position, so Jesus minim tingting blo olketa disaepol. Nomata olsem, Jesus patient witim olketa. Hem givim olketa taem for aotem datfala praod tingting and wei for winim narawan, wea olketa garem for longtaem kam finis.—Mark 10:​42-45.

13. Hao nao wei for patient bae helpem iumi for keepim frenship blo iumi witim olketa narawan? (Ephesians 4:2)

¹³ Hao nao iu savve keepim frenship blo iu witim olketa narawan? Gohed patient taem iu traem best for acceptim samfala wei wea iu no laekem, wea olketa narawan garem. (Prov. 14:29) Iumi evriwan garem own wei blo iumi, staka lo olketa wei hia hem no nogud, bat hem just showim wat kaen man nao iumi. So iumi appreciatim taem olketa narawan acceptim olketa wei blo iumi. (Readim Ephesians 4:2.) Hem important tu for balance lo wei for no kontrolem wei blo narawan. For example, tingim hem no isi for samwan wea kwaet and savve shame for associate and story witim olketa narawan. Bat olketa narawan wea laek associate and story tumas, iumi need tu for patient witim olketa. Iumi no expect for kamap best fren witim evriwan, bat iumi need for tingim dat nomata olketa Christian wea wei blo olketa barava difren savve waka gud tugeta.

14. Wei for patient bae helpem iumi for focus lo wat?

¹⁴ Wei for patient bae helpem iumi for focus lo olketa gudfala wei blo olketa brata and sista blo iumi. Taem iumi duim olsem, bae iumi no letem wei wea iumi garem olketa difren wei for stopem iumi for fren witim olketa brata and sista. For example, James and John laek garem bignem, bat wei wea tufala ask showim dat Kingdom hem real lo tufala. Jesus luksavve and tinghae lo faith wea tufala garem. Taem iumi luk for olketa gudfala wei blo olketa frens blo iumi, iumi followim example blo Jesus, and Dadi blo hem, Jehovah.

15. Wea nao iumi savve kasem help for keepim frenship blo iumi witim olketa wea wei blo olketa difren from iumi?

¹⁵ Most important samting, iumi savve prea lo Jehovah for helpem iumi keepim frenship blo iumi witim olketa wea wei blo olketa difren from iumi. Trae for ting raonem olketa situation wea savve kamap wea maet kosim iu for feel nogud lo fren blo iu, and then prea abaotem firstaem mekem iu savve kontrolem iuseleva. Remember, Jehovah, Creator blo iumi, hem understandim hao each wan lo iumi hem difren. So taem iu prea, trustim dat Jehovah hem savve gud lo iu so bae hem givim help wea iu needim. And taem hem no isi for iu gohed patient, askem Jehovah for holy spirit for helpem iu kontrolem hao iu react.—Luke 11:13; Gal. 5:​22, 23.

TAEM OLKETA BRATA AND SISTA BLO IUMI SAFA

16. Wat nao olketa challenge wea iumi maet feisim taem olketa brata and sista blo iumi safa?

¹⁶ Why nao datwan hem wanfala challenge? Taem olketa brata and sista blo iumi safa from olketa sik or olketa depress, olketa savve talem or duim samfala samting wea no isi for iumi deal witim. For example, maet olketa no laek story, kwiktaem feel nogud, or even talem or duim samting wea iumi no expectim. Maet bae olketa talem and duim samting wea mekem iumi feel nogud. (Job 6:​2, 3) Bikos iumi no savve lo olketa challenge wea olketa brata and sista blo iumi deal witim, datwan maet mekem iumi for expectim olketa for duim wat olketa no fit for duim.

17. Wat nao iu savve lanem from hao Jesus treatim Bartimaeus wea blind?

¹⁷ Lane from wei wea Jesus hem kaen and tingim narawan. Jesus hem kaen and tingim pipol wea safa, nomata olketa wea hem no meetim enitaem bifor. For example, tingim hao hem treatim datfala blind man Bartimaeus. Taem Bartimaeus herem Jesus kam pas, hem start for singaot mekem Jesus lukim hem. Samfala lo datfala crowd talem Bartimaeus for stap kwaet. Bat from hem barava laekem Jesus for healim hem, hem gohed for shout big moa. Maet samfala lo datfala crowd feel nogud lo wat hem duim. Bat, Jesus “sorre tumas” lo Bartimaeus, wea datwan showim Jesus barava tingim hem. (Matt. 20:34; Mark 10:​46-52) Hem story kaen lo Bartimaeus, and tinghae lo faith blo hem. Then Jesus healim hem and hem savve lukluk nao.

18. Hao nao iu shud treatim olketa fren blo iu wea safa? (1 Thessalonians 5:14)

¹⁸ Hao nao iu savve keepim frenship blo iu witim olketa narawan? Mas kaen and tingim narawan. Olketa naes quality hia bae helpem iu for “comfortim” olketa brata and sista blo iu wea safa from olketa sik or olketa depress. (Readim 1 Thessalonians 5:14.) Evritaem tingim dat wanfala tru fren hem redi for help, especially lo “taem blo trabol.” (Prov. 17:17) Kaen fren olsem no just feel sorre witim olketa wea safa, bat hem duim tu wat hem fit for duim for comfortim olketa, talem toktok for encouragem olketa, and provaedem wat olketa needim.

19. Hao nao iumi savve showim iumi kaen and tingim narawan? (Lukim tu piksa.)

¹⁹ Wat nao samfala samting iu savve duim for showim iu kaen and tingim narawan? Hem tru, iu no savve finisim pain wea nara brata and sista experiencem. Bat iu savve traem best blo iu for minim situation blo hem. (Matt. 7:12; 1 Pet. 3:8) Lisin gud taem hem storyim situation blo hem. Sapos fitim, faendem olketa toktok wea bae comfortim hem. (Prov. 12:25) Careful for tingse iu savve finis lo evriting abaotem situation blo hem. (Prov. 18:13) Trae for patient witim hem and no expectim dat hem bae evritaem talem or duim stret samting.—Eph. 4:32.

20. Iu laek for kamap wat kaen fren?

²⁰ Iumi evriwan tinghae lo wei wea iumi fren witim olketa Christian brata and sista blo iumi. Bat from iumi no perfect, hem gud for evritaem tingim dat samfala taem iumi savve talem or duim samting wea mekem narawan feel nogud. Staka lo iumi growap lo laef wea iumi experiencem olketa nogud samting. Dastawe, iumi barava tinghae lo olketa brata and sista wea keepim frenship blo olketa bikos olketa hambol, patient, kaen, and tingim narawan. Iumi laek for traem best for kamap kaen fren olsem.