Lukluk Gud lo Hao Iu Lisin

1-2. (a) Hao nao Jehovah provaedem spiritual need blo pipol blo hem distaem? (Psalm 23:​1, 2, 5) (b) Wat nao bae iumi storyim lo disfala article abaotem olketa Christian meeting blo iumi?

JEHOVAH hem provaedem staka spiritual kaikai for iumi distaem. So iumi savve agree witim disfala toktok wea David talem lo wanfala song wea sei: “Jehovah nao hem Shepherd blo mi. Bae mi no short lo eni samting.”—Readim Psalm 23:​1, 2, 5.

² Wanfala wei wea Jehovah provaedem spiritual kaikai for iumi distaem hem thru lo olketa kongregeson meeting. Lo olketa meeting hia, staka taem iumi storyim olketa information wea iumi savve finis lo hem. Nomata if iumi stap longtaem lo truth, and “biliv strong lo olketa truth” wea iumi lanem, iumi needim olketa reminder hia. (2 Pet. 1:12) Bat hao, iu faendem hem no isi for lisin gud lo olketa spiritual program taem olketa storyim samting wea iumi herem staka taem finis? If olsem, disfala article savve helpem iu. Bae iumi storyim why iumi need for lisin gud during lo olketa meeting. Bae iumi storyim tu hao olketa wea teach insaed kongregeson savve helpem audience for lisin. And bae iumi storyim samfala idea wea savve helpem iumi kamap gud lo wei for lisin. Bat firstaem, bae iumi discussim hu nao story lo iumi during lo olketa meeting.

TINGIM DAT JEHOVAH NAO STORY LO IUMI

3. Hao nao Jehovah story lo iumi, and hao nao olketa servant blo hem iusim gud Word blo hem?

³ Jehovah story lo iumi thru lo Word blo hem, Bible. (2 Tim. 3:​16, 17) Jesus savve lo datwan. Hem barava savve gud hao for iusim Word blo God, dastawe olketa wea lisin lo hem olketa sapraes and sei: “Hao nao disfala man savve lo olketa Scripture taem hem nating go lo olketa skul for lanem datwan?” (John 7:15) Pipol wea hambol olketa hapi taem olketa herem hao Jesus explainim Word blo God. Olketa Christian lo first century, olsem aposol Paul and Apollos tu explainim olketa Scriptures for helpem pipol minim wat Jehovah laekem olketa for duim. (Acts 17:​2, 3; 18:​24, 28) Iumi Olketa Jehovah’s Witness savve dat olketa article, broadcast, tok aotlaen, and olketa video blo iumi hem base lo Bible. Staka wea kam lo olketa meeting sapraes lo hao iumi iusim Bible lo olketa meeting blo iumi. Olketa wea garem part lo olketa meeting hia iusim Word blo God taem olketa teach. Olketa no just readim Bible bat olketa helpem audience for minim and applyim wat Bible talem.—Luke 24:32.

4. Lo Bible, wat nao tufala toktok hia “herem” and “lisin” savve minim?

⁴ Lo Bible, staka taem tufala toktok hia “herem” and “lisin” savve minim wei for obeyim samwan. So, taem Jehovah iusim Word blo hem for story lo iumi lo olketa meeting and iumi understandim wat hem laekem iumi for duim, bae hem moa isi for iumi obeyim hem. Iumi sure dat Jehovah hem hapi taem iumi lisin lo hem and duim samting followim wat iumi herem.—Prov. 27:11.

WHY NAO IUMI SHUD LISIN GUD LO OLKETA MEETING?

5. Wat nao love blo iumi for Jehovah bae muvim iumi for duim? (John 4:​23, 24; 1 John 5:3)

⁵ Iumi lisin lo olketa meeting bikos iumi lovem Jehovah. (Matt. 22:37) Taem iumi lanem moa samting abaotem Jehovah, love blo iumi for hem bae grow tu. Datfala love bae motivatim iumi for laek lisin lo hem, for obeyim hem, and for worshipim hem followim hao hem laekem.—Readim John 4:​23, 24; 1 John 5:3.

6. Lo olketa meeting, wat nao iumi lanem abaotem hao for helpem olketa narawan?

⁶ Iumi lisin lo olketa meeting bikos iumi lovem pipol. (Matt. 22:39) Lo olketa meeting blo iumi, Jehovah teachim iumi hao for helpem olketa brata and sista and olketa wea no savve lo hem yet. For example, datfala brochure Lovem Pipol—Mek Disaepol hem helpem iumi for garem olketa gudfala quality wea iumi needim lo ministry. Hao, iu faendem hem no isi for startim story witim pipol? If olsem, lisin gud lo hao olketa brata and sista duim datwan, taem olketa duim student part blo olketa lo midol week meeting.

7. Why nao hem important for iumi gohed lisin lo Jehovah?

⁷ Iumi lisin lo olketa meeting bikos iumi laek for hapi and kasem laef olowe. For iumi hapi and kasem laef olowe, iumi need for obeyim Word blo God, olsem olketa tru worshiper blo hem lo bifor mas duim. (Deut. 32:​44-47) Taem iumi lisin lo olketa meeting blo iumi, bae iumi kasem olketa encouragement wea iumi needim, mekem iumi no givap and gohed weitim niu world wea bae kam. (Rom. 8:25) For gohed lisin lo Jehovah distaem hem important bikos iumi stap lo olketa last day and iumi mas gohed lukaot lo spiritual wei.—Matt. 24:​42-44; Rev. 1:3.

HAO FOR HELPEM OLKETA NARAWAN FOR LISIN LO OLKETA MEETING

8. Why nao olketa brata wea teach lo olketa meeting shud gohed impruv lo hao for givim tok?

⁸ Olketa brata wea teach lo olketa meeting, especially olketa wea givim pablik tok, shud gohed for impruv lo hao for givim tok. Tok wea kam from Bible wea wanfala brata preparem gud, savve barava helpem pipol wea no witness yet for interest lo truth, and helpem olketa brata and sista for gohed faithful. So, olketa wea garem tok lo meeting shud evritaem tingim dat olketa narawan savve barava kasem gud samting from tok blo olketa. If iu garem datfala privilege, tingim hao iu savve applyim olketa point wea iumi bae storyim lo tok blo iu. Nomata olketa point hia hem for olketa wea savve givim pablik tok, hem savve helpem tu iumi wea maet garem olketa nara tok or part lo meeting.—2 Tim. 4:2; Titus 1:9.

9. Wat nao iu savve duim for audience isi for minim tok blo iu?

⁹ Preparem information followim order wea klia. Taem iu givim tok, iu laekem tok blo iu for klia mekem audience isi for minim. If iu storyim tumas information and hem no klia, audience bae no interest for lisin. Wat nao iu savve duim mekem tok blo iu hem followim order wea klia? (1) Lo start blo tok, talem klia wat nao olketa main point wea iu bae storyim insaed tok. (2) Storyim each main point finis then muv lo next wan, stop lelebet afta iu storyim wanfala main point, and then talem klia next main point bifor iu storyim datwan. (3) Reviewim olketa main point lo conclusion blo tok.

10. Why nao hem important for interest lo information insaed tok blo iu?

¹⁰ Interest lo information insaed tok. If iu redyim gud olketa point wea iu interest lo hem, bae iu storyim datwan witim feeling. (Prov. 2:​4, 5; Acts 4:20) For faendem olketa point wea iu interest for storyim, meditate lo olketa scripture and information lo tok blo iu. Wanfala 70 years old brata from United States tingim bak wanfala tok wea hem herem taem hem teenager, hem sei: “Mi still rememberim hao datfala speaker encouragem mifala for barava ting raonem gud Word blo God taem mifala readim. Hem explainim klia hao for duim datwan, and mi lukim hao datwan hem barava important lo hem. Datfala tok hem barava helpem mi, evritaem mi duim Bible reading mi savve lanem moa samting and mi fren klos witim Jehovah.”

11. Why nao hem gud for storyim insaed tok olketa specific suggestion wea audience savve applyim? (1 Timothy 4:​13-16)

¹¹ Ting raonem wat audience blo iu needim, and storyim hao for applyim wat iu teachim. Winim wei for just storyim information, iusim olketa Scripture for givim specific encouragement and suggestion. For example, aposol Paul givim samfala specific suggestion lo Timothy, for helpem hem gohed strong lo spiritual wei taem hem duim assignment blo hem lo Ephesus. (Readim 1 Timothy 4:​13-16.) Ting raonem wat audience blo iu needim, and helpem olketa for savve hao for applyim datfala information lo laef blo olketa.

12. Why nao hem important for story lo natural wei taem iu givim tok?

¹² Story big taem iu practice mekem iu savve story lo natural wei. Taem iu story lo natural wei instead for raetem evri toktok wea iu bae talem and readim nomoa, hem bae isi for audience lisin and minim tok blo iu. Datfala brochure Gohed Waka Hard for Read and Teach Gud sei: “Story long natural wei and from heart bilong iu. Showimaot iu laek helpem olketa wea lisin long iu.” Taem iu story from heart, audience blo iu bae lisin gud, interest lo wat iu teachim, and laek for applyim wat olketa herem.

13. Why nao olketa brata wea givim tok lo kongregeson shud askem olketa experience speaker for advaes? (Lukim tu piksa.)

¹³ Askem wanfala experience speaker for advaes. Hao nao iu savve duim datwan? Bifor iu givim tok, maet iu savve showim olketa note blo iu lo wanfala experience speaker, and iusim olketa idea wea hem talem lo tok blo iu. And tu, askem hem for lisin lo iu taem iu givim tok mekem hem savve talem iu wat nao maet iu need for impruv lo hem for teach gud. (Prov. 1:5) Staka taem iumiseleva no lukim wat iumi need for impruv lo hem, and maet iumi no luksavve if olketa point wea iumi storyim hem klia and audience isi for minim. Iumi laek for kamap olketa gud speaker and teacher, mekem iumi savve helpem olketa wea lisin for minim and applyim olketa naes point insaed Word blo God.a

HAO FOR LISIN GUD DURING LO OLKETA MEETING

14. Why nao iumi shud garem sem tingting olsem man wea raetem Psalm 119? (Psalm 119:​24, 111, 167)

¹⁴ Iumi bae lisin gud if iumi barava tinghae lo olketa reminder blo Jehovah. Iumi needim olketa reminder blo God mekem iumi savve deal witim olketa challenge wea iumi feisim distaem wea “evri samting hem hard tumas.” (2 Tim. 3:1) If samfala taem iumi feel olsem iumi herem sem information staka taem finis, hem gud for iumi meditate abaotem hao man wea raetem Psalm 119 hem ting lo olketa reminder blo God.—Readim Psalm 119:​24, 111, 167.

15. Hao nao iumi savve gohed tinghae lo spiritual kaikai wea iumi kasem lo olketa meeting?

¹⁵ Iumi need for keepim positive tingting abaotem spiritual kaikai wea iumi kasem, olsem olketa Israelite wea shud keepim positive tingting abaotem datfala manna, wea Jehovah provaedem for olketa lo wilderness. (Ex. 16:​15, 31) Firstaem, olketa Israelite tinghae lo datfala manna. Hem kam from Jehovah, hem teist naes, and hem helpem olketa for stap laef. Bat gogo, samfala start for taed nao for kaikaim manna evriday. (Num. 21:5) Wat nao leson? Iumi mas no ting nating lo olketa spiritual kaikai wea iumi kasem, olsem hem no important or iumi herem datwan olowe nomoa. Bat, iumi need for luksavve dat hem kam from Jehovah. Iumi mas tingim dat faithful and wise slave barava ting raonem and redyim gud spiritual kaikai wea iumi kasem. And tu, iumi shud tingim dat wat iumi lanem savve helpem iumi mekem olketa wise disison and savve sevem laef blo iumi.—Prov. 3:​13, 16-18; John 17:3.

16. Wat nao helpem samfala servant blo Jehovah wea servem hem for longtaem finis for gohed lisin gud lo olketa meeting? (Lukim tu box “Samfala Idea for Helpem Iu Lisin Gud.”)

¹⁶ Iumi bae lisin gud if iumi followim samfala suggestion. Lukim samting wea helpem samfala servant blo Jehovah wea servem hem longtaem finis for lisin gud during lo olketa meeting. Sista Ashley, wea worshipim Jehovah for winim 30 years finis, sei: “Main samting for lisin gud, hem nao for prepare firstaem. If mi no prepare firstaem, mi faendem hem hard for ansa, and mi start for tingim nara samting.” József, wea worshipim Jehovah for 52 years, sei: “Mi interest for lisin lo olketa topic wea mi savve lo olketa finis, bikos taem mi herem olketa narawan storyim and koment abaotem, datwan mekem mi for evritaem lanem niu samting.” And hem sei moa: “If wanfala brata hem no wanfala gud speaker, mi focus lo message wea hem storyim wea kam from Bible, no lo hao brata hia story.”

17. Wat nao iu savve duim for lisin gud lo olketa meeting? (Lukim tu piksa.)

¹⁷ Maet wan or samfala lo olketa suggestion hia savve helpem iu for lisin gud. (1) If iu kaikai bifor iu go meeting, mek sure for no kaikai big mekem iu no feel laek sleep. (2) Arrive early and faendem ples for sidaon bifor program hem start. (3) Setim device lo silent mode and no letem datwan for disturbim iu during lo meeting. (4) Trae for tingim wat nao speaker bae storyim. (5) Trae for focus lo speaker. (6) Raetem olketa short note, or drawim piksa abaotem olketa main point. (7) Trae for ting abaotem olketa main scripture and hao olketa scripture hia connect. (8) Tingim diswan, ‘Hao nao mi savve iusim disfala point for helpem samwan lo kongregeson or lo territory?’ (9) Lo olketa assembly and convention, ting abaotem theme blo datfala day, title blo olketa tok, and olketa main scripture blo each tok. (10) Redyim heart blo iu taem iu sidaon kwaet and lisin gud lo music, or watchim music video wea olketa pleim lo start blo program.

GOHED FOR LISIN LO JEHOVAH

18. Why nao iumi shud gohed for lisin lo olketa meeting?

¹⁸ Iumi shud gohed for lisin lo olketa meeting bikos taem iumi duim olsem, iumi letem Jehovah for leadim iumi “followim olketa road blo raeteous fasin.” (Ps. 23:3; 31:3) Iumi needim kaonsel wea iumi kasem, mekem iumi no go difren from road wea iumi followim olsem wanfala boat wea wind pushim and hem go difren. Dastawe iu mas “lukluk gud lo hao iu herem samting,” and followim wat iu lanem lo olketa kongregeson meeting. (Luke 8:18) Olketa wea lisin lo Jehovah bae hapi distaem and kasem laek olowe lo future.—Ps. 119:​2, 14.