Respectim Disison blo Olketa Narawan

1-2. Why nao samtaems olketa personal disison blo iumi hem difren from olketa nara Christian?

HAO, enitaem olketa narawan judgem iu rong bikos lo wanfala disison wea iu mekem? Hao, enitaem iu judgem nara Christian bikos lo disison wea hem mekem? For sure, ansa blo staka lo iumi for tufala kwestin hia hem yes.

² Iumi shud no sapraes dat samtaems disison blo iumi hem difren from olketa nara faithful Christian. Why? Bikos iumi evriwan no semsem. Each wan lo iumi garem own tingting blo hem. Culture blo iumi, famili baekgraon, and personal experience blo iumi savve affectim hao iumi ting lo samting. Bat iumi shud no letem wei wea iumi garem difren tingting for spoelem peace and wan mind wea iumi garem insaed lo kongregeson.—Eph. 4:3.

3. Wat nao maet mekem iumi for judgem nara Christian for disison wea hem mekem?

³ Taem nara Christian mekem wanfala disison wea iumi no agree witim, maet iumi feel dat iumi need for convincim hem for changem mind blo hem or maet iumi talem olketa narawan abaotem. Maet iumi duim datwan bikos iumi garem gud motive. Iumi lovem olketa brata and sista blo iumi, and iumi laekem olketa for hapi. (Prov. 17:17) So iumi no laekem olketa for mekem wanfala disison wea olketa bae regretim bihaen or wea bae spoelem olketa lo spiritual wei.

4-5. Wat nao iumi shud duim if wanfala Christian disaed for duim wanfala samting wea difren from wat iumi bae duim?

⁴ Hao, iumi shud talem tingting blo iumi lo brata or sista blo iumi if iumi no agree witim disison blo hem? Samtaems iumi savve duim datwan, bat samtaems iumi shud no duim datwan. For example, if iumi savve dat hem tingting for duim samting wea brekem wanfala komand insaed Bible, from iumi lovem hem, iumi shud trae for helpem hem for stretem tingting blo hem. (Prov. 27:​5, 6) Bat, wat nao iumi shud duim if wanfala brata or sista disaed for duim samting wea no brekem law blo God, bat hem just duim nomoa samting wea difren from wat iumi bae duim? Iumi kasem ansa blo datwan from theme Scripture blo iumi. Iumi “no judgem eniwan wea garem difren tingting abaotem samting.”—Rom. 14:1.

⁵ Nomata olsem, maet iumi faendem hem no isi for respectim disison blo hem. Lo disfala article, iumi bae discussim why iumi shud respectim disison blo narawan and hao iumi savve duim datwan. Bat firstaem, bae iumi storyim samfala situation wea involvim personal disison wea savve mekem iumi for judgem wanfala brata or sista blo iumi.

WAT PERSONAL DISISON NAO SAVVE MEKEM IUMI FOR JUDGEM NARAWAN?

6-7. Storyim olketa example wea iumi maet judgem olketa narawan for disison blo olketa.

⁶ Olsem iumi storyim lo start, iumi maet garem strong tingting abaotem samfala topic bikos lo baekgraon or experience blo iumi. Maet iumi tingse olketa narawan tu garem sem tingting olsem iumi. Bat, datwan hem no tru. Tingim raonem samfala example hia. Example 1: Bifor wanfala brata kamap Witness, hem growap witim dadi wea savve drunk tumas. Lo wanfala gathering, datfala brata lukim olketa nara Christian drinkim alcohol. Hem feel nogud tumas and hem talem olketa dat wat olketa duim hem rong. Example 2: Wanfala sista hem recover from wanfala big sik. Bihaen, hem herem dat nara sista kasem sem sik tu. Datfala first sista laek for help, so hem putim pressure lo nara sista hia for followim sem medical treatment wea hem kasem. Maet hem talem hem for followim wanfala type diet or treatment or tekem natural remedy. Example 3: Wanfala brata hem member blo wanfala false religion bifor. Bat taem hem lanem truth hem no laek for duim eniting wea join witim religion blo hem moa. So taem hem savve nara Christian attendim wanfala funeral lo wanfala church, hem feel nogud tumas.a

⁷ Tingim moa samfala nara example hia. Example 4: Wanfala brata growap during taem wea staka pipol ting hem no stret for olketa man garem beard or for olketa woman werem long pants lo olketa meeting, assembly, and lo ministry. Nomata datfala brata savve lo recent adjustment abaotem diswan, bat hem gohed talem olketa narawan dat olketa Christian brata shud no garem beard and olketa Christian sista shud no werem long pants taem olketa duim olketa theocratic activity. Example 5: Wanfala elder savve lo wanfala brata wea duim further education and wea gogo hem lusim truth. So taem wanfala young brata lo kongregeson blo elder hia disaed for kasem further education, datfala elder wari and trae for convincim hem and parents blo hem for changem mind blo olketa.

8. (a) Wat nao savve mekem parents for judgem olketa nara parents? (b) Hao nao wei wea iumi judgem olketa narawan savve affectim kongregeson?

⁸ Tingim disfala situation wea savve happen lo olketa parents. Example 6: Olsem wanfala parents, iu waka hard for lukaftarem pikinini blo iu lo wei for “givim discipline and training wea kam from Jehovah.” (Eph. 6:4) Bat maet olketa nara Christian parents letem pikinini blo olketa for followim tingting blo olketa seleva lo samfala samting. For example, olketa no markem taem for pikinini arrive bak lo haos, allowim pikinini for pleim olketa video game wea no violent, or for garem mobile nomata hem young tumas. From datwan, pikinini blo iu maet feel dat iu strict tumas. Maet hem sei lo iu: “Iu shud olsem parents blo fren blo mi.” Kaen situation olsem savve mekem iu garem negative tingting abaotem olketa nara parents. For tok stret, eni personal disison wea wanfala Christian mekem wea difren from iumi hem savve kosim disagreement. For example, maet iumi kwestinim hao hem spendem selen blo hem, hao many taems nao hem go holiday, or wat kaen entertainment nao hem chusim. Bat iumi mas no letem feeling blo iumi for important tumas lo iumi winim wan mind wea iumi garem insaed kongregeson.

9. Wat nao iumi shud tingim? (Lukim tu piksa.)

⁹ Nomata disison blo wanfala Christian maet difren from disison blo narawan, datwan no minim disison blo hem stret and disison blo narawan hem rong. (Rom. 14:5) From evri Christian kasem encouragement for “garem sem tingting” saed lo olketa standard blo Jehovah, datwan no minim iumi mas garem sem tingting abaotem evri personal samting. (2 Cor. 13:11) Iumi savve comparem olketa personal disison blo iumi olsem olketa choice wea iumi mekem taem iumi travel go lo wanfala ples. Staka taem, hem garem olketa difren wei for kasem datfala sem destination. Iumi chusim best wei for iumi followim and wea iumi laekem. Lo sei wei, olketa Christian savve mekem olketa difren choice abaotem olketa personal samting, bat destination blo iumi hem semsem, hem nao for mekem Jehovah hapi. So iumi no judgem narawan for olketa personal disison wea olketa mekem.—Matt. 7:1; 1 Thess. 4:11.

WHY NAO IUMI RESPECTIM PERSONAL DISISON BLO OLKETA NARAWAN?

10. Olsem James 4:12 talem, wat nao iumi no garem raet for duim, and why?

¹⁰ Bible givim samfala reason for why iumi shud respectim personal disison blo olketa narawan. Tingim samfala reason hia. Iumi no garem raet for judgem olketa narawan abaotem personal disison blo olketa. (Readim James 4:12.) Jehovah nao hem raeteous Man wea Givim Law and hem nao Judge. Hem nomoa garem raet for markem olketa standard and rul lo laef. So olketa brata and sista blo iumi bae givim ansa lo Jehovah for disison wea olketa mekem, and no lo iumi. (Rom. 14:10) Iumi no garem raet for judgem or accusim olketa for disison wea olketa mekem base lo own standard or tingting blo iumi.b

11. Wat nao iumi savve duim for mekem evriwan lo kongregeson garem wan mind? (Lukim tu piksa.)

¹¹ Jehovah laekem olketa worshiper blo hem for wan mind, no for semsem. God blo iumi laekem wei wea iumi evriwan difren! Iumi lukim pruv blo datwan lo olketa samting wea hem creatim. For example, each leaf blo wanfala tree hem no semsem. And tingim iumi olketa man. Nomata winim eit billion pipol nao stap lo earth, no eniwan hem garem sem appearance and personality olsem narawan. Jehovah creatim iumi for difren. Hem no laekem iumi for olsem photocopy blo narawan. Bat hem laekem iumi for wan mind. So instead for letem wei wea iumi difren for divaedem iumi, iumi shud promotim peace. Samting wea barava important lo iumi hem wan mind insaed lo kongregeson and no own tingting and wat iumiseleva laekem.—Rom. 14:19.

HAO FOR RESPECTIM TINGTING BLO OLKETA NARAWAN

12-13. Wat nao iumi shud tingim if iumi feel dat samwan hem “start for go difren”? (Galatians 6:1; lukim tu box “Taem Iu No Agree.”)

¹² Taem olketa narawan mekem disison abaotem olketa personal samting. Ting raonem diswan, ‘Hao, datfala person hem “start for go difren” or hem just duim nomoa samting wea difren from wat mi duim?’ Sapos hem go difren, olsem for brekem wanfala komand insaed Bible, tingim diswan, ‘Hao, mi nao raet person for stretem hem, or eni narawan, wea hem wanfala elder?’ If iu qualify for helpem hem, trae for story witim hem and duim datwan witim mildness. (Readim Galatians 6:1.) Bat, maet staka taem iu luksavve dat choice blo hem just difren from tingting blo iu. If datwan happen, no kwestinim hem or story negative abaotem disison blo hem. Respectim raet blo hem for disaed seleva, and no judgem hem.—Rom. 14:​2-4.

¹³ Tingim disfala example: If iu go lo wanfala restaurant witim fren blo iu, hao, bae iu forcem hem for orderim sem kaikai wea iu orderim? Nomoa. Iu bae respectim raet blo hem for chusim kaikai wea hemseleva laekem. Even if iu no laekem kaikai wea hem chusim, iu bae no warim nomoa bikos iu bae no kaikaim datfala kaikai. And hem semsem tu, iu bae no laek for fren blo iu orderim kaikai wea hemseleva nao laekem for iu. Lo sem wei, iumi savve showim iumi respectim olketa narawan taem iumi allowim olketa for mekem olketa personal disison and bae iumi no trae for forcem tingting blo iumi lo olketa.

14. Wat nao iu savve duim for gohed keepim wan mind taem iu mekem olketa personal disison? (1 Corinthians 8:​12, 13)

¹⁴ Taem iu mekem disison abaotem olketa personal samting. Iu savve gohed keepim wan mind taem iu duim best blo iu for avoidim wei for mekem olketa narawan feel nogud. (Readim 1 Corinthians 8:​12, 13.) Samtaems, iu savve dat disison wea iu bae mekem hem “stret,” wea minim hem acceptable. Bat, if datwan bae mekem brata or sista blo iu feel nogud, hao, datwan hem “gud” samting for duim?c (1 Cor. 10:​23, 24) Sapos olsem, instead for forcem olketa for acceptim dat iu garem raet for disaedem samting, hem gud for no tingim feeling blo iuseleva bat tingim feeling blo olketa. (Rom. 15:1) Remember, iumi storyim finis dat olketa narawan shud respectim disison blo iumi abaotem olketa personal samting. Olketa shud respectim choice blo iumi olsem iumi tu shud respectim choice blo olketa. Bat iumi shud tingim tu kaonsel wea stap lo Romans 12:​18, wea sei: “Iu mas waka hard for stap lo peace witim evri man.” So, iumi laek for duim evriting wea iumi fit for duim for maintainim peace wea iumi garem witim olketa narawan and avoidim eni samting wea bae mekem olketa feel nogud.

15. Wat nao olketa elder savve duim for help for mekem evriwan lo kongregeson garem wan mind? (1 Corinthians 4:6)

¹⁵ Olketa elder respectim disison blo olketa narawan. Olketa elder savve help for mekem kongregeson wan mind taem olketa no putim rul for olketa personal samting and olketa no “go ovam samting wea olketa raetem finis” insaed lo Bible. (Readim 1 Corinthians 4:6.) And datwan minim tu olketa no givim advaes wea no kam from olketa Bible base pablikeson blo iumi. And tu, taem olketa nara Christian ask for help, olketa elder bae mek sure for no givim advaes wea base nomoa lo own experience blo olketa. Bat, olketa bae givim advaes wea base lo Word blo God.—Isa. 48:​17, 18.

16. Hao nao wanfala elder savve showim hem respectim disison wea body of elders mekem?

¹⁶ Wanfala elder savve showim hem respectim tu olketa disison wea body of elders mekem tugeta. If body of elders prea for holy spirit, reviewim and applyim direction wea kam from Bible, and olketa mekem wanfala disison, then each elder shud sapotim datfala disison even if majority blo body of elders no agree witim tingting blo hem. (Eph. 5:17) And tu, olketa elder traem best for followim direction wea kam from Bible and olketa pablikeson blo iumi and no trae for iusim datwan for sapotim own tingting blo olketa. For example, wanfala elder bae no iusim wanfala sentence lo article from pablikeson blo iumi and ignorem wat full article hia storyim just for pruvim dat tingting blo hem nao stret.

17. Wanem gud samting nao iumi kasem taem iumi respectim disison blo olketa narawan?

¹⁷ Olsem iumi lanem, iumi no semsem. Each wan lo iumi garem own tingting and wat hem laekem. Bat datwan hem gud samting! Wei wea iumi garem difren baekgraon and personality hem mekem kongregeson hem wanfala hapi ples for iumi stap lo hem. So instead for letem wei wea iumi difren mekem iumi divaed, iumi traem best for maintainim peace. Iumi careful for no mekem olketa narawan feel nogud. Iumi respectim disison blo olketa narawan abaotem olketa personal samting. Taem iumi duim olsem, bae iumi kasem reward. Iumi bae hapi and garem wan mind insaed lo kongregeson.—Ps. 133:1; Matt. 5:9.