Gohed Strong lo Spiritual Wei Taem Iu Kasem Further Education

1-2. (a) If iu chus for kasem further education, wat nao iu need for gohed duim? (b) Wat nao hem minim for “gohed for wakabaot followim sem wei wea iumi followim kam kasem distaem”? (Philippians 3:16)

SAMFALA servant blo Jehovah disaed for kasem further education wea hem no just basic education wea gavman requirem. Maet olketa ting further education savve helpem olketa for faendem waka wea bae sapotim olketa lo service blo olketa for Jehovah. If iu disaed for kasem further education, hao nao iu savve mek sure dat iu bae gohed fren klos witim Jehovah? (Jas. 4:8a) Hem tru, iu experiencem finis samfala samting lo skul wea mekem hem no isi for iu gohed faithful. Bat distaem, iu bae need for “gohed for wakabaot followim sem wei wea iumi followim kam kasem distaem,” wea hem nao for faithful for worshipim Jehovah olsem iu gohed duim distaem.—Readim Philippians 3:16.

² Greek verb wea olketa iusim for disfala toktok “wakabaot followim sem wei wea iumi followim kam kasem distaem,” staka taem olketa savve iusim for describem olketa soldia wea gohed for march tugeta and no stop. If iu disaed for kasem further education, iu bae need for march forward lo service blo iu for Jehovah, and no standap or tane bak. Disfala article bae storyim fofala Bible principle wea bae helpem iu. Olketa principle hia hem no niu lo iu. Iu applyim olketa principle hia finis, and iu bae need for gohed applyim datwan taem iu kasem further education and even afta iu completim education blo iu.

MAINTAINIM GUD SPIRITUAL ROUTINE

3. Taem iu duim further education, wanem challenge nao maet iu feisim saed lo daily routine blo iu?

³ Challenge. Further education savve mekem iu busy tumas and datwan savve affectim daily routine blo iu. From hem normal feeling nomoa for laek garem gud grade lo skul, maet iu start for ting lo service blo iu for Jehovah olsem samting wea no mas important. Maet iu even start for no attendim olketa Christian meeting, join lo ministry, duim personal study, and prea.—Rev. 2:4.

4. Wat nao savve helpem iu for “evritaem busy lo waka blo Lord”? (1 Corinthians 15:58)

⁴ Readim 1 Corinthians 15:58. For baesikol gohed muv, iu mas gohed raedem. Lo sem wei, for gohed strongim frenship blo iu witim Jehovah iu need for gohed busy lo service blo hem. Dastawe Bible talem iumi for “evritaem busy lo waka blo Lord.” For sure, taem iu readim toktok “evritaem busy” maet iu tingim haomas taem iu spendem lo service blo Jehovah. Bat samting wea most important for tingim nao, iu duim olketa samting hia bikos hem barava important lo iu. Ting lo iuseleva olsem servant blo Jehovah first, bifor iu ting lo iuseleva olsem wanfala skul student. (Matt. 22:37) Wanfala young sista wea nem blo hem Samantha sei, “Mi disaed finis if education blo mi start for stopem mi for duim service blo mi for Jehovah, mi bae stop skul.”

5. Wat nao iu savve duim for gohed active lo service blo Jehovah?

⁵ Wat iu savve duim bifor iu start for duim further education. Mek sure iu garem klia piksa abaotem wat nao olketa priority blo iu. Ting raonem diswan, ‘Wat nao mi savve duim for mek sure mi evritaem prepare and attendim olketa meeting, joinim ministry, and duim personal study?’ (Josh. 1:8; Matt. 28:​19, 20; Heb. 10:25) And tu, iu savve ting go bak: Wat nao helpem iu for gohed focus lo olketa priority blo iu during lo olketa year wea iu skul bifor? If iu feel dat lo bifor iu no duim samfala samting, wat nao olketa adjustment wea iu need for duim distaem for impruv? Disaed strong for gohed active lo service blo Jehovah taem iu duim further education. Hem important for iu garem gud grade, bat no sakrifaesim worship blo iu for datwan.a—Matt. 6:24.

6. Wat nao iu savve ting raonem taem iu gohed chekim iuseleva? (Lukim tu piksa.)

⁶ Taem iu duim further education, hem gud for evritaem chekim iuseleva, maet evri month. Ting raonem diswan, ‘Hao, mi still focus lo olketa priority blo mi?’ Mas alert for olketa warning saen hia, for example, hao, hem habit blo iu for misstim olketa meeting or arrive leit? Hao, iu tingting abaotem olketa skul assignment taem meeting hem gohed? Or hao, iu attendim nomoa olketa meeting thru lo videoconference? And iu savve ting raonem diswan tu, hao, mi still prea and duim Bible reading evritaem olsem bifor? Hao, mi duim ministry bikos hem samting mi mas duim nomoa and no tek serious lo hem? If ansa blo iu hem yes for eniwan lo olketa kwestin hia, then iu need for duim samting kwiktaem. No letem education blo iu stopem iu for no putim service blo Jehovah olsem priority.

“GAEDEM GUD ABILITY BLO IU FOR TING RAONEM SAMTING”

7. Taem iu duim further education, olketa wanem challenge nao maet iu feisim wea affectim tingting blo iu?

⁷ Challenge. Samfala taem course wea iu tekem lo further education maet mekem iu for lanem “olketa iusles toktok and tingting blo man,” includim olketa idea dat no eni God stap and evolution. (Col. 2:8) And tu, wat iu lanem savve mekem iu for depend nomoa lo iuseleva. Wanfala young brata tingim bak taem hem skul and sei: “Mifala no just lanem skill, bat lanem tu hao mifala shud ting abaotem samting, wea staka taem datwan no followim tingting blo Jehovah. For example, mifala lanem dat for mifala success lo laef hem depend lo mifala seleva. Kaen tingting olsem mekem mi feel mi no needim Jehovah. Datwan mekem hard go moa for mi trustim Jehovah.”

8. Why nao hem important for “gaedem gud ability blo iu for ting raonem samting”? (Proverbs 5:​1, 2)

⁸ Readim Proverbs 5:​1, 2. Bible warnim iu for “gaedem gud ability blo iu for ting raonem samting.” Iu gaedem samting taem samwan trae for spoelem or tekem from iu. Sem samting tu iu shud duim witim ability blo iu for ting raonem samting. (1 Pet. 5:8) Tingting blo pipol lo world savve start for mekem iu daotem wat Bible teachim abaotem wat hem stret and no stret, origin blo laef, or if God hem exist. Maet hao pipol presentim idea blo olketa here olsem hem kleva tingting, bat really hem karangge tingting nomoa. Dastawe, Bible sei idea blo olketa “hem karangge samting lo God.”—1 Cor. 3:​18-20.

9. For gaedem ability blo iu for ting raonem samting, wat nao iu savve duim?

⁹ Wat iu savve duim bifor iu start for duim further education. For gaedem ability blo iu for ting raonem samting, iu mas mek sure iu barava bilivim wat Bible teachim hem truth bifor iu start for duim further education. Ting raonem olketa kwestin hia: ‘Why nao mi biliv lo God? Hao nao mi savve Bible hem Word blo hem? Wat nao mekem mi convince dat wei for followim olketa standard lo Bible abaotem wat hem stret and no stret hem gud winim tingting blo pipol lo world?’ And tu, ting go bak: Maet iu followim tingting blo pipol lo world taem iu lo skul bifor. Hao, theory abaotem evolution mekem faith blo iu for wik? Hao, hem hard for iu sei no lo olketa dirty samting wea olketa nara classmate duim? If ansa blo iu for eniwan lo olketa kwestin hia hem yes, wat nao iu savve duim distaem for barava bilivim wat Bible teachim nao hem truth? Disaed strong for gaedem ability blo iu for ting raonem samting taem iu duim further education.—2 Tim. 2:​16-18.b

10. Hao nao iu savve gohed protectim ability blo iu for ting raonem samting?

¹⁰ Taem iu duim further education, hem gud for evritaem chekim iuseleva. Ting raonem diswan: ‘Hao, olketa nogud samting wea pipol raonem mi duim temptim mi for duim sem samting? Hao, mi luksavve wat mi lanem lo skul hem idea blo man nomoa and hem no truth? Hao, mi barava convince dat Kingdom blo God nomoa savve stretem evri problem blo iumi olketa man?’ For gaedem ability blo iu for ting raonem samting, gohed kamap wanfala gud student blo Word blo God. Wei for studyim Bible and meditate abaotem savve helpem iu for barava convince dat wat Bible teachim hem truth.—1 Tim. 4:15.

IUSIM GUD TAEM BLO IU

11. Taem iu duim further education, wanem challenge nao maet iu feisim saed lo wei for iusim taem blo iu?

¹¹ Challenge. Further education savve tekem tumas taem blo iu, especially taem iu study for exam or taem iu garem eni deadline for completim wanfala project. If iu no iusim gud taem blo iu, iu savve stress tumas and feel taed tumas evritaem. Dastawe hem important for iu lukaftarem gud physical and emotional health blo iu.

12. Olketa wanem samting nao iu shud markem taem for duim? (Ephesians 5:​15, 16)

¹² Readim Ephesians 5:​15, 16. For “iusim gud taem wea [iu] garem” hem no isi. Iu need for balance. For example, nomata iu need for spendem taem for study for skul blo iu, hem moa important for iu spendem taem witim olketa spiritual brata and sista and witim famili blo iu. (Ps. 133:1; Prov. 18:1) Olketa spiritual need blo iu nao shud top priority blo iu. (Matt. 6:33) And maet iu garem tu olketa famili responsibility and waka wea iu need for duim. And tu, iu need for lukaftarem health blo iu lo wei for garem inaf taem for rest and exercise. (Eccl. 4:6; 1 Tim. 4:8) For duim evri samting hia, iu need for iusim gud taem blo iu.

13. Wat nao iu savve duim for mek sure iu iusim gud taem blo iu?

¹³ Wat iu savve duim bifor iu start for duim further education. Bible sei wei for plan savve helpem iu for succeed. (Prov. 21:5) So, hem gud for garem gudfala schedule bifor iu start for duim further education. For helpem iu duim datwan, iu savve ting go bak: Hao nao iu iusim taem blo iu during lo olketa year wea iu skul bifor? If iu feel dat lo bifor iu no iusim gud taem blo iu, wat nao olketa adjustment wea iu savve duim distaem? Disaed strong for kontrolem taem blo iu winim for letem taem nao kontrolem iu.c

14. Olketa wanem kwestin nao savve helpem iu for chekim iuseleva?

¹⁴ Taem iu duim further education, hem gud for evritaem chekim iuseleva. Ting raonem diswan: ‘Hao, schedule blo mi letem mi for garem inaf taem for rest and exercise? Hao, mi still garem taem for spendem witim olketa brata and sista? Hao, mi savve completim homework blo mi on taem? Sapos nomoa, hao, datwan hem bikos mi garem staka samting for duim or bikos mi evritaem duim olketa important samting lo last minute? Hao, olketa narawan, includim olketa lo famili feel dat mi need for adjustim samfala samting?’ If olsem, kwiktaem duim samting, maet iu need for adjustim schedule blo iu or lane for disciplinem iuseleva. Maet iu savve story tu witim olketa narawan wea iusim gud taem blo olketa.—Prov. 11:14.

GOHED “WAKABAOT WITIM OLKETA WEA WISE”

15. Taem iu duim further education, wanem challenge nao maet iu feisim?

¹⁵ Challenge. Taem iu duim further education, olketa classmate maet trae for includim iu insaed social laef blo olketa. Maet iu kasem temptation for joinim olketa. Diswan hem bikos iufala evriwan garem sem interest, especially if iu spendem staka taem witim olketa lo classrum. Maet iu even feel dat iu semsem witim olketa lo staka samting instead for semsem witim samfala brata and sista lo kongregeson blo iu. Nomata olsem, iu need for careful. Bikos nomata iu and olketa classmate blo iu lo sem class, iu difren from olketa bikos iu laek mekem Jehovah hapi bat olketa nomoa. And sapos iu spendem moa taem witim olketa, then tingting blo olketa savve affectim iu. (1 Cor. 15:33) Michael, wea completim wanfala fo-year electrical apprenticeship, luksavve datwan hem tru. Hem sei, “Each week mi spendem winim 40 hours witim olketa workmate wea tingting blo olketa abaotem opposite sex, music wea olketa chusim, and dirty toktok wea olketa iusim hem start for affectim tingting blo mi.”

16. Wat nao wei for “wakabaot witim olketa wea wise” hem minim? (Proverbs 13:20)

¹⁶ Readim Proverbs 13:20. Bible warnim iumi dat bad association savve kosim staka problem. Bat “man wea wakabaot witim olketa wea wise bae kamap wise.” Leson hem klia: Olketa wea iumi chus for spendem taem witim olketa savve influencim iumi for duim gud or nogud samting. So fren gud witim olketa wea laekem iu for kasem gud samting and wea worshipim Jehovah witim full heart blo olketa olsem iu.—Ps. 101:​6, 7; 119:63.

17. Wat nao iu savve duim for avoidim nogud association?

¹⁷ Wat iu savve duim bifor iu start for duim further education. Markem limit saed lo association blo iu. Wanfala Witness wea nem blo hem Trenton sei: “Mi kaen lo olketa classmate blo mi, bat mi no spendem taem witim olketa afta skul. Mi ting lo olketa olsem classmate blo mi, no olketa klos fren blo mi.” Wat nao olketa limit wea iu bae markem? For helpem iu ansarem datfala kwestin, ting go bak: Wat nao olketa limit wea iu markem during lo olketa year wea iu skul bifor? If iu feel dat lo bifor iu no duim stret samfala samting, wat nao olketa adjustment wea iu savve duim distaem? Disaed strong for gohed “wakabaot witim olketa wea wise” and avoidim wei for associate witim olketa wea no lovem Jehovah.d

18. Olketa wanem kwestin nao hem gud for iu ting raonem? (Lukim tu piksa.)

¹⁸ Taem iu duim further education, hem gud for evritaem chekim iuseleva. Ting raonem diswan: ‘Hao, mi start for fren klos witim olketa classmate blo mi? Hao, habit blo olketa, toktok wea olketa iusim, and attitude blo olketa hem start for affectim toktok and tingting blo mi? Hao nao bae Jehovah feel abaotem frenship blo mi witim olketa classmate blo mi?’ (Ps. 1:1) If iu luksavve dat iu need for mekem olketa change, then kwiktaem duim samting. Mek sure olketa best fren blo iu hem olketa wea lovem Jehovah olsem iu. And tu, no hol bak for witness lo olketa classmate blo iu. From iu savve lo olketa and spendem taem witim olketa lo skul, iu garem best opportunity for helpem olketa lane abaotem truth.

MAS REDI

19. Wat nao iu savve duim for redi for ovakamim olketa spiritual challenge taem iu duim further education? Storyim example.

¹⁹ Samwan wea wise wea redi for go hiking hem need for mek sure lo samfala samting bifor hem go. For example, hem need for mek sure hem fit, hem garem raet kaleko for protectim hem, and hem garem goal, hem nao for kasem destination blo hem. Nomata hem no savve lo wat nao bae happen during datfala hiking, olketa samting hia bae helpem hem for kasem destination. Iu savve duim sem samting tu for redi taem iu duim further education. Gohed strongim faith blo iu, werem “full sut for faet wea God givim,” and garem goal, no for achievim samting wea pipol lo world ting lo hem olsem success, bat for givim glory lo Jehovah lo evriting iu duim.—Eph. 6:​11-13; 1 Cor. 9:​26, 27; 10:31.

20. Hao nao iu savve ‘gohed for testim iuseleva sapos iu garem tru faith lo God’?

²⁰ Bible encouragem iumi olsem: “Gohed for testim iufala seleva sapos iufala garem tru faith lo God. Gohed for pruvim lo iufala seleva wat kaen man nao iufala.” (2 Cor. 13:5) Iu savve followim datfala advaes taem iu duim further education. Evritaem chekim iuseleva lo olketa difren area wea iumi storyim insaed disfala article. Hao, iu gohed maintainim gud spiritual routine? Hao, iu protectim tingting blo iu from wisdom blo disfala world? Hao, iu iusim gud taem blo iu? Hao, iu gohed strongim frenship blo iu witim olketa nara Christian and avoidim nogud association? Ting raonem olketa kwestin hia nomata iu lo skul, lo waka, or lo eni nara ples. Disaed for gohed strong lo spiritual wei lo eni situation wea iu feisim. Iu savve trustim dat Jehovah bae blessim effort blo iu if iu duim datwan.—Prov. 3:​5, 6.