Mekem Wise Disison Abaotem Further Education

1-2. (a) Olketa wanem disison nao olketa young wan mas mekem? (b) Wat nao toktok “further education” hem minim? (Lukim “Mining blo Wanfala Toktok.”)

“WAT kaen waka nao iu laek duim taem iu growap?” If iu wanfala young wan, maet pipol askem iu disfala kwestin staka taem. Best career wea iu savve chusim hem for duim full-taem service. Bat for sapotim iuseleva, iu needim selen tu. (2 Thess. 3:10) For sure, iu ting raonem wat kaen waka nao iu laek duim lo future.

² Samfala parents helpem young wan blo olketa for chusim further education afta olketa completim education wea gavman requirem, mekem datwan helpem pikinini for faendem waka.a Maet iu tu wonder if iu shud kasem further education. If olsem, wat type education nao iu shud chusim? Disfala article bae storyim olketa Bible principle wea savve helpem iu for tingting gud abaotem education wea iu shud kasem. Wei for tingting gud savve helpem iu for mekem wise disison. Nomata disfala article hem for olketa young wan, hem savve helpem tu eni Christian wea ting for kasem further education. And olketa principle hia fitim tu olketa parents for helpem pikinini mekem wise disison.

HAO, IU SHUD KASEM FURTHER EDUCATION?

3. Why nao samfala Christian maet disaed for kasem further education?

³ Lo samfala kantri, man no need for kasem further education for kasem wat hem needim. Bat lo olketa nara kantri, man needim further education mekem hem savve faendem waka wea garem gud pei or wea hemseleva savve chusim hao many hours hem bae waka. Diswan savve helpem wanfala Christian for spendem moa taem for duim preaching waka or duim eni nara theocratic waka. Nomata olsem, for wanfala Christian kasem further education hem bae need for mekem samfala sakrifaes and feisim samfala challenge.

4. Hu nao shud disaed if wanfala Christian bae kasem further education? (Lukim tu footnote.)

⁴ Bible sei dat each person mas “karem own load blo hem.” (Gal. 6:​5, lukim English study note.) So, each adult Christian mas disaed seleva if hem bae kasem further education.b And parents tu responsible for mekem disison abaotem education blo young pikinini blo tufala. (Eph. 6:1) And wei wea tufala helpem pikinini savve redyim hem for mekem wise disison abaotem education taem hem adult.—Prov. 22:6.

5. Wat taem nao wanfala person shud start for ting raonem if hem bae kasem further education, and why? (Lukim tu piksa.)

⁵ Staka taem wanfala young wan need for mekem disison abaotem whether hem bae kasem further education bifor hem completim hae skul. Hem tru, hem wise for wanfala young wan storyim disfala topic witim parents blo hem longtaem lelebet bifor hem mekem eni disison. Diswan bae givim taem for olketa duim research tugeta for lukim olketa difren option for chusim. Maet datwan bae mekem olketa for chusim subject lo skul wea bae redyim hem for education or waka wea hem bae duim lo future. Hao, olketa need for mekem datfala disison bifor young wan hia completim hae skul? Nomoa. (Prov. 21:5) Samfala young wan chus for completim hae skul, faendem waka, and start pioneer taem olketa ting raonem if olketa bae kasem further education. So nomata enitaem lo future, man savve mekem kaen disison olsem.

6. Wat nao savve helpem samwan for mekem wise disison abaotem further education?

⁶ Wat nao savve helpem iu for mekem wise disison abaotem further education? Prea abaotem datwan. (Jas. 1:5) And tu, iu savve duim tufala samting hia. First wan, ting raonem wat nao really motive blo iu. (Ps. 26:2) Mek-tu, ting raonem gud datfala education wea iu laekem. (Prov. 14:15) Bae iumi storyim each wan lo tufala samting hia.

TING RAONEM MOTIVE BLO IU

7. Wat nao olketa Christian shud ting raonem taem olketa plan for kasem further education?

⁷ If iu tingting for kasem further education, wanfala important kwestin for iu ting raonem hem, ‘Why nao mi laek kasem disfala education?’ Staka pipol kasem further education mekem olketa savve garem waka wea olketa enjoyim or wea garem gud pei. Hao, olketa motive hia hem rong? Nomoa. (1 Tim. 5:8) Nomata olsem, Bible warnim iumi lo olketa danger wea kam from wei for aftarem material samting and for ting dat only selen nomoa bae protectim iumi. (Prov. 23:​4, 5; 1 Tim. 6:​8-10; 1 John 2:17) If motive blo iu hem for kasem riches or for garem bignem, datwan maet mekem iu feel emti and hem savve mekem iu for go farawe from Jehovah tu.

8-9. (a) Hao nao olketa Christian shud ting lo education? (Matthew 6:33) (b) Wat nao iu lanem from koment blo Josefina, Morine, and Iris?

⁸ Hao nao iu shud ting lo education? No eni samting shud moa important lo iumi winim wei for worshipim Jehovah. (Matt. 22:​37, 38; Phil. 3:8) So ting lo education olsem wei for sapotim iu for kasem wat iu needim mekem iu savve worshipim Jehovah witim full heart.—Readim Matthew 6:33.

⁹ Tingim samting wea helpem samfala Christian for gohed garem stret tingting abaotem further education. Josefina, from Chile, hem sei: “Further education helpem mi for faendem waka wea allowim mi for spendem moa taem for servem Jehovah. Mi mek sure dat wat mi skulim hem no most important lo laef blo mi winim frenship blo mi witim Jehovah.” Wanfala sista wea nem blo hem Morine hem chusim wan year course for kamap hair stylist. Why? Hem sei: “Goal blo mi hem for serve lo ples wea garem big need. So mi chusim course wea bae helpem mi for kasem datfala goal. Afta mi completim datfala course, mi iusim wat mi lanem for duim datfala waka and sevem selen for muv. And taem mi kasem ples wea garem big need, education wea mi kasem helpem mi for faendem waka.” Iris wea completim wanfala long course for kamap dentist, hem sei: “Further education garem samfala advantage, bat hem no savve mekem iu for kasem trufala hapi and satisfae. For kasem trufala hapi, iumi mas tingim diswan: If iumi putim Jehovah first lo laef blo iumi, hem bae mek sure iumi hapi and garem evriting iumi needim.” Yes, taem frenship blo iumi witim Jehovah hem most important lo laef, iumi bae mekem olketa disison wea bae mekem iumi hapi for olowe.

TING RAONEM DATFALA FURTHER EDUCATION

10. If iu disaed for kasem further education, hao nao iu savve applyim principle lo Deuteronomy 32:29?

¹⁰ Maet iu plan for duim wanfala specific course or wanfala training program. Bat hem gud for ting raonem tu olketa nara option wea iu savve duim, maet lo sem waka or nara waka. (Comparem Proverbs 18:17.) Distaem, staka difren option stap for duim further education winim bifor, olsem for duim olketa online course. And no forget tu for ting raonem sapos iu needim further education for sapotim iuseleva or nomoa. For example, Johanna, from Finland, no kasem further education. Hem sei: “Afta mi finis skul, mi start waka part-taem and mi pioneer. Mi duim olketa difren waka and mi lukim Jehovah evritaem keepim promis blo hem for provaedem wat iumi needim.” Remember, evri disison wea iumi mekem abaotem further education, maet for kasem or wat type education for kasem, hem garem olketa advantage and disadvantage. So ting raonem diswan: ‘Hao, datwan garem staka advantage winim disadvantage?’ (Readim Deuteronomy 32:29; 1 Cor. 10:23) Bae iumi storyim samfala important point wea bae helpem iumi for ansarem disfala kwestin.

11. Why nao hem important for ting raonem schedule blo education or training wea iu laek kasem? (Lukim tu piksa.)

¹¹ Schedule. Ting raonem hao many hours nao iu bae spendem each week for attendim olketa class, kasem training and duim homework. Hao, iu bae still garem taem for duim spiritual routine blo iu and olketa responsibility insaed famili? (Phil. 1:10) Hao, education wea iu kasem bae mekem iu taed tumas for prepare for olketa meeting or personal study? Diswan nao samting wea happen lo Jeroz, from India. Hem sei: “Mi stragol for focus lo olketa spiritual activity. Samfala taem mi savve misstim olketa meeting. Taem mi ting bak, mi realizim dat course mi tekem hem weistim taem and energy blo mi.” Bat, samfala course no tekem staka taem, samfala hem part-taem, and olketa narawan no garem staka homework. For example, Sista Rabeca, from Mozambique hem hapi witim education wea hem chusim. Hem sei: “Course wea mi tekem hem just for tu hours each day. Datwan allowim mi for gohed regular pioneer.”

12. Hao nao samwan savve iusim gud taem blo hem saed lo education? (Ecclesiastes 12:1)

¹² Hao long. Hem gud for tingim bae hem tekem hao many months or years for iu completim datfala education program. Hao, education wea iu chusim bae showim iu iusim gud taem blo iu? (Eph. 5:​15-17) If iu wanfala young wan, hao, education program hia bae letem iu for givim best blo iu lo Jehovah taem iu young, olsem for duim full-taem ministry? (Readim Ecclesiastes 12:1.) Hao, eni short course stap wea iu savve duim for datfala sem waka? For example, iu savve kasem practical skills from vocational training and trade skul wea iu savve completim insaed short taem, and no expensive tumas olsem olketa university. Mario, from Chile, sei: “Mi chusim tu-year technical course wea cheap winim wanfala course lo university. Mi attendim datfala course fofala days lo week nomoa, so datwan allowim mi for pioneer.”

13. Hao nao ples wea man stap for kasem further education savve affectim hem?

¹³ Ples. Maet ples for iu kasem further education hem klosap lo ples wea iu stap. Bat wat if datfala education program hem lo difren ples? Or hao if iu mas stap lo campus for duim datfala education program? No forget dat wei for go farawe from famili savve spoelem frenship blo iu witim Jehovah, especially if iu bae sharem rum witim pipol wea no garem sem biliv olsem iu. (Prov. 22:3; 1 Cor. 15:33) Matias, from Mozambique, hem completim wan-year course wea no expensive. Nomata olsem, hem regretim disison blo hem. Why? Hem sei: “Mi spendem full taem lo boarding skul. Evriday mi kasem temptation for duim rong samting. Advaes blo mi hem for no tekem course wea bae mekem iu stap difren from famili blo iu.” Wanfala sista from Russia sei: “For avoidim olketa danger and temptation, mi stap witim parents blo mi lo haos winim for go stap lo campus or lo dormitory.” Maet iu even savve duim wanfala course online.

14. Hao nao principle lo Luke 14:28 savve helpem iu if tingting for kasem further education?

¹⁴ Kost. Samfala course hem no expensive, or maet gavman nao peim kost. Lo olketa situation olsem, wei for kasem further education maet hem only cheaper wei for kasem knowledge and skills wea bae helpem iu for kasem waka. Bat staka taem, further education hem expensive. Maet iu bae garem olketa nara kost tu, for example, maet iu needim olketa private class or tutor for helpem iu qualify for enrollment. Samfala course mekem staka student garem kaon for staka year. Adilson, from Mozambique, regretim disison blo hem saed lo education. Hem sei: “Famili blo mi sakrifaesim kaikai and olketa nara basic need for peim fo-year course wea mi tekem.” Taem iu ting abaotem wat kaen course or training program wea iu laek kasem, ting raonem olketa kwestin hia: ‘Haomas nao bae hem kostim? Hao, mi or famili blo mi fit for peim? Hao, eni nara option stap wea no expensive?’ (Readim Luke 14:28.) ‘If mi garem kaon, hao long nao bae hem tekem for mi peim bak? And bihaen, if mi waka, pei wea mi kasem bae hem inaf for olketa need blo mi and tu for changem bak kaon wea mi garem?’—Prov. 22:7.

15. Why nao iu shud ting raonem waka wea available lo ples wea iu stap bifor iu disaedem wat type education for kasem?

¹⁵ Waka wea available. Ting raonem olketa difren waka wea available lo ples wea iu stap or ples wea iu laek for stap. Hao, education wea iu kasem bae helpem iu for faendem waka? Samfala course hem no really provaedem olketa practical training. Instead, staka course focus nomoa lo theory and for kasem knowledge winim for teachim olketa skill wea bae helpem iu for faendem waka. (Col. 2:8) Wanfala sista from India sei: “Course wea mi tekem nating helpem mi for garem practical skills wea olketa employer luk for hem. From datwan, mi no faendem waka wea mi skulim.” Or samfala course, maet iu lanem hao for duim waka, bat iu no garem staka job opportunity. For example, Sublime, from Central African Republic, hem completim wanfala course for repairim air-con. Bat, hem sei: “Lo ples wea mi stap, staka pipol repairim tings seleva, so hem no isi for faendem waka.”

16. Why nao hem gud for ting raonem wat kaen waka bae iu duim afta iu completim education blo iu?

¹⁶ Ting raonem tu wat kaen waka iu bae faendem. Hao, bae iu enjoyim datfala waka? (Eccl. 3:​12, 13) Hao nao bae environment lo waka ples and hu nao bae iu waka witim? Hao, datfala waka hem dangerous, pipol savve compete, or savve mekem man stress tumas? Haomas selen nao bae iu kasem from kaen waka olsem? Hao, bae hem inaf for sapotim iuseleva? Hao, bae iu need for tekem samfala course moa for iu gohed duim datfala waka? Most important samting nao, hao, waka hia bae allowim iu for putim Kingdom first lo laef? (Eccl. 12:13) Hem tru, taem no staka job opportunity stap, iumi bae no evritaem faendem waka wea iumi laekem. Bat disison wea iu mekem abaotem education bae affectim chance for faendem waka lo future. Tabitha, from India, chusim wanfala six-month course for lanem sewing. Hem sei: “Mi disaed dat for waka olsem tailor bae helpem mi for pioneer. Mi evritaem garem waka for duim, miseleva savve chusim wat taem for waka, and hem no kostim big selen for startim.” Datfala course helpem Tabitha for faendem waka wea sapotim hem for pioneer.

17. (a) Hao nao wanfala Christian savve faendem information wea savve helpem hem mekem wise disison abaotem education? (b) Olketa wanem Bible principle nao savve helpem hem for mekem wise disison? (Lukim box “Olketa Bible Principle for Ting Raonem.”)

¹⁷ Iumi discussim finis olketa point for ting raonem abaotem further education. Hao nao iu savve faendem information wea iu needim for helpem iu mekem wise disison? Visitim datfala skul or website blo olketa for research abaotem olketa course wea iu plan for tekem. Duim research lo olketa difren waka wea available for datfala course. Iu savve story tu witim olketa narawan wea completim semkaen training or wea duim waka wea iu skulim. (Prov. 13:10) Askem olketa, “Wat nao olketa advantage and disadvantage blo datfala education or waka?” Story lo olketa narawan wea hapi for servem Jehovah. (Prov. 15:22) Wat kaen education and waka nao olketa suggestim? Maet olketa storyim wanfala waka wea iu no even tingim.

18. Wat nao iumi shud tingim?

¹⁸ Olsem iumi lanem, further education garem olketa advantage and disadvantage. So prea abaotem olketa option wea iu garem. Tingim, further education maet savve mekem man garem waka for sapotim hem, bat for kasem tru hapi man mas fren klos witim Jehovah. (Ps. 16:​9, 11) Jehovah bae evritaem provaedem wat pipol blo hem needim, nomata olketa kasem further education or nomoa. (Heb. 13:5) Bat, wat if iu disaed finis for kasem further education? Wat nao savve helpem iu for gohed fren klos witim Jehovah taem iu continue witim further education? Bae iumi discussim diswan lo next article.