Gohed Strongim Frenship Witim Marit Partner blo Iu

1. Why nao olketa gud fren hem present from Jehovah?

OLKETA gud fren hem present from Jehovah. (Jas. 1:17) Olketa lovem God, and olketa lovem iumi tu. Olketa hapi witim iumi taem iumi hapi, comfortim iumi taem iumi sorre, and givim iumi honest advaes taem iumi needim. Olketa loyal, and iumi savve trustim olketa. Olketa fren olsem olketa really “mekem heart hapi”!—Prov. 27:9.

2. Why nao hem important for marit couple gohed strongim frenship blo tufala? (Matthew 19:6)

² Hem important for hasband and waef kamap best fren. Tufala shud tinghae lo frenship blo tufala and duim samting for gohed strongim datwan. If tufala no strongim frenship blo tufala, bae tufala start for feel lonely, no hapi, and even kros lo each other. Bat if tufala gohed strongim frenship blo tufala, bae tufala enjoyim closest bond wea tufala person savve garem. (Readim Matthew 19:6.) Lo disfala article, bae iumi storyim hao tufala wea marit savve gohed strongim frenship blo tufala. Bat firstaem, bae iumi storyim hao wanfala singol Christian savve chusim marit partner wea savve kamap best fren blo hem for olowe.

HAO FOR CHUSIM SAMWAN WEA BAE KAMAP FREN BLO IU FOR OLOWE

3-4. Wat nao bae helpem samwan for faendem wanfala gud marit partner? (Proverbs 18:22)

³ Bifor iumi mekem eni big disison, iumi need for tingim wat nao maet olketa danger, benefit, and result blo datwan. Olketa big disison savve affectim iumi for full laef blo iumi, dastawe hem important for ting raonem gud datwan bifor iumi mekem disison.

⁴ For chusim marit partner hem wanfala lo olketa most important disison wea iumi bae mekem. From Jehovah nao startim marit arrangement, hem mek sense for luk lo hem for advaes taem iumi chusim marit partner. Hem laekem wanfala boy for faendem gud waef, and Hem laekem wanfala gele for faendem gud hasband. Jehovah evritaem savve wat nao hem best for iumi. (Readim Proverbs 18:22; Isa. 48:​17, 18) Olketa principle wea stap insaed Word blo God savve helpem wanfala Christian for faendem samwan wea hem raet partner for hem.

5. Why nao hem important for chusim samwan wea baptaes finis for kamap marit partner blo iu?

⁵ Taem iumi baptaes, iumi kamap fren blo God. (Ps. 25:14) If iu laek for marit, iu shud chusim samwan wea fren witim Jehovah tu. (1 Cor. 7:39) Taem iu duim olsem, datwan showim iu tinghae lo olketa standard blo Jehovah and bae iu ting lo marit partner blo iu olsem blessing from Jehovah. (Prov. 19:14) And tu, bae iu avoidim olketa problem wea savve kamaot from wei for “join witim eniwan wea no biliv.” (2 Cor. 6:14) Hem barava no wise for frenim samwan wea no biliv, maet from iu tingse hem hard for faendem samwan wea worshipim Jehovah. And hem no wise tu for ting dat hem olraet for frenim samwan wea no biliv, from iu tingse bae hem lanem truth bihaen.

6-7. Olketa wanem kwestin nao iu shud ting raonem taem iu frenim samwan?

⁶ Tru samting nao, no evri baptaes Christian savve kamap gud marit partner. Taem iu frenim samwan, hem gud for ting raonem olketa kwestin hia: ‘Hao nao hem treatim olketa lo famili blo hem? Hao, hem kaen and respectim olketa narawan? Hu nao olketa fren blo hem? Wat nao hem duim taem olketa narawan garem difren tingting from hem? Hao, hem forcem olketa narawan for followim tingting blo hem, or hem willing for acceptim tingting blo narawan taem datwan no brekem eni Bible principle? Hao nao hem ting lo selen?’

⁷ And iu savve ting raonem tu olketa kwestin hia: ‘Hao, disfala person wea mi frenim hem garem strong love for Jehovah? Hao, hem traem best for garem “niufala wei”? Hao, bae hem savve helpem mi for gohed worshipim Jehovah witim full heart? Hao, mitufala garem olketa sem spiritual goal? Hao, bae hem kamap wanfala barava klos fren blo mi winim for just gud fren nomoa?’ (Col. 3:​9, 10) If iu wanfala sista, hao, brata wea iu frenim savve kamap wanfala gud fren and gud famili hed? (1 Cor. 11:3) If iu wanfala brata, hao, sista wea iu frenim bae willing for acceptim authority blo iu olsem hed nomata iu garem olketa wik point? Hem needim taem for kasem ansa blo olketa kwestin hia. So, iusim chance wea iutufala fren for savve gud lo person wea iu plan for maritim.

8-9. Wat nao savve helpem samwan wea fren for mekem wise disison? (Lukim tu piksa.)

⁸ During courtship, iu savve mekem wise disison if iu trae for savve gud lo datfala person wea iu frenim. Trae for savve hao nao olketa narawan ting lo person wea iu frenim. Maet iu savve askem olketa abaotem reputation and olketa quality blo hem. For example, hao, hem samwan wea hambol, kaen, and reasonable? Sarah, wanfala sista lo French Guiana wea maritim wanfala brata wea nem blo hem Daniel, sei: “Mi ask abaotem Daniel from pioneer partner brata wea tufala stap lo sem haos, from wanfala elder lo kongregeson blo Daniel, from olketa gud frens blo mitufala, and from olketa sista lo kongregeson blo hem.” Maet iu savve askem person wea iu frenim abaotem past blo hem or eniting wea happen distaem wea iu need for savve abaotem, bikos samfala samting or habit savve kosim olketa serious problem bihaen iutufala marit.

⁹ If iuseleva garem daot or iu herem eni honest koment from olketa mature fren abaotem samwan wea iu frenim, then no ignorem datwan. Sapos iu duim datwan, iu bae fit for disaed sapos hem wise for gohed frenim hem or nomoa.a Distaem bae iumi storyim wat marit couple savve duim for strongim frenship blo tufala.

SPENDEM TAEM TUGETA FOR BUILDIM FRENSHIP BLO IUTUFALA

10. Why nao hem gud for hasband and waef givim taem and attention for each other?

¹⁰ Hasband and waef savve gohed strongim frenship and marit blo tufala taem tufala traem best for spendem taem tugeta, nomata tufala busy. Diswan givim chance for tufala storyim olketa samting wea happen evriday, storyim tingting and feeling blo each other, showim love for each other, and duim samting wea tufala enjoyim tugeta.

11. Wat nao savve spoelem frenship blo hasband and waef?

¹¹ Hasband and waef wea fren klos laek for stap tugeta winim for stap difren. Hem tru, samfala taem tufala maet stap difren for lelebet taem, bat hem danger for tufala stap difren for longtaem. For example, samfala acceptim wanfala waka lo nara kantri, wea datwan mekem olketa stap farawe from famili blo olketa for longtaem. Nomata olketa kasem samfala gud samting saed lo finance, bat wei for go from marit partner for longfala taem savve spoelem marit.

12-13. (a) Wat nao samfala Christian wea marit duim for spendem taem tugeta witim marit partner blo olketa? (Lukim tu piksa.) (b) Hao important nao relationship blo iu witim marit partner blo iu? (Lukim box “Wea Nao Ples blo Marit Partner blo Iu lo Laef blo Iu?”)

¹² Lukim wat samfala marit couple duim for mek sure olketa evritaem spendem taem tugeta. Leah, from Guam, sei: “Mitufala hasband blo mi enjoyim wei for duim olketa difren samting tugeta. Staka taem mitufala no duim samting or acceptim invitation withoutim each other.” Roxanne, from United States, sei: “From mitufala busy, mitufala luksavve mitufala need for markem taem for spendem tugeta, olsem mitufala markem taem for olketa nara important event tu.” (Comparem Amos 3:3.) Damien, lo France, sei olsem: “Mitufala luksavve hem important for lane abaotem wat narawan interest lo hem, and gogo mitufala barava enjoyim wei for duim datwan.” (Matt. 7:12) And Katie, lo United States tu sei olsem: “Samtaems mitufala no holem phone mekem datwan no distractim mitufala.”

¹³ Bat most important samting hem for spendem taem tugeta for duim olketa spiritual activity. Myriam, lo France, hem sei: “Mitufala startim day blo mitufala witim Bible reading, then mitufala storyim wat mitufala laekem and wat mitufala savve applyim lo laef blo mitufala. Mi enjoyim tumas olketa taem wea mitufala spendem tugeta.” Hem sei moa: “And mi enjoyim tu taem mitufala savve prea tugeta and mi herem strongfala love wea hasband blo mi garem for Jehovah.” Katie, wea iumi storyim finis hem sei: “Fevaret taem blo mitufala tugeta hem lo ministry. Taem mitufala herem each wan lo mitufala storyim faith blo hem, datwan strongim mitufala, and mitufala gohed lanem olketa niu samting from each other.”—Prov. 27:17.

STAY KLOS TAEM OLKETA CHALLENGE KAMAP

14-15. Why nao couple shud traem best for winim olketa challenge wea savve kamap lo marit blo tufala? Storyim example.

¹⁴ From tufala wea marit no perfect, tufala bae experiencem olketa challenge lo marit blo tufala. Bible storyim klia taem hem sei tufala wea marit “bae kasem hard taem lo laef.” (1 Cor. 7:28) Wanfala study note lo disfala verse storyim datfala expression “hem minim olketa problem and hard taem wea olketa marit couple savve kasem.” Taem olketa problem olsem kamap, why nao tufala shud traem best for stay klos lo each other and winim datfala challenge?

¹⁵ Tingim disfala example. If wanfala famous building or wanfala valuable samting hem damage, staka taem pipol wea onam bae traem best for repairim. Maet olketa spendem staka selen and olketa nara resource for repairim datwan, nomata maet datwan hem tekem staka year for completim. Why nao olketa duim olsem? Bikos datfala building or valuable samting hem spesol lo olketa. Lo sem wei, evri marit hem spesol. Nomata olsem, olketa couple wea fren klos tu savve kasem problem insaed marit blo olketa. Bat, olsem wei wea pipol savve repairim bak datfala building or valuable samting wea damage, tufala wea marit savve stretem bak problem wea kamap insaed marit blo tufala. Datwan maet tekem staka taem and effort, bat Jehovah bae hapi if marit couple waka hard for strongim bak marit blo tufala and gohed stap tugeta. (Mal. 2:16) Taem tufala duim datwan, tufala no just showim tufala lovem and respectim each other bat tufala lovem and respectim Jehovah tu, Man wea Startim marit.

16. Olsem 1 Corinthians 13:​4-8a storyim, wat nao savve helpem wanfala couple wea feisim wanfala big problem lo marit? (Lukim tu piksa and box “Samting wea Savve Help for Strongim Frenship blo Iutufala.”)

¹⁶ If problem kamap insaed marit blo iu, no kwiktaem for separate. (1 Cor. 7:​10, 11) Bat, ting raonem kwestin hia, ‘Wat moa mi savve duim for strongim frenship blo mitufala?’ Reviewim wat Bible talem abaotem wei for showim love, and ting raonem wat iu savve duim for impruv lo samfala quality wea stap lo 1 Corinthians 13:​4-8a. (Readim.) Instead for ting for lusim marit partner blo iu, traem best for kam klos lo marit partner blo iu moa. Focus lo wat iu savve duim for buildim bak relationship blo iutufala. Prea lo Jehovah for helpem iu. Kasem help from olketa pablikeson and video blo iumi, and from olketa elder and olketa nara mature Christian. Taem iu gohed depend lo Jehovah, datfala mek-thri rope wea hem strongest wan lo “thrifala rope wea join tugeta,” marit blo iu bae “no isi for brek.”—Eccl. 4:12.

17. Wat nao olketa wea plan for marit and olketa wea marit savve duim for hapi?

¹⁷ Jehovah laekem evri servant blo hem for hapi, includim olketa wea plan for marit and olketa wea marit finis. So if iu singol and laek for marit, chusim gud samwan wea bae kamap fren blo iu for olowe. And if iu marit finis, gohed strongim frenship blo iu witim marit partner blo iu. Waka hard for winim olketa challenge wea maet kamap insaed marit blo iu witim help blo Jehovah. Taem iu duim olketa samting hia, iu bae “enjoyim laef” witim marit partner blo iu wea iu lovem!—Eccl. 9:9.