Understandim Olketa Word Piksa lo Bible

Bible garem staka handred word piksa. Bat, staka wea readim Bible stragol for understandim olketa word piksa hia. (Matt. 13:13) Wat nao savve helpem iu for kasem stret mining blo olketa word piksa wea Bible iusim? Traem olketa idea hia:

• Identifyim topic and piksa. Olketa word piksa comparem wanfala topic witim wanfala piksa. For example, Revelation 3:3 comparem kaming blo Jesus (topic) witim wanfala thief wea kam for steal (piksa).

• Trae for luksavve hao datfala topic and piksa hem semsem. Ting raonem wat nao samfala samting wea semsem between datfala topic and datfala piksa.

• Mek sure wat iu lanem hem wat datfala word piksa hem teachim. Samtaems samwan savve misunderstandim wat hem semsem between topic and piksa. Olsem lo example antap, Jesus no kam for stealim eniting. Bat, context showim dat kaming blo Jesus bae olsem wanfala thief lo wei wea pipol bae no expectim and hem bae no talem taem wea hem kam.