Lane From “God blo Evri Comfort”

1. Why nao iumi shud comfortim olketa narawan?

IUMI evriwan “safa lo enikaen hard taem,” so iumi needim comfort and encouragement samfala taem. (1 Pet. 1:6) Iumi barava tinghae tumas lo comfort wea iumi kasem from olketa narawan, so iumi shud kwiktaem for provaedem comfort for olketa wea kasem hard taem. (Matt. 7:12) Jehovah, “God blo evri comfort,” hem showim iumi hao for “comfortim olketa narawan wea kasem hard taem.” Iumi savve followim example blo hem taem iumi “comfortim olketa narawan.” (2 Cor. 1:​3, 4; 1 Thess. 4:18) Iumi duim no bikos hem samting wea iumi mas duim, bat bikos iumi lovem olketa brata and sista blo iumi. Lo disfala article, bae iumi storyim (1) hao Bible describem word comfort, (2) hao iumi savve comfortim olketa narawan, and (3) wat iumi savve duim taem iumi needim comfort.

HAO BIBLE DESCRIBEM WORD COMFORT

2. Lo Bible, wat nao disfala word “comfort” hem minim?

² Lo Bible, Greek word wea olketa transleitim for “comfort” hem garem olketa difren mining depend lo context. Hem savve minim “encouragem,” or “strongim.” (Rom. 12:8; lukim “encourages” lo English study note.) Lo Greek languis, literal mining blo word “comfort” hem minim for kol for samwan kam standap saed lo iu for helpem iu. So iumi savve imaginim diswan olsem wanfala fren wea kwiktaem kam for helpem fren blo hem wea safa, and provaedem eni help or sapot wea hem needim. Nomata wat kaen help nao datfala fren hem givim, tru comfort hem garem wanfala result nomoa, hem for buildim and strongim datfala person wea safa.

3. Hao nao Barnabas showim gud example lo wei for comfortim olketa narawan? (Lukim tu piksa.)

³ Tingim wanfala Bible example. Wanfala Christian wea nem blo hem Joseph hem showim nambawan example lo wei for encouragem and comfortim olketa narawan, from datwan olketa aposol kolem hem lo Barnabas, wea minim “Son blo Comfort.” (Acts 4:36) Nem hia hem barava fitim hem dastawe no enitaem moa Bible iusim datfala nem Joseph. Staka taem Barnabas duim samting for helpem olketa nara Christian taem olketa needim help. For example, taem Saul wea just kamap wanfala disaepol hem arrive lo Jerusalem, hem laek for meetim olketa nara disaepol. Bat, olketa fraetem hem bikos hem man wea savve persecutim olketa Christian bifor. Nomata olsem, Barnabas trustim Saul and introducem Saul lo olketa nara aposol.—Acts 9:​26-28.

HAO FOR COMFORTIM OLKETA NARAWAN

4. Wat nao wanfala lo olketa best wei for givim comfort? (Romans 1:​11, 12)

⁴ Visitim olketa if hem possible. Jehovah iusim olketa servant blo hem for givim comfort lo olketa narawan. For example, taem profet Elijah hem barava sorre, Jehovah iusim wanfala angel for encouragem hem. (1 Ki. 19:​4-7) Aposol Paul tu luksavve dat wei for visitim olketa brata and sista in person savve barava encouragem olketa. (Readim Romans 1:​11, 12.) Taem iu visitim samwan for givim comfort, spendem moa taem witim hem winim for story lelebet taem nomoa and go. (1 Cor. 16:7) If iu no fit for visitim samwan wea needim help, tingim dat wanfala phone kol, leta, card, or text message savve barava strongim hem. Hao, bae iu letem Jehovah for iusim iu for givim comfort lo olketa narawan?

5. Olketa wanem challenge nao iumi expectim?

⁵ Iumi stap lo olketa last day wea hem barava hard tumas, so iumi expectim dat olketa challenge bae kamap worse taem iumi trae for givim comfort lo olketa brata and sista in person. Taem Paul prison lo Rome, Onesiphorus, wea hem from Ephesus, hem lukaotem Paul for comfortim hem. Onesiphorus duim datwan nomata hem savve olketa bae putim hem lo prison or killim hem dae. (2 Tim. 1:​16-18) Olketa Witness lo Russia tu duim sem samting taem pipol persecutim olketa brata and sista blo olketa bikos lo faith blo olketa. Taem olketa Witness go for kot, olketa brata and sista go tu lo kotrum for sapotim olketa, nomata olketa savve dat wei for duim datwan bae mekem pipol for arrestim olketa. Wat nao iu savve duim distaem for followim example blo olketa hia wea brave? Iu savve studyim wat pipol blo God lo bifor and distaem olketa duim for comfortim each other and gohed hapi nomata olketa kasem persecution.

6. Hao nao iumi savve followim example blo Jehovah taem iumi comfortim olketa narawan? (Lukim tu piksa.)

⁶ Lisin lo olketa. Taem laef blo profet Elijah stap lo danger, hem pourimaot heart blo hem lo Jehovah. Loving God blo iumi lisin lo Elijah taem hem storyim olketa wari blo hem, nomata Hem savve finis lo olketa hard taem wea hem feisim. Jehovah even patient for lisin nomata Elijah gohed storyim sem samting nomoa! (1 Ki. 19:​9, 10, 14) And Jehovah duim sem samting tu taem hem allowim profet Habakkuk for talemaot olketa wari and daot blo hem, nomata wat Habakkuk talem hem here olsem hem challengem authority blo God. (Hab. 1:​2, 3) Distaem tu Jehovah lisin gud lo olketa prea blo iumi nomata hem savve finis lo wat iumi needim. Iumi savve followim example blo Jehovah taem iumi lisin gud and showim respect taem olketa brata and sista blo iumi story. Iumi “mas willing for lisin” taem olketa story, and no katem story or feel nogud nomata if wat olketa talem hem no stret or olketa storyim sem samting nomoa.—Jas. 1:19; Eccl. 7:9.

7. Hao nao bae iumi luksavve lo need blo samwan wea kasem hard taem?

⁷ Luksavve lo need blo wanfala person. Iumi no savve lukim heart blo pipol olsem Jehovah, bat iumi bae luksavve lo wat kaen comfort wanfala person needim only if iumi lisin gud lo hem. No tingse iu savve finis lo wat datfala person needim from iu tingse iu tu bae needim semkaen comfort if iu insaed sem situation. Iumi evriwan no semsem. So spendem taem for lisin gud and askem olketa kwestin wea bae helpem iu for savve lo feeling blo hem.—Prov. 20:5.

8. Hao nao Jesus comfortim Martha and Mary bihaen Lazarus dae? (Lukim tu piksa.)

⁸ Tingim wat Jesus duim for comfortim Martha and Mary bihaen brata blo tufala Lazarus dae. Tufala woman hia evriwan sorre bikos brata blo tufala dae, bat, Jesus comfortim tufala lo tufala difren wei. Afta Martha story witim Jesus, Jesus storyim truth abaotem resurrection and helpem hem for strongim faith blo hem lo datfala loving provision. Bat taem Mary kam and krae lo Jesus, Jesus no story abaotem resurrection. Instead, hem krae witim Mary and askem wea nao olketa putim body blo Lazarus. (John 11:​20-35) Wat nao leson? Taem iumi trae for comfortim olketa wea safa, iumi mas trae for luksavve wat nao need blo each wan winim wei for givim semkaen comfort for evriwan.

9. Hao nao iumi savve iusim Bible for comfortim olketa narawan? (Romans 15:​4, 5)

⁹ Iusim Bible. Taem iu sharem “comfort from olketa Holy Raeting” witim samwan, iu helpem datfala person for strongim hope blo hem. (Readim Romans 15:​4, 5.) Datfala hope savve barava comfortim and encouragem hem. (Isa. 40:31) Hao nao iu savve faendem wanfala scripture for encouragem samwan? Samfala keepim list blo olketa scripture wea olketa savve iusim taem olketa needim, olsem olketa scripture wea stap anda lo topic “Comfort” lo Scripture for Laef blo Christian buk. Askem Jehovah for helpem iu for iusim Word blo hem lo best wei for givim encouragement. Holy spirit blo hem savve helpem iu for tingim olketa comforting scripture taem iu need for givim comfort.—John 14:26.

10. Why nao iumi mas story kaen taem iumi trae for encouragem samwan?

¹⁰ Story kaen. Original languis word wea olketa iusim for “comfort” hem savve minim “encouragem.” Samfala taem maet iu need for encouragem datfala person wea iu comfortim for adjustim tingting blo hem. If iu need for duim datwan, tingting gud bifor iu talem samting nogud toktok blo iu hem no healim datfala man bat hem spoelem feeling blo hem. (Prov. 12:18) Jehovah showim perfect example lo datwan taem hem story witim Elijah, wea ting dat waka blo hem iusles nomoa and no eniwan lo Israel faithful lo Jehovah. Jehovah helpem Elijah for stretem tingting blo hem winim for talem dat wat Elijah tingim hem rong. (1 Ki. 19:​15-18) Iu tu savve duim sem samting sapos iu kaen and tingting gud firstaem bifor iu talem samting. Taem iu givim tok or koment lo olketa Christian meeting, evritaem story kaen and positive taem iu trae for encouragem and strongim olketa brata and sista.

11. Staka taem wat nao olketa wea kasem hard taem needim? (1 John 3:18)

¹¹ Provaedem practical help. Staka taem olketa wea kasem hard taem needim practical help winim for just herem nomoa comforting toktok from iumi. (Readim 1 John 3:18.) Barnabas showim gud example lo datwan. Hem salem wanfala pis land then hem givim selen wea hem tekem for sapotim olketa brata and sista wea just baptaes wea needim help. (Acts 4:​36, 37) Staka brata and sista distaem followim gudfala example blo hem for provaedem practical help for olketa wea garem need. Gabriela, from Poland, hem barava sorre and wari taem flood spoelem haos blo hem. Hem sei: “Mi barava fraet and wari, and parents blo mi wea stap witim mi tu feel olsem. Mi no savve lo wat for duim. Bat olketa brata and sista from olketa nara kongregeson wea klosap olketa kam and duim waka for repairim haos blo mi insaed wan day nomoa. Datwan strongim faith blo mi dat Jehovah hem iusim pipol blo hem for comfortim olketa wea safa.”

12. Hao nao wei wea iu no givap lo olketa hard taem savve helpem olketa nara brata and sista?

¹² Winim olketa hard taem wea kasem iu. Paul talem olketa Christian lo Thessalonica dat hem kasem comfort and strong taem hem herem dat olketa gohed faithful and no givap. Hem savve dat hem no waka hard nating for helpem olketa. (1 Thess. 3:​5-8) And Paul savve if hem gohed faithful lo Jehovah, example blo hem tu savve encouragem olketa brata and sista for gohed faithful, even olketa wea no meetim hem bifor. (Col. 2:​1, 2) Lo sem wei, taem olketa brata and sista blo iumi lukim hao Jehovah helpem iumi for no givap lo olketa hard taem wea kasem iumi datwan savve barava encouragem olketa.

13. Wat nao iumi mas gohed for duim taem iumi encouragem olketa narawan?

¹³ Patient. Olketa brata and sista wea discourage maet no stretawe feel beta taem iumi comfortim olketa. Bat Bible sei for iumi “gohed for encouragem narawan.” Disfala toktok “gohed for encouragem” hem showim dat diswan hem samting wea iumi mas continue for duim. (1 Thess. 5:11) Hem gud for patient taem iu gohed encouragem and comfortim olketa wea needim sapot blo iu. (1 Thess. 5:14) Bat samfala taem, iumi tu needim comfort. Lo taem olsem wat nao iumi savve duim?

TAEM IU NEEDIM COMFORT

14-15. Wat nao iumi shud duim taem iumi feel sorre or wari?

¹⁴ Prea lo Jehovah. Askem hem for comfortim iu taem iu feel sorre or wari. (Ps. 94:19) Story specific lo prea blo iu and pourimaot heart blo iu lo hem. (Ps. 62:8) Hem tru, Jehovah savve finis lo hao iu feel bifor iu prea. Bat, taem iu story from heart datwan showim iu garem faith lo hem. And Jehovah bae evritaem ansarem prea blo man wea garem faith lo hem, nomata datfala help hem no wat datfala person expectim. (Mark 11:24) Philippians 4:​6, 7 encouragem iumi olsem: “Barava prea strong witim wei for talem thankiu, and peace blo God wea winim nao wanem man savve minim bae gaedem heart blo iufala and tingting blo iufala.”

¹⁵ Askem narawan for help. Storyim feeling blo iu lo wanfala mature fren or lo wanfala elder wea iu trustim. Olketa brata and sista blo iu savve barava comfortim iu, bat olketa bae no savve lo feeling blo iu or wat iu needim unless iu talem olketa. (Prov. 14:10) Iu savve askem olketa for lisin lo iu or for sharem wanfala scripture or wanfala article wea olketa savve hem bae comfortim iu.

16. Wat nao maet happen taem olketa narawan trae for encouragem iu, bat wat nao iu shud tingim?

¹⁶ Patient and willing for forgive. Olketa brata and sista maet mekem mistek taem olketa trae for encouragem iu. For example, maet wat olketa talem or duim no mekem iu feel beta bat hem just mekem iu for feel worse go moa. If datwan happen, patient witim olketa. (1 Cor. 13:​4, 7) And tingim toktok wea stap lo James 3:​2, wea sei: “Sapos eniwan hem no stambol lo toktok blo hem, hem wanfala perfect man.” Focus lo olketa gud motive blo brata and sista blo iu. And tingim, olketa laek for duim gud samting olsem iu tu, bat olketa savve mekem mistek.—Matt. 26:41.

17. Wat nao iumi shud disaed strong for duim?

¹⁷ Iumi evriwan needim comfort and encouragement, and iumi bae needim datwan go moa taem olketa hard taem wea iumi experiencem lo olketa last day hem gohed for worse, and taem olketa enemy blo God olketa kros tumas and againstim iumi. So disaed strong for duim samting for gohed comfortim each other.