11-17 MAIO, 2026
NYIMBO NA. 7 Yahova ni mphanvu zathu
Khulupirirani Yahova wachilengedwe chose
‘Yahova, ndimwe Wamdzulumdzulu ndipo ndimwe wofunika kutonga dziko yose yapasi.’—SAL. 83:18.
CHOLINGA
Nkupfunzira kuti Yahova adzatithandize tikagumana na mabvuto.
1. Ko ni mabvuto yaponi yomwe Yobu adagumana nayo?
YOBU yemwe wenze munthu wokhulupirika adaluza vose vomwe wenze navo. Adaluza wana wake, chuma chake ndipo iye adayamba kudwala maninge. Kuingizira pamwapa, iye adaleka kulemekezewa na wanthu. Olo “azishamwali” wake chaiwo adamunenera vinthu vomwe vidamukwinyiririsa maninge. Mpakana nkazi wake adamuuza kuti ‘atukwane Mulungu kuti afe.’ (Yobu 2:9; 15:4, 5; 19:1-3) Mabvuto mwaya yadakachitisa Yobu kusiya kukhulupirira Mulungu, nkuyamba kukaikira kuti peno Yahova atetezadi atumiki wake wokhulupirika.
2-3. Ko tingambaganize chani tikambagumana na mabvuto, ndipo tipfunzire chani mu bukhu ya Yobu?
2 Isepano tikukhala mu “nthawe zoshupa.” (2 Tim. 3:1) Ndipomwapa, nthawe zinango tigumana na mabvuto yomwe yangayese chikhulupiriro chathu. Ndipo tikayamba kugumana na mabvuto, tingayambe kukhala na nkhawa maninge na kumbaganiza kuti tikwaniselini kupirira. Anango mpakana akaikira kuti peno Yahova awakondadi chaivo.
3 Peno imwepo mudadzibvako kale teneuyu, ayi kukwinyirira. Yobu adapfunzira kuti Yahova asiyalini atumiki wake omwe ni wokhulupirika kwa iye. Isembo tingakhale na chikhulupiriro ninge mwichi kwa Ababa wathu wa kudzulu. Chinthu chinango chomwe chingatithandize, ni kuwerenga bukhu ya Yobu na kuona vinthu viwiri vomwe iye ankutitsimikizira. Choyamba, kukhulupirira Yahova wa chilengedwe chose. Chachiwiri, tingakwanise kuwona kuti Yahova anamphanvu ndipo vomwe wapolomisa adzavikwanirisedi. Ndipo iye atithandiza kuti tipitirize kukhala paushamwali wolimba na iye.
SATANA ADAONEKERA KWA MULUNGU NA KWA ANGELO WOKHULUPIRIKA
4. Ko nchani chomwe chidachitika pomwe Yahova na angelo adagumana pabodzi?
4 Ntsiku inango, ‘wana wa Mulungu chaiwo,’ adaonekera pamaso pa Yahova. Baibolo iwonesa kuti ‘Satana adabwerambo.’ (Yobu 1:6) M’Baibolo kamwaka kenze koyamba kugumanika mawu yakuti “Satana,” yomwe yatanthauza “wotsutsa.” Satana ni mzondi nkulu wa Yahova. Panthawe yomwe umbachitika msonkhano muyu kudzulu, nkuti Satana wasiya kale kutumikira Mulungu. Iye adakhala mzondi kwa Yahova, kwa angelo wokhulupirika na kwa atumiki wa Yahova wokhulupirika. Yahova padafotokoza mawu yogumanika pa Genezesi 3:15, iye adaonesa kuti Satana ambachitalini pomwe mbali ya banja yake kudzulu.
5. Ko tikupfunzira chani pa vomwe Satana adanena kwa Yahova na momwe Yahova adadawirira?
5 Yahova adabvuma kuti vinembewe vomwe vidafotokozewa pa nsonkhano muyu kudzulu. Mawu ya Satana yawonesa kuti iye ni woipa ndipo afotokoza vinthu voipa kwa atumiki wokhulupirika wa Yahova. (Yobu 1:9; onani pomwe Chivumbuluso 12:10.) Vomwe vidachitika pa nsonkhano muyu, vititsimikizira pomwe kuti Yahova nthawe zose aphatisa basa mphanvu zake mwachilungamo. Tikupfunzira kuti Yahova apereka mwayi kwa aliyese pa vomwe angachite na vomwe angachitelini.
YAHOVA APEREKA MALILE YOCHITIRA VINTHU
6. Ko Yahova adaonesa tani kuti ni mphanvu zose pa nsonkhano omwe udachitika kudzulu? (Yobu 1:7, 8)
6 Werengani Yobu 1:7, 8. Yahova ndiye ambatsogolera nsonkhano muyu. Iye adamubvunza Satana kuti: “Ko ntima wako uli pa ntumiki wangu Yobu?” Yahova ambadziwa kuti Satana akufuna kudzudza Yobu. Naboni tiwone momwe Yahova adaphatisira basa mphanvu zake pakuthandiza ntumiki wake wokhulupirika Yobu.
7. Mobverana na Yobu 1:10, 11, ko Satana adanena chani pakunena va atumiki wokhulupirika wa Yahova?
7 Werengani Yobu 1:10, 11. Yahova ndiye wotonga wa dziko yose yapasi. Iye angachite chirichose chomwe wasalula ndipo adziwa momwe angaphatisire basa mphanvu zake. (Yer. 32:17; Dan. 4:35) Olo nteno, Satana adafotokoza kuti Yahova aphatisalini bwino basa mphanvu zake. Satana adafotokoza kuti Yahova adamupasa vinthu vizinji Yobu kuti amutumikire. Satana adanena pomwe kuti wanthu atumikira Yahova ndawa ya vinthu vabwino vomwe Yahova adawapasa. Ko Yahova adachita tani padabva vimwivi?
8-9. Ko Yahova adamuuza chani Satana ndipo ndawa chani? (Yobu 1:12) (Onani pomwe foto.)
8 Werengani Yobu 1:12. Yahova adabvuma kuti Satana ayese Yobu. Koma Yahova adapasa lamulo Satana yomwe ambafunika kuitewedza. Yahova adauza Satana kuti: ‘Ayi kumupha.’ Angelo wose kudzulu adabva pomwe Yahova ambapereka lamulo mwiyi kwa Satana ndipo Satana enze alibe mochitira. Ndipo iye wenze alibe mphanvu yochita vinthu vomwe Yahova alibe kumubvumiza ndipo viri teno mpakana ntsiku zino. Ndipo nthawe mwiyi Yahova adaphatisa basa mphanvu zake kuteteza Yobu na kuonesa kuti ni Mulungu wachilungamo komasoti wachikondi.
9 Cholinga cha Satana chiribe kukwanisika. Yobu adapitiriza basi kukhala wokhulupirika kwa Yahova. (Yobu 1:22) Koma Yahova ambadziwa kuti Satana apitirize kumuyesa basi Yobu.
Yahova adabvuma kuti Satana afotokoze maganizo yake pagulu ya angelo (Onani ndime 8-9)
10. Ndawa chani Yahova adabvuma kuti Satana ayese Yobu? (Yobu 2:2-6)
10 Werengani Yobu 2:2-6. Panthawe mwiyi Satana adayesa maninge Yobu na cholinga chakuti asiye kutumikira Yahova. Satana adanena kuti Yobu asiye kutumikira Yahova na cholinga chakuti apulumuse moyo wake. Koma kuti awonese kuti vomwe Satana adafotokoza ni vabodza, Yahova adabvuma kuti Satana achitise Yobu kuti adwale. Pamwapa soti Yahova adapereka lamulo. Iye adati: ‘Ayi kumupha!’ Ndipo pamwapa pomwe Satana wenze alibe mochitira. Pamwapa Yahova adaonesa soti kuti ndiye ambatonga pomwe Yobu ambayesewa ndipo Satana adakakwanisalini kuchita vinthu vomwe Yahova alibe kuvinena kuti vichitike.
YAHOVA ADAMALISA MABVUTO YA YOBU
11. Mobverana na Yobu 42:10-13, ko Yahova adadalisa tani Yobu?
11 Werengani Yobu 42:10-13. Pomwe Yobu adaonesa kuti apitirize kukhala wokhulupirika, Yahova alibe kubvuma kuti Satana apitirize kumuyesa basi. Kuingizira pamwapa Yahova adamalisa mabvuto yose ya Yobu. Pamwapa soti palibe chomwe Satana adakakwanisa kuchita. Iye wenze alibe mphanvu kuti angakwanise kukangisa Yahova kuti aleke kudalisa Yobu.
12. Perekani chitsanzo cha momwe Yahova aphatisira basa mphanvu zake, pakufuna kupulumusa atumiki wake wokhulupirika.
12 Yahova aphatisa basa mphanvu zake kuti athandize atumiki wokhulupirika ntsiku zino. Mwakulinganiza, mu 1945 mu nthawe ya chipani cha Nazi, Mboni za Yahova zokwana 230 zomwe zenze mudjeri zidapulumuka pa nthawe yomwe ambayenda kuti akaphewe. Patsogolo pakuti agumana na chiyeso chogopsya mwichi, iwo adanena kuti: “Yahova watipulumusa ninge momwe adapulumusira alumbwana atatu wa Chiheberi omwe enze adaponyewa kumoto, koma iwo alibe kubva olo pfungo ya moto ndawa Yahova adawapulumusa. . . . Mwanjira ibodzibodzi mwiyi, atumiki wa Yahova enze pachiyeso koma Yahova adawapulumusa.” Iwo adanena pomwe kuti: “Yahova adatipulumusa ninge momwe adapulumusira Danieli . . . mu chidindi cha mphondolo . . . Mwaya yenze madaliso yathu yakulu.”—Onani Danieli 3:27; 6:22.
13. Tikakhala kuti tikugumana na mabvuto, ko tingakhale wotsimikizira va chani? (Onani pomwe foto.)
13 Isembo tingagumane na mabvuto yomwe yangachitise kuti timbadzibve ninge tiri muchidindi cha mphondolo. (1 Pet. 5:8-10) Nthawe zinango tikhala wokwinyirira maninge ndawa viwoneka ninge kuti mabvuto yathu yangamalelini. Panthawe mwiyi, kuganizira vomwe vidachitikira Yobu kungatithandize maninge. Isepano tingakhale na chidikhiro manjeuno kuti Yahova adzamalise mabvuto yathu manjeuno panango kutsogolo. Ndipo Yahova adzamalise mabvuto yose yomwe tikugumana nayo mu dziko inyowani!
Yahova adzamalise mabvuto ya atumiki wake wokhulupirika (Onani ndime 13)
YAHOVA AWAKONDA MANINGE ATUMIKI WAKE WOKHULUPIRIKA
14-15. Ko Yahova akufuna kuwachitira chani atumiki wake wokhulupirika, ndipo ndawa chani? (Yobu 14:15) (Onani pomwe foto ya pakhava.)
14 Werengani Yobu 14:15. Ababa wathu wakudzulu ni wokhulupirika kwa wale omwe ni okhulupirikambo kwa iye. Iye awakonda maninge atumiki wake ndipo wale omwe adamwalira, adzawamukise pomwe. Tidzakhale wokondwa mu dziko inyowani ndawa Yahova adzamukise wanthu omwe adamwalira.—Yes. 65:17.
15 Ni shuwadi kuti Yobu adapitiriza basi kukhala mudziko yomwe imbatongewa na Satana, koma Baibolo inena kuti Yahova adadalisa maninge Yobu ndipo adamupasa vinthu voposha vomwe wenze navo pakuyamba. Madaliso mwaya yadawonesa vomwe Yahova adzamuchitire Yobu kutsogolo ndipo Yahova afuna pomwe kuti atumiki wake wokhulupirika akhale na moyo wokondwa. Iye adzadalise atumiki wake wose wokhulupirika na kuwapasa moyo wosapera mudziko inyowani. (Chiv. 21:3, 4) Pakuti Yahova ni yemwe adalenga vose, palibe munthu angamukangise kuchita vinthu vomwe iye akufuna kwa atumiki wake wokhulupirika. Kuganizira momwe Yahova adzatidalisire, kungatithandize maninge manjeuno tikambagumana na mabvuto!
Patsogolo pakuti wagumana na mabvuto, Yobu na nkazi wake adatambira madaliso yazinji yochokera kwa Yahova (Onani ndime 14-15)
16. Ko ni chifukwa chinango chiponi chomwe chitichitisa kukhulupirira kuti Yahova ni wolamulira wa chilengedwe chose?
16 Patsogolo pakuti wakhala na moyo utali, Yobu adamwalira. Ndawa yakuti Yahova ndiye adalenga vose, iye anamphanvu za kudzamumukisa pomwe. (Deut. 32:39) Yahova wasalula kale nthawe yakuti adzamukise atumiki wake okhulupirika ndipo palibe yemwe angamukangise kuchita vimwivi.—Aro. 8:38, 39.
MUMBAKHULUPIRIRE MANINGE YAHOVA
17. Ko nchani chomwe chikuwonesa kuti Satana angakwaniselini kudzonga atumiki wa Yahova?
17 Isepano tapfunzira mu bukhu ya Yobu kuti, tinavifukwa vizinji vokhulupirira Yahova. Titembeja maninge Yahova ndawa iye apulumusa atumiki wake. Tikudziwa kuti Yahova ni yemwe adalenga vinthu vose. Ndawa wanthu pafupifupi 9 midyawu ntsiku zino, ankumutumikira. Ndipo maboma yazinji ntsiku zino na atsogoleri wachipembedzo ayesesa maulendo yazinji kulambiza atumiki wa Yahova kumutumikira. Koma iwo akangira kulambiza ndawa yakuti Yahova ali kumbali yathu. (Yes. 54:17) Ndipo palibe yemwe angatilambize kuuza wanthu anango va ntontholo wabwino na kuonesa kuti Satana ni wabodza nakuti ni woipa. Olo impfa ingatiwinelini ndawa Yahova adzamukise wanthu omwe adamwalira omwe ni okhulupirika kwa iye.—Hos. 13:14.
18. Ndawa chani tifunikalini kukhala na mantha na vinthu vomwe vidzachitike kutsogolo?
18 Tikambaganizira va bukhu ya Yobu, virimbikisa chikhulupiriro chathu chakuti Yahova adzapitirize kukhala ku saidi yathu nthawe zose. Pa chisautso chikulu, Satana na magulu yake yankhondo, adzaganize kuti atumiki wa Yahova ni wofoka ndipo adzawone kuti ni wosashupa kuwawina. Koma Yahova adzaphatise basa mphanvu zake zose ninge momwe adachitira na Yobu ndipo iye adzabvumelini kuti Satana adzonge atumiki wake. Manjemanje apa Yahova adzamalise mabvuto yose yomwe Satana adayambisa. Satana na viwanda vake adzaponyewe kuphompho ndipo adzakhale muko kwa magole 1000. (Luka 8:31; Chiv. 20:1-3) Ndipo patsogolo pake, wose omwe ali kumbali ya Satana adzadzongewe ninge momwe Yahova adapolomisira.—Gen. 3:15; Aro. 16:20; Chiv. 20:10.
19. Ko ni madaliso yaponi yomwe wanthu omwe ni wokhulupirika kwa Yahova adzatambire kutsogolo? (Onani pomwe foto.)
19 Tikudikhira kudzakhala na moyo wokondwa mparadaiso. Yahova ankupolomisa kuti: “Onani! Vinthu vose vomwe ni kukonza ni vinyowani.” (Chiv. 21:5) Ko vimwivi vikutanthauza chani? Vinkutanthauza kuti Satana na viwanda vake adzakwaniselini pomwe kusokoneza wanthu. Ndipo palibe yemwe adzakhale na nkhawa, wanthu adzadwalelini pomwe ndipo Yahova adzamukise wale omwe adamwalira! Panthawe mwiyi, tidzakhale na moyo wabwino na wokondwa maninge!
Yahova adzadalise atumiki wake wose omwe ni wokhulupirika kwa iye (Onani ndime 19)
20. Ko imwepo ndimwe wotsimikizira kuchita chani?
20 Isepano tinkufunika kukhala wolimba ntima kuti tikwanise kulimbana na mabvuto yomwe tinkugumana nayo ntsiku zino na kupitiriza kukhala wokhulupirika. Ndawa ya vimwivi, ndise wotsimikiza kupitiriza kukhulupirira Yahova na ntima wose na kupitiriza kukhala kumbali ya utongi wake. Tikufuna kuwonesa chikondi kwa Ababa wathu wakudzulu kuti tiwonese kuti Satana ni wabodza. Tingakhale wotsimikiza kuti tikapitiriza kukhala wokhulupirika kwa Yahova, tidzakhale na moyo wabwino ndawa Yahova akufunisisa kudalisa atumiki wake wokhulupirika!
NYIMBO NA. 153 Nibatsireni kukhala wolimba moyo