18-24 MAIO, 2026
NYIMBO NA. 35 ‘Mumbatsimikizire kuti vinthu vofunika maninge ni viponi’
Ayi kubvuma kuti chirichose chikukangiseni kuchita vinthu vofunika maninge
“Pitirizani kuzindikira vomwe Yahova afuna.”—AEF. 5:17.
CHOLINGA
Nkuona vomwe tingachite kuti timbaikhe patsogolo kutumikira Yahova olo kuti tikugumana na vinthu vomwe vitichitisa kumbakhala na nkhawa.
1-2. Ko ni chitsanzo chiponi chomwe chikuwonesa kuti chinthu chofunika maninge nthawe zinango chingakhale chinthu chosokoneza?
LINGANIZANI kuti mukufambisa karo ndipo mwadzidzidzi munthu wakufonerani. Nishuwadi kuti vingachitike kuti pana munthu yemwe akufunikira thandizo yanu, koma panthawe mwiyi mufunikalini kudawira foni ndawa yakuti mukufambisa karo ndipo mufunika kukhala tcheru maninge. Nthawe zinango pa moyo wathu pangakhale vinthu vinango vomwe tindofunika kusalula kuti vinthu vofunika maninge ni viponi panthawe mwiyo.
2 Isepano tikhala na vochitika vizinji maninge, olo teno tidziwa kuti chofunika maninge ni kuikha kutumikiraa Yahova pamalo yoyamba. (Mat. 6:33) Ninge diraiva yemwe abvumalini kuti chinthu chirichose chimusokoneze pomwe akufambisa karo, atumikimbo wa Yahova abvumalini kuti chirichose chiwasokoneze kuikha kutumikira Yahova pamalo yoyamba.—Miy. 4:25; Mat. 6:22.
3. Ndawa chani ni vabwino kupfunzira momwe tingalimbanirane na vinthu vomwe vingatisokoneze?
3 Isepano tifunalini kuti chirichose chitikangise kuikha kutumikira Yahova pamalo yoyamba. Koma ndawa yakuti tikhala na vochita vizinji, tikaleka kusamala tingasokoneze ushamwali wathu na Yahova. (Luka 21:34-36) Isepano kuti tikwanise kuikha Yahova pamalo yoyamba, tikambirane vinthu vitatu vomwe vingatithandize. Choyamba, vinthu vomwe vingatisokoneze pomwe tikutumikira Yahova. Chachiwiri, vomwe Yesu adachita kuti ayikhe kutumikira Yahova pamalo yoyamba ndipo chachitatu, momwe tingatewedzerere Yesu.
KO NI VINTHU VIPONI VOMWE VINGATISOKONEZE?
4-6. Ko ni vinthu viponi vomwe vingatisokoneze?
4 Pana vinthu vizinji vomwe vitichitisa kukhala na nkhawa. Mwakulinganiza, kudwala, kugumana na mabvuto ya m’banja na mabvuto yanango. Ni shuwadi kuti vinthu vimwivi vingambatichitise kukhala na nkhawa koma tifunikalini kubvuma kuti vinthu vimwivi vitisokoneze nkuleka kuikha kutumikira Yahova pamalo yoyamba. Ko vimwivi vingachitike tani? Vingachitike peno tayamba kumbandoviganizira maninge vinthu vimwivi.
5 Azinji wa isepano tigumana na mabvuto ninge, kusowa kwa kobiri, vipiringu, matenda na mabvuto yanango yomwe yakuchitika mu dziko yoipa iyi. (2 Tim. 3:1) Tikambagumana na mabvuto ninge mwaya, tingayambe kukhala na nkhawa maninge ndipo tingambandoganizira va mabvuto yathu mwaya.
6 Panango imwepo munkudziwako wanthu omwe adagumanako na mabvuto ndipo yadawachitisa kuti vinthu vichinje pa moyo wawo. Shuwadi, wanthu akakhala kuti akugumana na mabvuto akhala wokwinyirira maninge. Vimwivi vichitika ndawa yakuti Yahova alibe kutilenga kuti timbagumane na mabvuto panango kukhala na nkhawa. Wanthu anango awona kuti mabvuto yomwe akugumana nayo yangamalerini. Ndipomwapa, andomalira nthawe yawo ikulu ankuchita vinthu vokondweresa. Ko imwepo mungachite chani peno munkugumana na bvuto mwiyi? Naboni tiwone momwe chitsanzo cha Yesu chingatithandizire kupitiriza kuikha Yahova pa malo yoyamba.
KO YESU AMBACHITA TANI KUTI AYIKHE KUTUMIKIRA YAHOVA PAMALO YOYAMBA?
7. Ko ni chani chomwe chidakasokoneza Yesu pakutumikira Yahova?
7 Penze vinthu vizinji vomwe vidakamusokoneza Yesu kuleka kuikha kutumikira Yahova pamalo yoyamba. Ninge nkhani za ndale. Mu nthawe za Yesu wanthu azinji enze wosauka, iwo ambachitiriwa vinthu viribe chilungamo na Aroma komasoti Ayuda anango. (Mat. 14:14; Maliko 14:7) Pomwe wanthu adazindikira kuti Yesu anamphanvu yochita vodabwisa, iwo ambafuna kuti Yesu akhale mpfumu yawo. (Yoh. 6:14, 15) Kuingizira pamwapa, Satana adayesa Yesu pakumuuza kuti amupase maufumu yose kuti akhale wolamulira. (Mat. 4:8, 9) Nayembo ntumi Petulo yemwe wenze shamwali wake wapamoyo wa Yesu adamulimbikisa kuti: “Dzikomereni ntima Ambuya.”—Mat. 16:21, 22.
8. Ko Yesu ambachita tani kuti adziteteze ku vinthu vomwe vidakamusokoneza kutumikira Yahova?
8 Ko Yesu ambachita tani kuti apitirize kuikha kutumikira Yahova pamalo yoyamba? Pali njira zitatu za momwe iye ambachitira vimwivi. Yoyamba, iye ambaganiza ninge Yahova. (Yoh. 8:28; 14:9) Yachiwiri, ambatangwanika maninge na basa yolalikira. (Mat. 9:35) Ndipo yachitatu ambaikhira maninge nzeru pa vinthu vofunika. (Yoh. 4:34) Yesu adalamba motsimikiza pomwe Satana ambamuyesa. Yesu ambadziwa kuti Petulo ambafuna kumuthandiza koma vomwe Petulo adanena, ni vomwelini Yahova ambafuna. (Mat. 4:10; 16:23) Yesu alibe kubvuma kuti maganizo ya wanthu na voyankhula vawo vimukangise kutumikira Yahova. Ni shuwadi kuti vinthu vomwe vidakasokoneza Yesu mu nthawe yake ni vosiyana maninge na vomwe vingatisokoneze isepano ntsiku zino. Koma chitsanzo chake chingatithandize maninge kulimbana na vinthu vomwe vingatisokoneze pomwe tikutumikira Yahova.
KO TINGAPEWE TANI VINTHU VOMWE VINGATICHITISE KUTI TISIYE KUIKHA KUTUMIKIRA YAHOVA PAMALO YOYAMBA?
9. Ko tingachite tani kuti “tipitirize kuzindikira vomwe Yahova afuna?” (Aefeso 5:17)
9 Mbaganizani ninge Yahova. Vimwivi vidzakuthandizeni “kuzindikira vomwe Yahova afuna.” (Werengani Aefeso 5:17.) Imwepo mungadziwe vomwe Yahova afuna mukambawerenga Baibolo na kuganizira. Olo kuti Baibolo ingafotokozelini mwasitiriti vomwe mufunika kusalula pa bvuto yanu, ni vokwanisika kusalula vinthu vomwe vingakondwerese Yahova. Ko mungachite tani vimwivi? Mufunika kudziwa bwino maganizo ya Yahova na kuphatisa basa vomwe mupfunzira.
10. Ko tingambaganize tani ninge Yahova?
10 Isepano tingakwanise kuganiza ninge Yahova, tikambapfunzira mawu yake na kuganizira momwe iye achitira vinthu na wanthu. (Yer. 45:5) Tikambawerenga Baibolo tingambadzibvunze kuti: ‘Ko vimwivi vinkunipfunzisa chani va Yahova? Ko nikufunika kuchinja chani pa moyo wangu kuti nimbawone vinthu ninge momwe Yahova aviwonera?’ Tikudziwa kuti Yahova ni wanzeru maninge kuposha isepano. (Yes. 55:9) Ndipomwapa, timukumbira kuti atithandize kuyadziwa bwino maganizo yake, nkumbawona vinthu ninge momwe iye aviwonera.—Sal. 143:10; 1 Yoh. 5:14.
11. Ko Yahova afunalini kuti timbakhale na nkhawa na chani?
11 Yahova afuna kuti tikhale wokonzeka mpakana mapeto. Ndipomwapa, iye afunalini kuti chinthu chirichose chitisokoneze pomwe tikumutumikira. (Mat. 24:44) Iye akomedzewalini akambawona kuti isepano tinankhawa maninge. (Mat. 6:31, 32) Ni ndawa yake iye atipasa malangizo yabwino kuti tidziwe vomwe tifunika kuchita tikakhala kuti tinankhawa. Peno tikumukumbira nzeru kuti atithandize pomwe tinkugumana na mabvuto, iye adzatithandize.—Sal. 55:22; Miy. 3:5-7.
12. Ko nchani chomwe chidzatithandize kulimbana na nkhawa zathu? (Mateyu 5:3)
12 Khalani wotangwanika na basa za Yahova. Tose isepano tikhala na nkhawa ndawa ya vochitika va mudziko ya Satana iyi. Ndipomwapa, tikhala otangwanika maninge pakutumikira Yahova ndawa kutithandiza kuti osati timbakhale na nkhawa maninge na vinthu vimwivi. Peno tichita vose vomwe tingakwanise kuti tipitirize kukhala paushamwali na Yahova, tidzakhale wokondwa maninge. (Werengani Mateyu 5:3.) Tingambachite vimwivi, pa kuwerenga Baibolo na kuchita vose vomwe tingakwanise pa kutumikira Yahova. Tikachita teno, tidzaphatise basa nthawe yathu mwanzeru ndipo tidzakondwerese Yahova.—Miy. 23:15.
13. Ko tingaphatise tani basa “nthawe yathu mwanzeru?”
13 Ninge atumiki wa Yahova, “mumbaphatise basa bwino nthawe yanu.” (Aef. 5:15, 16) Vesi mwiyi indonenalini momwe tingaphatisire basa nthawe yathu pa basa zathu za ntsiku na ntsiku. M’malo mwa vimwivi, itilimbikisa kuphatisa basa bwino nthawe yathu ntsiku zomalizira zino. Ko tingaphatise tani basa bwino nthawe yathu mu njira yabwino? Tikambandokhalira kunyang’anira vinthu voipa na kuwerenga nkhani zoipa vingasokoneze ushamwali wathu na Yahova. Chinthu chabwino kuchita ni kusiya kunyang’anira vinthu vimwivi. Tikachita teno, tidzakhale na nthawe ikulu yolimbisa ushamwali wathu na Yahova. Isepano tingambaganizire pomwe momwe tingakulisire buya yathu mu umboni, ninge kuyenda kukachitisa maulendo yobwereza. Kuingizira pamwapa, tifunika kuphatisa basa nthawe yathu pa kuthandiza anango ‘kudziwa bwinobwino chonadi kuti adzapulumuke.’—1 Tim. 2:4.
14. Ko ni vifukwa vinango viponi vomwe vitichitisa kukhala wotangwanika pakuchita basa zomwe Yahova afuna? (Onani pomwe foto.)
14 Tikakhala kuti tikutangwanika maninge pa kutumikira Yahova, vitichitisa kuti timbakwanise kulimbana na mabvuto yomwe tikugumana nayo mudziko ya Satana iyi. Olo kuti tinkugumana na mabvuto, ninge nkhani za ndale kusowa kwa kobiri, kuwanda kwa matenda tikhalalini na nkhawa maninge. Tikwanisa kuona kuti ni vinthu vomwe vidaneneweratu kuti vidzachitike mu ntsiku zomalizira. Tibvumalini kuti vinthu vimwivi visokoneze ushamwali wathu na Yahova ndipo tikhala na chikhulupiriro chakuti Yahova adzakwanirise vomwe adapolomisa kutsogolo. Pomwe tikudikhira kuti vimwivi vichitike, naboni tipitirize kukhala wodekha na kukhulupirira kuti Yahova apitirize kutithandiza.—Sal. 16:8; 112:1, 6-8.
Olo kuti padziko yapasi pankuchitika vinthu voipa maninge, pitirizani kuikha kutumikira Yahova pa malo yoyamba (Onani ndime 14)b
15. Mobverana na lemba ya 1 Petulo 4:7 ko tifunika kuchita chani ndipo ndawa chani?
15 Mbakumbukirani vinthu vomwe ni vofunika maninge. Wanthu azinji ntsiku zino, amala nthawe yawo ankuchita vinthu vokondweresa m’malo moganizira kuti mapeto yali pafupi. Olo kuti vinthu vokondweresa ni vofunika, tifunika kukhala “woganiza bwino” ndawa tingayambe kuganiza ninge wanthu wa ku dziko panango kuti omwe atewedzalini malangizo ya Mulungu. (Werengani 1 Petulo 4:7.) Ko kukhala woganiza bwino kutanthauza chani? Kutanthauza kuganiza bwino tikanati kuchita chosalula. Ndipo vimwivi vidzatithandize kukhala na maganizo yabwino pa vinthu vokondweresa. Tikambachita vimwivi, tiyamba kuganiza ninge momwe Yahova aganizira ndipo tikwanisa kuzindikira kuti vinthu vofunika maninge ni viponi.—2 Tim. 1:7.
16. Ko tinkupfunzira chani pa vomwe Yesu adachita pomwe adasala pang’ono kufa?
16 Yesu ambadziwa kuti vinthu vofunika maninge ni viponi. Pomwe adasala pang’ono kufa, iye ambaganizira maninge va kupitiriza kuikha kutumikira Yahova pamalo yoyamba. Kuti akwanise kuchita vimwivi, adapemphera maninge. Koma wopfunzira wake alibe kukhala maso, iwo enze “wofoka na wokwinyirira”.—Luka 22:39-46; Yoh. 19:30.
17. Ndawa chani wanthu azinji aphatisa basa intaneti ndipo ni chani chomwe chingawachitikire? (Onani pomwe foto.)
17 Isembo tikukhala mu nthawe zoshupa ndipo nthawe zinango tingambadzibve kukhala woneta maninge na wokwinyirira. Ndipo vinthu vomwe vikuchitika muntsiku zomalizira zino, vingatichitise kukhala na nkhawa. Anango pakufuna kulimbana na mabvuto yawo, amala nthawe itali ali pa intaneti. Mwakulinganiza, aphatisa basa intaneti kuti ambacheze na azibale wawo na azishamwali wawo ndipo atumizirana mafoto, mavidiyo na masenzeka yanango. Koma azinji akhala wotangwanika maninge na vomwe vikuchitika mudziko iyi ndipo amala nthawe yawo ikulu akuchita vinthu vimwivi. Kuti vimwivi vireke kutichitikira, tingadzibvunze kuti: ‘Ko patsogolo pakuti naphatisa basa intaneti, nidzibva bwino panango chikumbuntima changu chinishupa? Ko malo yochezera ya pa intaneti yanimalira nthawe yangu ikulu ndipo nikwanisalini kuchita vinthu vofunika maninge?’
Kuganiza bwino kudzatithandize kupewa vinthu vosokoneza vomwe vigumanika pa intaneti na vokondweresa vinango (Onani ndime 17)
18. Ndawa chani tifunikira nzeru tikakhala kuti tikufuna kusalula vinthu vomwe tinkufuna kunyang’anira pa intaneti?
18 Tikakhala kuti tikunyang’anira mavidiyo pa intaneti panango tikuchita masenzeka yanango, tifunika kuchita vinthu vimwivi mwanzeru. Vinthu mwivi vingakhale vinthu vokondweresa vomwe vingatichitise kubvako bwino. Koma kuganiza bwino kudzatithandize kuzindikira kuti vinthu vofunika maninge ni viponi. Pana malo yanango pa intaneti pomwe ukakhala kuti ukunyang’anira vidiyo, ikandomala ibwereratu inango ndipo kumala nthawe yathu ikulu tikunyang’anira pangabwere vinthu vinango voipa. Ni vimwiviretu vomwe vidachitikira m’bale munango wa ku Ásia. Iye adayamba kumbanyang’anira mavidiyo pa intaneti. Akakhala kuti akunyang’anira mavidiyo mwaya, pambabwera soti mavidiyo yanango yowonesa volaula ndipo patsogolo pake iye adayamba kunyang’anira mavidiyo yowonesa volaula. Na thandizo ya akulu komasoti azishamwali wake, iye adakwanisa kusiya kunyang’anira vinthu vimwivi na kuchepesa nthawe yomwe ambamala ankucheza pa foni. Nkhani mwiyi inkutipfunzisa momwe tingaphatisire bwino basa nthawe yathu.
19. Ko nchani chomwe chingatichitikire peno tiikha pamalo yoyamba vinthu vokondweresa?
19 Isembo tifunika kukhala osamala na vinthu vomwe tisalula kuchita ntsiku na ntsiku. Ni shuwadi kuti tose isepano tifunambo kuchita vinthu vomwe ni vokondweresa, koma tikaleka kusamala vinthu vimwivo vingambatimalire nthawe yathu nkuleka kuchita vinthu vofunika maninge. (Afil. 1:10) Munthu aliyese asalula yekha momwe angaphatisire basa nthawe yake. Koma pakusalula momwe mungaphatisire basa nthawe yanu, dzibvunzeni kuti: ‘Ko nthawe yomwe nimala pakuchita vinthu vokondweresa, viwonesa kuti nichita vinthu moganiza bwino? Ko niwonesa kuti nikuikha Yahova pamalo yoyamba?’
20. Ko nchani chomwe chingatichitikire peno tisamalalini na vinthu vomwe vingatisokoneze?
20 Ni vabwino maninge kukhala wosamala na vinthu vomwe vingasokoneze ushamwali wathu na Yahova. (Yes. 48:17) Tikachita teneuyu, na thandizo ya Yahova tidzakwanise kulimbana na bvuto iriyose. Ndipo vinthu vomwe vikuchitika mu dziko iyi na vinthu vokondweresa, vidzatichitiselini kuti timbaviyikhe pamalo yoyamba. Ndipomwapa, tifunika kuyesesa kuti timbaganize ninge Yahova na kupitiriza kutangwanika na vinthu vomwe iye akondwera navo na kumbakumbukira kuti vinthu vofunika maninge ni viponi. Tikachita vimwivi, tidzasokonezewelini ndipo ‘tidzaphate mwamphanvu moyo chaiwo.’—1 Tim. 6:19.
NYIMBO NA. 129 Tipitirize kupirira
a DZIWANI IVI: Basa za Mulungu, ziphatanidzapo chirichose chomwe chichita mbali pakutumikira Yahova. Mwakulinganiza, kuwerenga Baibolo, kugumanika pamisonkhano, kuchita pfunziro ya banja na kuyenda kukalalikira. Komasoti tikhala kuti tikutumikira Yahova tikambathandizira pa basa yomangamanga, kuthandizira kukonza pomwe nyumba zathu za Ufumu, kuthandizira pakachitika matsoka ya nchilengedwe, kuthandizira basa zinango pansonkhano wachigawo na kukatumikira pa Beteli.
b MAWU YOFOTOKOZERA FOTO: Mwamuna na nkazi wake akuchitalini nkhawa na vinthu vomwe vikuchitika mu dziko iyi ndipo ankutangwanika maninge pa basa yolalikira.