Bukhu ya Yobu ingakuthandizeni mukambabonera

1-2. Ndawa chani tingaphindule maninge tikambawerenga bukhu ya Yobu?

KO MUDAWERENGAKO kale bukhu ya Yobu manjemanjepa? Olo kuti idanembewa kalekale magole 3500, iyo niyothandiza maninge. Ndipo wanthu azinji aona kuti ni bukhu yabwino maninge. Komasoti atembeja maninge ndawa adaphatisa basa mawu yosashupa kubva komasoti yolimbikisa. Mose ndiye adanemba bukhu mweyi, koma Yahova ndiye adamuthandiza kuti akwanise kunemba.—2 Tim. 3:16.

² Bukhu ya Yobu ni yofunika maninge m’Baibolo. Ndawa chani? Ndawa yakuti itithandiza kubvesa kuti angelo na wanthu afunika kusalula kutumikira Yahova na kuchenesa dzina yake. Komasoti bukhu mweyi itipfunzisa va makhalidwe yabwino ya Yahova ninge chikondi, nzeru, chilungamo na mphanvu zake. Mwakulinganiza, bukhu ya Yobu inena kuti Yahova ni ‘wamphanvu zose’ kwa maulendo 31 kuposha Malemba yanango. Bukhu ya Yobu ifotokoza pomwe ndawa yake Mulungu wabvuma kuti wanthu ambabonere ndipo idawira mibvunzo yofunika maninge.

3. Ko tingagumane nkhani ziponi m’bukhu ya Yobu?

³ Bukhu ya Yobu tingailinganize na munthu yemwe ali padzulu paphiri ndawa yakuti akwanisa kuwona bwinobwino vinthu vomwe viri m’nyantsi. Ndipomwapa, tikambawerenga bukhu ya Yobu itithandiza kuwona momwe Yahova awonera mabvuto yathu. Mu nkhani mweino, tione momwe bukhu ya Yobu ingatithandizire tikagumana na mabvuto. Ndipo tipfunzire pomwe momwe nkhani ya Yobu idathandizira Aizirayeli anango na momwe ingatithandizire ntsiku zino. Komasoti tipfunzire momwe tingaphatisire basa bukhu mweyi pakupfunzisa anango.

MULUMGU ADABVUMA KUTI YOBU ABONERE

4. Ko Yobu ambasiyana tani na Aizirayeli omwe ambakhala ku Iguputo?

⁴ Pa nthawe yomwe Aizirayeli ambabonera ku Iguputo, Yobu ambakhala ku Uzi. Vinkuwoneka kuti kwenze kufupi na dziko yopolomisiwa. Pa nthawe yomwe Aizirayeli adayamba kutumikira mafano, Yobu adapitiriza kukhala wokhulupirika kwa Yahova. (Yos. 24:14; Ezek. 20:8) Yahova adanena kuti: ‘Padziko yapasi palibe munango wolingana naye.’a (Yobu 1:8) Yobu wenze wolemera maninge ndipo ambalemekezewa mudziko yomwe ambakhala. (Yobu 1:3) Ndipomwapa, Satana adakalipa maninge kuwona Yobu ankulemekezewa na wanthu na kutumikira Yahova mokhulupirika!

5. Ndawa chani Yahova adabvuma kuti Yobu abonere? (Yobu 1:20-22; 2:9, 10)

⁵ Satana adanena kuti peno Yobu angagumane na mabvuto adzasiye kutumikira Yahova. (Yobu 1:7-11; 2:2-5) Olo kuti Yahova ambamukonda maninge Yobu, iye adabvuma kuti Satana ayese Yobu na cholinga chakuti viwoneke kuti vomwe Satana adanena ni vabodza. (Yobu 1:12-19; 2:6-8) Satana adapha vipfuwo va Yobu, adamuphera wana wake ndipo adamuchitisa kuti adwale matenda yakulu maninge. Olo kuti Satana adaboneresa Yobu, iye adapitiriza kukhala wokhulupirika. (Werengani Yobu 1:20-22; 2:9, 10.) Chitsanzo cha Yobu chingatithandize kupitiriza kukhala wokhulupirika olo kuti tinkugumana na mabvuto. Patsogolo pake Yahova adapolesa Yobu, adamupasa pomwe chuma chake ndipo adakhala pomwe na wana. Komasoti wanthu adayamba pomwe kumulemekeza. Kuingizira mwapa, Yahova adamudalisa Yobu pakumuchitisa kukhala na moyo utali ndipo adakhala pomwe na magole 140. Iye adakwanisa kuona azizukulu wake na azizikulu wa wana wake. (Yobu 42:10-13, 16) Ko atumiki wa Yahova wakalekale adapfunzira chani pa nkhani ya Yobu, ndipo ko isembo tingapfunzire chani?

6. Ko nkhani ya Yobu idakathandiza tani Aizirayeli? (Onani pomwe foto.)

⁶ Momwe Aizirayeli adakaphindulira. Pomwe Aizirayeli enze ku Iguputo, enze na moyo woshupa maninge. Mwakulinganiza, Yoswa na Kalebe adakhala na moyo woshupa pa ulumbwana wawo. Ndipo iwo adakhala pomwe muchipululu kwa magole 40 ndawa yakuti Aizirayeli anango alibe kubvera Yahova. Vomwe vidachitikira Yobu vidakathandiza Aizirayeli kuzindikira kuti ni Satana yemwe achitisa mabvuto osati Mulungu. Iwo adakabvesa pomwe kuti ndawa chani Mulungu abvuma kuti wanthu ambabonere nakuti atembeja maninge wanthu womwe ni wokhulupirika kwa iye.

7-8. Ko bukhu ya Yobu ingatithandize tani tikambabonera? Fotokozani chitsanzo

⁷ Momwe isepano tingaphindulirembo ntsiku zino. Wanthu azinji ntsiku zino akambawona wanthu wabwino ankubonera, abvesalini kuti ndawa chani Mulungu abvuma kuti wanthu ambabonere. Ndawa ya vimwevi angaleke kukhulupirira Mulungu. Onani chitsanzo cha Hazelb waku Ruanda. Pomwe iye wenze mtsikana ambakhulupirira Mulungu. Koma vinthu vidachinja pa moyo wake pomwe banja ya azibereki wake idamala. Patsogolo pake amayi wake adalowodwa na mwamuna munango yemwe ambaboneresa Hazel. Ndipo mwamuna munango adamuponderera. Iye adayesa kuyenda ku chipembedzo koma alibe kutambiriwa bwino. Patsogolo pake, Hazel adapemphera kwa Mulungu kuti: “Nidayesesa kuchita vabwino koma mulibe kunithandiza nidzakutumikirenilini pomwe. Manje nikufuna kuchita chilichose chomwe ninkufuna pa moyo wangu.” Ninge Hazel, wanthu azinji akhulupirira mabodza yomwe wanthu alewa pakunena va Yahova ndipo akhulupirira kuti iye ndiye achitisa mabvuto. Ndawa ya vimwivi tiwabvera ntsisi wanthu mwawa ndawa yakuti amudziwalini Mulungu ndipo tifunisisa kuwathandiza.

⁸ Bukhu ya Yobu yatithandiza kubvesa kuti ni Mulungu lini yemwe achitisa mabvuto koma Satana. Tapfunzira pomwe kuti wanthu akambabonera sikuti akhala kuti aphonyesa vinthu vinango. Baibolo iwonesa kuti vinthu voipa vichitikira munthu aliyese. (Mla. 9:11; Yobu 4:1, 8) Ndipo tapfunzira pomwe kuti peno tingapitirize kutumikira Yahova, olo pa nthawe yoshupa tiwonesa kuti Satana ni wabodza. (Yobu 2:3; Miy. 27:11) Ndise wokondwa ndawa yakuti tapfunzira vinthu vimwevi m’Baibolo ndawa tadziwa vomwe vichitisa kuti wanthu ambabonere. Pomwe Hazel adapfunzira Baibolo na Wamboni za Yahova, adabvesa kuti ni Mulungu lini yemwe achitisa mabvuto. Ndipo pomwe adadziwa vimwevi moyo wake udachinja. Iye adati: “Nidapemphera pomwe kwa Yahova kuchokera pasi pa ntima nkumuuza momwe nimbabvera. Pakuyamba pale nenze nidanena kuti ninkufunalini kumutumikira ndawa yakuti nimbamudziwalini bwinobwino. Koma manje nazindikira kuti Yahova anikonda ndipo ndine wokondwa maninge.” Titembeja maninge ndawa yodziwa kuti ndawa chani Mulungu wabvuma kuti timbabonere. Manje naboni tiwone momwe nkhani ya Yobu ingatithandizire tikakhala kuti tinkugumana na mabvuto.

MOMWE NKHANI YA YOBU INGATITHANDIZIRE TIKAGUMANA NA MABVUTO

9. Ko Yobu adachita chani pomwe ambabonera? (Yakobo 5:11)

⁹ Linganizani kuti munkuona Yobu alikhale padotha ndipo anavilonda thupi yose. Iye ankuoneka wowonda ndawa ya matenda yomwe ankudwala. Iye ambadzikhwenyakhwenya na anyaphale ndipo nthawe zizinji iye ambadandaula ndawa yakubva kuwawiwa. Olo kuti Yobu adagumana na vose mwevi, iye adapitiriza kukhala wokhulupirika kwa Yahova na kumukhulupirira. (Werengani Yakobo 5:11.) Ko nchani chidathandiza Yobu kupirira?

10. Ko Yobu wenze pa ushamwali wotani na Yahova? Fotokozani.

¹⁰ Yobu adauza Yahova momwe ambabvera. (Yobu 10:1, 2; 16:20) Mwakulinganiza, mu nsolo 3 Yobu adauza Yahova momwe ambabvera muntima mwake na vomwe vidamuchitikira. Yobu ambaganiza kuti mabvuto mwaya ambachitisa ni Yahova. Ndipo azishamwali wake atatu wale, ambamuuza mobwerezabwereza kuti ni Mulungu yemwe ankuchitisa mabvuto yomwe ankugumana nayo ndawa ya vophonya vake. Koma Yobu adapitiriza kukhala wokhulupirika. Mawu ya Yobu yankuonesa kuti nthawe inango iye ambadziona kukhala wolungama kuposha Mulungu. (Yobu 10:1-3; 32:1, 2; 35:1, 2) Yobu adanena pomwe kuti nthawe zinango ambanena vinthu mosaganiza bwino ndawa ambafuna kuonesa kuti ni wokhulupirika. (Yobu 6:3, 26) Ndipo mu nsolo 31, Yobu adati alibe kuphonya chinthu ndipo ambafuna kuti Mulungu amudawire. (Yobu 31:35) Koma Yobu alibe kuchita bwino kuchichimiza Mulungu kuti amuuze kuti ndawa chani ankubonera.

11. Ko Yahova adamuchitira chani Yobu ndawa ya kukhulupirika kwake?

¹¹ Apa manje tinkuona kuti Yobu adabvunza teneule Yahova ndawa yakuti wenze naye pa ushamwali wolimba ndipo ambadziwa kuti amuweruze bwino. Pamapeto pake Yahova adachitisa chimphepo ndipo adamudawira, koma alibe kumufotokozera kuti ndawa chani ankubonera. Koma olo nteno, Yahova alibe kumulanga Yobu ndawa yofotokoza momwe ambabvera panango ndawa yonena kuti ni wosaphonya. Koma Yahova adalangiza Yobu mwachikondi ninge momwe baba achitira na mwana wake. Imweyi yenze njira yabwino yopfunzisira Yobu. Vimwevi vidachitisa Yobu kuti azindikire kuti iye ni mng’ono maninge ndipo adalapa ndawa ya mawu yomwe adayankhula mosaganiza bwino. (Yobu 31:6; 40:4, 5; 42:1-6) Ko vomwe vidachitikira Yobu vidathandiza tani wanthu wakalekale ndipo vingatithandizembo tani ntsiku zino?

12. Ko nkhani ya Yobu idakawaphindulisa tani Aizirayeli?

¹² Momwe Aizirayeli adakaphindulira. Aizirayeli ambafunika kupfunzira na vomwe vidachitikira Yobu. Onani chitsanzo cha Mose. Venze voshupa maninge kuti iye atsogolere Aizirayeli. Viri teno ndawa iwo ambabveralini Yahova ndipo ambandomukalipisa Mose. Vinthu vikashupa, Aizirayeli ambapandukira Yahova. Koma Mose ambapemphera kwa Yahova kuti amuthandize pamabvuto. (Eks. 16:6-8; Num. 11:10-14; 14:1-4, 11; 16:41, 49; 17:5) Chitsanzo cha Yobu chidathandiza pomwe Mose panthawe yomwe iye adatsuuliwa na Yahova. Mwakulinganiza, Aizirayeli padandosala pang’ono kungena mudziko yopolomisiwa, Mose ‘adapopotera’ Aizirayeli ndipo alibe kulemekeza Yahova. (Sal. 106:32, 33) Ndipomwapa Yahova alibe kumubvumiza kuti angene mu Dziko Yopolomisiwa. (Deut. 32:50-52) Vimwevi vidamuwawa maninge Mose, koma olo nteno iye adadzichepesa nkupfunzirapo kanthu. Chitsanzo cha Yobu chidathandiza Aizirayeli pomwe Mose adafa. Iwo adakakwanisa kuganizira nkhani ya Yobu nkuuza Yahova momwe ambabvera. Ndipo ambafunika pomwe kukumbukira kuti enzelini wolungama kuposha Yahova. Iwo adakapfunzira kuti ambafunika kukhala odzichepesa na kubvera pomwe Yahova ambawatsuula.

13. Ko nkhani ya Yobu ingatithandize tani kupirira? (Aheberi 10:36)

¹³ Momwe isepano tingaphindulirembo ntsiku zino. Isepano tinkukhala nthawe zoshupa. Ndipomwapa, tinkufunikira mphanvu kuti tikwanise kupitiriza kutumikira Yahova mokhulupirika. (Werengani Aheberi 10:36.) Mwakulinganiza, panango tinkudwala maninge, tinankhawa ndawa ya mabvuto ya m’banja mwathu, panango taferewa munthu yemwe timukonda. Nthawe zinango tikagumana na mabvuto munthu munango angatiyankhulire mawu yokhumudwisa. (Miy. 12:18) Bukhu ya Yobu itipfunzisa kuti tingamuuze Yahova momwe tinkubvera komasoti ititsimikizira kuti iye atithandize. (1 Yoh. 5:14) Yahova akalipalini tikambamuuza momwe tinkubvera olo kuti nthawe zinango tiyankhula mosaganiza bwino. M’malo mwa vimwevi iye adzatipase mphanvu na nzeru kuti tikwanise kupirira. (2 Mbiri 16:9; Yak. 1:5) Komasoti iye atilangiza ninge momwe adachitira na Yobu. Bukhu ya Yobu itipfunzisa momwe tingapiririre tikatambira malangizo yochokera m’mawu ya Mulungu, gulu yake panango abale omwe ali paushamwali wolimba na Yahova. (Aheb. 12:5-7) Ninge momwe Yobu adaphindulira pomwe adatambira malangizo modzichepesa, isepanombo tingaphindure tikabvuma malangizo modzichepesa. (2 Akor. 13:11) Mwizi ni mpfundo zofunika maninge zomwe tingapfunzire mu bukhu ya Yobu. Manje naboni tione momwe tingaphatisire basa nkhani ya Yobu pakupfunzisa anango.

PHATISANI BASA BUKHU YA YOBU PAKUTHANDIZA ANANGO

14. Ko tingawafotokozere tani wanthu vomwe vinkuchitisa kuti timbabonere?

¹⁴ Wanthu azinji afuna kudziwa kuti ndawa chani wanthu wabwino abonera. Ndipo isepano tiyesesa kuwadawira pakuphatisa basa Baibolo. Kazinjikazinji, tiwauza vomwe vidachitika munda wa Edeni panthawe yomwe Satana adanamiza Adamu na Hava. (Gen. 3:1-6) Ndipo tiwafotokozera kuti Adamu na Hava alibe kubvera Yahova ndipomwapa wanthu azinji abonera na kufa. (Aro. 5:12) Komasoti tingawafotokozere pomwe kuti Yahova wapereka nthawe yokwanira kuti awonese kuti vomwe Satana adanena nivabodza ndipo Yahova ankuphatisa pomwe basa nthawe mweyi kuti wanthu adziwe kuti iye adzachose mabvuto yose. (Chiv. 21:3, 4) Imweyi ni njira yabwino yomufotokozera munthu kuti akwanise kubvesa kuti ndawa chani wanthu wabwino agumana na mabvuto.

15. Ko tingaphatise tani basa bukhu ya Yobu pothandiza munthu yemwe ankufuna kudziwa ndawa yake wanthu abonera? (Onani pomwe mafoto.)

¹⁵ Tingasimbe pomwe nkhani ya Yobu pomufotokozera munthu kuti ndawa chani wanthu abonera. Tingayambe na kuwatembeja nkuwauza kuti mwabvunza mbvunzo wabwino maninge. Patsogolo pake tingawauze kuti munthu wokhulupirika Yobu adabvunzambo kuti ndawa chani ankubonera. Mpakana iye ambawona ninge kuti Mulungu ndiye ankuchitisa kuti ambabonere. (Yobu 7:17-21) Munthu watinkucheza naye panango angadabwe kubva kuti olo kalekale wanthu ambafuna kudziwa kuti ndawa chani ankubonera. Tikateno, tingamuuze kuti nkhani ya Yobu inkuwonesa kuti Satana ndiye achitisa kuti wanthu ambabonere, osati Mulungu. Satana achita vimwivi pakufuna kuwonesa kuti wanthu atumikira Mulungu ndawa ya dyera. Mulungu akhulupirira kuti panawanthu omwe amutumikira na volinga vabwino, ndipomwapa awasiya kuti awonese kuti Satana ni wabodza. Pakumalizira tingamuuze pomwe kuti Yobu adapitiriza kukhala wokhlupirika ndipo Mulungu adamudalisa maninge. Viribe basa kuti tinkubonera ndawa ya chani, timbawatsimikizire wanthu kuti mabvuto yathu yachokeralini kwa Yahova.

16. Perekani chitsanzo chowonesa kuti bukhu ya Yobu ingathandize munthu yemwe ankubonera.

¹⁶ Onani momwe bukhu ya Yobu idathandizira Mario. Ntsiku inango mugole ya 2021, mulongo munango ambalalikira pakuphatisa basa foni. Munthu woyamba kumufonera wenze Mario. Iye adamuwerengera vesi yomwe iwonesa kuti Mulungu adatipolomisa vinthu vabwino maninge ndipo atibvesera mapemphero. Mulongo ule padauza Mario kuti aneneko maganizo yake, Mario adati ambafuna kudzipha ndipo wandomaliza manjemanje kunemba kalata yolaira wanthu wa m’banja mwake. Iye adati: “Inepano nidziwa kuti Mulungu aliko, so kundoti machibese yano maganizo yanibwerera nkumbaona kuti iye aniikhiralini nzeru.” Pamwapo mulongo ule adamusimbira mabvuto yomwe Yobu adagumana nayo. Padabva nkhani mweyi, Mario adasaina kuti awerenge bukhu yose ya Yobu. Basi manje mulongo wathu adamutumizira linki kuti awerenge Baibolo pa saiti ya jw.org. Vimwivi vidachitisa kuti Mario abvume kupfunzira Baibolo kuti amudziwe bwino Mulungu yemwe amuikhira nzeru.

17. Ndawa chani imwepo mutembeja maninge Yahova pakubvuma kuti bukhu ya Yobu inembewe? (Yobu 34:12)

¹⁷ Apa manje tawona kuti Mawu ya Mulungu yanamphanvu yochinja wanthu na kulimbikisa omwe ankubonera. (Aheb. 4:12) Yobu adakumbira Yahova kuti nkhani yake inembewe. Ndipo tinkutembeja ndawa yakuti Yahova adachitisadi kuti inembewe m’Baibolo. (Yobu 19:23, 24) Bukhu ya Yobu ititsimikizira kuti ‘Mulungu angachitelini vinthu voipa olo pang’ono.’ (Werengani Yobu 34:12.) Ifotokoza pomwe kuti ndawa chani Mulungu abvuma kuti timbabonere ndipo itiuza momwe tingapiririre. Kudziwa vimwivi kutipasa mphanvu yolimbikisambo omwe ankubonera. Mu nkhani yomwe inkubwera, tidzapitirize kupfunzira bukhu ya Yobu ndipo tidzaone vatingachite kuti timbapereke malangizo yanzeru.