Momwe tingakulisire ‘luso yathu yakupfunzisa’

1. Ko tifunika kukhala na luso iponi ndipo ndawa chani? (2 Timoteyo 4:2) (Onani pomwe foto.)

YESU adauza wopfunzira wake kuti: “Yendani mukapfunzise wanthu . . . ndipo mumbawapfunzise kuti ambaphatise basa vinthu vose vomwe nidakulamulani.” (Mat. 28:19, 20) Malangizo mwaya yankuwonesa kuti Akhrisitu wose afunika kupfunzisa anango. Nishuwadi kuti Yahova akwekweta wanthu wale womwe “anamaganizo yabwino” ndipo angelo atithandiza kugumana wanthu mwawa. (Mac. 13:48; Yoh. 6:44; Chiv. 14:6) Olo nteno, isepano tifunika kuchitambo mbali yathu. Ganizirani chitsanzo cha Paulo na Baranaba. Baibolo inena kuti pomwe iwo ambalalikira ku Sunagoge ku Ikoniyo, iwo “adayankhula bwino maninge mwakuti Ayuda azinji pabodzi na Agiriki adakhala wokhulupirira.” (Mac. 14:1) Vimwivi vinkuchita kuwonekeratu kuti Paulo na Baranaba enze na “luso yopfunzisa.” (Werengani 2 Timoteyo 4:2.) Ndipo Akhrisitu wose afunika kupfunzira momwe angapfunzisire anango.

2. Ndawa chani anango aganiza kuti angakwaniselini kukulisa luso yawo yakupfunzisa?

² Anango awona kuti angakwaniselini kupfunzisa anango ndawa yakuti alibe kupfunzira vizinji, anango adziwona kuti alibe luso yakupfunzisa. Atumiki anango wa Mulungu womwe atomolewa m’Baibolo ambadziwonambo teneuyu. (Eks. 4:10; Yer. 1:6) Anango angakwinyirire kuti adziwalini kupfunzisa bwino ndawa yakuti alibe pfunziro ya Baibolo. Nishuwadi kuti ni wanthulini wose tingawalalikire womwe angakhale na shungu yopfunzira Baibolo. Ndipo maphindu yomwe tigumana mu utumiki yandothembalini khama yathu. Ninge momwe tawonera, Yahova na angelo ndiwo womwe atithandiza kuti tigumane wanthu wa maganizo yabwino. Olo nteno, tifunika kuchita vose vomwe tingakwanise kuti tikhale mpfunzisi wabwino. Mu pfunziro mwino, tiwone vinthu vitatu vomwe vingatithandize kukulisa luso yathu yopfunzisa anango.

WONESANI KUTI MUWAKONDA WANTHU WOMWE MUNKUWALALIKIRA

3. Ndawa chani Yesu ambakwanisa kuwafika pamoyo wanthu womwe iye ambawapfunzisa?

³ Baibolo inena kuti Yesu “Ambadziwa vomwe viri muntima mwa munthu.” (Yoh. 2:25) Vimwevi vinkutanthauza kuti Yesu ambawadziwa bwino wanthu ndipo ambadziwa momwe ambaganizira. Iye ambakwanisa kuwafika pamoyo wanthu ndawa yakuti ambadziwa vosowa vawo. Yesu ambawona kuti wanthu mwawa enze alibe munthu wowatsogolera na owalimbikisa ndawa yakuti atsogoleri wa chipembedzo ambawapfunzisa vinthu vabodza. (Mat. 9:36; 23:4) Pa ulaliki wake wapaphiri, Yesu adapfunzisa vinthu vomwe vidakawathandiza kukhala na moyo wabwino. Wanthu azinji ambakomedzewa kubvesera vomwe Yesu ambapfunzisa ndawa yakuti ambawauza vinthu vofunika maninge.

4. Ko tingawonese tani kuti tiganizira wanthu? (Onani pomwe mafoto.)

⁴ Chinthu chinango chomwe chingatithandize kuti tiwonese kuti tiwaganizira wanthu ni kuwabvesera pomwe iwo ankutifotokozera mabvuto yawo. Wanthu wose womwe tigumana nawo mu ulaliki ankugumanambo na mabvuto yosiyansiyana mu dziko ya Satana iyi. Kukumbukira mwivi kutithandiza kuti timbawabvere ntsisi wanthu wa mudera yathu. Mwakulinganiza, ko mudera yanu mudachitikako kale chinthu chinango chomwe chidachitisa wanthu kukhala na nkhawa maninge? Ko azibereki akhala na nkhawa na chitetezo cha wana wawo akambayenda kushikola? Ko kudera komwe tinkukhala, kugumana basa ni koshupa? Ndoganizirani momwe moyo wa wanthu mwawa ukhalira “woshupa” makamaka ndawa yakuti alibe chidikhira chomwe Baibolo ipereka.—2 Tim. 3:1; Yes. 65:13, 14.

5. Ko Yesu adawonesa tani kuti wenze wosiyana na Afalisi? (Mateyu 11:28-30)

⁵ Yesu ambaganizira maninge wanthu ndipo wanthu mwawo ambakwanisambo kuwona vinthu vimwevi ndawa ya momwe iye ambachitira nawo vinthu. Yesu wenze wosiyana na Afalisi. Atsogoleri wa vipembedzo mwawa ambadziwona kuti ni wanthu wabwino maninge kuposha anango ndipo nthawe zizinji ambadzudza wanthu! (Mat. 23:13; Yoh. 7:49) Koma Yesu ambachita vinthu na wanthu mwachikondi komasoti mwaulemu. Iye wenze “wopfatsa na wodzichepesa” ndipo vimwevi vidamuthandiza kukhala mpfunzisi wabwino. (Werengani Mateyu 11:28-30.) Isembo tifunika kumbachita vinthu na wanthu mwa chikondi na mwaulemu.

6. Ko tingawonese tani chikondi panango ulemu kwa wanthu wale womwe abvumalini ntontholo wabwino?

⁶ Anango alamba kubvesera ntontholo wanthu. Ko isepano tifunika kuchita chani vimwivi vikachitika? Yesu adanena kuti tifunika kuchita vizinji osati kundopirira tikambatsutsiwa. Iye adanena kuti: “Pitirizani kukonda azondi wanu na kuchitira vabwino womwe akuzondani” “pitirizani kudalisa wanthu womwe akutembererani komasoti kupempherera wanthu wale womwe ankukunyozani.” (Luka 6:27, 28) Vidzakhale vosashupa kuchita vimwevi, tikakhala kuti tazindikira vinthu vomwe vamuchitisa munthu muyo kuleka kutibvesera. Ni shuwadi kuti anango afuna kulambiza basa yathu yolalikira, koma anango atizondalini. Vingachitike kuti anango afunalini kubvesera ntontholo wanthu ndawa ya mabvuto yomwe ankugumana nawo ku banja kwawo panango mabvuto yanango yomwe yankuwachitisa kukhala na nkhawa. Anango vikhala kuti tiwagumana pa nthawe yophonyeka. Mulimose momwe vingakhalire, tifunika kutewedzera malangizo ya pa Akolose 4:6 yomwe yanena kuti: “Nthawe zose mawu yanu yambawonese kuti ndimwe wabwino ntima ndipo yambakhale yokoma ninge kuti mwayayikha munyu kuti mudziwe momwe mungadawirire munthu aliyese.” (Akol. 4:6) Tikambaganizira wanthu na kudziwa vosowa vawo, vidzatithandize kukhala mpfunzisi wabwino.

MBAPHATISANI BASA BAIBOLO PAKUPFUNZISA WANTHU

7. Ko Yesu adawonesa tani kuti ambathemba mawu ya Mulungu pakupfunzisa wanthu? (Yohani 7:14-16)

⁷ Yesu ambapfunzisalini wanthu pakuphatisa basa nzeru zake. Iye ambaphatisa basa Mawu ya Mulungu pakuwapfunzisa vinthu vosashupa kubva kuti viwathandize pa moyo wawo. Baibolo itiuza kuti Yesu ambapfunzisa “ninge munthu wokhala na ulamuliro osati ninge alembi.” Ndipomwapa, wanthu “ambakomedzewa” maninge. (Maliko 1:22) Alembi wa munthawe ya Yesu ambapfunzisa wanthu vinthu vomwe apfunzisi anango wobvekera ambanena. Koma Yesu ambaphatisa basa Malemba. Olo kuti Yesu ambakhala kudzulu pabodzi na Ababa wake, iye ambapfunzisalini nzeru zake. M’malo mwa vimwevi, ambapfunzisa wanthu pakuphatisa basa Malemba. (Werengani Yohani 7:14-16.) Pamwapa Yesu adasiya chitsanzo chabwino maninge kwa wopfunzira wake.

8. Ko Petulo adatewedzera tani chitsanzo cha Yesu?

⁸ Wopfunzira wa Yesu ambaphatisambo basa Mawu ya Mulungu pakupfunzisa wanthu. Mwakulinganiza, Petulo adaphatisa basa Mawu ya Mulungu pa nkhani yake ya pa Pentekosite mu gole ya 33 Yesu wayenda kale kudzulu. Petulo wenze wosapfunzira maninge, koma olo nteno, iye adawafika pamoyo wanthu womwe ambawapfunzisa ndipo ambawafotokozera momwe Yesu adakwanirisira maulosi ya m’Baibolo. (Mac. 2:14-37) Ko ni maphindu yaponi yadagumana? “Womwe adatambira mawu yake mwayo mokondwa adabatiziwa, mwakuti ntsiku mwiyo chiwerengero cha wopfunzira mwawo chidaingizirika na wanthu wothamangira 3000.”—Mac. 2:41.

9. Ndawa chani pakupfunzisa tifunika kuphatisa basa Baibolo?

⁹ Njira yabwino yomwe ingatithandize kuti timbawafike pamoyo wanthu ni kuphatisa basa Mawu ya Mulungu. (Aheb. 4:12) Ndipomwapa, tifunika kuphatisa basa Baibolo pakupfunzisa wanthu. Isepano tifunika ‘kulalikira mawu ya Mulungu,’ osati maganizo yathu. (2 Tim. 4:2) Lemba ya Miyambo 2:6 inena kuti: ‘Yahova ni yemwe apereka nzeru, kudziwa vinthu komasoti kuzindikira vichokera kwa iye.’ Ndipomwapa tikambaphatisa basa Baibolo tikhala kuti tinkubvuma kuti Yahova ayankhulane na wanthu. (Mal. 2:7) Tinkufuna kuti wanthu ambadziwe kuti mpfundo za m’Baibolo ni zabwino maninge kuposha malangizo yomwe wanthu angapereke. Vomwe Baibolo ipfunzisa ni vochokera kwa Yahova ndipo vitithandiza kuti timbamukondwerese komasoti kuti isepano timbakhale wokondwa.—2 Tim. 3:16, 17.

10. Ko mungawonese tani wopfunzira wanu wa Baibolo kuti vomwe ankupfunzira vinkuchokera m’Baibolo?

¹⁰ Pomwe munkukonzekera kukachitisa pfunziro ya Baibolo, fagani malemba yomwe yangakamuthandize wopfunzira wanu. Podiya kuti tiphatisa basa mafoto, mavidiyo, koma wopfunzira wathu afunika kudziwa kuti vomwe ankupfunzira vinkuchokera m’Baibolo. Ndipomwapa, nkati mwa pfunziro, mbawerengani malemba yomwe yangathandize wopfunzira wanu kubvesa mpfundo ikulu. Patsogolo pake, tingamubvunze vomwe iye wapfunzira pa malemba yomwe tawerenga. Mukambaphatisa basa mafoto na mavidiyo, muthandizeni wopfunzira wanu kudziwa vomwe ankupfunzira. Vimwivi vinkutanthauzalini kuti imwepo mufunika kuyankhula maninge panango kuwerenga malemba yazinji. M’malo mwa vimwivi, mupaseni nthawe wopfunzira wanu kuti ambakwanise kubvesa lemba iriyose yomwe mwawerenga ndipo mungawerenge kanganani lemba mweyo kuti akwanise kuyibvesesa. Tikachita vimwevo, tidzakhale kuti tinkupfunzisa wanthu Mawu ya Mulungu.—1 Akor. 2:13.

11-12. (a) Ko tingawonese tani kuti ndise wodekha kwa omwe tipfunzira nawo Baibolo? (Machitidwe 17:1-4) (Onani pomwe foto.) (b) Ko wanthu adziwalini vinthu viponi pakunena va Baibolo ndipo tingawathandize tani?

¹¹ Peno wopfunzira wanu ankuwona kuti ni voshupa kutewedza vomwe ankupfunzira, kumbukirani mpfundo yakuti “mumbalalikire . . . modekha.” Ndipo anango atenga nthawe kuti akwanise kubvesa mpfundo. Wopfunzira anango wa Baibolo, panango angatenge nthawe kuti abvese mpfundo zinango za m’Baibolo zomwe kwa isepano ni zosashupa kuzibvesa. Tifunika kutewedzera chitsanzo cha ntumi Paulo. Kumbukirani kuti Ayuda waku Tesalonika alibe kubvesa kabodzi na kabodzi pa vomwe Paulo adawapfunzisa. Ndawa ya vimwivi, Paulo adapitiriza kuwapfunzisa ndipo anango adakwanisa kubvesa vomwe ntumi Paulo ambawapfunzisa.—Werengani Machitidwe 17:1-4.

¹² Njira inango ya momwe tingawonesere kudekha na mapfunziro yathu, ni kuwabvunza mibvunzo na kuwapasa nthawe yokwana kuti adawire. Bveserani mwatcheru m’dawiro womwe angapereke ndipo mumbabvese kuti ni ndawa chani ankuganiza teneuyu. Patsogolo pake, mungawerenge malemba yomwe yangamuthandize kubvesa maganizo ya Mulungu pa nkhani mweyo. Ndipo kumbukirani kuti wanthu anango akalibe aiwonako Baibolo ndipo adziwalini vinthu vomwe viri nembewe mumo. Vikakhala teno, mungamuwonese Baibolo ya pa manja ndipo mungamufotokozere vinthu vomwe angapfunzire mumo. Mungaphatise pomwe basa bukhu yakuti kondwani na moyo mpakana kalekale kuti mumufotokozere momwe Baibolo ingamuthandizire kukhala na moyo wokondwa na kumuwonesa malemba yomwe yangamulimbikise. Ndipo peno imwepo mungathandize pfunziro yanu ya Baibolo mwa kumuwonesa kufunika kwa Baibolo, iye adzaphatisire basa vinthu vomwe ankupfunzira pa moyo wake ndipo adzafunisise kupitiriza kupfunzira.

ATHANDIZENI WOPFUNZIRA WANU KUMUDZIWA BWINO YAHOVA

13. Ko pomwe tinkupfunzisa wanthu, tifunika maninge kuganizira va mbani?

¹³ Isepano cholinga chathu, ni kuthandiza wanthu womwe tipfunzira nawo Baibolo kuti amudziwe bwino Yahova na kukhala naye paushamwali. (Yak. 4:8) Tikambapfunzisa wanthu Baibolo, tifunalini kuti wanthu adziwe vizinji vonena va isepano panango vomwe isepano tidziwa, koma tifuna kupereka ulemerero kwa Yahova.

14. Ko tifunika kuchita tani kuti tithandize wopfunzira wathu kukondweresa Yahova?

¹⁴ Muthandizeni wopfunzira wanu wa Baibolo kukhala na ntima wofuna kukondweresa Yahova. (Miy. 27:11) Cholinga chanu ni kumuthandiza wopfunzira wanu wa Baibolo, kuti ambachite vinthu vabwino na cholinga chakuti akhale wa Mboni za Yahova na kumuthandiza kuchinja vinthu vinango pa moyo wake. Mwakulinganiza, peno iye ankulimbana na chizolowezi chinango choipa, mungamubvunze kuti: “Ndawa chani Yahova azonda khalidwe mwiyi? Ndawa chani Yahova ankukulambizani kuchita chinthu chomwe imwepo muchikonda? Ko lamulo mwiyi inkuwonesa tani kuti Yahova akukondani?” Mukambathandiza wopfunzira wanu kuganizira maninge va Yahova na makhalidwe yake yabwino, vidzamuthandize kudziwa kuti Yahova amukonda. Vimwivi vidzamuthandize wopfunzira wanu kukhala na shungu yofuna kukondweresa Yahova.

PITIRIZANI KUKULISA LUSO YANU YA KUPFUNZISA

15. Ko tingachite tani kuti tipitirize kukulisa luso yathu ya kupfunzisa?

¹⁵ Tingapemphere kwa Yahova kuti atithandize kuwona vomwe tingachite kuti tikulise luso yathu ya kupfunzisa. (1 Yoh. 5:14) Patsogolo pake, tifunika kuchita vinthu mobverana na vomwe takumbira Yahova. Njira ibodzi ya momwe tingachitire vimwivi ni kukhala tcheru pa misonkhano na kuphatisa basa vomwe tapfunzira. Tingakumbire m’bale panango mulongo yemwe adziwa vizinji kuti tiyende naye pabodzi kupfunziro yathu na kumukumbira kuti iye atiuze vomwe tifunikira kukonza. Komasoti kumbukirani kuti mpfundo zomwe munkupfunzira na wopfunzira wanu ni zachilendo kwa iye. Ndipomwapa, mumbayesese kuganizira vomwe iye ankuganiza pa nkhani mweyo. Ndipo thandizani wopfunzira wanu kuwona maphindu ya pfunziro. Kudziwa vimwevi kudzamuthandize kukhala paushamwali wolimba na Yahova komasoti adzakhale na moyo wokondwa.—Sal. 1:1-3.

16. Ndawa chani ni vabwino kupitiriza kukulisa luso yathu yopfunzisa?

¹⁶ Chinthu chomwe chitikomedza maninge ntsiku zino, ni kupfunzisa wanthu anango va Yahova. Ndipo basa mweyi idzapitirize mu dziko inyowani. Ndipomwapa, pomwe tinkulalikira ntontholo wabwino, tifunika kuwonesa kuti tiganizira wanthu, tikambaphatisira basa Baibolo pakupfunzisa na kupereka ulemerero wose kwa Yahova. Mwa njira mweyi, tidzapitirize kukulisa luso yathu yakupfunzisa.