DZIKO ILI PA MABVUTO

3 | Mumbateteze ushamwali wanu na anzanu

NDAWA YAKE VIRI VODEKANA

Mabvuto ya m’dziko iyi yankuchitisa kuti wanthu azinji ambakhale na nkhawa. Ndawa ya vimwevi, mosadziwa wanthu anango ankuchita vinthu vowonesa kuti akondalini anzawo.

Wanthu anango adzisalula kuti ambachite vinthu okhaokha.
Wanthu anango omwe ali pa banja achebwalini kuyambana.
Azibereki achitalini chidwi na wana wawo ndipo anango aganiziralini nkhawa zomwe wana wawo anazo.

Vomwe muchadekana kudziwa

Kukhala na anzathu ni kwabwino, ndawa atithandiza kukhala na moyo wabwino komasoti atilimbikisa makamaka pa nthawe yomwe tagumana na mabvuto.
Nkhawa zomwe zibwera ndawa ya mabvuto ya dziko iyi, zingachitise kuti muleke kubverana na wanthu wa m’banja yanu pa vinthu vomwe ne mumbaviganiziralini.
Wana wanu akambabvesera pa radiyo panango kuwona vinthu vogopsa pa TV vingawasokoneze maninge

Vomwe mungachite manjeuno

Baibolo inena kuti: ‘Shamwali chaiye akukonda nthawe zose ndipo shamwali muyo ni m’bale yemwe adabadwira kuti akuthandize pakachitika mabvuto.’—Miyambo 17:17.

Ganizirani va munthu yemwe angakuthandizeni komasoti yemwe angakupaseni malangizo yothandiza. Kudziwa kuti munthu munango akuganizirani kungakulimbiseni kupirira mabvuto yomwe munkugumana nayo.

VOMWE MUNGACHITE KUTI MUPIRIRE—Mpfundo zomwe zingakuthandizeni

Pa nthawe ya mabvuto, mungateteze ushamwali wanu pakuchita vinthu ivi

MUMBALIMBISE BANJA YANU

Mumbalimbise banja yanu

Baibolo inena kuti: ‘Awiri aposha m’bodzi . . . Peno m’bodzi angagwe, munzake angamuyimikize.’ (Mlaliki 4:9, 10) Wanthu olowolana achadekana kuchita vinthu ninge wanthu awiri ofambisa ndeke imodzi omwe akhala na cholinga chibodzi, osati ninge ndeke ziwiri za jato zomwe zikufuna zigunthane.

Mumbayesese kuti muleke kumbachitira vinthu voipa nkazi panango mwamuna wanu, ndawa ya mabvuto yomwe munkugumana nayo. Ndipo mumbakhale odekha na obvumira.
Kabodzi pa sondo, mumbakambirane na nkazi panango mwamuna wanu va mabvuto yomwe muchadekana kuyakonza. Cholinga chanu chimbakhale kufuna kulimbana na bvuto osati mwekhamwekha.
Mumbagumane nthawe yochitira vinthu pabodzi vomwe mose awiri muchakonda.
Mumbagumane nthawe yokomedza yomwe mungambachitire vinthu pabodzi, mwakulinganiza mungawone pabodzi mafoto ya pa ukwati wanu.

“Wanthu olowolana abveranalini pa chilichose, koma vimwevi vinkutanthauzalini kuti angachitirelini vinthu pabodzi. Iwo angakwanise kusalula pabodzi vochita na kuthandizana kukwanirisa vomwe asalula.”—David.

MUMBALIMBISE USHAMWALI WANU NA ANZANU

Mumbalimbise ushamwali wanu na anzanu

Kuyingizira pa kutambira thandizo kuchokera kwa anzanu, mumbaganizire momwe imwepo mungawathandizire. Mukambalimbikisa anango imwepo mudzalimbikisiwembo.
Ntsiku iliyose mumbafone panango kutumizira mamesaje anzanu kuti mudziwe momwe vinthu viliri pa moyo wawo.
Mumbabvunze anzanu momwe ankukwanisira kupirira mabvuto yolingana na yomwe munkugumana nayo.

“Mukagumana na mabvuto yakulu, anzanu angakuthandizeni. Iwo angakuthandizeni kudziwa vodekana kuchita mpakana angakukumbuseni vomwe munkudziwa kale. Anzanu akuganizirani, ndipo nawombo adziwa kuti muwaganizira.”—Nicole.

MUMBAKHALE M’BEREKI WOTHANDIZA

Mumbakhale m’bereki wothandiza

Baibolo inena kuti: ‘Munthu aliyese akhale wofulumiza kubva na wodekha poyankhula.’ (Yakobo 1:19) Pakuyamba wana wanu angambabonere kukuuzani vomwe vinkuwachitisa nkhawa na vomwe ankuganiza, koma mukambawabvesera mwatcheru angamasuke nkukuuzani.

Mumbagumane malo komasoti mpata wabwino kuti wana wanu ambamasuke kufotokoza vomwe vinkuwachitisa nkhawa. Wana anango akhala omasuka kufotokoza va muntima akakhala kuti ali nkaro, akambafamba panango akambadya pabodzi na azibereki wawo osati akawakhazika pasi nkumbacheza nawo maso na maso.
Mumbawonesese kuti wana wanu ankunyang’aniralini vinthu vogopsa.
Mumbathandize wana wanu kudziwa vomwe banja yanu yakonza kuti ikhala yotetezeka.
Mumbadziwiretu vomwe mungachite peno pangachitike vinthu vinango vadzidzidzi ndipo mumbachite vimwevi na wana wanu.

“Mumbacheze na wana wanu ndipo mumbabvume kuti afotokoze momwe ankubvera. Angambadzibise kuti aleke kuwoneka kuti anamantha, nkhawa panango akalipa. Mumbawauze wana wanu kuti imwepo nthawe zinango muchabvambo tene, ndipo mumbawauze vomwe vikuthandizani kuti mumbabve bwino.”—Bethany.