DZIKO ILI PA MABVUTO

4 | Mumbateteze chidikhiro chanu

NDAWA YAKE VIRI VODEKANA

Nkhawa zomwe zibwera ndawa ya mabvuto ya dziko iyi, zingakhudze wanthu mu njira zosiyanasiyana. Wanthu azinji omwe akhudziwa na nkhawa mwezi akhala alibe chidikhiro ndipo anena kuti vinthu vingachinjelini. Manje ko iwo achita tani?

Anango afunalini kuganizira va kutsogolo.
Anango achamwa mowa panango kuphatisa basa mankhwala yosokoneza msolo kuti ayebwe mabvuto.
Anango awona kuti viribwino kundofa ndipo abvunza kuti: “Ko moyo unaphindu yanyi?”

Vomwe muchadekana kudziwa

Mabvuto yomwe muchagumana nayo yangakhale ya kanthawe ndipo yangamale nthawe iliyose.
Podiya vichikhala kuti mabvuto yomwe munkugumana nayo yangachinjelini, pa na vinthu vinango vomwe mungachite kuti mupirire.
Baibolo itipasa chidikhiro chothembeka. Inena kuti mabvuto yose yomwe tigumana nayo ntsiku zino yadzamale.

Vomwe mungachite manjeuno

Baibolo inena kuti: “Ayi kumbakhala na nkhawa na vinthu vamangwana, ndawa ntsiku ya mangwana idzakhale na vinthu vake vochitisa nkhawa. Mabvuto ya ntsiku iliyose ni yokwanira pa ntsiku mweyo.”—Mateyu 6:34.

Mumbalimbane na vochitika va ntsiku iliyose pavokha. Ayi kumbakhala na nkhawa na vinthu va mangwana mpaka kufika pakukangira kuchita vinthu vodekana va ntsiku ya lero.

Kumbandoganizira va vinthu voipa vomwe munkuganizira kuti vingachitike, kungandokuingizireni nkhawa nkuyamba kuwona kuti kutsogolo mabvuto yadzamalelini.

VOMWE MUNGACHITE KUTI MUPIRIRE—Mpfundo zomwe zingakuthandizeni

MUMBAGANIZIRE VINTHU VA BWINO

Baibolo inena kuti: ‘Ntsiku zose za munthu wodzudzika zikhala zoipa koma munthu wantima wokondwa achita phwando nthawe zose.’ (Miyambo 15:15) Mukambandoganizira vinthu voipa, mungagumanelini njira yomalisira mabvuto yanu. Koma kumbaganizira vinthu vabwino, kungakuthandizeni kugumana njira yomalisira mabvuto yomwe mungagumane nayo.

Ayi kumbandokhalira kunyang’anira panango kubvesera nkhani.
Ntsiku iliyose ikamala, mumbanembe vinthu viwiri panango vitatu vomwe mungatembeje.
Mumbanembe ndandanda wa vinthu vomwe munkufuna kuchita ntsiku mweyo. Peno mu na mapulani yofuna kuchita vinthu vikuluvikulu, mumbavigawe kuti vikhale ving’onoving’ono kuti mumbakwanise kuwona vinthu vomwe mwakwanisa kuchita ntsiku ikamala.

MUMBABVUME KUTI WANTHU ANANGO AKUTHANDIZENI

Baibolo inena kuti: ‘Wodzipatula . . . achachita vosiyana na nzeru zose zophindulisa.’ (Miyambo 18:1) Mwekha mungakwaniselini kubula mu dindi yonoka koma munthu munango akakuthandizani mungakwanise.

Mumbakumbire anzanu panango azibale kuti akuthandizeni.
Mumbagumane njira zomwe imwepo mungathandizire anango.
Peno munkuwona kuti mabvuto yadzamalelini ndipo munkuwona pomwe kuti moyo ni wosafunika, mungayende kukagumana na mafulumelo. Nthawe zinango kukhala na nkhawa maninge kuwonesa kuti munkudwala. Panango yangakhale matenda yoshupika maganizo. Wanthu azinji athandiziwa akayenda ku shipitali.a

a Magazini ya Galamukani! yasaluliralini wanthu ntundu wa mankwala yomwe angatambire.

Baibolo ichatipasa chidikhiro chothembeka

Wonemba masalimo munango adapemphera kwa Mulungu kuti: ‘Mawu yanu ni luju yovunikira ku mapazi yangu ndipo ni luju yovunikira njira yangu.’ (Salimo 119:105) Ko Baibolo yomwe ni mawu ya Mulungu ichitatani vimwevi?

Tikambafamba usiku, luju itithandiza kuwona pomwe tingaponde. Molingana na vimwevi, m’Baibolo mu na malangizo yanzeru yomwe yangatithandize tikambafuna kusalula vinthu voshupa.

Chedza chitithandiza kuwona komwe tinkufuna kuyenda. Molingana na vimwevi, Baibolo itithandiza kudziwa vinthu vomwe vichitike kutsogolo.

Baibolo ni bukhu yopatulika yomwe inena va momwe moyo wa munthu udayambira. Inena pomwe va chidikhiro chothembeka cha vomwe vichitike kutsogolo. Iyo inena kuti:

Momwe

Momwe mabvuto yadayambira: Baibolo inena kuti: ‘Ninge momwe uchimo udangenera m’dziko ndawa ya munthu m’bodzi, na impfa ndawa ya uchimo, impfa mweyo kufikira kwa wanthu ose ndawa yakuti ose adachimwa.’—Aroma 5:12.

Ndawa yake

Ndawa yake utongi wa wanthu wakangira kumalisa mabvuto ya wanthu: Baibolo inena kuti: ‘Munthu wochokera ku pfumbi alibe mphanvu zotsogolera moyo wake.’ (Yeremiya 10:23) Umboni wa vimwevi ni momwe mabvuto yawandira m’dziko iyi.

Vomwe

Vomwe Mulungu adzachite kuti akonze dziko iyi: Baibolo inena kuti: ‘Iye adzapukuse misozi yose m’maso mwawo ndipo impfa idzakhalekolini soti. Padzakhalelini kulira ne kubuwula ne kuwawiwa.’—Chivumbulutso 21:4.