DZIKO ILI PA MABVUTO

2 | Ayi kumbandodzonga kobiri

NDAWA YAKE VIRI VODEKANA

Ntsiku iliyose, wanthu achakhala bize kuti agumane vinthu vodekana pa moyo wawo. Ni vobvesa ntsisi kuti mabvuto ya dziko iyi yawachitisa kuti ambabonere maninge. Ndawa chani?

Kukakhala ku na mabvuto vinthu ninge nyumba, vakudya vikhala vodula maninge.
Mabvuto yakawanda, wanthu azinji achosewa basa panango achepeserewa kobiri.
Kukachitika ngozi za nchilengedwe, mabizi yachasokonezeka ndipo nyumba na katundu munango adzongeka. Vimwevi vichitisa kuti wanthu ambakhale osauka.

Vomwe muchadekana kudziwa

Mukambaphatisa bwino basa kobiri, vidzakushupenilini mukadzagumana na mabvuto.
Kugumana kobiri zizinji, kusunga kobiri komasoti katundu uzinji, nthawe zinango vikhala viribe phindu ndawa yakuti vimala mphanvu.
Pa na vinthu vinango vomwe kobiri ingagulelini ninge kukhala okondwa na kukhala na banja yobverana.

Vomwe mungachite manjeuno

Baibolo inena kuti: ‘Tikakhala na chakudya, vovala na pogona, timbakhutire na vimwevi.’—1 Timoteyo 6:8.

Kukhala okhutira kuphatanidza pomwe kumbadziyikhira malire pa vomwe tinkufuna. Kukhala okondwa na vomwe takwanisa kugumana ntsiku na ntsiku. Vimwevi ni vodekana maninge makamaka tikakhala kuti tinkugumana na mabvuto yosowa kobiri.

Kuti mukhale okhutira na vomwe munavo, muchadekana kuchinja vomwe muchachita pa moyo wanu. Mukambafuna kukhala na moyo wapadzulu kuposha pa kobiri zomwe muchagumana, mabvuto yanu yosowa kobiri yangamalelini.

VOMWE MUNGACHITE KUTI MUPIRIRE—Mpfundo zomwe zingakuthandizeni

Pa nthawe ya mabvuto, mpfundo izi zingakuthandizeni kuti mukwanise kusunga kobiri

MUMBACHEPESE VINTHU VOMWE MUCHAGULA

Mumbachepese vinthu vomwe muchagula

Ayi kumbandothamangira kugula vitsulo panango vovala vinyowani. Mumbadzibvunze kuti: ‘Ko ninkudekanadi karo? Ko ningalime dimba ya muliwo wamasamba?’
Mukanati kugula chinthu mumbadzibvunze kuti: ‘Ko ninkufunikadi chinthu mwechi? Ko nikwanise kupagali?’
Peno kwanu vichitika, munganembese kuboma kuti mumbatambire thandizo.

“Ninge banja tidaganizira pomwe momwe tichaphatisira basa kobiri. Tidachepesa kobiri zomwe timbaphatisira basa pakuchita vinthu vokondweresa. Tidayamba pomwe kumbaphika chakudya chomwe chidzongalini kobiri zizinji.”—Gift.

MUMBAKHALE NA PULANI

Mumbakhale na pulani

Baibolo inena kuti: ‘Vomwe munthu wakhama aganiza vimuphindulira koma wagugu shuwadi adzasauke.’ (Miyambo 21:5) Kuchita pulani kungakuthandizeni kuti muleke kumbadzonga kobiri zizinji kuposha zomwe muchagumana.

Chakuyamba nembani kobiri zomwe muchagumana mwezi uliwose.
Chachiwiri onani vinthu vomwe muchapagali mwezi uliwose.
Ndipo onani kobiri zomwe muchagumana na zomwe muchaphatisa basa. Ndipo peno ni vokwanisika mungachepese vinthu vinango kuti vibverane na kobiri zomwe muchagumana.

“Mwezi uliwose tinemba kobiri zomwe tichagumana na zomwe tinkufuna kuziphatisa basa. Tiyesesa kusunga kobiri zakuti tiziphatise basa pavinthu va dzidzidzi na vinthu vomwe tinkufuna kudzagula kutsogolo. Tikambachita vimwevi tikhalalini na nkhawa, ndawa yakuti tidziwiratu momwe tingaphatisire basa kobiri zomwe tichagumana.”—Carlos.

AYI KUMBANDOCHITA VIKWERETE / MUMBASUNGE KOBIRI

Ayi kumbandochita vikwerete / Mumbasunge kobiri

Mumbakhale na pulani yabwino kuti mubwezere vikwerete vomwe munavo. Peno ni vokwanisika ayi kumbakwereta. Ndipo mumbayesese kusunga kobiri kuti mugule vomwe munkufuna.
Mwezi uliwose mumbayesese kusunga kobiri yakuti mudzayiphatise basa pa vinthu vomwe munkudziwiratu panango vinthu vadzidzidzi.

MUMBALIMBIKIRE BASA

Baibolo inena kuti: ‘Kuphata basa iliyose kuphindulisa.’ —Miyambo 14:23.

Mumbalimbikire basa

Mumbawone basa yanu kukhala yodekana. Podiya ichikhala kuti ndiyolini yomwe munkufuna koma ikupasani kobiri.
Mumbayesese kuphata basa mwakhama komasoti mumbakhale othembeka. Vimwevi vidzakuthandizeni kuti mukhalise pa basa. Ndipo peno ingamale mudzabonerelini kugumana inango.

“Niphata basa iliyose yomwe nagumana, podiya kuti basa yake ikhale yomwe nimbaifunalini olo kuti kobiri zake ni zing’onong’ono. Niyesesa kukhala wothembeka komasoti kuphata bwino basa ninge kuti basa mweyo ni yangu.” —Dmitriy.

Peno munkufuna basa . . .

Mumbayesese kuifaga. Mumbayese kufaga basa ku ma impreza yomwe kungagumanike basa olo kuti alibe kulengeza kuti ankufuna wanthu wabasa. Mumbauze anzanu komasoti azibale wanu kuti munkufaga basa.
Mumbakhale okonzeka kuchinja. Ni voshupa kugumana basa yomwe inavose vomwe munkufuna.