29 JUNHO–5 JULHO, 2026
NYIMBO NA. 131 “Chomwe Mulungu wamanga”
Pitirizani kulimbisa banja yanu
‘Pali munzako yemwe akukonda kuposha m’bale wako.’—MIY. 18:24.
CHOLINGA
Nkuwona vomwe mwamuna na nkazi afunika kuchita kuti alimbise banja yawo.
1. Ndawa chani azishamwali wabwino ni mphaso yochokera kwa Yahova?
AZISHAMWALI chaiwo ni mphaso yochokera kwa Yahova. (Yak. 1:17) Iwo akonda Yahova komasoti akonda isepano. Kuingizira mwapa, iwo akhala wokondwa akationa kuti isembo tinkukondwa. Iwo atilimbikisa tikakhala kuti ndise wokwinyirira ndipo atipasa malangizo pa nthawe yomwe tikufunikira. Iwo ni wokhulupirika ndipo isepano tiwathemba. Azishamwali wateneuyu achitisa ‘ntima kukhala wokondwa.’ —Miy. 27:9.
2. Ndawa chani ni vofunika kuti mwamuna na nkazi apitirize kulimbisa banja yawo? (Mateyu 19:6)
2 Ni vofunika maninge kuti mwamuna na nkazi ambawonesane chikondi. Koma iwo afunika kukumbukira kuti afunika khama kuti apitirize kukondana. Peno iwo angaleke kuchita khama kuti akhale paushamwali wolimba, vinthu vingawafambirelini bwino. Koma akayesesa kuwonesana chikondi, adzakhale wokondwa. (Werengani Mateyu 19:6.) Mupfunziro mwaino tione momwe mwamuna na nkazi angapitirizire kuwonesana chikondi. Koma manje naboni tikambirane vomwe munthu yemwe ankufuna kulowola afunika kuchita peno ankufuna kusalula munthu yemwe ankufuna kudzangena naye banja.
KO MUNGASALULE TANI MUNTHU YEMWE MUNKUFUNA KUDZALOWOLANA NAYE?
3-4. Nchani chomwe chingathandize Mkhrisitu kugumana munthu woyenerera yemwe ankufuna kulowolana naye? (Miyambo 18:22)
3 Tikalibe kuchita chosalula chirichose tifunika kuganizira ngozi komasoti maphindu yomwe tidzakhale nayo ndawa ya chosalula chathu. Vomwe tingasalule vingachinje moyo wanthu kukhala wokondwa panango neye. Ndipomwapa, tikalibe kuchita chosalula chirichose tifunika kuyamba taganizira.
4 Tikakhala kuti tinkufuna kusalula munthu yemwe tinkufuna kudzalowolana naye, tikhala kuti tinkufuna kusalula shamwali yemwe tidzakhale naye kwa moyo wanthu wose. Ndipomwapa, chimwechi ni chosalula chofunika maninge. Ndawa yakuti Yahova ndiye adayambisa banja, tifunika kubvera malangizo yake tikalibe kuchita chosalula mwichi. Yahova ankufuna kuti mwamuna agumane nkazi wabwino komasoti kuti nkazi agumane mwamuna wabwino. Yahova adziwa vomwe ni vabwino kwa isepano. (Werengani Miyambo 18:22; Yes. 48:17, 18) Mpfundo za m’Baibolo zingathandize Mkhrisitu kusalula bwino munthu yemwe ankufuna kulowolana naye.
5. Ndawa chani ni vofunika kusalula munthu yemwe ni wobatizika kuti mulowolane naye?
5 Tikabatizika tikhala paushamwali na Yahova. (Sal. 25:14) Ndipomwapa, peno munkufuna kusalula munthu yemwe munkufuna kulowolana naye, mufunika kusalula munthu yemwe ali paushamwali wolimba na Yahova. (1 Akor. 7:39) Vimwivi viwonesa kuti munkulemekeza mpfundo za Yahova. Kuingizira mwapa, mudzamuwone munthu muyo ninge mphaso yochokera kwa Yahova. (Miy. 19:14) Mukachita vimwivi, mudzapewe “kumangiwa djoko” na munthu yemwe akondalini Yahova. (2 Akor. 6:14) Ni nzerulini kusalula munthu yemwe atumikiralini Yahova kuti mulowolane naye, olo kuti mumpingo ankugumanikalini munthu yemwe munkufuna kulowolana naye. Komasoti vingakhalelini vanzeru kulowolana na munthu yemwe ni Mbonilini nkumbaganiza kuti mudzamuchinje nkukhala wa Mboni.
6-7. Ko ni mibvunzo yaponi yomwe yafunika kudawiriwa pa nthawe yomwe muli pachibwenzi?
6 Ni shuwadi kuti ni Akhrisitu lini wose womwe ni wobatizika womwe angakhale mwamuna wabwino panango nkazi wabwino. Ndipomwapa peno munkufuna kusalula munthu yemwe munkufuna kudzalowolana naye,a vingakhale bwino kudzibvunza mibvunzo aya: ‘Ko iye achita tani vinthu na azibale wake? Ko ni wachikondi komasoti waulemu? Ko azishamwali wake anamakhalidwe yabwino? Ko achita tani vinthu akakhala kuti wasiyana maganizo na munzake? Ko akhala wokonzeka kubvesera maganizo ya anango? Ko aphatisa tani basa kobiri?’
7 Mungadzibvunze pomwe kuti: ‘ko munthu muyu akonda Yahova? Ko ankuyesesa “kuvala umunthu unyowani?” Ko iye adzanithandize kuti nipitirize kutumikira Yahova? Ko volinga vathu votumikira Yahova ni volingana? Ko adzakhale shamwali wabwino kwa inepano?’ (Akol. 3:9, 10) Peno ndimwe mulongo, ko m’bale yemwe muli naye pachibwenzi adzakhale nsolo wabwino? (1 Akor. 11:3) Peno ndimwe m’bale, ko mulongo yemwe muli naye pachibwenzi adzakulemekezeni komasoti ambadzalemekeze vosalula vanu? Imwepo mufunika nthawe kuti mudawire mibvunzo mwaya. Ndipomwapa, phatisani bwino nthawe yomwe muli pachibwenzi kuti mumudziwe bwino munthu yemwe munkufuna kulowolana naye.
8-9. Ko nchani chomwe chingathandize munthu yemwe ali pachibwenzi kuchita chosalula mwanzeru? (Onani pomwe foto.)
8 Chinthu chinango chomwe chidzakuthandizeni kuchita chosalula chabwino pomwe muli pachibwenzi na munthu yemwe munkufuna kulowolana naye, ni kumudziwa bwino munthu muyo. Ndipo mbabvunzani anango va mbiri ya munthu muyo komasoti makhalidwe yake. Mwakulinganiza, ko iye ni wachikondi, wodzichepesa komasoti ololera? Mulongo munango dzina yake Sarah waku Guiana ku França yemwe adalowodwa na m’bale munango dzina yake Daniel, adati: “inepano nidabvunza va makhalidwe ya Daniel kwa m’bale yemwe ambachita naye pabodzi upainiya. Nidabvunza pomwe kwa akulu wa mumpingo mwake, azishamwali wake na alongo wa mumpingo mwake.” Kuingizira mwapa, mungamubvunze munthu yemwe muli naye pachibwenzi mwaulemu vinthu vomwe vinkumuchitikira pa moyo wake na cholinga chakuti muvidziwe. Vimwivi nivofunika ndawa yakuti pana mabvuto yanango yomwe ukaleka kuyadziwiratu muli pachibwenzi vingadzabwerese mabvuto m’banja.
9 Ayi kunyalanyaza peno munkukaikira panango wanthu ankukuuzani chaivo vonena va munthu yemwe munkufuna kulowolana naye. Mukachita teno, mudzakwanise kusalula kupitiriza chibwenzi panango neye. Manje naboni tione malangizo kwa wale womwe ni wolowolana kale.
Pa nthawe yomwe muli pachibwenzi yesesani kumudziwa bwino munthu yemwe munkufuna kulowolana naye (Onani ndime 8-9)
KHALANI NA NTHAWE YOCHITIRA VINTHU PABODZI
10. Ndawa chani ni vabwino kuti mwamuna na nkazi ambakhale na nthawe yocheza?
10 Mwamuna na nkazi wake, afunika kukhala na nthawe yocheza pabodzi olo kuti akhala wotangwanika. Pa nthawe mweyi, iwo angakambirane momwe ntsiku mwiyo yafambira, aliyese angafotokoze maganizo yake na kuchita vosangalasa.
11. Ko nchani chomwe chingabwerese mabvuto yakulu m’banja?
11 Akakhala kuti mwamuna na nkazi akondanadi chaivo, afunalini kuti ambakhale nthawe itali ne kuonana. Nishuwadi kuti angambandokhaliralini ankucheza nthawe zose, koma kukhala kuti munango ali kutali, ni ngozi ikulu. Mwakulinganiza, wanthu anango abvuma basa yomwe iwachitisa kuyenda dziko inango, vomwe viwachitisa kuti akhale kutali na banja yawo kwa nthawe itali. Olo kuti vimwivi panango vingachitise kuti banja ikhale ilibe bvuto yosowa kobiri, koma kukhala kunango kwa nthawe itali, kungabwerese ngozi ikulu banja.
12-13. (a) Ko mabanja yanango yachita tani kuti ambakhale na nthawe yocheza? (Onani pomwe foto.) (b) Ko nkazi wathu panango mwamuna wathu ni wofunika tani pa moyo wathu? (Onani bokosi yakuti “Ko nkazi wangu panango mwamuna wangu ni wofunika tani pa moyo wangu.”)
12 Onani vomwe mabanja yanango yachita kuti yambakhale na nthawe yocheza. Leah yemwe akhala ku Guam adati: “Ine na mwamuna wangu tikonda kuchitira vinthu pabodzi ndipo olo vinthu vosangalasa tichitira pabodzi.” Roxanne waku Estados Unidos adati: “Ndawa yakuti tikhala wotangwanika maninge tikonza ndandanda yakuti timbakhale na nthawe yochitira vinthu pabodzi.” (Onani pomwe Amosi 3:3.) Damien waku França adati: “Isepano tipfunzira kuona vomwe munango akonda nkuyambambo kukonda vimwevo.” (Mat. 7:12) Ndipo Katie waku Estados Unidos adanenambo kuti: “nthawe zinango tisiya mafoni, kuti tikhale na nthawe yocheza.”
13 Chofunika maninge chakuti wolowolana ambakhale na nthawe yochitira vinthu pabodzi pa nkhani yotumikira Yahova. Mulongo munango waku França dzina yake Myriam adanena kuti: “Isepano ntsiku iriyose kumachibese tiwerengera pabodzi Baibolo ndipo tifotokoza vomwe tapfunzira na momwe tingaviphatisire basa pa moyo wathu. Inepano nikomedzewa maninge tikambachita vimwivi komasoti nikomedzewa maninge mwamuna wangu akambapempherera banja yathu. Pa nthawe mwiyi, nikwanisa kuona momwe mwamuna wangu akondera Yahova.” Ndipo Katie yemwe tamutomola pakuyamba ule adati: “Vinthu vomwe tikonda kuchitira pabodzi ni kulalikira. Ni vabwino maninge kubva munango ankulalikira va Yahova ndipo tipfunzira maluso kwa munango na munzake.”—Miy. 27:17.
Limbisani banja yanu pakukhala na nthawe yocheza (Onani ndime 12-13)
PITIRIZANI KUCHITIRA VINTHU PABODZI OLO KUTI MUNKUGUMANA NA MABVUTO
14-15. Ndawa chani wanthu womwe ni wolowolana, afunika kuchita vose vomwe angakwanise kuti akambirane mabvuto yomwe yangabwere m’banja? Perekani chitsanzo.
14 Ndawa yakuti ndise wochimwa, wanthu wolowolana agumana na mabvuto m’banja. Baibolo inena kuti wale womwe ni wolowolana “adzagumane na mabvuto.” (1 Akor. 7:28) Mawu ya m’nyantsi pa vesi mweyi “yankutanthauza mabvuto yomwe mabanja yagumana nayo.” Vimwivi vikachitika, ko ndawa chani wolowolana afunika kuchita vose vomwe angakwanise kuti akonze nkhani mwiyo na kupitiriza kukondana?
15 Ganizirani chitsanzo ichi: Peno nyumba panango chinthu chinango chofunika maninge chikadzongeka, ni vochita kuonekeratu kuti munikachiro angasalule kuchikonza pomwe. Olo kuti basa mweyo ingatenge nthawe itali kuti imale ndipo panango pangafunike kobiri zizinji, vochita kuonekeratu kuti angapitirize kukonza basi olo kuti vimutengere nthawe ikulu. Ndawa chani? Ndawa chinthu chimwicho ni chofunika maninge kwa iye. Mwanjira ibodzibodzi mwiyi, wanthu womwe ni wolowolana ni wofunika maninge. Shuwadi, olo mabanja yomwe yabvana maninge yagumanambo na mabvuto. Koma ninge chinthu chire chomwe chadzongeka koma chakonzewa pomwe, kwa walembo womwe ni wolowolana ni vokwanisika kukambirana mabvuto yawo nkupitiriza kukhala mokondwa. Ni shuwadi kuti pafunika khama kuti vimwivi vikwanisike, koma Yahova akhala wokondwa maninge akaona kuti wanthu womwe ni wolowolana ankuchita vose vomwe angakwanise kuti alimbise ushamwali wawo. (Mal. 2:16) Mwanjira mwiyi, iwo awonesa kuti akondana komasoti kuti alemekeza Yahova yemwe adayambisa ukwati.
16. Mobverana na lemba ya 1 Akorinto 13:4-8a, ko nchani chomwe chingathandize banja kulimbana na mabvuto yakulu yomwe ankugumana nayo m’banja mwawo? (Onani pomwe foto komasoti bokosi yakuti “Ko nchani chomwe chingakuthandizeni kulimbisa banja yanu.”)
16 Peno mungagumane na mabvuto m’banja mwanu, ayi kuganiza vomalisa banja. (1 Akor. 7:10, 11) M’malo mwa vimwevi, mungadzibvunze kuti: ‘Ko tifunika kuchita chani kuti tipitirize kukondana? Mungawerenge Baibolo na kuona malangizo yomwe yafotokoza va momwe mungakhalire na banja yokondwa na kuyesesa kutewedza malangizo yomwe yagumanika pa 1 Akorinto 13:4-8a. (Werengani.) M’malo mothamangira kumalisa banja yanu mukakhala kuti munkugumana na mabvuto, mbayesesani kukambirana kuti mupitirize kukondana. Mbaganizirani vomwe mungachite kuti mupitirize kulimbisa banja yanu. Mbapempherani kwa Yahova kuti akuthandizeni kukhala na banja yokondwa. Mumbafagefage muvofalisa vathu, mavidiyo, kukumbira thandizo kwa akulu komasoti kukumbira thandizo kwa abale womwe ali paushamwali wolimba na Yahova. Baibolo inena kuti ukwati uli ninge ‘chingwe chokonzewa na vingwe vitatu’ ndipo chingwe chofunika maninge m’banja yanu ni Yahova. Ndipomwapa, mukambachita vinthu vomwe iye afuna, ‘banja yanu idzakhale yolimba.’—Mla. 4:12.
Chitani vose vomwe mungakwanise kuti mumbakambirane mabvuto yomwe yangabwere m’banja mwanu (Onani ndime 16)
17. Ko wale womwe ankufuna kulowola na wale womwe ali kale pabanja angakhale tani wokondwa?
17 Yahova afuna kuti atumiki wake wose ambakhale wokondwa. Vimwivi vinkuphatanidza wale womwe ankufuna kulowola na wale womwe ali kale pabanja. Ndipomwapa, peno imwepo munkufuna kusalula munthu wakuti mulowolane naye, salulani munthu yemwe anamakhalidwe yabwino komasoti yemwe akonda Yahova na cholinga chakuti mudzakhale naye kwa moyo wanu wose. Peno muli kale pa banja pitirizani kulimbisa banja yanu. Chitani vose vomwe mungakwanise kuti mumbakambirane mukakhala kuti munkugumana na mabvuto m’banja mwanu ndipo mbathembani malangizo ya Yahova. Mukachita vimwivi, ‘mudzakhale na banja yokondwa.’—Mla. 9:9.
NYIMBO NA. 132 Manje ndise thupi ibodzi
a Kuti mudziwe vizinji va momwe mungasalulire munthu wakuti mudzalowolane naye, onani nkhani yakuti: “Vomwe mungachite kuti chibwenzi chanu chikuthandizeni kusalula vinthu mwanzeru, koma paka nsolo kakuti: “Kudziwana bwinobwino” mu Ntsanja ya Ulonda ya Maio 2024.