11-17 MAI 2026
LUNGIMBO 7 Yehowa Udi Muhuluishi Wami
Khala Mushila Fumu wa Mavu Agasue Mutshima
“Yehowa, phamba aye udi Nzambi wa gudinyinyiga holu dia mavu agasue.”—Ngi. 83:18.
MU GUHIHIA
Tuza mumona luholo tuajiya gukolesa gutshigina guetu gudi Yehowa nu gusha mutshima egi muene mbawutukuatesa mu malamba agasue tudi mutagana nawo mangino nu mu masugu adi muza.
1. Ndaga jitshi jiabuidile Yobo?
YOBO watagenele nu malamba avula: an’enji afuile, sante yenji yabolele, watotesele nji umonyi wenji wagasue. Lukuma luenji nji luabolele. Ndaga jiamuwambelele “mafuta” enji jiamulebesele luko muila. Mukaji’enji nji wakhalele nu gikenene giavula, wamuwambelele egi ‘ate Nzambi mukumbu nu afue genji.’ (Yobo 2:9; 15:4, 5; 19:1-3) Ndaga jiagasue jiabuidile Yobo jiakhalele naye gumutuma ha gubemba gushila Nzambi wa giamatshidia mutshima nu gusendesa gudihula gula Yehowa wana bamba diago athu ana gumuzumba nu ana gumukombelela.
2-3. Gula tudi mutagana nu malamba, itshi tuajiya gusendesa gudihula? Itshi tuza mulonguga mu mukanda wa Yobo?
2 Esue nji tuajiya gutagana nu malamba ajiya gulola gutshigina guetu gudi Yehowa. Tudi mujinga mu masugu a gisugishilo adi a guzala pha nu “matangua a lamba nu ndaga jiakola.” (2 Tim. 3:1) Gula malamba avula atubuila giphungu gimoshi, tuajiya guvua gikenene nu gutangiza egi mbatushigo mukhala nu luholo lua gukolesela. Ndaga jia luholo jiatumile gale athu ako ha gudihula gula Yehowa wana gudisagesa diago mukunda nu ene.
3 Gila aye nji watagenele gale nu ndaga ya luholo elu, ulebigo muila. Yobo wakotelesele egi Yehowa wana huluisa athu adi agujinginyina gudi muene. Esue nji tuajiya gukhala nu gutshigina guakola gua luholo elu gudi sh’etu wa mu dilu. Tutadilenu luholo mukanda wa Yobo wajiya gutukuatesa mu ndaga yene. Tuza mumona ndaga mbadi jia ndando jidi naye gututuma ha gushila Nzami mutshima: Ya thomo, Yehowa udi Nzambi wa gudinyinyiga. Ya mbadi, Nzambi wetu wakhala nu ngolo jia gutagenesa ndaga jiagasue jiana laya muene, wana bamba nji akombeledi enji gu ndaga jiajiya gubolesa ufuta wawo n’enji nu guabatela malamba mayilago.
SATANA WANGINYILE MUKATSHI DIAWO
4. Akuatshi akhalele mu gudibungisa gua mu dilu adi muzuelela mu mukanda wa Yobo?
4 Lusugu lumoshi, “ana a Nzambi wa giamatshidia” adibungishile gutuama dia Yehowa mu dilu. Biblia idi muzuela egi: “Satana nji wanginyile mukatshi diawo.” (Yobo 1:6) Verse eyi yene fundo dia thomo Biblia yana kalegela mbimbi “Satana” ha guzuelela mbalagaji wakoma wa Yehowa. Mu tangua diene ana a Nzambi adibungishile, Satana gakhalelego luko mun’a Nzambi wa gujinginyina. Wakhalele wabui gale mbalagaji wa Yehowa nu wa an’enji adi mu dilu nu ha mavu. Yehowa wamonesele egi Satana gakhalelego luko mukatshi dia fami yenji ya mu dilu, hazuelele muene mbimbi jidi mu Gisendeselo 3:15. Yakotelesa egi Satana gashigo mukatshi dia “mukhetu” (fami ya Yehowa ya mu dilu), munu wakhalele naye guvuala “vungu.”
5. Ndaga jiazuelewe mu gudibungisa gua mu dilu jidi gutulongesa itshi?
5 Yehowa wasonegesele lumene luene mu Biblia. Ndaga jiazuelele Satana jiamonesele diago egi wakhala muthu wabola nu muenya mambo. (Yobo 1:9; fuanesa nu Gumonesa 12:10.) Luholo Yehowa wasonegesele lumene luene mu Biblia, idi mumonesa egi wana kalegela ufumu wenji mu luholo luabonga nu luatagana diago. Idi nji gutumonesa egi Nzambi wa ngolo jiagasue wakhala nu ufumu wa guhana athu njila ha gutshita ndaga nga ndo.
YEHOWA WAKHALA NU UFUMU WA GUTOMBA NDAGA ATHU AJIYA GUTSHITA NU JINYI AJIYILEGO GUTSHITA
6. Luholo lutshi Yehowa wamonesele egi wakhala Nzambi wa gudinyinyiga? (Yobo 1:7, 8)
6 Tanga Yobo 1:7, 8. Yehowa wakhalele mutuameza ndaga jiagasue jiabalegele mu gudibungisa guene. Wahudile Satana egi: “Wamonyi muenya mudimo wami Yobo ba?” Muhu wene wamonesele egi Yehowa wakhalele mujiya egi Satana wakhalele mutshigina guluisa Yobo. Tutadilenu luholo Yehowa wakalegele ngolo jienji ha gukuatesa Yobo.
7. Ha gutadila Yobo 1:10, 11, Satana wazuelele egi mukunda natshi athu ana kombelela Yehowa?
7 Tanga Yobo 1:10, 11. Yehowa wakhala Nzambi wa gudinyinyiga ha mavu nu mu dilu. Wana kalegela ufumu wenji ha gutshita ndaga yagasue yatshigina muene nu wana jiya ndaga yabonga ya gutshita tangua diagasue. (Yel. 32:17; Dan. 4:35) Ikhale ngenyi, Satana wazuelele egi Yehowa wana kalegela ufumu wenji mu luholo luabola. Wazuelele egi Nzambi wana hana athu gifua Yobo ima yabonga hagula ajiya gumukombelela. Wakhalele nji mutshigina guzuela egi athu ana kombelela Yehowa mukunda nu gubonga guawo uvi ishigo handaga ana gumuzumba. Ndaga itshi Yehowa wakalegele?
8-9. Mukhuala utshi Yehowa washidile Satana? Mukunda natshi? (Yobo 1:12) (Tala nji gifuanesa.)
8 Tanga Yobo 1:12. Yehowa wahanele Diabulu njila ha gulola Yobo, uvi wamutunyishile ndaga jiko jiakhalelego naye muene gutshita. Wamuwambelele haphelo egi: “Uvi muene [Yobo] hakhenji umutshitshigo gubola!” Yehowa wahanele Satana mukhuala wene ha meso a anjelo agasue. Satana gakhalelego nu luholo lua gutshita ndaga gu ngolo jienji, wakhalele naye gutumagela mukhuala wene. Mukhuala wene wana khala ngenyi uu nu mangino. Satana wana kalagala phamba ndaga Yehowa wana gumuhana njila ha gutshita. Yehowa wakalegele ngolo jienji nu ufumu wenji ha gubamba Yobo nu ha gumonesa egi wakhala Nzambi watagana nu wa guzumba.
9 Satana gabingilego ha gulebesa gutshigina gua Yobo. Yobo walanduile gukombelela sh’enji wa mu dilu nu gujinginyina guagasue. (Yobo 1:22) Uvi Satana gasugilego hanyanyi, walanduile gutshita ndaga jiko ha gulola Yobo.
Yehowa wahanele Satana njila ha guzuelela matangi enji ha meso a anjelo (Tala paragrafe 8-9)
10. Mukunda natshi Yehowa wahanele luko Satana njila ha gulola Yobo? (Yobo 2:2-6)
10 Tanga Yobo 2:2-6. Satana wakalegele ndaga jiko ha gulola Yobo. Wazuelele egi gula Yobo wamona egi udi mutshigina gufua, mbawuta Nzambi mikumbu nu mbawubemba gumukombelela. Ha gumonesa egi Satana udi muenya mambo, Yehowa wamuhanele njila ha gukatesa Yobo. Uvi wamuhanele nji mukhuala uko egi: “Umushiyigo!” Satana gakhalelego nu luholo lua gushiya Yobo handaga Yehowa gamuhanelego njila. Ndaga jiene jiagasue jiamonesele egi Yehowa udi Nzambi wa gudinyinyiga nu muene wakhala nu ufumu, handaga Satana gakhalelego nu luholo lua gutshita ndaga jinyi muene gamuhanelego njila ha gukalagala.
YEHOWA WAMANESELE MALAMBA A YOBO
11. Tangua Yehowa wamanesele malamba a Yobo, ishimbigo itshi yamuhanele muene? (Yobo 42:10-13)
11 Tanga Yobo 42:10-13. Luholo Yobo wasalele wa gujinginyina gudi Yehowa, Yehowa gahanelego luko Satana njila ha gulandula gumumonesa malamba. Wamanesele malamba a mukombeledi wenji wa gujinginyina. Satana gakhalelego nu luholo lua gukanga Yehowa njila ha gubamba Yobo nu gumushimbiga mukunda nu gutshigina guenji.
12. Hana gifezegeselo gidi mumonesa luholo Yehowa wana kuatesa athu ana gumushila mutshima.
12 Yehowa wana kalegela nji ngolo jienji ha gukuatesa akombeledi enji mu masugu awa a gisugishilo. Ha gufezegesa, mu 1945 masuta a enya Nazi atumile Matemue a Yehowa 230 ha guwenda ha malu sendese gu bologo dimoshi gu Allemagne uu nu gu kianga (vuayaje yene yana tamegewa mu français egi marche de la mort dans le camp de concentration Nazie). Atshitshile ngenyi handaga akhalele mutshigina guashiya, uvi aphangi ene agasue ahulugile. Aphangi ene asonegele mukunda nu lamba diaabuidile, azuelele egi Yehowa waahuluishile gifua luholo luahuluishile muene mavuala thathu a enya Hebelu mu fulu ya tshuya tuakola; mavuala ene akhalelego nga nu vumba dia mishi ha muila wawo. Aphangi ene nji atagenele nu lamba diakola, uvi gutshigina guawo gualebelego. Yehowa waahanele diago ngolo. Azuelele egi: “Gungima dia gukhala mu wina wa khoshi . . . tudi gudifelela egi Yehowa atuhane luendu lua gumukombelela . . . mayilago. Mbayikhala gishimbigo giakoma diago.”—Fuanesa nu Danyele 3:27; 6:22.
13. Itshi tudi naye gujiya gula tudi mutagana nu malamba? (Tala nji ifuanesa.)
13 Esue nji tuajiya gutagana nu malamba mu monyo wetu ajiya gututuma ha gudivua gifua tuabishidiwa mu wina wa khoshi. (1 Phet. 5:8-10) Mu matangua a luholo elu, tuajiya guleba muila nu gutangiza egi malamba etu mbaashigo muhua. Gula tuadivua ngenyi, ndaga yabonga tuajiya gutshita idi gutangiza lumene lua Yobo. Tudi naye gusha mutshima egi Yehowa udi nu ngolo jia gumanesela malamba etu henyaha nga mu mavu ahe-ahe. Yehowa watombele gale lusugu mbalushiya muene mavu awa; mbagashigo mutshigina egi nga tangua diazonda dibalega luko!
Yehowa mbawumanesela malamba a akombeledi enji agujinginyina (Tala paragrafe 13)
YEHOWA WANA ZUMBA AKOMBELEDI ENJI A GUJINGINYINA
14-15. Itshi Yehowa wana tshigina gukalegela akombeledi enji a gujinginyina? Mukunda natshi? (Yobo 14:15) (Tala nji holu dia gizula.)
14 Tanga Yobo 14:15. Tata wetu wa mu dilu wana zumba akombeledi enji a gujinginyina muavula. Wana guazula nu ndando yavula; gula afua, wana nengena nu mutshima zagu-zagu tangua mbadiafuzumuna muene. Mbawukatula diago malamba agasue ana gutubatela gufua.—Yesh. 65:17.
15 Yobo walanduile gukhala ha mavu abola a Satana, uvi Biblia idi mumonesa egi Yehowa wamuhanele luko sante yabonga nu ishimbigo yavula gubalega ima yagasue yakhalele nayo muene gutuama dia gulolewa. Ishimbigo yene yakhalele mumonesa egi mu masugu adi muza, Yehowa mbawumuhana ima iko yavula yabonga. Ndaga Yehowa wakalegele Yobo jidi mumonesa egi wana tshigina diago egi akombeledi enji a gujinginyina akhalele nu gusuanguluga mu monyo wawo. Mu masugu adi muza, Yehowa mbawuhana athu agasue mbaasala a gujinginyina gudi muene luendu lua gubua athu atagana nu ha gukhala nu gusuanguluga mu phaladiso ha mavu. (Gumo. 21:3, 4) Yehowa udi nu nzala ya gutshita ndaga jiene handaga muene Nzambi wa gudinyinyiga ha mavu nu mu dilu. Gujiya ndaga eji gudi naye gutuhana gikhesa tangua tudi mutagana nu malamba!
Gungima dia gumona malamba, Yobo nu mukaji’enji ahetele ishimbigo yavula ya Yehowa (Tala paragrafe 14-15)
16. Ndaga itshi iko idi naye gututuma ha gushila Yehowa mutshima?
16 Gungima dia gujinga luko ivo yavula, Yobo wafuile. Uvi Yehowa udi nu ngolo jia gumufuzumuna handaga udi Nzambi wa gudinyinyiga nu wa ngolo jiagasue. (Mikh. 32:39) Gushigo nu muthu wajiya gumukanga njila ha gufuzumuna athu ana zumba muene mu tangua mbaditomba muene.—Roma 8:38, 39.
LANDULA GUSHILA YEHOWA MUTSHIMA
17. Itshi idi mumonesa egi Satana gabingilego ha gumanesela akombeledi a Yehowa?
17 Lumene lua Yobo ludi mu Biblia luana gutumonesa gishina tudi naye diago gulandula gushila Yehowa mutshima. Tuana khala nu gusuanguluga handaga Yehowa gahanelego Satana njila ha gumanesela akombeledi enji! Tudi mujiya egi Yehowa udi Nzambi wa gudinyinyiga handaga mangino athu bamilio 9 ana gumukombelela nu gujinginyina guagasue. Iphungu yavula, tuana mona luholo mbalagaji jiana tshita yagasue ha guluisa akombeledi a Yehowa uvi jianago gubinga. (Yesh. 54:17) Mafumu avula a leta nu a ikombelelo atshitshile yagasue ha gumanesela akombeledi a Yehowa handaga akhalele mutangiza egi gushigo nu muthu wa guahuluisa, uvi ndaga jiene jiagasue jiabingilego. Gushigo nu muthu nga gima giajiya gutukanga njila ha gulongesa giamatshidia giatadila Yehowa nu gumonesa haphelo egi Satana udi muenya mambo nu mushiyi wa athu. Nga guene gufua guajiyilego gutukanga njila handaga tudi mujiya egi Yehowa mbawufuzumuna athu agasue adi a gujinginyina gudi muene.—Hosh. 13:14.
18. Mukunda natshi tushigo naye guvua woma mukunda nu ndaga mbajitubuila mu masugu adi muza?
18 Gutangigiza lumene lua Yobo guajiya gukolesa gutshigina guetu mukunda nu masugu adi muza. Mu sungi ya lamba diakola, Satana nu athu enji mbaaluisa akombeledi a Nzambi handaga mbaatangiza egi gushigo nu muthu wa guahuluisa. Uvi gifua luholo tuayimonyi mu lumene lua Yobo, Yehowa mbawubamba akombeledi enji nu mbagashigo muhana Satana njila ha guamanesela mayilago. Gualeha ndo, mbawumanesela malamba agasue atubatelele Satana. Diabulu nu bademo enji mbaabishidiwa mu wina dishigo nu gisugishilo mukunda nu ivo 1 000. (Luka 8:31; Gumo. 20:1-3) Gungima dienji, Satana nu athu agasue mbaaya gu khanda yenji mbaashiyiwa mayilego gifua luholo Yehowa wazuelele.—Gis. 3:15; Roma 16:20; Gumo. 20:10.
19. Ndaga jitshi jiabonga mbajiheta athu ana shila diago Yehowa mutshima? (Tala nji gifuanesa.)
19 Akombeledi a Nzambi ana nengena nu mutshima zagu-zagu tangua mbaabua athu atagana nu mbaakhala nu gusuanguluga mu mavu ahe-ahe. Lujingu mbalukhala luabonga diago. Yehowa walayele egi: “Tala! Ngudi mutshita ima yagasue ihe-ihe.” (Gumo. 21:5) Yakotelesa itshi? Satana nu bademo enji mbaashigo luko mumonesa athu malamba; mbayikhala mbala ya thomo sendese mu gilanga gia Edene. Athu mbaakhala diago mu guhuima! Malamba agasue ajiya gututuma ha gudisagesa muavula mbaashigo mukhala luko. Athu agasue mbaahuluga gu ita ya Alemagedona mbaamona ndaga jiavula jiagushimana gifua gusagewa gua athu adi mukata. Mu tangua diene, athu agasue tuakhalele muzumba afuile gale, mbaasendesa gufuzumuga. Mbatukhala diago nu lujingu luabonga gifua luholo sh’etu wa mu dilu wana tshigina egi tukhale nalo!
Yehowa mbawushimbiga akombeledi enji atagenele nu malamba avula ha mavu awa abola (Tala paragrafe 19)
20. Desizio ditshi wazula?
20 Mu masugu awa a gisugishilo, mbatutagana nu malamba avula, mbatukhala nji nu funu ya gikhesa ha gusala agujinginyina gudi Yehowa. Hene, tudi naye guzula desizio dia gushila Yehowa mutshima nu gumutumagela handaga muene Nzambi wa gudinyinyiga ha mavu nu mu dilu. Tulandulenu nji gumonesa egi tuana zumba tata wetu wa mu dilu nu gumonesa egi Satana udi muenya mambo. Tuajiya diago gusha mutshima egi gila tuasala agujinginyiga gudi Nzambi wetu wa ngolo jiagasue, mbatuheta ishimbigo yavula mu masugu adi muza handaga Yehowa wana tshigina gukuatesa akombeledi enji nu mbawuyitshita diago!
LUNGIMBO 153 Nguhane Gikhesa