“Nzambi wa Giamatshidia” Wana Tagenesa Ndaga Jiana Laya Muene

1. Ha gutadila Ngimbo 31:2-5, mukunda natshi tudi naye gushila Yehowa mutshima?

TUDI mujinga ha mavu awa ana tuamezewa gudi Satana. Athu avula ana gumba mambo nu anago gutagenesa ndaga jiana laya ene. Hene, yajiya gukhala lamba ha gujiya muthu tuajiya gushila mutshima. Mafumu avula a midimo anago guzuela giamatshidia. Enya mungenda avula nji ana gumba mambo gu ima adi musumbisa hagula athu asumbe ima yene. Athu ako nji anago gushila mafuta awo mutshima handaga anago gutagenesa ndaga ana zuela. Uvi esue tuajiya gulandula gushila Yehowa mutshima handaga wakhala “Nzambi wa giamatshidia.” (Tanga Ngimbo 31:2-5.) Yehowa ganago gumba mambo, ndaga jiagasue jiana zuela muene wana gujitagenesa. Hene, tuajiya gusha mutshima egi ndaga jiagasue jiana laya muene mbawujikalagala.

2. Itshi tuza muzuelela mu longo edi?

² Mu longo edi tuza mumona ndaga jidi naye gututuma ha gushila Yehowa mutshima. Tuza nji mumona luholo Nzambi wa giamatshidia mbawushiya mavu awa a Satana nu ndaga jidi mutshita muene mangino ha gutagenesa gutshigina guenji. Ndaga tuza mumona mu longo edi jiza gutukuatesa ha gulongesa athu ako nu gikhesa giagasue.

MUKUNDA NATSHI TUDI NAYE GUSHILA YEHOWA MUTSHIMA?

3. Mukunda natshi tudi naye gushila Yehowa mutshima?

³ Tudi naye gushila Yehowa mutshima handaga udi mufugi. Muene wafugile dilu nu mavu nu ima yagasue idi nu monyo. (Gis. 1:1; Ngi. 36:9; Gumo. 4:11) Wafugile mavu nu ima yagasue tuana khala nayo funu ha gutukuatesa ha gukhala nu monyo, gifua muhehe nu meya. Muene wana bamba ima yagasue idi ha mavu. Yehowa muene watufugile, wakhala nu ndunge nu ngolo jiavula, tuajiya diago gumushila mutshima.

4. Ndaga jitshi jidi mumonesa egi Yehowa wana gutuzumba?

⁴ Tudi naye gushila Yehowa mutshima handaga wana gutuzumba. Yehowa wafugile athu handaga wakhalele mutshigina egi akhale nu monyo nu akhale nu gusuanguluga gifua muene. Gutuama dia gufuga athu Yehowa wazuelele egi: “Tutshite muthu mu gifuanesa gietu, akhale gifua esue.” (Gis. 1:26) Watuhanele luendu lua guditombela ndaga. Watuhanele nji mavu, fundo diabonga diago tuana jinga. (Ngi. 115:16) Yehowa washimbigile mvuaji jietu jia thomo nu waahanele ginemo giabonga gia gubuisa mavu phaladiso. (Gis. 1:28; 2:15) Waahanele nji ima yagasue yafugile muene ha mavu ha guakuatesa ha gukhala nu gusuanguluga. Ndaga eji jiagasue jidi mumonesa diago egi “guzumba gua giamatshidia gua Yehowa guana khala mayilago.”​—Ngi. 103:17.

5. a) Itshi Yehowa wakalegele tangua Adama nu Eva amulumbugidile? b) Ndaga jitshi jiko jialayele Yehowa jinyi jiatagenesewe gale? (Tala galuanda “Nzambi Wana Zuela Giamatshidia Tangua Diagasue.”)

⁵ Tudi naye gushila Yehowa mutshima handaga wana tagenesa ndaga jiana laya muene. Yehowa gafugilego mavu ‘ha gukhala a gituhu, uvi waalondele hagula athu akhale hene.’ (Yesh. 45:18, 19) Tangua Adama nu Eva amulumbugidile, abuile enya gubola nu akhalele naye gufua. Hene, yakhalele mumonega gifua felela dia Nzambi mbadishigo luko mutagenesewa. Uvi Yehowa wana tagenesa ndaga jiagasue jiana laya muene. (Yesh. 46:10, 11) Felela dienji dia guzalesa mavu nu athu abonga diasombegeselego. Gishina giene, Yehowa wabembele egi Adama nu Eva avuale ana. Wahanele nji mun’enji mumoshi ha mumoshi gifua mulambu ha gutuhana felela dia guheta monyo wa ivo nu ivo.​—Yone 3:16.

NZAMBI WA GIAMATSHIDIA WANA TAGENESA NDAGA JIANA LAYA MUENE

6. Ndaga itshi Yehowa wazuelele tangua Adama nu Eva amulumbugidile?

⁶ Muthu watumile Adama nu Eva ha gulumbugila Yehowa yakhalele “nyoga ya mualeha, inyi yana tamegewa egi Diabulu nu Satana.”a (Gumo. 12:9; Gis. 3:4, 5; Yone 8:44) Mukunda nu ndaga yene, Yehowa wazuelele egi Satana mbawushiyiwa mu masugu adi muza. (Gis. 3:15) Gutuama egi Satana ashiyiwe, athu avula mbaamulandula nu mbaatshita ndaga gifua muene. Uvi athu ako mbaasala agujinginyina gudi Yehowa.

7. Akuatshi akhala gu khanda ya Diabulu nu itshi mbayabuila?

⁷ Anjelo anyi alumbugidile Yehowa nu athu anago gutumagela Nzambi ene akhala gu khanda ya Satana Diabulu. Luholo ana lumbugidila Yehowa, adibuishile gale vungu dia Satana. Uvi Nzambi watombele gale tangua mbadishiya muene Satana nu athu agasue akhala gu khanda yenji.​—Dan. 2:44; Roma 16:20.

8. Ndaga itshi yakalegele Yesu mu 1914? (Tala nji ifuanesa.)

⁸ Ndaga itshi idi gututuma ha gusha mutshima egi Yehowa mbawutagenesa ndaga yalayele muene egi mbawushiya Satana nu athu agasue akhala gu khanda yenji? Mu 1914, Yesu waluile ita nu Satana Diabulu nu bademo enji nu waabishidile ha mavu. (Gumo. 12:7-9) Ita yene yaluiwe mu dilu, uvi yabatelele athu akhala ha mavu malamba. Biblia yana zuela egi: “Lamba diavula ha mavu nu mu kianga, handaga Diabulu wabulumuga gudi enue, udi nu khabu jiakola, handaga udi mujiya egi wasala nu tangua diazonda.” (Gumo. 12:12) Sendese mu 1914, felela dia Satana diakhala dia gunana athu avula gudi muene, gishina giene tudi mulandula gutagana nu malamba avula. Uvi gualeha ndo, Yesu mbawukatula Satana ha mavu nu mbawushiya athu agasue akhala gu khanda yenji. (Gumo. 6:2) Yesu mbawumonesa haphelo egi Satana udi muthu wabola nu ndaga jiagasue jiazuelele muene mukunda nu Yehowa jidi jia mambo. (Ngi. 45:4-6) Athu agasue mbaajiya egi Yehowa udi Nzambi wa giamatshidia.​—Ezek. 38:23.

Ita ya mbadi ya ha mavu agasue: U.S. National Archives photo; bombe: USAF photo; misongo ya gisambugila ha mavu agasue: blvdone/stock.adobe.com; maphulushi adi mulua nu athu: inhauscreative/E+ via Getty Images

YEHOWA UDI MUBUNGISA ATHU ANA ZUMBA GIAMATSHIDIA

9. Yehowa wana bungisa akuatshi mangino?

⁹ Sendese mualeha, Yehowa wana “gubungisa ima yagasue mu Klisto, ima idi mu dilu nu ima idi ha mavu.” (Ef. 1:10) “Ima idi mu dilu” yana monesa Aklisto ambiwe maji mu nyuma anyi Yehowa wana tomba ha guhinyina nu Yesu mu dilu. Uvi “ima idi ha mavu” yana monesa athu mbaaheta monyo wa ivo nu ivo mu Phaladiso ha mavu. Akombeledi awa agasue a Yehowa ana gudihana ha gukuatesa athu ako ha gujiya giamatshidia giatadila Yehowa nu ha gumonesa egi ndaga jiazuelele Satana mukunda nu Yehowa jidi jia mambo.

10. Luholo lutshi Yehowa wana kula athu mu uhiga wa malongo a mambo? (Gumonesa 14:6, 7)

¹⁰ Yehowa wana tuma akombeledi enji ha gulongesa lukuma luabonga gudi athu adi mutshigina gujiya giamatshidia giamutadila. Mudimo wa gulongesa wa luholo elu khenji wakalegewe galego ha mavu. (Tanga Gumonesa 14:6, 7.) Yehowa wana kalegela athu ha gulongesa lukuma luabonga, uvi anjelo ana guatuameza gudi athu adi nu mitshima yabonga. Lukuma elu luabonga luana monesa haphelo mambo a Babilona Yakoma, yakotelesa egi ikombelelo yagasue ya mambo inyi Satana wana kalegela sendese mualeha ha guzuela ndaga jia mambo mukunda nu Yehowa. (Gumo. 18:2, 4) Gualeha ndo ikombelelo yagasue ya mambo mbayishiyiwa, uvi athu agasue ana zumba Nzambi wa giamatshidia mbaamuhana lutumbu ludi naye guheta muene.​—Gumo. 17:16.

11. Luholo lutshi tuajiya gujiya akombeledi a Yehowa a giamatshidia?

¹¹ Yehowa wana gunana athu a maluholo agasue mu ulondegi wenji. (Gumo. 7:9, 10) Tangua athu ene ana guvua “lukuma luabonga,” ana kotelesa egi idi giamatshidia nu ana gudihana ha gubua akombeledi a Yehowa. (Mako 13:10) Mangino, yana khalago luko lamba ha gujiya athu ana kombelela Yehowa mu luholo luabonga. Profete Malaki wazuelele egi: ‘Mbamumona gudisha gudi mukatshi dia muthu wabonga nu muthu wabola, mukatshi dia muthu wana kombelela Nzambi nu muthu ganago gumukombelela.’ (Mal. 3:18) Akombeledi a Yehowa ana monesa mu makalegelo awo nu luholo ana gudihana mu mudimo wa gulongesa egi ana kombelela diago Nzambi wa giamatshidia.

12. Luholo lutshi mudimo wa gulongesa wana tagenesa gutshigina gua Yehowa?

¹² Tangua tuana longesa ‘lukuma luabonga lua Ufumu,’ tuana tumagela mukhuala wa Yesu nu tuana tagenesa profesi ya Biblia. (Mat. 24:14; 28:18-20) Mudimo wene wana kuatesa nji athu a maluholo agasue ha gubua alandudi a Yesu nu ha guheta luendu lua gukombelela Yehowa mayilago. Yehowa watuhanele diago luendu luakoma luholo luana gutukalegela muene ha gutagenesa gutshigina guenji.

SHA MUTSHIMA EGI YEHOWA MBAWUTAGENESA NDAGA JIANA LAYA MUENE

13. Akuatshi Satana wana luisa muavula? Mukunda natshi?

¹³ Satana Diabulu udi nu khabu jiakola handaga udi mujiya egi “wasala nu tangua diazonda” hagula egi mavu enji ashiyiwe. (Gumo. 12:12, 13) Wana luisa muavula Aklisto ambiwe maji mu nyuma anyi Yehowa wana tomba ha guhinyina nu Yesu mu dilu. Biblia yana guatamega egi “athu a gijila anyi ana tumagela mikhuala ya Nzambi nu ana landula gutshigina gua Yesu.” (Gumo. 12:17; 14:12) Satana wana luisa nji muthu wagasue wana kuatesa Aklisto ene nu wana tshita mudimo hamoshi nawo.

14. Itshi mbayibua tangua Satana mbawuluisa akombeledi a Yehowa? (Tala nji holu dia gizula.)

¹⁴ Tangua Babilona Yakoma mbayishiyiwa, athu agasue adi gu khanda ya Satana mbaaza ha guluisa akombeledi a Nzambi. Uluishi wene mbawubata ita ya Alemagedona. (Gumo. 16:13, 14, 16) Yesu nu masuta a mu dilu mbaahuluisa akombeledi a Yehowa nu mbaashiya mavu agasue a Satana. (Gumo. 19:19-21) Athu agasue abola nu enya mambo mbaakhadigo luko. (Gumo. 21:8) Mu tangua diene, athu agasue mbaajiya egi Yehowa wana tshita ndaga mu luholo luabonga nu wana zuela giamatshidia.

15. Mukunda natshi tuajiya gusha mutshima egi Yehowa mbawutagenesa ndaga jialayele muene? (Yeshaya 65:16, 17) (Tala nji gifuanesa.)

¹⁵ Athu a ha mavu awa anago gukhala mu gudivua. Uvi Yehowa wana kuatesa akombeledi enji ha gukhala mu gudivua. Yehowa wana bungisa athu agasue ana zumba giamatshidia mu fami yenji. Gushigo nga gima giajiya gukanga Yehowa njila ha gukuatesa akombeledi enji nu gushimbiga mudimo ana gumukalegela. (Tanga Yeshaya 65:16, 17.) Tuajiya diago gusha mutshima egi Yehowa mbawutagenesa ndaga jiagasue jialayele muene. Mu Roma 8:38, 39, mupostolo Phaula wasonegele egi: “Ikhale gufua nga monyo, nga anjelo, nga ba guvernema, nga ima idi guene mangino, nga ima mbayiza, nga ahinyinyi nga ima idi gosa, nga ima idi goshi’a mavu, nga gima giko gitshi giafugiwe, yajiyilego gutukhaphumuna mu guzumba guatumonesele Nzambi mu njila ya Fumi’etu Klisto Yesu.” Mbimbi eji jidi diago gutuhana gikhesa.

16. Mukunda natshi tudi naye gushila Yehowa mutshima wetu wagasue?

¹⁶ Tudi diago nu ndaga jiavula jidi gututuma ha gushila Yehowa Nzambi wa giamatshidia mutshima. Muene watufugile nu wana gutuzumba muavula. Udi mubungisa athu a maluholo agasue ha gumukombelela mu luholo luana tshigina muene. (Yesh. 60:22; Zak. 8:23) Tudi mujiya egi Yehowa mbawutagenesa ndaga jialayele muene. Gualeha ndo, mbawushiya Satana hagula gahuigigo luko athu ha mavu. Gishina giene, tuana zuela gifua muazuelele Davidi egi: “Yehowa Nzambi atumbuishiwe, . . . phamba muene wana kalagala ndaga jia gushimana. Jina dienji diakoma ditumbuishiwe mayilago, lutumbu luenji luzale pha ha mavu agasue.”​—Ngi. 72:18, 19.