Kudisa Luholo Luaye lua Gulongesa

1. Mukunda natshi tudi naye gukudisa luholo luetu lua gulongesa? (2 Timote 4:2) (Tala nji gifuanesa.)

YESU wawambelele alandudi enji egi: “Ndenu gudi athu a ifutshi yagasue, muaabuise alandudi ami . . . Muaalongese ha gutumagela ndaga jiagasue ngamiwambelele.” (Mat. 28:19, 20) Mbimbi eji jia Yesu jiakhalele mumonesa egi Aklisto agasue akhalele naye gubua alongeshi. Idi yadiago egi Yehowa wana gunana athu adi nu “mitshima yatagana” ha guza gudi muene, anjelo nji ana gutukuatesa muavula mu mudimo wa gulongesa. (Makal. 13:48; Yone 6:44; Gumo. 14:6) Uvi esue hakhetu nji tudi naye gujiya luholo luabonga lua gulongesa athu ene. Tutadilenu gifezegeselo giabonga giatubembele mupostolo Phaula nu Barnabase. Biblia yana monesa egi tangua alongesele mu sinagoga ya gu Ikoniome, “alongesele muabonga diago, gishina giene enya Yuda avula nu enya Greke abuile alandudi a Yesu.” (Makal. 14:1) Ndaga yene idi mumonesa egi Phaula nu Barnabase akudishile diago luholo luawo lua gulongesa. (Tanga 2 Timote 4:2.) Hene, Muklisto wagasue udi naye nji gutshita yagasue ha gukudisa luholo luenji lua gulongesa.

2. Mukunda natshi Aklisto ako ana tangiza egi ajiyilego gukudisa luholo luawo lua gulongesa?

² Athu ako ana tangiza egi ajiyilego gukudisa luholo luawo lua gulongesa handaga alongugilego makhalasa avula nga ndo akhalago nu luholo lua gukotelesela athu ako ndaga muabonga. Biblia yana zuelela nji athu ako akhalele mutangiza ngenyi. (Guz. 4:10; Yel. 1:6) Athu ako ajiya gutangiza egi ashigo alongeshi abonga handaga ashigo muheta mbuto jiabonga mu mudimo wa gulongesa gifua athu ako. Ndaga ya giamatshidia idi egi ishigo muthu wagasue mbatutagana n’enji mu mudimo wa gulongesa mbawutshigina lukuma luabonga. Ishigo nji ngolo jietu hakhetu jiana tuma athu ako ha gutshigina giamatshidia. Gifua luholo tuayimonyi, Yehowa nu anjelo ana gutukuatesa ha guheta athu adi nu mitshima yatagana. Ikhale ngenyi, tudi naye gutshita yagasue ha gulongesa lukuma luabonga mu luholo luajiya gukuata mitshima ya athu. Hene, longo edi diza gutukuatesa ha gujiya ndaga thathu tuajiya gutshita ha gukudisa luholo luetu lua gulongesa.

KHALA GUDISAGESA MUKUNDA NU ATHU

3. Itshi yakuatesele Yesu ha gukuata mitshima ya athu akhalele gumutegelela?

³ Biblia yana zuela egi Yesu wakhalele “mujiya ndaga jidi mu mutshima wa muthu.” (Yone 2:25) Mbimbi eji jidi mumonesa egi Yesu wakhalele mujiya matangi a athu nu ndaga jiakhalele guatuma ha gutshita ndaga. Wakhalele nu luholo lua gukuata mitshima ya athu akhalele gumutegelela handaga wakhalele mujiya muabonga ndaga athu ene akhalele najio funu. Wakhalele mujiya egi athu ene akhalele nu funu ya utuameji nu gikhesa handaga akhalele mumona malamba avula mukunda nu mikhuala yavula-vula yakhalele guahagela mafumu a ikombelelo. (Mat. 9:36; 23:4) Gishina giene, waalongesele ndaga jiene mu diskur dienji dia holu dia mulundu. Athu avula asuangulugile nu ndaga jiaalongesele muene handaga jiene jiakhalele guasagesa.

4. Luholo lutshi tuajiya gumonesa egi tuana gudisagesa mukunda nu athu? (Tala nji ifuanesa.)

⁴ Tuajiya gumonesa egi tuana gudisagesa mukunda nu athu gula tudi mukamba gukotelesa ndaga adi mutagana najio. Athu agasue tuana tagana nawo mu mudimo wa gulongesa ana gulua nu lamba dimoshi ngenyi ha mavu awa a Satana. Gujiya ndaga eyi guajiya gutukuatesa ha guavuila khenda nu gudisha ha fundo diawo. Ha gufezegesa, tuajiya gudihula egi: Ndaga itshi yabui muembo? Mvuaji jidi gudisagesa mukunda nu ndaga jiajiya gubuila an’awo gu khalasa ba? Athu avula adi gudisagesa handaga ashigo nu midimo ba? Tudi naye gutshita yagasue ha gukamba gukotelesa luholo athu ashigo nu felela diana gutuhana Biblia adi mubalegesa ‘matangua awa a lamba.’​—2 Tim. 3:1; Yesh. 65:13, 14.

5. Mu luholo lutshi Yesu wakhalele wagudisha nu Afalese? (Matayo 11:28-30)

⁵ Yesu wakhalele gudisagesa mukunda nu athu akhalele gumutegelela. Athu ene nji akhalele mujiya ndaga yene handaga akhalele mumona luholo luakhalele muene guakalegela ndaga. Yesu wakhalele wagudisha nu Afalese handaga ene akhalele musegulula athu nu guamonesa lamba! (Mat. 23:13; Yone 7:49) Uvi Yesu wakhalele mukalegela athu ndaga nu gisemo nu ginemua. Wakhalele “muthu wahuima nu wa gudibulumuisa,” ndaga yene yamukuatesele ha gukhala mulongeshi wabonga. (Tanga Matayo 11:28-30.) Esue nji tudi naye gukalegela athu adi gututegelela ndaga nu gisemo nu ginemua.

6. Luholo lutshi tuajiya gumonesa gisemo nu ginemua gudi athu ana tuna lukuma luabonga?

⁶ Athu ako ana tuna gawo lukuma luabonga tuana gualongesa, ako nji ana gutusagesa mukunda nu ndaga yene. Uvi Yesu watulongesele egi tushigo naye guvutula gubola mu gubola. Watuwambelele nji ndaga jiko tudi naye gutshita, wazuelele egi: “Landulenu . . . gutshita ndaga jiabonga gudi athu adi n’enu umbalagaji;” “landulenu guzuela ndaga jiabonga gudi athu adi gumita mikumbu, kombelelenu nji mukunda nu athu adi gumishinga.” (Luka 6:27, 28) Mbayikhala yaleba gudi esue ha gutshita ngenyi gula tudi muwunguluga egi guajiya gukhala nu ndaga jidi mutuma athu ene ha gutuna gututegelela. Idi yadiago egi athu ako ana tuna gututegelela handaga ana tshigina egi tubembe gulongesa. Uvi ako ana tuna gawo handaga adi nu milonga mu fami idi guasagesa nga ndo adi nu milonga yawo iko idi guasagesa inyi ishigo gututadila. Yajiya nji gukhala egi tuayi guatala mu tangua diabola. Ikhale ngenyi nga ndo, tudi naye gulandula longo dia Biblia diana zuela egi “mbimbi [jietu] jikhale jiabonga tangua diagasue, jia gumba mungua hagula [tujiye] luholo lua guhana muthu wagasue mvutu.” (Kol. 4:6) Gula tudi muvuila athu khenda nu tudi mukamba gukotelesa ndaga jidi guasagesa, mbayitukuatesa ha gutuna gulaba guvua khabu nu ha gukhala alongeshi abonga.

KHALA MUKALEGELA MBIMBI YA NZAMBI MUABONGA

7. Luholo lutshi Yesu wakhalele mulongesa athu? (Yone 7:14-16)

⁷ Yesu gakhalelego musha mutshima mu ndunge jienji. Ndaga jiagasue jiakhalele mulongesa muene jiakhalele mukatuga mu Mbimbi ya Nzambi. Biblia yana zuela egi Yesu ‘gakhalelego mulongesa athu gifua alongeshi a mikhuala, uvi wakhalele gualongesa gifua muthu udi nu ufumu.’ Athu “adihudile muavula” mukunda nu luholo luenji lua gulongesa. (Mako 1:22; tala note d’étude “contrairement aux scribes” mu Biblia ya français.) Alongeshi a mikhuala a mu tangua dia Yesu akhadile nu khadilo dia gulongesa matangi a alongeshi ako akoma ha guasunzula. Uvi Yesu wakhalele mulongesa athu Mbimbi ya Nzambi. Yesu wakhadile mun’a Nzambi, wabalegesele nji ivo yavula mu dilu, ndaga yene yakhalele naye gumutuma ha gulongesa athu ndaga jiagasue jiakhalele mujiya muene ha gudisunzula nga guamonesa egi adi athu aheya. Uvi gakalegelego ngenyi. Wakhalele mukalegela Mbimbi ya Nzambi ha gualongesa ndaga jiakhalele guatoga Nzambi ha gutshita. (Tanga Yone 7:14-16.) Yesu wabembelele diago alandudi enji gifezegeselo giabonga.

8. Luholo lutshi mupostolo Phetelo walanduile gifezegeselo gia Yesu?

⁸ Alandudi a Yesu nji akhalele mukalegela Mbimbi ya Nzambi tangua akhalele mulongesa athu. Ha gufezegesa, tangiza diskur diakalegele mupostolo Phetelo gu Pantekote ya givo 33 G.Y. Phetelo galongugilego makhalasa avula. Uvi wakuatele mitshima ya athu akhalele gumutegelela hakalegele muene Mbimbi ya Nzambi ha guakotelesela profesi jiatagenesele Yesu. (Makal. 2:14-37) Itshi yabuile gungima? “Athu anyi atshiginyile mbimbi yenji nu gusuanguluga guagasue, abatijiwe. Mu lusugu luene athu guvula 3 000 abuile alandudi.”​—Makal. 2:41.

9. Mukunda natshi tudi naye gukalegela Mbimbi ya Nzambi tangua tudi mulongesa athu?

⁹ Gushigo nu gikadigilo tuajiya gukalegela ha gukuata mitshima ya athu gubalega Mbimbi ya Nzambi. (Heb. 4:12) Hene, tudi naye gukalegela Biblia muavula tangua tudi mulongesa athu. Tudi naye ‘gulongesa mbimbi,’ uvi matangi etu ndo. (2 Tim. 4:2) Ishima 2:6 yana zuela egi: “Yehowa wana hana gutema; mu kano dienji muana zoga ujiyi nu ukoteleshi wa ndaga.” Hene, tangua tuana kalegelela Biblia ha gulongesa athu, yana khala gifua tudi mubemba egi Yehowa hakhenji alongese athu ene. (Mal. 2:7) Tuana tshigina egi athu akotelese egi Biblia yabalega ndunge jiagasue jia athu. Biblia yasonegewe mu ukuateshi wa nyuma ya Nzambi nu yana gutukuatesa ha gutshita ndaga jidi musuanguluisa Nzambi nu ha gukhala nu gusuanguluga mu monyo wetu.​—2 Tim. 3:16, 17.

10. Itshi wajiya gutshita ha gukuatesa muthu wana longesa Biblia ha gukotelesa egi ndaga udi gumuwambela jidi mukatuga mu Biblia?

¹⁰ Tangua udi gudilondega ha guya mulonguga Biblia nu muthu, kamba maluholo wajiya gumukuatesa ha gukotelesa egi ndaga jiagasue udi gumulongesa jidi mukatuga mu Biblia. Muthu wana longesa Biblia udi naye gukotelesa egi ikhale ifuanesa nu video yana gutukuatesa ha gulonguga muabonga, uvi mukanda wabalega ndando udi Biblia. Hene, tangua mudi mulonguga, tangenu verse jidi muzuelela matangi a ndando, gungima kuatesa muthu wana longesa Biblia ha gukotelesa gudivua gudi mukatshi dia verse jiene nu ndaga mudi mulonguga. Gula mudi muzuelela gifuanesa nga video, tshita yagasue ha gumukuatesa ha gukotelesa malongo a Biblia ajiya guzula muene. Ishigo mukotelesa egi udi naye guzuela muavula nga gutanga verse jiavula ha gumukuatesa. Uvi mubembele tangua dia gukotelesa muabonga verse yagasue muatangi; muajiya nji guvutugila verse imoshi mbala jiavula gula muthu muene gashigo guyikotelesa muabonga. Gula watshita ngenyi, mbawumonesa egi ushigo gumulongesa mukanda nga gifuanesa nga video, uvi udi gumulongesa Biblia.​—1 Kol. 2:13.

11-12. a) Luholo lutshi wajiya gumonesela athu wana longesa Biblia khadilo dia guhuiminyina? (Makalegelo 17:1-4) (Tala nji gifuanesa.) b) Ndaga itshi athu ako anago gujiya mukunda nu Biblia? Luholo lutshi tuajiya guakuatesa?

¹¹ Gula muthu wana longesa Biblia gashigo mutshigina nga mukotelesa ndaga imoshi ngenyi udi gumulongesa, ubuitshigo mutshima egi udi naye ‘gumulongesa mbimbi . . . nu guhuiminyina guagasue.’ Athu agasue anago gukula mu nyuma luholo lumoshi. Ndaga jiko jidi jialeba gudi aye, jiajiya gumuzula tangua diavula ha gujikotelesa. Ha gufezegesa, Phaula walongesele enya gu Tesalonike mbala jiavula malongo a Mbimbi ya Nzambi, wazudile nji tangua dia guakotelesela nu guhuiminyina guagasue ndaga jiene gutuama egi ako mukatshi diawo ajikotelesele giwa muabonga.​—Tanga Makalegelo 17:1-4.

¹² Wajiya nji gumonesela muthu wana longesa Biblia khadilo dia guhuiminyina gula udi gumuhula mihu nu udi gumubembela tangua dia guhana mvutu. Khala gumutegelela muabonga nu gukotelesa matangi enji. Gungima tangenu verse jia Biblia, jizuelelenu nji ha gumukuatesa ha gukotelesa matangi a Yehowa mu ndaga mudi mulonguga. Ubuitshigo mutshima egi athu ako khenji amonele galego Biblia nga guyijiya muabonga. Gula idi ngenyi, wajiya gumubatela Biblia ya papie ha gumukuatesa gula luholo ludi guene. Wajiya nji gukalegela gamukanda “Mbimbi jia Gisendeselo ha Gulongesa Mbimbi ya Nzambi,” ha gumukuatesa ha gujiya malongo a ndando a Biblia. Muajiya gutanga verse imoshi nga mbadi idi mu muhu wa 15 ha gumukuatesa ha gukotelesa luholo Biblia yajiya gumukuatesa ha gukhala nu gusuanguluga mu monyo wenji. Mu guhihia tudi mutshigina guzuela egi, gula wakuatesa athu wana longesa Biblia ha gukotelesa egi Biblia yakhala nu ndando yavula, ndaga udi gualongesa mbajiakuatesa diago nu mbaatshigina gulonguga ndaga jiko jiavula.

KHALA MUKAMBA LUTUMBU LUA YEHOWA

13. Tangua tudi mulongesa athu, lutumbu lua nanyi tudi naye gukamba? Hana gifezegeselo.

¹³ Tangua tuana longesa athu, felela dietu diakhala dia guakuatesa ha gujiya Yehowa nu ha gukuata ufuta n’enji. (Yak. 4:8) Tutadilenu gifezegeselo gimoshi giajiya gutukuatesa ha gukotelesa mudimo tuakhala nawo. Tangiza gale egi muthu mumoshi udi mukamba gima gienji mu phipha. Gungima watoga muthu muko ha gumumunyigila muenda. Muthu muene mbagashigo gudimunyiga hakhenji, uvi mbawumunyiga muthu udi mukamba nu fundo didi ene mukamba gima giene. Esue nji tangua tudi mulongesa athu, tudi naye guakuatesa ha gutumbuisa Yehowa uvi ishigo ha gututumbuisa esue.

14. Luholo lutshi wajiya gukuatesa muthu wana longesa Biblia ha gusuanguluisa Yehowa?

¹⁴ Tangua udi mulongesa muthu Biblia, mukuatese ha gutshita ndaga jiabonga ha gusuanguluisa Yehowa. (Ish. 27:11) Felela diaye dishigo naye gukhala phamba dia gumuwambela ndaga jidi naye gutshita muene ha gubua Temue wa Yehowa. Uvi didi naye gukhala dia gumukuatesa ha guzumba Yehowa nu ha gutshita ndaga jidi gumusuanguluisa. Ha gufezegesa, gula muthu muene udi mulua ha gubemba khadilo dimoshi diabola, wajiya gumuhula egi: “Mukunda natshi Yehowa wana tuna khadilo diene? Udi mutangiza egi mukunda natshi Yehowa udi gugutoga ha gubemba ndaga yana gugusuanguluisa? Luholo lutshi mukhuala owu udi mumonesa egi Yehowa wana guguzumba?” Gula udi mukuatesa muthu wana longesa Biblia ha gutangigiza ndaga jiatadila Yehowa nu makalegelo enji abonga, mbawumukuatesa ha gukotelesa egi sh’etu wa dilu wana gumuzumba. Ndaga yene mbayimutuma nji ha gutshita ndaga ha gumusuanguluisa.

LANDULA GUKUDISA LUHOLO LUAYE LUA GULONGESA

15. Itshi wajiya gutshita ha gukudisa luholo luaye lua gulongesa?

¹⁵ Gula udi mutshigina gukudisa luholo luaye lua gulongesa, wajiya gutoga Yehowa mu gisambu ha gugukuatesa ha gujiya mafundo wajiya gusombegesa. (1 Yone 5:14) Gungima, wajiya gutegelela muabonga formasio ya mudimo wa gulongesa tuana zula mu gudibungisa nu gukalegela malongo ene. Wajiya nji gulongesa nu aphangi ana longesa muabonga. Gungima wajiya guahula matangi awo mukunda nu luholo luaye lua gulongesa. Ujimbilago nji egi muthu udi mulongesa Biblia gashigo mujiya ndaga jiagasue udi mujiya mu ndaga mudi mulonguga. Kamba gukotelesa matangi enji. Tshita nji yagasue ha gumukuatesa ha gukotelesa gubonga guajiya guheta muene mu ndaga mudi mulonguga nu mu ndaga jiabonga jidi gutulaya Yehowa. Gutshita ngenyi guajiya gumutuma ha gukuata ufuta wakola nu Yehowa nu ha gukhala nu gusuanguluga.​—Ngi. 1:1-3.

16. Mukunda natshi tudi naye gulandula gukudisa luholo luetu lua gulongesa?

¹⁶ Gulongesa athu ako ndaga jiatadila Yehowa gudi mukatshi dia ndaga jiana gutusuanguluisa muavula. Mbatulongesa nji athu ako avula mu mavu ahe-ahe. Hene, tulandulenu gudisagesa nu gudisha ha fundo dia athu tuana longesa Biblia; tulandulenu nji gukalegela Mbimbi ya Nzambi muabonga nu gukamba lutumbu lua Yehowa. Ngenyi mbatukudisa diago luholo luetu lua gulongesa.