Observando e Mundu

Humamentu Ta Mata Mas Hende Muher

Un investigacion recien, publicá den The Canadian Journal of Public Health a descubrí cu morto como resultado di humamentu den hende muher canades a aumentá for di 9.009 na 1985 te na 13.541 na 1991. E investigacion ta calculá cu mas hende muher cu homber lo muri como resultado di humamentu promé cu e aña 2010 si e tendencia actual sigui. Na 1991, nan a calculá cu tabatin 41.408 morto como resultado di humamentu (27.867 homber i 13.541 muher), segun e corant The Toronto Star. Na Merca, morto di hende muher debí na cancer di pulmon a aumentá seis bes entre e añanan ’60 i ’80, segun Dr. Mi­chael Thun dje Sociedad Americano di Cancer. Investigadornan ta concluí cu “humamentu di cigaria na Merca ta sigui ser e solo causa mayor di morto prematuro cu por ser prevení,” segun e corant The Globe and Mail di Toronto, Cánada.

Droga den Scol na Alemania

Un investigacion entre mas cu 3.000 alumno den e nort di Alemania ta revelá uso na tur parti di substancia adictivo na scol. Segun e noticiero semanal Focus, casi mitar dje alumnonan di 17 aña di edad a usa personalmente droga ilegal, i mas cu un tercer parti di nan ta consumidor. Profesor Peter Struck a splica cu “na hopi scol secundario den Hamburg, bo ta contra cu alumno di scol di 16 of 17 aña di edad cu ta varia constantemente for di tuma stimulante pa tuma calmante.” Pero, pakico tantu hóben ta usa droga? Profesor Klaus Hurrelmann a duna tres motibu pakico hóben sa usa droga: ta fadá di bida, ta kere cu nan ta ricibí muchu poco reconocimentu pa logro personal, i ta bou di presion di otro hóbennan.

Biaheronan Notabel

Un albatros a bula 26.000 kilometer den 72 dia, i un cachó di awa shinishi a landa 5.000 kilometer den tres luna. Científiconan di conserbacion a descubrí tal hazaña di awante despues di a scoge albatros i cachó di awa i a pone radiotransmisor miniatura riba nan i laga satélite sigui nan biahamentu. Un biaha, e albatros a bula casi 3.000 kilometer den cuater dia riba Laman Sur Pacífico. E cachó di awa a landa tantu como 100 kilometer pa dia entre Escocia i Islanan Feroe i a demostrá cu e por nabegá cu exactitud crusando laman grandi, segun The Times di Londen. Kico a conmové e dos bestianan aki pa haci biahe largu asina? En busca di cuminda, segun e informe.

“Un Cuerpo Mundial Sin Muchu Alma”

“Pa tres dia siman pasá, lider di tur continente a reuní p’e fiesta di hacimentu di 50 aña di Nacionnan Uní pa duna discurso grandioso tocante estado di mundu,” segun The New York Times di october último. Sin embargo, aparentemente tabata falta un ingrediente importante den vários “discurso grandioso,” esta, onrades. Segun Times, “Mescos cu políticonan na tur parti, nan a haci promesanan cu nan lo no cumpli i a criticá otro hende pa nan falta.” Despues di a mencioná ocho lider nacional kende nan palabra a contradicí echo di nan pais, e corant a concluí cu nan mensahe principal tabata: “Mundu, lubidá loke mi ta haci pero scucha loke mi ta papia.” Nada straño cu U.S.News & World Report a yama Nacionnan Uní “un cuerpo mundial sin muchu alma.”

Abeha di Temperatura Haltu

Abeha hapones ta defendé nan mes contra atake di maribomba gigante dor di mat’é, usando e calor di nan curpa, segun Science News. Despues di mira e presencia di un maribomba gigante, e abehanan ta tenta e enemigu pa drenta nan neshi, unda cientos di abeha ta atacá i ta forma un bola di abeha rond di dje. Anto, “e abehanan ta vibra i ta aumentá e temperatura dje bola te na 47° Celsio fatal pa rond di 20 minuut,” segun e revista. Siendo cu abeha hapones por wanta temperatura te na 50 grado Celsio, nan accion no ta haci nan daño. Pero, tur ­maribomba no ta cai den trampa di abeha. Siendo cu “20 te 30 maribomba por destruí un colonia di 30.000 abeha den 3 ora,” un atake en conhunto di maribomba gigante por vence abeha. Segun News, “Den tal caso, maribomba ta dominá e neshi i ta recogé webu i e chikitunan di abeha.”

E Crus—Un Símbolo di Violencia?

Segun e corant The Dallas Morning News, algun teólogo ta cuestioná si ta corecto pa usa e crus como un símbolo di cristianismo pa motibu di su asociacion cu violencia. E teólogonan ta recomendá e uso di símbolonan cu ta reflehá e bida di Jesus en bes di e morto di dje. E crus “ta promové adoracion dje mortonan,” segun teólogo Catherine Keller di Drew University Theological School den Madison, New Jersey, Merca. “Ningun hende kier un stul eléctrico of un pal’i horca como un símbolo principal di fe, pero esei ta loke nos lo tabata usando si gobiernu djawe a duna Jesus e castigu di morto.”

Pruga di Awa Ta e Solucion

E humilde pruga di awa por percurá e solucion p’e problema di canalnan interior contaminá, segun e corant Independent di Londen. Un proyecto di recobramentu cu ta den progreso awor ta indicá esei. Primeramente, bió­logonan a saca 9,5 ton di piscá cu ta come pruga di awa for dje lagun Ormesby Broad na Norfolk, Inglatera. Esaki a permití pruga di awa abundá i come lima cu tabata contaminá e lagun. Anto otro yerba a nace bou di awa for di simia pendiente, i para, tal como koet i zwaan, a bolbe. Cu tempu, lo bolbe pone piscá, i nan ta calculá cu henter e medio ambiente lo bolbe na normalidad den cincu aña. Ecólogonan di Europa ta wak e resultado dje proyecto cu interes.

Pasando Picá Por Haltu

E revista Newsweek a puntra, “Ta kico a sosodé cu picá? E sintimentu urgente di picá personal casi a disparcé for dje ambiente alegre di religion mericano.” Parokiano “no kier tende predicashi cu por molestiá nan concenshi,” i den pueblo católico “confesion cu regularidad na pastor a bira un ceremonia anticuá.” Pastor na competencia cu otro tin miedu di alehá nan miembro. Hopi clero “rutinariamente ta condená malecho social ‘sistemático’ tal como discriminacion racial i sexual,” segun e artículo. “Pero bo casi no ta tende nan mes papia tocante tópiconan personal—manera divorcio, orguyo, golosidad i ambicion personal egoista.”

“Vingerafdruk” di Djamanta

Muhernan di Gran Bretania ta doño di 39 miyon di hoyas di djamanta di balor di aproximadamente US$17,5 mil miyon, i tur aña artículonan di balor di US$450 miyon ta ser hortá. No tin manera pa localisá e mayor parti di tal hoyas. Pronto nan ta smelt e plata i oro di montura dje djamanta. Anto piedra precioso ta ser poní den otro montura. Sin embargo, awor trahando pa medio di un computer central, hoyeronan lo por registrá den e memoria digital dje computer tur defecto particular di tur hoya. Un rayo laser di densidad abou ta distinguí tal “vingerafdruk” i ta detectá e imperfeccionnan di cada hoya—no tin dos hoya cu ta mescos. E único manera pa ladron evitá e sistema di seguridad ta di corta tur hoya di nobo, un proceder costoso, locual tambe ta reducí nan balor, segun The Sunday Times di Londen.

Alerto Contra Vuurwerk

Un informe oficial ta bisa cu “aproximadamente 12.000 hende ta ser tratá tur aña den EHBO na Merca debí na herida di vuurwerk,” segun Morbidity and Mortality Weekly Report (MMWR). E informe, cu e Comision di Seguridad di Producto pa Consumidor a compilá pa aña 1990-1994, ta calculá cu 20 porciento di tur herida di vuurwerk ta herida di wowo. Esakinan, segun MMWR, “hopi bes ta severo i por causa daño permanente na bista of ciega hende.” Ta notabel, tambe, cu aparentemente mas mirones ta ricibí herida di wowo cu hende cu ta cende e vuurwerk.

“Un Potencial Bomba di Tempu”

Rond di 45 porciento dje poblacion di mundu ta biba den stad actualmente, segun e revista Focus, i p’e aña 2000 caba, nan ta calculá cu mitar dje poblacion lo biba den stad. Hopi parti di nort di Europa, Italia, i e parti oost di Merca tin un densidad di poblacion basta haltu, i parti di China, Egipto, India, i Sur Africa tin stadnan cu poblacion basta denso meimei di un campo rural. Sin embargo, bista di satélite ta revelá awor cu solamente 3 te 4 porciento dje planeta ta urbanisá. Pero, ya cu 61 miyon hende ta bai biba den stad tur aña, principalmente den paisnan den desaroyo, e densidad di poblacion den tal urbanisacion ta aumentá pasobra “stad no por crece mes lihé cu nan poblacion,” segun Focus, i ta agregá: “E situacion ta un potencial bomba di tempu.”