Hóbennan Sa Puntra . . .

Tabaco Sin Huma Ta Perhudicial?

‘ORA Cord, un mucha homber di 13 aña di edad, a bai biba den e parti central di Merca, el a descubrí mesora cu el a falta loke tur mucha homber di e di ocho klas tin: un bleki cu snuff, un clase di tabaco sin huma. Casi tur amigu nobo di dje tabata adicto na snuff, i Cord kier a conformá. Pues, ora un mucha homber a ofrec’é un paki chikitu di snuff, el a acept’é i a hinca un poco dje snuff meimei di su lip abou i encia na moda di experto.’—E revista Listen.

E hóben Cord apénas ta un excepcion. Dr. Christopher A. Squier, un profesor di patologia di boca, ta bisa cu un cantidad aumentante di mucha homber tiener ta cuminsá usa snuff. Aunke benta di tabaco sin huma no a sigui aumentá cerca di aña 1990, Dr. Squier a bisa: “uso di snuff muhá ta aumentá atrobe.”a Por ehempel, investigador ta informá cu 1 di cada 5 mucha homber di scol secundario na Merca i 1 di cada 3 mucha homber na Suecia—miyones di hóbennan—awor ta usa tabaco sin huma. Pakico esaki ta sosodiendo?

Segun e Sociedad Americano di Cancer lo siguiente ta algun motibu cu hóbennan sa duna hopi bes, splicando pakico nan ta usa tabaco sin huma: “E ta ménos dañino cu humamentu.” “No tin evidencia di cu e ta peligroso.” “Mi amigunan ta us’é. E no ta haci nan nada.” “Un tiki de bes en cuando no ta matá mi.” “E no a mata ningun hende ainda.”

Kico ta haci hóbennan kere cu snuff ta ménos peligroso cu humamentu? Esei realmente ta e caso?

Víctima di Propaganda Comercial

Pa hopi aña e industria poderoso di tabaco a bombardeá hóbennan cu propagandanan comercial cu a indicá cu tabaco sin huma ta mes inofensivo cu bals i mes necesario cu e marca apropiado di keds. Lemanan manera “Usa snuff en bes di huma,” “Mi ta saca e berdadero goso di tabaco sin cende cigaria,” i “Un tiki so ta tur loke ta necesario,” di un manera mañoso ta indicá cu snuff ta superior cu humamentu.

Despues cu lema asina di television i radio tabata prohibí na Merca, e industria di tabaco a sigui usa revista pa su propaganda comercial. Potret na color di homber robusto gosando bida na wandelmars, subiendo ceru, i piscando riba laman brutu cu un bleki di tabaco na plena bista den e sacu di nan carson, ta ­comunicá un mensahe claro i comprendibel: “Tabaco sin huma ta bunita, natural, i ta pa homber ­machu!”

E informe di 1994 dje ciruhano general di Merca, titulá Preventing Tobacco Use Among Young People [Prevencion di Uso di Tabaco den Hóbennan], ta bisa cu hopi hóben ta kere awor cu “producto di tabaco sin huma no ta peligroso i ta aceptabel socialmente.” Un investigacion bou alumnonan di scol secundario a mustra cu “rond di 60 porciento di consumidor di scol secundario i 40 porciento di consumidor di scol superior a kere cu no tabatin ningun rísico of solamente un tiki rísico den uso regular di tabaco sin huma.” I asta consumidor di scol secundario cu ta reconocé cu tabaco sin huma por ta perhudicial “no a mira cu e rísico ta grandi.” E propagandanan comercial ta eficas i convinciente. Pero, tal propaganda ta corecto?

Un proverbio bíblico ta bisa: “Cualkier persona sin experencia ta pone fe den tur palabra, pero esun spiertu ta considerá su pasonan.” Of manera un otro proverbio ta bisa: “Cualkier persona spiertu lo actua cu conocimentu.” (Proverbionan 13:16; 14:15) Kico, pues, echo ta mustra tocante tabaco sin huma?

E Mal Noticia

Aunke propaganda comercial por indicá cu uso di tabaco sin huma lo mehorá bo aparencia i cu e no ta perhudicial pa bo curpa, echo ta mustra net lo contrario. Entre otro cosnan, uso di tabaco sin huma lo no mehorá bo aparencia. Si bo no ta kere esei, simplemente hinca bo lenga den bo banda di cara i wak den spiel. Bo ta mas nechi? Di ningun manera. I esei ta solamente loke e ta haci cu bo aparencia! Loke e ta haci cu bo paden ta hopi mas malu.

Por ehempel, esnan cu ta kouw tabaco of ta usa snuff por haña sker den nan lip, djente manchá, mal aliento, i dolor di carni di djente—nada pa causa sonrisa. Ademas, nan capacidad di saboreá i hole ta mengua miéntras cu nan hartklop i presion di sanger ta subi—mal noticia en berdad. Pero, e berdadero mal noticia tá cu investigacion hací na ­Europa, India, i Merca ta mustra cu tabaco sin huma ta causa cancer di banda di cara, encia, i garganta. Tal descubrimentu no ta sorprendé expertonan. Un investigacion ta bisa: “Snuff tin e nivel di mas haltu di ingrediente cu ta causa cancer cu cualkier producto cu ta drenta e curpa.” No ta straño cu “esnan cu ta usa snuff pa hopi tempu ta core 50% mas rísico di desaroyá cancer di boca cu hende cu no ta us’é.”

Ora hende haña cancer di boca, e consecuencia ta serio. Esei no solamente ta daña e salú dje consumidor pero hopi bes nan bida ta ser cortá. Un publicacion dje Sociedad Americano di Cancer ta relatá e siguiente cuenta tristu: ‘Sergio a cuminsá usa tabaco sin huma n’e edad di 13 aña. El a calculá cu esei tabatin ménos rísico cu humamentu. Despues di cincu aña di gasta un bleki of mas pa dia, el a haña un yaga riba su lenga. Esei tabata cancer di boca. Dokter a kita un parti di su lenga, pero e cancer a plama te na su garganta. Mas operacion cu a desfigur’é a wordu hací pero sin éxito—na edad di 19 aña el a muri. Promé cu su morto, Sergio a skirbi un mensahe senciyo riba bloknote: “No usa snuff.”’

Biciá!

Despues cu Cord, mencioná anteriormente, a lesa e relato horibel tocante Sergio, por fin el a comprendé e peliger. El a dicidí di stop. Pero, esfuerso di kita tabata trabahoso. Cord a bisa e revista Listen, “Mi curpa ta exigí snuff. Asta awor, vários luna despues cu mi a kita oficialmente, mi ta haña mi mes ta fulando den mi sacu p’e bleki di snuff. Mi ta kouw hopi bals. Esei ta yuda, pero e no ta eliminá e deseo.”

E revista Ca-A Cancer Journal for Clinicians ta confirmá: “Den investigacion di hóbennan cu ta haci esfuerso pa kita for di uso di tabaco sin huma, solamente un porciento chikitu por a hacié.” Pero, pakico ta asina difícil pa kita for di uso di tabaco sin huma? E mésun droga cu ta hacié asina difícil pa kita for di humamentu di cigaria: nicotina.

Nicotina, un droga hañá den cigaria i tambe den tabaco sin huma, ta un veneno potente cu ta pone esun cu ta us’é bira ‘high.’ Cada 30 minuut of mas, e consumidor tin cu tuma otro snuff p’e stimulacion no terminá. Nicotina ta biciá bo. Algun consumidor ta bira asina biciá cu nan ta keda cu un snuff den nan boca dia i anochi—asta ora nan ta drumi.

Contrario na loke hóbennan tal bes ta kere, snuff no ta reducí nicotina cu nan ta consumí. Un bleki di snuff pa dia ta contaminá bo cu tantu nicotina como 60 cigaria! Segun e buki Preventing Tobacco Use Among Young People, ‘Consumidor di snuff ta absorbá por lo ménos e mésun cantidad di nicotina cu humador—kisas tantu como dos bes e cantidad.’ (Letter cursivo di nos.) Ademas di nicotina, snuff ta contené dies bes mas nitrosamina (substancia potente cu ta causa cancer) compará cu ­cigaria.

Sea Sabí

Segun Dr. Roy Sessions, un ciruhano di cabes i garganta, “Absolutamente no cabe duda cu [snuff,] ta un producto perhudicial. Snuff ta producí un estado di adiccion cu e mayoria di hende ta kere ta hopi mas difícil pa vence cu humamentu.” Dr. Oscar Guerra, specialista di cancer di boca a concluí: “Snuff simplemente no ta bon p’e curpa.” Experto rond mundu ta di acuerdo: Un tiki snuff ta mas cu un tiki dificultad. E por terminá bo bida!

Hóbennan cristian tin asta un motibu mas urgente cu interes den nan salú pa keda liber di producto di tabaco, esta, nan deseo pa agradá Jehova Dios. Su Palabra ta manda nos: “Laga nos haci nos limpi di tur contaminacion di carni i di spiritu, perfeccionando santidad den temor di Dios.”—2 Corintionan 7:1.

E revista Aviation, Space, and Environmental Medicine ta concluí e asuntu na moda bunita, bisando: “Tabaco ta un mata repugnante cu solamente dos criatura ta consumí—un bichi berde chikitu i hende. E bichi berde chikitu no sa loke hende sa.”

Pero, abo sí. Pues, sea sabí—no cuminsá usa tabaco.

[Nota]

[Komentario na página 27]

‘‘Promé cu su morto, Sergio a skirbi un mensahe senciyo: “No usa snuff”’

[Plachinan na página 26]

Kouwmentu di tabaco a cuminsá bira mas popular den hóbennan caba. Bo mester purb’é?