Ki Futuro Tin pa Albatros?

Dje coresponsal di Spierta! na Gran Bretania

Con e futuro dje albatros, e para di laman mas grandi di mundu, ta? “Basta scur,” The Times di Londen ta informá. Dies di miles di nan—investigadónan australiano ta calculá te cu 44.000—ta ser matá tur aña. De echo, algun autoridad ta kere cu e albatros cu ta bula di un parti pa otro, cu su halanan magnífico di dies pia di punta pa punta, pronto lo bai den extincion.

Despues cu albatros ta cla pa bula, nan ta pasa shete aña continuamente na laman, bayendo na haltu i zweef rond pa miles di kilometer i asta durmiendo den pleno vuelo. Algun ta kere cu e paranan lo por ta bula alrededor di tera vários biaha promé cu nan bolbe bek na nan lugá di nacementu pa brui.

Albatros ta cria solamente un puito cada pasa un aña. Pero durante e último 20 añanan, e poblacion di albatros cu ta bula di un parti pa otro na South Georgia den Océano Sur Atlántico i na Crozet den Océano Indio a baha te na casi mitar. Kico algun ta pensa ta e motibu di esaki? Piscamentu cu liña largu.

Pa pisca tuna bluefin, piscadónan ta usa liñanan largu, di cua cada un ta hiba cientos di anzue. Ta baha e liñanan den awa for dje parti patras dje boto piscadó. Cada anzue tin un sekat buladó como as—e alimento principal di albatros. De bes en cuando, ora e para baha abou pa coge e sekat, e ta guli e anzue tambe. E ora ei e albatros atrapá ta zink bai abou cu e liña pisá i ta hoga.

Pa protehá e albatros, a logra animá algun piscadó di tuna pa baha nan liñanan anochi, ora e para no ta pisca. Tambe piscadónan ta buscando maneranan pa habri nan liñanan for dje parti abou di nan boto pa asina e albatros no mira e as. Otro técnicanan cu a ser usá ta entre otro liñanan cu peso cu ta zink bai abou mas lihé i un tipo di spantapara pa spanta nan.

Sin embargo, den e laman ganchu den Océano Sur Atlántico, no tin control riba e métodonan cu botonan piscadó ta usa. Segun e specialista den para di laman Sandy Bartle, dje Museo di Nueva Zelandia, ei botonan “no ta haci nada pa stop albatros di ser matá.” Berdaderamente, e posibel desaparicion dje mahestuoso albatros ta un muestra dje negligencia i indiferencia humano.