For di Nos Lectornan

Holocausto Mi semper a straña pakico ningun hende a papia francamente tocante e Holocausto. E seri “E Holocausto—Ken A Papia Francamente?” (¡Despertad! 22 di augustus, 1995) a contestá mi pregunta. Testigo di Jehova a papia francamente, i mi ta sintí mi mashá orguyoso dje otro Testigonan!

C. B., Merca

Permití mi—aunke mi no ta miembro—felicitá boso p’e tratamentu dje asuntu dje Holocausto. Boso tratamentu obhetivo dje manifestacion baho di inhumanidad di hende pa cu hende ta esun mas iluminante cu mi a lesa. E curashi di otro Testigo di Jehova n’e tempu ei ta algu cu mundu, lamentablemente, sa mashá poco di dje.

L. B., Inglatera

Mi tata a perde su bida den Sachsenhausen. Mi ruman mayor tambe a perde su bida como resultado di encarcelacion nazi. Ainda mi tin recuerdonan claro dje persecucion nazi di Testigo di Jehova. P’esei, mi ta conmoví pa expresá mi aprecio p’e artículo. Bon hací!

F. D. J., Cánada

E artículonan a impresioná mi hopi. Pero, mi no ta di acuerdo di cu Testigo di Jehova tabata e único i solo “bos meimei di silencio.” E comunistanan tambe a advertí hende contra Hitler promé cu el a bira dictador. Hopi di nan a wordu cerá den concentrasicamp.

B. W., Alemania

“Spierta!” ta reconocé unbes cu Hitler tabatin hopi opositor político. Sin embargo, e artículo a referí specíficamente n’e falta di organisacionnan religioso, e mayoria di cua a colaborá cu e gobiernu nazi. E nazinan mes a identificá Testigo di Jehova como nan enemigu religioso principal. P’esei, Testigo di Jehova tabata e único grupo religioso duná un símbolo di identificacion como prizonero den concentrasicamp—e desonorabel triángulo púrpura.—Red.

Temblor na Hapon Mi a yora ora mi a lesa e artículo “E Desaster Di Ripiente di Hapon—Con Hende A Enfrent’é.” (¡Despertad! 22 di augustus, 1995) Mi a perde mi ruman muher cristian faborito den e temblor ei. E tabata mashá celoso. Mi sa cu e lo ser resucitá i cu lo mi por mir’é atrobe. Mi ta mashá gradicidu pa tur e yudansa spiritual i material cu nos a ricibí for dje congregacion i dje Sociedad. Pero, mi ta yora ainda ora mi ta corda loke a pasa e dia ei.

T. M., Hapon

E accion organisá i rápido di parti di Testigo di Jehova a asombrá mi absolutamente. Ora mi a lesa e mensahe amoroso dje rumannan den e congregacion na Korea, mi a keda yora so. Mi a keda asina contentu di pensa cu mi ta parti di un organisacion asina amabel.

M. K., Hapon

Molestia Sexual Danki p’e artículo “Hóbennan Sa Puntra . . . Molestia Sexual—Con Mi Por Protehá Mi Mes?” (¡Despertad! 22 di augustus, 1995) Mi tin 17 aña di edad, i mi a yega di conocé un mucha homber no-cristian na scol. Mi a confi’é, pero despues e i su amigunan a molestiá mi cu pregunta indecente i menasa. Mi tabatin cu cambia di scol pa librá mi dje situacion. Mi a siña hopi cos for dje artículo aki. Awor mi sa kico pa haci den e asuntu di trata cu hende dje otro sexo.

T. G., Portugal

Un compañero di trabou a molestiá mi i a  menasá mi sexualmente. Siendo cu mi tabata abusá como un mucha, hopi bes mi ta haña cu ta difícil pa defendé mi mes. Tog, mi a pidié bes tras bes lagá mi na pas. Pa caba, mi a raport’é n’e doño di trabou, anto el a bai lagá mi na pas. Mi realmente a apreciá e artículo. Hende muher tin cu sa con pa enfrentá e problema aki.

V. A., Merca