No Antoy Dugan Isipen Tayo No Ondadalan Tayod Subok tan Problema

1-2. Akin et importante ya duga tan malinew so panagnonot tayo no ondadalan tayod problema? Mangiter na ilustrasyon. (Nengnengen met so litrato.)

KASIN walay dadalanen mon subok o problema natan? Singa bilang, kasin lapud pananisiam et aliwan patas so panagtrato na arum ed sika, kokontraen ka na pamilyam, o papairapen ka na gobierno? Kasin walay graben sakit mo? Kasin naliliknam lay epekto na itatatken? Odino kasin inateyan ka na kapamilya o kaaro? Talagan ‘napno na gonigon tan ermen’ so bilay tayo. (Sal. 90:10) Anggan saray matoor ya lingkor nen Jehova et aga nipuera ed satan.

² No naproproblema tayo, say unonan naapektoan et say panagnonot tayo. No aliwan duga iray isipen tayo, agtayo makapandesisyon na duga. Isipen pay sakey ya too ya manmamanehoy luganan. Seguradon walan-wala ray nadalan to ya kaukolan ton paliisan. No malinew so windshield to, nanengneng ton tampol iratan kanian amta to lay gawaen to—nayarin onkawigi, onkawanan, man-menor, o ontundan magano. Pero no aburagas so windshield to, delikado! Ontan met no ondadalan tayod problema. Mas amta tayoy gawaen tayo no duga o malinew so panagnonot tayo—amay pareho ed panagnonot nen Jehova. Pantongtongan tayo ed sayan artikulo no antoy dugan isipen no naproproblema tayo, no antoy makapuy ya resulta no aliway isipen tayo, tan no anto ray nepeg tayon gawaen no naproproblema tayo.

NO NAPROPROBLEMA KA, TANDAAN MO IRAYA

3. Akin et anggapoy nipuera ed problema diad sayan mundo?

³ Diad sayan mundo, anggapoy nipuera ed problema. Akin ey? On ta amin ya totoo et aliwan perpekto, tan si Satanas so manuuley ed sayan mundo. Legan ya manasingger so anggaan, lalon oniirap so bilay lapud nanduruman kalamidad tan kaugsan ya gagawaen na totoo. (Mat. 24:8; 2 Tim. 3:13) Dia nid arapen so pangekal nen Jehova ed saratan ya problema. Ta no ekalan to la iratan natan, singa tutulongan ton manuley si Satanas. On, anggad agni aderal iyan sistema, walan-walay subok tan problema.—Ecl. 9:12.

4. Antoy kaaruman ya subok ya dadalanen na saray papatumbok nen Jesus?

⁴ Ondalan ed kaaruman ya subok iray papatumbok nen Jesus. Impasakbay la nen Jesus ya busolen itayo na totoo lapud pananisia tayo. (Mat. 24:9; Juan 16:2) Kanian agka la nabibigla no nagawa itan ed sika. Imbes ya onkapuy so pananisiam, napakiwas ka ingen ya manmatoor ta paneknek itan ya tutumboken moy Jesus. (1 Tes. 3:​3, 4) Lapud antam ya manmamatoor ka, ombiskeg so tiwalam ya naawat moy bilay ya andi-anggaan. No aanosan moy panamairap, papaneknekan mo met ya matila si Satanas. Dederalan toy Jehova tan ibabaga to ya mandadayew tayo labat ed Dios lapud bendisyon ya nanaawat tayo. Kanian susugsogan to ray totoo ya busolen da tayo pian ompaway ya duga may akusasyon to. Pero no manmatoor ka anggan antoy nagawa, ipapanengneng mo ya wala kad dapag nen Jehova. (Job 1:​9-11) Nalikna to ya inar-arom, kanian napaliket moy puso to.—Pro. 27:11.

5. Antoy naaralan tayo ed Eclesiastes 7:​13, 14? (Nengnengen met so litrato.)

⁵ Aliwan si Jehova so panlalapuay problema, iyaabuloy to labat itan. Agan balot manggaway mauges si Jehova tan agto tayon balot ipahamak. (Sant. 1:13) Pero antoy labay ya ibaga nen Arin Solomon nen insulat to ya say “agew na kairapan” et ‘ginawa na tuan Dios’? (Basaen so Eclesiastes 7:​13, 14.) No maminsan, diad Biblia, no imbagan ginawa nen Jehova so sakey ya bengatla, say labay ton ibaga et iyaabuloy to labat itan. Anto sirin so naaralan tayo ed satan ya imbaga nen Solomon? Unona, awaten tayo ya diad sayan mundo nen Satanas, no maminsan et maong so agew tayo, no maminsan balet et andi. No maong so agew tayo, misalamat tayo ed Dios ta bendisyon to itan. Komadua, ipapanonot nen Solomon ya ‘agtayon balot naseguro no antoy nagawa ed sikatayo’ kada agew. Anggan siopa et nayarin naproblema, maong man o mauges ya too.

6. Akin et iyaabuloy nen Jehova ya ondalan tayod subok? (Hebreo 12:​7, 11)

⁶ Legan na subok, naaralan tayoy mandepende ed si Jehova, aliwan diad sarili tayo. Amta nen Jehova iray dadalanen tayo tan labalabay to tayon tulongan. Tua, iyaabuloy to ray subok, pero manggawan-manggaway paraan pian nipalikna ton inar-aro to tayo. Wadtan ya lanang ya mangigiya tan manpabiskeg ed sikatayo pian makapan-anos tayo. (Sal. 23:4) No nasusubok tayo, diman tayo met nanengneng iray kaukolan tayo nin paaligwasen ed sarili tayo, tan sarag itan ya usaren nen Jehova pian pinoen so inkatoo tayo. (Basaen so Hebreo 12:​7, 11.) Singa bilang, inabuloyan nen Jehova ya ondalan si Job ed subok. Aliwan si Jehova so nanlapuan na subok, pero inusar to itan pian naaralan nen Job so manpaabeba. (Job 42:​1-6) Nia so tandaan tayo: Antokaman tay subok ya iyabuloy nen Jehova, tulongan to tayon manmatoor, tan seguradon bendisyonan to so katooran tayo.—Roma 8:​35-39.

7. Akin et maliket tayo nin siansia anggano wala ray mamubusol ed sikatayo lapud pananisia tayo?

⁷ Maliket tayo nin siansia anggano bubusolen itayo na arum lapud pananisia tayo. No napapasegsegang ka, agmo komon iisipen ya anggapo lad sikay pabor nen Jehova. Paneknek ingen itan ya matoor kad sikato, kanian napapaliket mo. (Mat. 5:​10-12) Kanian no walay mamubusol ed sika lapud pananisiam, ipasen mo ya baleg itan ya kagalangan. Walay rason mon manliket, ya singa alikna na saray apostol nensaman. (Gawa 5:​40-42) Tan no agmo ikbanay katooran mo, naimano itan na saray aliwan Tasi. Ompan lapud satan et magmaliw iran interesado ed katuaan tan “igloria ray Dios.” (1 Ped. 2:12) Kanian singa si Jose, naliknam lay bendisyon nen Jehova anggano agni asumpal so subok.—Gen. 39:​3, 23.

8. Anto ni balibalin nonoten tayo pian makapanmatoor tayo anggano ondadalan tayo ed subok?

⁸ Walay anggaan na amin ya problema. Ipapanonot na samay agawad si Job ya mangangga lanlamang so paniirap tayo. No bilang ta aliwan natan, diad balon mundo. Ibabaga na Biblia ya “mas lalon benendisyonan nen Jehova so kaunoran iran taon na bilay nen Job nen say nen inmuna.” (Job 42:12) Makaseguro ka ya bendisyonan ka met nen Jehova diad balon mundo. Tua, mair-irap so bilay natan. Pero antiktikey labat itan no ikomparad andi-anggaan ya bilay ya iter nen Jehova. Manmatoor tayo sirin anggad anggaan!—Mat. 24:13.

SARAY MAKAPUY YA RESULTA NO ALIWAY ISIPEN MO

9. Akin et delikado no aliway isipen tayo no ondadalan tayod subok?

⁹ No aliway isipen tayo legan na subok, ompan onloor laingen so situasyon. Singa bilang, ompan isipen tayo ya si Jehova so nanlapuan na problema tayo. Alikna itan nen Job. Nen unaan say amta to, nanlapud si Jehova iray subok ya dadalanen to, kanian labay ton “paneknekan a sikato so duga, aliwan say Dios.” (Job 32:2) Ontan met so alikna nen Noemi. Tinetel toy Jehova ed saray agawan trahedya ed bilay to. (Ruth 1:​13, 20, 21) Delikado itan ya alikna nen Job tan Noemi, ta no walay barong dad si Jehova, ompan ontunda la ran manlingkor ed sikato. (Pro. 19:3) Pero maong labat ta impetek nen Jehova so aliwan iisipen da, tan benendisyonan to ra lapud nanmatoor ira.

10. Anto ni sakey ya nayarin isipen tayo no ondadalan tayod problema?

¹⁰ Anggano kombinsido tayo ya aliwan si Jehova so nanlapuan na problema tayo, ompan isipen tayo balet ya anggapoy pibabali to. No ontan so isipen mo, onkapuy so liknaan mo. (Pro. 24:10) Asali itan nen Arin David tan propetan Habacuc. Nen ondadalan irad subok, say pakalikna ra et agdedengelen nen Jehova so pikakasi ra. (Sal. 10:1; Hab. 1:2) Pero maong labat ta ag-ira tinmundan kinmerew na tulong ed si Jehova. Impaseguro tod sarayan matoor ya lingkor to ya agto ra paulyanan, tan seguradon ontan met so gawaen tod sika.—Sal. 10:17.

11. Antoy nayarin isipen tayo no agtayo akaparaan ed saray subok?

¹¹ Papasesegen itayo na Biblia ya iparaan tayo lay sarili tayo ed saray subok. (1 Ped. 4:12) No agtayo akaparaan, ompan nabigla tayo tan isipen tayo ya agtayo kanepegay manirap. Ontan so agawa ed saray disipulo nen Jesus. Malinlinew ya imbaga nen Jesus ed sikara ya sikatoy napairap tan pateyen, pero ag-ira makapanisia. (Luc. 18:​33, 34) Imbaga ingen nen apostol Pedro ya imposiblin abuloyan na Dios ya manirap si Jesus! No manpaapektoy Jesus ed satan ya imbaga nen Pedro, agto nagawaay panlabayan nen Jehova. Kanian impetek toy Pedro. (Mar. 8:​31-33) Nen inatey lay Jesus, agnin siansia natatalosan na saray disipulo to no akin ya kaukolan toy ompatey. Pero maong labat ta agto ra sinukoan. Nen apaoli la, kinatongtong to ra tan malinew ton ‘impaliwawa ed sikara so Kasulatan.’ (Luc. 24:​25-27, 32, 44-48) Impapuso da itan ya imbaga nen Jesus kanian agla ra abigla nen sikara lan mismo so binusol tan pinairap na arum. No talosan tan ipapuso tayo met iray katuaan ed Biblia, niparaan tayo met lay sarili tayo ed saray subok.

12. No aliwan pareho so panagnonot tayo ed panagnonot nen Jehova, antoy nayarin isipen tayo no onaarap tayod mairap ya situasyon?

¹² No aliwan pareho so panagnonot tayo ed panagnonot nen Jehova, ompan isipen tayo ya singa tayo nasisibletan no onaarap tayod mairap ya situasyon, tan isipen tayo ya balbaleg so problema tayo, anta andi met manaya. Makaaral tayo ed samay ilustrasyon nen Jesus nipaakar ed saray inupaan ya trabahador ed kaubasan. Nen panangiter lay upa, nanreklamo so arum ed sikara ta alugi ra kuno. Pero oniay imbaga to may akanggawa na kaubasan ed samay sakey ya trabahador: “Kaaro, anggapoy ginawak a mauges ed sika.” (Mat. 20:​10-13) Diad tua, anggapoy karapatan dan manreklamo ta tinoor na amo ra no antoy nantongtongan dan upa. Say aliwa, inilaloan da ya mas ni so iter tod sikara, kanian adismaya ira. Diad panaon tayo, ompan ontan met so nalilikna na arum ya agagi. Singa bilang, ompan say pakalikna ra et nasisibletan iray pribilehyo, odino ompan nadidismaya ra ta kaukolan da lan ikbanan so sakey ya asainmin. Antoy gawaen tayo pian duga so isipen tayo anggano ondadalan tayod mairap ya situasyon?

NO ANTO RAY NEPEG MON GAWAEN NO NAPROPROBLEMA KA

13. Antoy nayarin nalikna tayo no sikatayo lan mismo so naproproblema?

¹³ Kabisado tayoy ibabaga na Biblia nipaakar ed paniirap na totoo. Seguro no walay kaarom ya ondadalan ed subok, walan tampol so naisip mon teksto ya ibasam ed sikato pian napaseseg. Pero no sikatayo lan mismo so naproproblema, ompan agtayo la amta no antoy dugan isipen. Singa bilang, ompan say pakaliknam et dudusaen ka nen Jehova odino agto dedengelen iray pikakasim. Antoy nepeg mon gawaen pian makapannonot kay duga anggano naproproblema ka?

14. Anto ray sarag mon ipikasi no naproproblema ka? (Filipos 4:13)

¹⁴ Ipikasim ed si Jehova ya tulongan to ka. Ibagam ed sikato no antoy dadalanen mo tan no antoy epekto to ’tan ed sika. No walay espisipiko ya labay mon gawaen to parad sika, ibagam labat. Kerew kay masanton espiritu to. Atan so manpabiskeg na liknaan mo, tan atan met so mangiter ed sikay karunongan pian makapandesisyon kay duga. Pero siempre, ompan say ebat nen Jehova ed pikakasim et duma ed samay iilaloan mo. (Efe. 3:20) Ompan usaren to iray anghel tan saray agagi. (Sal. 34:7) Antokaman so paraan ya usaren nen Jehova, awat moy tulong to. Mabulbulos ton iter ed sika so masanton espiritu ya kaukolan mo pian nasarag mo so anggan anton subok.—Basaen so Filipos 4:13.

15. Antoy agmo dapat papaulyanan no ondadalan kad subok? (Nengnengen met so litrato.)

¹⁵ Agmo papaulyanan so espiritualidad mo. No ondadalan kad subok, ompan naapektoan so espiritual ya rotinam. Pero tandaan mo ya diad ontan iran situasyon, mas kakkaukolan moy Jehova. Kanian anggano “nagogonigon tan nanairapan” ka, gawam so anggaay nayarian mo ya pakanen so sarilim ed espiritual. (Sal. 119:143) Agew-agew mon basaen tan aralen so Biblia, tan dalepdep mo iray nababasam. Agmo met papaulyanan so panagpulong, pipiaral, tan panagkomentom. Iyapit moy liknaan mo ed saray agagi. No bilang ta singa labay mon ibiig so sarilim, labanan mo itan ya liknaan.—Pro. 18:1.

16. No walay mairap ya dadalanen mo, anto ray nayarin onsebang ed isip mo, pero anto dapat so gawaen mo? (2 Corinto 10:​4, 5)

¹⁶ Usar moy Biblia pian nipetek moy nonot mo. No walay mairap ya dadalanen mo, ompan wala ray negatibon naisip mo nipaakar ed sarilim tan ed si Jehova. Ibabaga na Biblia ya kaukolan tayon ‘igeba iray ontan ya panagkatunongan.’ (Basaen so 2 Corinto 10:​4, 5.) Antoy gawaen mo pian ‘nigebam’ iratan? Usar mo so “kakabatan nipaakar ed Dios” ya walad Biblia tan ed saray publikasyon tayo. Singa bilang, kasin iisipen mo ya agla naliliketan si Jehova ed sika? Maabig no i-personal study’m so alimbawa nen apostol Pablo. Aliwan bastabasta iray subok ya dinalan to, pero akapanmatoor kanian akombinse ya talagan walad sikatoy pabor nen Jehova tan Jesus. (2 Cor. 11:​23-27) Kasin iisipen mo ya agka ni aperdona nen Jehova ed saray kasalanan ya agawaan mo nensaman? Maabig no ilistam iray teksto ya mangipapaseguro ya talagan mameperdona si Jehova. (Isa. 43:25) Lanang mon basaen tan dalepdepen iratan ya teksto. (Sal. 119:97) Kasin walay agawan trahedya ed bilay mo kanian mairap mo lan panisiaan imay sipan nen Jehova ya salimbengan to iray lingkor to? Maabig no i-research mod saray publikasyon tayo no akin ya aabuloyan na Dios so paniirap tan no panon to tayon sasalimbengan ed espiritual. (Sal. 91:​9-12) Basam met iray eksperiensya na agagi ya nansiansian aktibo ed panaglingkor ed si Jehova anggano walay trahedya ya dinalan na pamilya ra.a

17. Antoy nepeg tayon gawaen no walay onsabin problema?

¹⁷ Kasin anggapoy dadalanen mon ambelat ya problema natan tan nibagam ya lanang ya maong so agew mo? Pisalamatan mo sirin si Jehova tan sambot mo iyan panaon pian dalepdepen so kamaongan tod sika. (Ecl. 7:14) Pero no walay onsabin problema, antam la natan no antoy dugan isipen mo. Ipanonot mod sarilim iray apantongtongan tayon katuaan ed Biblia, tan mantiwala kad si Jehova. No gawaen mo itan, seguradon ‘manggawa si Jehova na dalan ya pawayan mo pian makapansungdo ka.’ (1 Cor. 10:13) Anto met balet so nagawaan mo parad saray agagi ya ondadalan ed subok? Atan so pantongtongan tayo diad onsublay ya artikulo.