Alig Moy “Dios na Amin a Ligliwa”

1. Akin et kaukolan tayon ligliwaen so arum?

AMIN tayo et ondadalan ed “nanduruman subok,” kanian wala ray panaon ya kakkaukolan tayoy ligliwa tan panamaseseg. (1 Ped. 1:6) Balibali ed liknaan no walay manligliwa ed sikatayo, pero akaparaan tayo met komon ya ligliwaen so arum. (Mat. 7:12) Diad Biblia, atawag si Jehova ya “say Dios na amin a ligliwa, a manliligliwa ed sikatayo diad amin a subok a dadalanen tayo.” Liligliwaen to tayo pian naligliwa tayo met so arum. (2 Cor. 1:​3, 4; 1 Tes. 4:18) Gawaen tayo itan aliwan lapud obligado tayo, noagta lapud inar-aro tayo ray agagi. No nabitla ed Biblia so salitan “ligliwa,” antoy labay ton ibaga ’tan? Antoy gawaen tayo pian naligliwa tayoy arum? Tan anto met so nepeg tayon gawaen no kaukolan tayoy ligliwa? Pantongtongan tayo iratan diad sayan artikulo.

ANTOY LABAY YA IBAGA NA LIGLIWA?

2. Diad Biblia, antoy nanduruman kabaliksan na samay Griegon salita ya impatalos ya “ligliwaen”?

² Diad Biblia, amay Griegon salita ya impatalos ya “ligliwaen” et nandurumay kabaliksan to. Diad tua, nayari met itan ya ipatalos ya “pasesegen” o “simbawaen.” (Roma 12:8; paimanod leksab) Say literal ya kabaliksan to ’tan ya salita et “tawagen so sakey pian abayan to ka.” Naimadyin tayo ed saya so sakey ya too ya aliston ontulong no maniirap so kaaro to. Nayarin nandurumay gawaen to pian makatulong. Say importante ed sikato et napaseseg tan napabiskeg toy liknaan na kaaro to. Atan so tuan ligliwa.

3. No panligliwa ed arum so pantongtongan, antoy naaralan tayo ed si Bernabe? (Nengnengen met so litrato.)

³ Imanoen tayo pay sakey ya alimbawa ed Biblia. Walay Kristiano nen inmunan siglo ya say ngaran to et Jose, ya kabkabat ed ugali to ya matulong tan aliston manligliwa ed arum. Nginaranan laingen na saray apostol ya Bernabe, ya say labay ton ibaga et “Anak na Ligliwa.” (Gawa 4:36) Dugarugad sikato itan ya ngaran. Kanian diad tinmutumbok ya salaysay ed Biblia, aglan balot atawag ya Jose, Bernabe la. Dakel so nabasad Biblia ya tinulongan nen Bernabe iray agagi. Singa bilang, agto pinaulyanan si Saulo nen balobalo nin Kristiano tan kakkasabi tod Jerusalem. Labay komon nen Saulo ya nakabat iray agagi diman, pero natatakot irad sikato ta amta ra ya dati et kabusol to ray Kristiano. Pero anggano onman so apalabas to, pinanengnengan nen Bernabe na kamaongan, tan inkabat to ed saray apostol.—Gawa 9:​26-28.

ANTOY GAWAEN MO PIAN NALIGLIWAM SO ARUM?

4. Antoy sakey ed saray sankaabigan ya paraan ya naligliwa tayoy arum? (Roma 1:​11, 12)

⁴ Pasyar mo ra no iyabuloy na situasyon. Duman-duma no personal tayon nakatongtong so agin mankaukolan na ligliwa. Nen nadi-depress si propetan Elias, angibaki si Jehova na anghel ya mamaseseg ed sikato. (1 Ara. 19:​4-7) Nen sinulatan nen apostol Pablo iray agagi, imbaga to ya labay to ran napinengnengan pian napaseseg to ra. (Basaen so Roma 1:​11, 12.) No pasyaren mo so sakey ya agi ya mankaukolay ligliwa, seguradom ya malaem so oras mo pian talagan nakaistoryaan tan napaseseg mo. (1 Cor. 16:7) Pero no ag-iyabuloy na situasyon ya makapasyar ka, naligliwam nin siansia no tawagan mo, ikdan moy sulat o card, odino i-chat mo. On, sarag kan usaren nen Jehova pian naligliwa to iray lingkor to. Kasin mabulos kan pausar ed sikato?

5. Anggano labay tayon pasyaren iray agagin mankaukolan na ligliwa, akin et aliwan onman kainomay no maminsan?

⁵ Diad sayan kaunoran iran agew, mapeligro lay panaon. Kanian anggano labay tayo komon ya pasyaren iray agagin mankaukolan na ligliwa, aliwan onman kainomay no maminsan. Nen akapriso si Pablo diad Roma, pinasyar nen Onesiforo, sakey ya agi ya tagad Efeso. Inanap toy Pablo diad Roma anggano amta to ya posiblin nipriso met tan ompan ipapatey ni ingen na gobierno. (2 Tim. 1:​16-18) Ontan met so gagawaen na saray agagi tayod Russia. No walay agi ya litisen lapud pananisia to, onla met ed korte so arum ya agagi pian nasuportaan da, anggano amta ra ya posiblin sikara so onsublay ya arestoen. Anto kasi no iparaan mo met lay sarilim ed onia ran situasyon? I-personal study’m sirin so alimbawa na saray makpel ya lingkor nen Jehova nensaman tan natan. Aral mo no panon dan niligliwa so sakey tan sakey tan no panon iran nansiansian maliket anggano walay panamasegsegang.

6. Panon tayon naalig si Jehova no liligliwaen tayoy arum? (Nengnengen met so litrato.)

⁶ Dengel mo ra. Nen aburidon maong si propetan Elias ta wala ray malabay ya mamatey ed sikato, impaway ton amin so nalilikna to ed si Jehova. Diad tua, amta pa la nen Jehova no antoy panaaburidoan nen Elias, pero dinmengel nin siansia. Maar-aro tan maan-anos ya dinmengel anggano paulit-ulit lay ibabaga nen Elias. (1 Ara. 19:​9, 10, 14) Nen agla nitepel nen propetan Habacuc so nanenengneng ton kaugsan, imbalikas tod si Jehova so nalilikna to. Anggano singa la kukuestionen nen Habacuc so autoridad nen Jehova, pinaulyanan To labat ya mansalita. (Hab. 1:​2, 3) Ontan nin siansia so gagawaen nen Jehova ed saray lingkor to natan. Anggano amta to la no antoy ibaga tayod sikato, madengedengel nin siansia no manpipikasi tayo. Aligen tayo sirin si Jehova. No ibesngaw na agi so problema to, dengel kan maong tan agka onsasalet. Marespeto kan ondengel anggano singa ansasakit lay ibabaga to tan paulit-ulit la.—Sant. 1:19; Ecl. 7:9.

7. Panon tayon naamtaan no anton talagay kaukolan na kaaro tayo?

⁷ Usar moy pakatebek mo. Aliwa tayon singa si Jehova ya makabasay puso. Pero no dengelen tayon maong so kaaro tayo, diman tayo naamtaan no anton talagay kaukolan to. Nanduruma so kada too. Kanian agmo iisipen ya antam la no antoy kaukolan to may kaarom, ta ompan duman tulong manaya so kaukolan to. Anosan mo sirin ya dengelen, ipaliknam so malasakit, tan tepetan mo pian napapaway mo no antoy walad nonot tan puso to.—Pro. 20:5.

8. Nen inatey si Lazaro, panon ya niligliwa nen Jesus si Marta, tan panon to met ya niligliwa si Maria? (Nengnengen met so litrato.)

⁸ Imanoen no panon ya niligliwa nen Jesus si Marta tan Maria nen inatey so agi dan si Lazaro. Pareho iran maneermen, pero aliwan pareho so impanligliwa nen Jesus ed sikara. Nen katongtong nen Jesus si Marta, impanonot toy nipaakar ed kioli na saray inaatey, tan pinabiskeg toy pananisia nen Marta ed satan ya katuaan. Pero nen si Maria la so katongtong nen Jesus tan anengneng ton onaakis, agto la binitla so nipaakar ed kioli. Manakis labat lay Jesus, tan tinepetan toy Maria no iner so angiponponan ed si Lazaro. (Juan 11:​20-35) Antoy naaralan tayo? Aliwan pareparehoy pankaukolan na kada too. Pian talagan naligliwa tayo so kaaro tayon maneermen tan maniirap, tebeken tayo ni no anton talagay tulong ya kaukolan to.

9. Antoy gawaen tayo pian nausar tayoy Biblia no liligliwaen tayoy arum? (Roma 15:​4, 5)

⁹ Usar moy Biblia. No basaan mo na teksto so agi ya mankaukolan na ligliwa, ombiskeg so liknaan to tan ‘nawalaan na ilalo.’ (Basaen so Roma 15:​4, 5.) Nalikna to ya inar-aro nen Jehova tan agto paulyanan. (Isa. 40:31) Antoy gawaen mo pian mainomay mon naromog iray makapaseseg ya teksto ed Biblia? Wala ray agagi ya ililista da iray agusgustoan dan teksto ya nausar da ed panligliwa dad arum, singa saramay teksto ya walad topic ya “Ligliwa” diad libron Manpaigiya ed Saray Prinsipyo na Biblia. Ipikasim ed si Jehova ya nausar mo komon so Salita to pian napaseseg moy arum. Tulongan ka na espiritu to pian nanonotan mo ray teksto ya dugarugad situasyon na agi ya liligliwaen mo.—Juan 14:26.

10. Akin et importante ya asikasoen tayoy panagsalita tayo no kaukolan tayon simbawaen so agin liligliwaen tayo?

¹⁰ Asikasom so panagsalitam. No maminsan, ompan kaukolan tayo met ya simbawaen imay agi ya liligliwaen tayo pian nipetek so panagnonot to. No bilang ta kaukolan mon simbawaen, nonot mo nin maong so ibagam pian napabiskeg moy liknaan to tan agmo la naarumay pakakadismaya to. (Pro. 12:18) Makaaral tayod samay ginawa nen Jehova nen katongtong toy Elias. Inisip nen Elias ya anggapoy kana na amin ya sagpot to tan bukbukor to labat lay akeran matoor ed si Jehova. Imbes ya ipalupa nen Jehova ed si Elias ya aliway iisipen to, maaro ton impetek so panagnonot to. (1 Ara. 19:​15-18) Alig moy Aman Jehova. No simbawaen mo so agi ya liligliwaen mo, mannonot ka nin maong antis kan mansalita tan maomaong komon so pitongtong mo. Tan no walay asainmin mo o mankomento kad aral, komon ta positibo so ibagam pian napaseseg iray agagi.

11. Likud ed panamaseseg, anto ni kaukolan na saray agagin maniirap? (1 Juan 3:18)

¹¹ Mangiter kay praktikal ya tulong. No maminsan, aliwan panamaseseg labat so kaukolan na saray agagi tayon maniirap. Kaukolan da met so praktikal ya tulong. (Basaen so 1 Juan 3:18.) Maabig ya alimbawa ed saya si Bernabe. Angilako na dalin to tan indonasyon to may nanlakoan pian natulongan iray balon bautismadon agagi ya mankakkaukolan. (Gawa 4:​36, 37) Dakel met ya agagi natan so mangiiter na praktikal ya tulong parad saray mankaukolan. Imanoen pay eksperiensya nen Gabriela ya tagad Poland. Aderal so abung to nen adelap so lugar da, kanian aprobleman maong. Kuan to: “Abupburido ak tan agko la amtay gawaen ko. Anggan saray atateng ko, mapagpaga ira ta diad siak ira manaayam. Dakel so kaukolan ya apigeren. Pero maong labat ta tinulongan kami na saray agagi diad kakaabay ya kongregasyon. Dakdakel so agawaan da diad loob labat na sanagew. Apaneknekan ko ya talagan uusaren nen Jehova iray lingkor to pian tulongan iray maniirap.”

12. Antoy epekto ed saray agagi no manmamatoor tayo anggano nasusubok tayo?

¹² Manmatoor ka. Aligliwa tan binmiskeg si Pablo nen abalitaan to ya manmamatoor iray agagi ed Tesalonica anggano ondadalan irad subok. Apaseseg ta aliwa manayan andi-kakanaan so impansagpot to parad sikara. (1 Tes. 3:​5-8) Kanian nen sikato met so ondadalan ed graben subok, desidido ya manmatoor ta amta to ya napaseseg iray agagi ed alimbawa to, anggan saramay agto ni kabat ed personal. (Col. 2:​1, 2) On, no nanenengneng na agagi ya nasasarag tayoy subok diad tulong nen Jehova tan makakapanmatoor tayo, napaseseg ira ta amta ran agmet ira paulyanan nen Jehova.

13. Akin et kaukolan so anos no liligliwaen tayoy arum?

¹³ Anosan mo may toon liligliwaen mo. No say sakey ya agi et nadidismaya, ompan agan tampol onepekto so panamaseseg tan panliligliwa tayod sikato. Pero bibilinen itayo na Biblia ya “itultuloy” tayo labat ya pasesegen so sakey tan sakey. (1 Tes. 5:11) Kanian no walay agi ya maer-ermen o nadidismaya, agka komon onsasawa ya mamaseseg ed sikato ta kakkaukolan to itan. (1 Tes. 5:14) Pero panon to no sikatayo met so mankaukolay ligliwa? Antoy gawaen tayo?

ANTOY GAWAEN MO NO KAUKOLAN MOY LIGLIWA?

14-15. Antoy gawaen tayo no maer-ermen o aburido tayo?

¹⁴ Manpikasi kad si Jehova. No maer-ermen o aburido ka, ibagam ed si Jehova ya ligliwaen to ka. (Sal. 94:19) Ibalikas mo labat no antoy walad pusom. (Sal. 62:8) Tua, amta la nen Jehova no antoy naliliknam anggano agmo ibagad sikato. Pero no ibagam ed sikato so naliliknam, pakapatnagan itan ya walay pananisiam. Tan ibabaga na Biblia ya no walay pananisia tayo, ebatan ton ebatan so pikakasi tayo. (Mar. 11:24) Oniay ipapaseseg na Filipos 4:​6, 7: “Ipaamta yo ed Dios iray kerew yo . . . tan say kareenan na Dios a palumbasan toy amin a pakatalos so manbantay ed saray puso tan nonot yo.”

¹⁵ Patulongan kad saray agagi. Ibagam so naliliknam ed maespiritual ya kaarom odino diad elder ya pantitiwalaan mo. Akaparaan iray agagi ya manligliwa ed sika. Pero ompan agda amtay dadalanen mo tan no antoy kaukolan mo. (Pro. 14:10) Kanian sika lay onasingger ed sikara. Ibagam ya kaukolan moy kaaro ya ondengel ed sika. Tepetan mo ra no walay teksto o artikulo ya akaligliwa ed sikara nen ondadalan irad subok ta ompan makatulong met itan ed sika.

16. Anggano labalabay kan pasesegen na agagi, antoy nagagawa no maminsan, pero antoy nepeg mon tandaan?

¹⁶ Itepel moy lingo na arum tan mabulos kan mamerdona. Tua, labalabay kan pasesegen na saray agagi, pero agmet ira perpekto. Ompan walay naibaga o nagawaan da ya agmo nagustoan. Kanian imbes ya napaseseg ka, ompan nadismaya ka la laingen. No ontan so nagawa, itepel mo la ra. (1 Cor. 13:​4, 7) Tandaan mo may nabasad Santiago 3:2: “No walay agnalilingo ed panagsalita to, sikatoy perpekto.” Manpokus ka la sirin ed maong ya motibo na saray agagi. Tandaan mo ya “magunaet so espiritu, balet maletey so laman.”—Mat. 26:41.

17. Antoy itultuloy tayon gawaen?

¹⁷ Kakkaukolan tayon amin so ligliwa tan panamaseseg ta manbibilay tayo lad kaunoran iran agew. Tan diad ilalabas na panaon, seguradon mas kakkaukolan tayoy ligliwa ta lalon onloor so kipapasen ed mundo tan lalo itayon pairapen na saray mamubusol ed sikatayo. Gawaen tayo sirin so anggaay nayarian tayo ya ligliwaen so sakey tan sakey.