Tooren na “Dios na Katuaan” so Amin ya Sipan To

1. Anggano manbibilay tayod mundo nen Satanas ya napnoy tila, siopay napantiwalaan tayo, tan akin? (Salmo 31:​2-5)

DIAD sayan mundo ya uuleyan nen Satanas, normal labat ed saray totoo so mantila, tan singa anggapo labat ed sikara no lokoen tan traidoren day kapara dan too. Kanian agmo la laingen amta no siopay pantiwalaan mo. Iray akanggaway kompanya, matmainomay day mansaol. Saray negosyante tan managlako, tila-tilaan da iray kustomer da pian masaliw so produkto da. No maminsan ingen, anggan saray malet ya sankakaaro, nitepel dan ipalalbong so sakey tan sakey. Pero maong labat ta say Dios tayo ya si Jehova et “Dios na katuaan,” kanian seguradon nailaloan tan napantiwalaan tayo. (Basaen so Salmo 31:​2-5.) Agbalot nayarian nen Aman Jehova so mantila. Amin ya ibabaga to et tua. Kanian no walay imbaga to ya gawaen to, tooren ton tooren!

2. Anto ray pantongtongan tayo ed sayan artikulo?

² Pantongtongan tayo ed sayan artikulo so pigaran rason no akin ya talagan makapantiwala tayo ed si Jehova. Insan tayo pantongtongan no panon ya panampoten na Dios na katuaan iyan mauges ya mundo nen Satanas, tan no anto la ray gagawaen na Dios natan pian nasumpal so gagala To. Makatulong iyan artikulo pian magmaliw tayon makpel ya Tasi nen Jehova.

NO AKIN YA MAKAPANTIWALA TAYO ED DIOS NA KATUAAN

3. Antoy sakey ya rason akin et makapantiwala tayod si Jehova?

³ Makapantiwala tayod si Jehova ta sikato so Amalsa ed amin a bengatla. Sikato so nanggawad tawen tan dalin, tan sikato met so nanlapuan na bilay. (Gen. 1:1; Sal. 36:9; Apo. 4:11) Intarya to ingen so amin ya kaukolan tayo pian manbilay tayo, singa say dagem ya iingasen tayo tan say danum ya iinumen tayo. Kontrolado to so amin ya bengatla diad uniberso. On, anggapoy makapiparad karunongan tan pakayari nen Jehova. Agka sirin manaalangan ya ipiyay bilay mo ed sikato. Makapanmatalek ka ya ikdan to kay maong ya arapen.

4. Panon tayon amta ya inar-aro to tayo nen Jehova?

⁴ Makapantiwala tayod si Jehova ta inar-aro to tayo. Pinalsa nen Jehova iray totoo ta labay ton nalikna day liket ya manbilay, ya singa nalilikna to. Espisyal tayo ingen ta pinalsa to tayo ya sarag tayon ipanengneng iray balibalin ugali tan kualidad to. (Gen. 1:26) Inikdan to tayoy abilidad ya mandesisyon parad sarili tayo. Inggawaan to tayo met na marakdakep ya ayaman. (Sal. 115:16) Tan inmatalek tod inmunan atateng tayo so balibalin asainmin—pagmaliwen dan paraiso so interon dalin. (Gen. 1:28; 2:15) Sinegurado nen Jehova ya dakel so naakan da, tan nanggaway nanduruman tanaman tan ayayep pian talagan panliketan day manbilay. Paneknek irayan amin ya “say matoor a panangaro nen Jehova et mansiansia ya anggad angga.”—Sal. 103:17.

5. (a) Nen nankasalanan si Adan tan Eva, kasin anguman so gagala nen Jehova? Ipaliwawa. (b) Anto ran sipan nen Jehova so sinumpal to la? (Nengnengen so kahon ya “Walay Sakey ya Salita nen Jehova.”)

⁵ Makapantiwala tayod si Jehova ta walay sakey ya salita to. Impaisulat nen Jehova diad Biblia ya say dalin et “agto pinalsa ya andiay gagala, noagta ginawa ton panayaman.” (Isa. 45:​18, 19) Nen nanrebelde si Adan tan Eva, patey so sentensia ra. Seguro say amta nen Satanas, apurnada lay gagala nen Jehova. Pero anggapoy makaamper ed si Jehova. No antoy imbaga to, talagan sumpalen to! (Isa. 46:​10, 11) Ag-anguman so gagala to ya say dalin et napano na matunong ya totoo. Kanian anggano nankasalanan si Adan tan Eva, inabuloyan to ran nawalaan na ananak. Tan inter toy bogbogtong ya Anak to bilang dondon pian niliktar ed kasalanan iray ananak nen Adan, tan nawalaan ira na tsansan manbilay ya andi-anggaan.—Juan 3:16.

SUSUMPALEN LA NA DIOS NA KATUAAN SO GAGALA TO

6. Nen nanrebelde si Adan tan Eva, antoy impasakbay nen Jehova?

⁶ Say nansugsog ed si Adan tan Eva ya manrebelde ed Dios et “say sankaunaan ya uleg, samay tatawagen a Diablo tan Satanas.”a (Apo. 12:9; Gen. 3:​4, 5; Juan 8:44) Lapud satan ya ginawa nen Satanas, impasakbay nen Jehova ya onsabi panaon et sikatoy naderal. (Gen. 3:15) Antis itan ya nagawa, dakel so ompanig ed si Satanas tan aligen day kaugsan to. Pero wala met iray manmatoor ed si Jehova.

7. Siopa ray pinmanig ed Diablo, tan antoy pansumpalan da?

⁷ Pinmanig ed si Satanas ya Diablo iray anghel ya nanrebelde ed si Jehova tan saray totoo ya agmanguunor ed Dios. Lapud susumpaen o kokontraen day gagala na Dios, nibagan ilalak ira nen Satanas. Pero onsabi panaon, deralen lanlamang nen Jehova si Satanas tan amin ya alipores to.—Dan. 2:44; Roma 16:20.

8. Antoy ginawa nen Jesus nen 1914? (Nengnengen met so litrato.)

⁸ Akin et segurado tayo ya talagan deralen na Dios si Satanas tan saray alipores to? Nen 1914, introno la nen Jehova si Jesus bilang Ari. Tan antoy unonan ginawa nen Jesus? Akiguerra ed si Satanas a Diablo tan ed saray demonyo, tan imbasileng to ra diad dalin. (Apo. 12:​7-9) Anggano agawa itan ya guerra diad tawen, sankaliknay epekto to ’tan diad dalin. Kanian oniay ibabaga na Biblia: “Kasi lay dalin tan say dayat, lapud linmeksab ed sikayo so Diablo, ya agaylay pasnok to, ta amta ton antikey lay panaon to.” (Apo. 12:12) Manlapu la nen 1914, mamapasyay Satanas ed pangiimpluensya to ed saray totoo kanian linmoor so kaugsan ed mundo. Talagan ‘pakaskasi so dalin’! Pero makaseguro tayo ya sumpalen nen Jesus iyan laban. Asingsingger lan baloren nen Jesus si Satanas, tan deralen toy amin ya alipores to. (Apo. 6:2) Linisan nen Jesus so ngaran nen Jehova. (Sal. 45:​4-6) On, naamtaan na amin ya si Jehova so Dios na katuaan!—Eze. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

TITIPONEN NA DIOS NA KATUAAN SO AMIN YA MANGAAROD KATUAAN

9. Siopa ray titiponen nen Jehova natan?

⁹ Antis ya naderal si Satanas tan saray alipores to, titiponen la nen Jehova so “amin a bengatla diad Kristo, saray bengatla ed tawen tan saray bengatla ed dalin.” (Efe. 1:10) “Saray bengatla ed tawen” et ontutukoy ed saray alanaan ya pinili nen Jehova ya manuley ya kaiba nen Kristo diad tawen. “Saray bengatla ed dalin” et ontutukoy ed saramay say ilalo da et manbilay na andi-anggaan diad Paraison dalin. Amin irayan lingkor nen Jehova et maseseg ya manpupulong pian nakabat na totoo si Jehova tan naamtaan da ya matila si Satanas.

10. Antoy gagawaen nen Jehova pian nibulos iray totoo ed saray katilaan ya ibabangat na palson relihyon? (Apocalipsis 14:​6, 7)

¹⁰ Pian natipon nen Jehova so amin ya mangaarod katuaan, ingganggan to ray lingkor to ya ipulong so maong a balita diad interon mundo. Amay onian kalaknab ya panagpulong, natan labat iya nagagawa! (Basaen so Apocalipsis 14:​6, 7.) Sikatayo so direktan manpupulong. Pero igigiya itayo na saray anghel pian naromog tayo iray mapaabeban totoo. Lapud pampupulong tayo, nanaamtaan na saray totoo ya katilaan so ibabangat ed sikara na relihyon da. Diad tua, amin ya palson relihyon natan et instrumento nen Satanas pian mangikayat na katilaan nipaakar ed si Jehova. (Apo. 18:​2, 4) Pero asingger lan naderal so amin ya palson relihyon, say Makapanyarin Babilonia. (Apo. 17:16) No nagawa la itan, igloria na amin ya mangaarod katuaan si Jehova!

11. Panon tayon nibiig no siopa ray mandadayew ed si Jehova diad dugan paraan?

¹¹ Nanduruman klase na totoo ed interon mundo so iyaasingger nen Jehova ed katuaan. (Apo. 7:​9, 10) Nen naamtaan da so “maong a balita,” akombinse ira ya atan so katuaan kanian nandesisyon iran manlingkor ed si Jehova tan nagmaliw iran parte na pamilya to. (Mar. 13:10) Diad panaon tayo, matmainomay lan ibiig no siopa ray mandadayew ed Dios diad dugan paraan. Oniay impasakbay nen propetan Malaquias: “Nanengneng yo lamet so pandumaan na matunong a too tan mauges a too, samay manlilingkor ed Dios tan samay agmanlilingkor ed sikato.” (Mal. 3:18) Nanengneng ed kabibilay tan pampupulong na saray Tasi nen Jehova ya say dadayewen da et say Dios na katuaan.

12. Panon ya makakatulong so kimey ya panagpulong ed pakakasumpal na gagala nen Jehova?

¹² Kada no ipupulong tayo so “maong a balita na Panarian,” uunoren tayoy ganggan nen Jesus, tan diad tua et susumpalen tayoy propesiya. (Mat. 24:14; 28:​18-20) Lapud kimey ya panagpulong, dakel ya totoo ed interon mundo so magmamaliw ya disipulo nen Kristo, tan wala lay ilalo dan mandayew ed Dios na katuaan diad anggad angga. On, walay nitutulong tayo ed pakakasumpal na gagala nen Jehova. Balbaleg itan ya pribilehyo!

AGKA NATATAKOT ED SARAY NAGAWAD ARAPEN

13. Siopa ray manunan pupuntiryaen nen Satanas, tan akin?

¹³ Amta nen Satanas ya asingger lan naderal iyan mundo to tan “antikey lay panaon to” kanian ampetang so ulo to. (Apo. 12:​12, 13) Ipapangget toy pasnok to ed saray alanaan ya wadia nid dalin. Sikara so manunan puntirya to lapud ‘uunoren da iray ganggan na Dios’ tan idadaulo da so “kimey a panagtasi nipaakar ed si Jesus.” (Apo. 12:17; 14:12) Pupuntiryaen to met so siopaman ya onsusuporta ed sikara tan ed kimey ya idadaulo da.

14. Antoy nagawa no atakien la nen Satanas iray lingkor nen Jehova? (Nengnengen met so litrato.)

¹⁴ No aderal la so Makapanyarin Babilonia, atakien na saray alipores nen Satanas iray lingkor nen Jehova. Ditan la onggapo so guerra na Armagedon. (Apo. 16:​13, 14, 16) Iliktar nen Jesus tan say armada tod tawen iray lingkor nen Jehova tan deralen da so amin ya akerad mundo nen Satanas. (Apo. 19:​19-21) Kanian amin ya totoon mauges, matila, tan managsaol et naandi la. (Apo. 21:8) Naamtaan na amin ya totoo ya no antoy imbaga nen Jehova, talagan gawaen to!

15. Akin et agtayo dapat takotan iray nagawad arapen? (Isaias 65:​16, 17) (Nengnengen met so litrato.)

¹⁵ Diad panaon tayo, mapatpatnag ya anggapoy pankakasakey na saray totoo ed mundo. Pero diad tulong nen Jehova, sikatayo ran lingkor to et walay pankakasakey tayo. Anggapoy makapanpatunda ed si Jehova diad panitipon to ed saray mangaaro ed katuaan. Seguradon bendisyonan to ray lingkor to tan say kimey ya gagawaen da. (Basaen so Isaias 65:​16, 17.) Kanian anggapoy nepeg tayon takotan ed saray nagawad arapen. Oniay malinlinew ya insulat nen apostol Pablo ya nabasad Roma 8:​38, 39: “Anggan say patey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari odino say kaatagey odino say kaaralem odino anggan dinan nin pinalsa et agbalot makapangisian ed sikatayo ed panangaro na Dios a walad si Kristo Jesus a Katawan tayo.”

16. Akin et baleg so tiwalam ed si Jehova?

¹⁶ On, dakel so rason tayon mantiwala ed si Jehova, say Dios na katuaan. Sikato so Amalsa ed sikatayo. Inar-aro to tayo. Tan titiponen to la natan so baleg ya ulop manlapud amin ya nasyon, tan maliket iran mandadayew ed sikato. (Isa. 60:22; Zac. 8:23) Lanang ton totooren iray sipan to, tan asingger to lan ekalen si Satanas pian nibulos la so mundo ed amin ya katilaan to. Ipikasi tayo met sirin imay impikasi nen David: “Narayew komon si Jehova a Dios, . . . a sikato labat so manggagawa na makapakelaw iran bengatla. Narayew komon ya anggad angga so maglorian ngaran to, tan napano komon na gloria to so interon dalin.”—Sal. 72:​18, 19.