“Makarengel Kayo na Saray Guerra”

“Manlapu la nen nagmaliw ak ya reporter nen 1960s, masulok lan 40 ya guerra ed interon mundo so nibalitak. Anengneng ko no panon ya linmoor lan linmoor so tension ed baetan na United States tan Soviet Union, insan bigla labat itan ya tinmunda. Balet diad ami-amin, ayay 2025 so talagan makapa-alarma—ta pigaran angkakabaleg ya guerra so nagagawa tan sakey ed saratan so nayarin walay aliwliwan epekto to ed saray politika ed mundo ya agnin balot agawa nensaman.”—John Simpson, editor na BBC world affairs, indanet mi iray mabakat ya salita.

Aburido iray totoo ed saray nagagawan guerra ed interon mundo. Iisipen na dakel no kasin ontunda ni iratan. Antoy imbangat nen Jesus?

No antoy imbangat nen Jesus

Impasakbay nen Jesus iray nanenengneng tayon nagagawa natan. Oniay imbaga to ed saray papatumbok to: “Makarengel kayo na saray guerra tan balita nipaakar ed saray guerra.”—Mateo 24:6.

Pero anggano makapa-alarma iray guerra tan panlalaban ya nanenengneng tayo natan, agtayo dapat naeekalay ilalo. Akin ey? On ta imbangat nen Jesus ya saray guerra tan arum nin nagagawa tan ugali na totoo et kaiba ed “tanda” ya manbibilay tayo la ed “kaunoran a parte na sistema na mundo.” (Mateo 24:3; Lucas 21:7) Labay ton ibaga et onsabi panaon ya patundaen nen Jesus so amin ya guerra. Panon?

No antoy gawaen nen Jesus

Bilang Ari na Panarian na Dios, asingsingger lan ‘patundaen nen Jesus iray guerra diad interon dalin.’—Salmo 46:9.

Pian naamtaan mo no panon ya magmaliw ya mareen so mundo tan no antoy magmaliw ya kipapasen na bilay ed satan ya panaon, basaen so artikulon “No Panon ya Manampot so Guerra tan Panlalaban.”