Tulong Parad Saray Bulag
Base ed tantiya, 43 milyon ya totoo ed interon mundo so bulag tan 295 milyon so walaay deperensya ed pakanengneng.a Balet makapaermen ta aliwliway panagtrato ed sikara na arum ya totoo.
Antoy pakanengneng na Dios ed saray bulag? Antoy ibabaga na Biblia nipaakar ed sikara? Tan antoy gagawaen na saray Tasi nen Jehova natan pian natulongan ira?
Antoy pakanengneng na Dios ed saray bulag?
Ipapaamta na Biblia ya inar-aro nen Jehovab iray bulag. Labay ton patas so pantrato ed sikara tan labay ton naawat da met komon so edukasyon ya manlalapud sikato. Ipapaamta met nen Jehova ya wala ray balibalin gawaen to parad sikara diad arapen.
Teksto: “Naayew so mangibalang ed sakey a bulag a too diad dalan.”—Deuteronomio 27:18.
Say labay ton ibaga: Nensaman, angiter so Dios na ganggan ed saray totoo to pian naprotektaan iray bulag tan ag-ira naabuso.
Teksto: “Anggapoy lalabien na Dios.”—Gawa 10:34.
Say labay ton ibaga: Inaro na Dios iray bulag ya singa pangaaro to ed saray makanengneng.
Teksto: ‘Impawil nen Jesus so pakanengneng na dakel a bulag a totoo.’—Lucas 7:21.
Say labay ton ibaga: Nen wadiad dalin si Jesus, impawil toy pakanengneng na saray bulag pian ipanengneng no antoy gawaen na Panarian na Dios diad arapen.
Teksto: “Makanengneng la ray mata na bulag.”—Isaias 35:5.
Say labay ton ibaga: Asingsingger lan nagawa so insipan nen Jehova ya makanengneng la ray bulag no manuley la so Panarian na Dios ed dalin.
No panon ya tutulongan na saray Tasi nen Jehova iray bulag
Bilang Tasi nen Jehova, ipapaamta mi diad interon mundo so balibalin gawaen na Dios ed arapen parad saray bulag. Panon min nagagawaan itan?
Manggagawa kami na Biblia pati saray publikasyon ya uusaren ed panag-aral na Biblia tan saray video ed nanduruman format ya nayarin usaren na saray bulag tan saray walaay deperensya ed pakanengneng. Kaiba lad satan so braille, saray publikasyon ya angkabaleg so letra da, tan audio.
Wala ray regular ya pantitipon mi ya imbitado so amin, kaiba la ray bulag.
Mangiyoopresi kami na panag-aral na Biblia ya walay personal ya manbangat ed kada sakey.c
Gagawaen tan iiter mi irayan amin ya anggapoy bayar ta oniay ingganggan nen Jesus: “Inawat yon anggapoy bayar, iter yon anggapoy bayar.”—Mateo 10:8.
Importantin maong ed saray Tasi nen Jehova iray bulag. Siopaman ya labay day mandayew ed Dios ya kaiba mi et seguradon makalmo na maomaong tan masuporta iran kakaaro. Imanoen irayay istorya na arum ed saray Tasi nen Jehova ya bulag.
Si Talita Alnashi ya tagad Sweden et wala lay deperensya na pakanengneng to manlapu nen inyanak. Nengnengen no panon ya imbangat ed sikato na atateng to so nipaakar ed Biblia tan no panon ya impalikna na saray kakaaro da so panangaro tan suporta ed sikato tan ed pamilya to.
Si James Ryan ya tagad United States et inyanak ya emel insan nagmaliw met ya bulag. Amtaen no akin ya maliket tan kontento ed bilay to.
Si Cynthia Pablo ya tagad Pilipinas et emel tan bulag. Panon ya sinuportaan na saray kapananisiaan to legan na mair-irap ya situasyon nen COVID-19 pandemic? Nengnengen so artikulo ya “Sister na Pipi at Bulag, Tinutulungan ng Kongregasyon sa Panahon ng Pandemic.”
Anto ran uusaren ed panag-aral na Biblia so itatarya mi?
Saray publikasyon ed braille. Mangipa-publish kami na braille ya Biblia ed nanduruman lenguahe, balanglan say interon Biblia odino say arum ya parte na satan. (Pian naamtaan yo no anto ran lenguahe so wala la, nengnengen so kahon ya “Say Balon Mundo a Patalos na Biblia ed Braille.”) Ipa-publish mi met ed braille so dakel ed saray nibase ed Biblia ya publikasyon mi. Parad saramay labay day makaaral na braille, angi-publish kami met na sakey ya workbook ya say title to et Learn to Read Braille. Ginawa itan pian natulongan so sakey ya bulag ya naaralan toy manbasay braille diad tulong na sakey ya toon makanengneng.
Sarag yoy mitongtong ed sakey ed saray Tasi nen Jehova pian makala kayoy kopya na saray publikasyon mi ed braille odino sarag yoy man-request na ombisita ed sikayo.
Diad jw.org, sarag yoy man-download na saray file ya parad saray notetaker.d
Saray publikasyon ya inimprinta ed angkabaleg ya letra tan saray digital content ya nayarin pabalegen. Dakel ed saray publikasyon mi so inimprinta ed angkabaleg ya letra parad saramay walaay deperensya so pakanengneng da. Denesinyo so jw.org ya website mi ya duga nin siansia so nanengneng anggano pabalegen ya maong so web page. Tan nayari met ya pabalegen iray letra na sakey ya publikasyon ed JW Library app.
Sarag yoy mitongtong ed sakey ed saray Tasi nen Jehova pian makala kayoy kopya na saray publikasyon mi ya angkabaleg so letra odino sarag yoy man-request na ombisita ed sikayo.
Diad jw.org, sarag yon i-download iray digital ya publikasyon ya angkabaleg so letra da. Parehas lanlamang so karga da ed saray inimprintan kopya.
Saray publikasyon ya walay audio. Igagawaan mi na audio recording so Balon Mundo a Patalos na Biblia ed masulok ya 200 ya lenguahe. Igagawaan mi met na audio recording so dakel ed saray nibase ed Biblia ya publikasyon mi. Kaslakan et narengel ed sarayan recording so deskripsion na saray litrato.
Nayarin i-play so audio legan ya akakonekta ed Internet odino i-download diad jw.org tan diad JW Library app.
Diad jw.org, sarag yon i-download iray file ya parad screen reader tan digital talking book player.e
Saray video ya walay audio description.f Manggagawa iray Tasi nen Jehova na nibase ed Biblia iran video ya walay audio description to diad masulok ya 100 ya lenguahe. Makakatulong irayan video pian natalosan na saray totoo tan niyaplika da iray praktikal ya bilin na Biblia.
Nia ray pigaran video ya walay audio description to:
Saray aral o pantitipon. Diad interon mundo, sinimba kamin mantitipon diad saray kongregasyon pian manaral na Biblia tan mandayew. Mangoorganisa kami met na saray angkabaleg ya pantitipon kada taon. Ditan et wala ray nabantayan ya video, tan pansasagpotan mi met ya mamawala na saray video ya walay audio description to. No posible, diad saray pantitipon mi ya wala ray onaatendi ya bulag tan emel, walay gagawaen mi ya tactile interpreting. Atan may pangisinyas panamegley na ibemben ed saray lima na bulag tan emel. Welcome so amin ed saray pantitipon mi, anggapoy lalabien mi.
Mananap na kongregasyon ya piaralan.
Amtaen so nipaakar ed tinaon ya kombension mi.
Onatendi ed Memoryal na impatey nen Jesus, say sankaimportantian ya pantitipon mi kada taon.
Si José Luis Ayala et tagad Mexico. Inyanak ya emel tan nagmaliw ya bulag nen 29 so taon to. Amtaen no akin ya importante ed sikato iray pantitipon mi tan no panon ya akatulong iratan ed sikato pian magmaliw ya epektibon managbangat na Biblia.
a Saramay walaan na “deperensya ed pakanengneng” et ontutukoy ed saramay totoon agla ompawil so pakanengneng da tan makakaabala itan ed saray inagew-agew ya gagawaen da. Diad sayan artikulo, no imbagan “bulag” ontutukoy itan ed saramay talagan agmakanengneng tan saramay walaay deperensya ed pakanengneng.
b Jehova so ngaran na Dios. (Salmo 83:18) Nengnengen so artikulo ya “Siopa si Jehova?”
c Sarag yon i-request ya ipanengneng mi no panon min gagawaen so libren panag-aral na Biblia.
d Say notetaker et sakey ya melag ya elektronikon gadyet ya nasalat-salatan so ompapaway ya butil-butil na braille. Say arum ya notetaker et wala met so narengel ya computerized ya boses to. Pian nasalatan so ompapaway ya butil-butil na braille, nayarin papawayen odino paseleken iray butil pian makabuo na saray letra ya braille. No walay notetaker, agla kaukolan so amayamay ya kopya na aka-emboss ed papel ya braille.
e Sarag ya basaen ya maksil na screen reader tan digital talking book player iray salita panamegley na boses ya aka-program ed computer odino akarekord lan audio. Lapud saratan ya teknolohiya, mainomay ya napugta na sakey ya bulag iray espisipikon parte na publikasyon.
f Say audio description et kaaruman ya impormasyon ya narengel ed sakey ya video ya mangipapaliwawa no antoy nagagawa ed kada eksena.