Tulongan Iray Bulag ya Nakabat si Jehova

1. Panon ya impanengneng nen Jesus so panangasi ed saray bulag?

¹ Pigaran agew labat lad saman antis na ipatey nen Jesus. Nen paalis lad syudad na Jerico, walay duaran mipapayabol a bulag ya inmeyag: ‘Katawan, kasian mo kami!’ Anggan sankanonot to lad saman iray nagawad sikato, tinmunday Jesus, tinawag to ra, insan to ra pinaabig. (Mat. 20:29-34) Panon tayon naalig so panangasi nen Jesus ed saray bulag?

2. No walay nanengneng tayon bulag, panon tayo ran napulongan?

² Tulongan Ira: No walay nanengneng yon bulag, mikabat kayo tan ibaga yon labay yon tulongan. Maslak ed sikara et mabetbet ya naloloko kanian ompan diad gapo et mansuspetsa ra. Balet no nalikas dan talagan makaaro kayo tan labalabay yoy ontulong, naekal so pansuspetsa ra. Tandaan met ya nandurumay kagrabe na inkabulag, tan akadependid satan no anton tulong so iter yo. Kayari yon tinulongan, nayari yon ibagan kaiba kayod saray manbabangat na Biblia. Nayari kayon mangibasa na teksto, singa say Salmo 146:8 odino Isaias 35:5, 6. No makabasay Braille, tepetan no labay toy publikasyon ya Braille ya ontulong ed sikaton naaralan so Biblia. Nayari met ya tulongan tayon makaala na saray dedengelen a publikasyon diad jw.org. No walay computer ton walay screen reader program ya basaen to ray walad screen, ompan nagustoan to ray artikulo ed jw.org tan publikasyon ya na-download ed RTF (Rich Text Format).​—Nengnengen so kahon ya “No Tulongan Moy Sakey a Bulag . . .”

3. Panon tayon anapen iray bulag diad teritorya tayo?

³ Anapen Iray Bulag: Matalag tayon makaromog na bulag no manpupulong tayod kaabungan ta maslak ed sikara et natatakot ya mitongtong ed agda kabat. Kanian kaukolay sagpot pian ‘naanap’ tan napulongan ira. (Mat. 10:11) Wala kasi katrabahom o kaeskuelam ya bulag? Pitongtongan mo. No diad teritorya yo et walay eskuelaan parad saray bulag, sarag yoy mangiter na saray publikasyon tayo ya Braille parad librarya da. Walay kabat mon walay kanayon ton bulag? Wala ra kasi organisasyon ed teritorya yo ya ontutulong ed saray bulag, odino ayaman parad disabled ya wala ray bulag? Ipaliwawa ed kanayon to, ed manager, odino receptionist ya labay na Saray Tasi nen Jehova so ontulong ed saray bulag, tan ibagan mangawit kayoy literaturan Braille odino audio recording. Ipanengneng ed sikara so sipan na Biblia ya onsabi panaon et makanengneng la ray bulag. Sarag yo met ya ipabantay so video ed jw.org ya “Without It, I Would Feel Lost,” ya mangisasalaysay ed eksperiensya na sakey a bulag ya agunggonaan lapud Biblia ya Braille. No ipaliwawam so gagala na imbisitam, ompan abuloyan da kan mitongtong ed saray bulag.

4. Antoy naaralan tayod eksperiensya nen Janet?

⁴ Si Janet, sakey a bulag ya sister et binmisitad ayaman ya wala ray bulag. Akitongtong ed sakey ya bii. Oniay imbaga nen Janet: “Pinaabig nen Jesus iray bulag pian ipanengneng no antoy gawaen tod amin ya bulag diad arapen.” Nantongtongan day Apocalipsis 21:3, 4, tan impaliwawa nen Janet no panon ya nagawa itan panamegley na Panarian na Dios. Nampareen may bii insan to imbaga: “Agko nin balot arengel ’tan ed sakey a bulag. Maslak ya aliwan bulag et manisian wala ray bulag lapud mauges a ginawa da odino na inmunan atateng da.” In-email nen Janet ed bii so link na libron Ibabangat na Biblia, tan natan et manaaral la ray Biblia, mamiduad sakey simba.

5. Anggano agtayo napaabig iray bulag a singa ginawa nen Jesus, anto ray bendisyon no ipanengneng tayoy panangiyansakit ed sikara?

⁵ Agtayo napaabig iray bulag a singa ginawa nen Jesus. Balet sarag tayon tulongan iramay say nonot da et binulag na dios na sayan sistema na mundo, kaiba la ray literal ya bulag, pian natalosan so katuaan ya walad Salita na Dios. (2 Cor. 4:4) Pinaabig nen Jesus imay duaran mipapayabol a bulag ta “naabagey” to ra. (Mat. 20:34) No ipanengneng tayo met so ontan ya panangiyansakit ed saray bulag, panliketan tayoy pribilehyon ontulong ed sikara ya nakabat imay manpaabig ed saray bulag, si Jehova.