Respetom so Desisyon na Arum

1-2. Akin ya no maminsan et dumay desisyon tayo ed desisyon na arum ya agagi?

ASALIM la may hinusgaan ka na arum ta agda agustoay desisyon mo? Pero asalim met la ya hinusgaan moy sakey ya agi ta agka kompormi ed desisyon to? Seguro maslak ed sikatayo et “on” so ebat tayo ed satan ya duaran tepet.

² Diad tua, agti la dapat pankelawan ya no maminsan et dumay desisyon tayo ed desisyon na arum ya agagi. Nanduruma so kada too. Kada sakey ed sikatayo et walay kanya-kanyan opinyon to, depende ed abangonan ton kultura, binalegan ton pamilya, tan saray naeksperiensya tod bilay. Pero anggano nandurumay opinyon tayo, agtayo ompapayag ya lapud satan et naderal so pankakasakey tan deen ed kongregasyon.—Efe. 4:3.

3. Antoy nayarin naisip tayo no agtayo kompormi ed desisyon na sakey ya agi, tan akin et ontay naisip tayo?

³ No agtayo kompormi ed desisyon na sakey ya agi, ompan isipen tayo ya kaukolan tayon katongtongen pian nakombinsi ya umanen toy desisyon to, tan ompan istoryaen tayo ni ingen ed arum ya alanganin so desisyon to. Nayarin maong met so motibo tayo. Siempre, inar-aro tayo ray agagi tan sankanonot tayoy pankaabigan da. (Pro. 17:17) Kanian agtayo labay ya makagawa ray desisyon ya pagbabawian da lanlamang tan sengegan na ikapuy dad espiritual.

4-5. Kasin kaukolan tayon katongtongen so sakey ya agi no iisipen tayon aliwa so desisyon to? Ipaliwawa.

⁴ Kasin kaukolan tayon katongtongen so sakey ya agi no iisipen tayon aliwa so desisyon to? Depende. Singa bilang, no say plano ton gawaen et kontra ed ibabaga na Biblia, tulongan mo pian nipetek so panagnonot to. Gawaen mo itan lapud panangarom ed sikato. (Pro. 27:​5, 6) Panon to balet no anggapo met so nakokontra ton ganggan na Dios, pero agkan talaga labat kompormi ed desisyon to? Say ebat et walad pinagkateman teksto tayo: ‘Agtayo uukomen so sakey ya too no midumaan iray opinyon to.’—Roma 14:1.

⁵ Pero ompan wala ray panaon ya talagan nanairapan tayon respetoen so desisyon na sakey ya agi. Pantongtongan tayo sirin ed sayan artikulo no akin ya kaukolan tayon respetoen so desisyon na arum tan no panon tayon nagawaan itan. Pero pantongtongan tayo nin unona iray nanduruman situasyon ya nayarin nahuhusgaan tayo la manaya iray agagi lapud saray desisyon da.

SARAY SITUASYON YA NAYARIN NAHUSGAAN TAYO LAY ARUM

6-7. Mangiter na situasyon ya nayarin nahusgaan tayo lay arum.

⁶ Singa abitla nen niman, nandurumay opinyon tayo ta nandurumay apalabas o eksperiensya tayod bilay. Pero no maminsan, nalilingwanan tayo itan tan ompan ipilit tayoy opinyon tayo ed arum. Isipen pa irayan situasyon. Situasyon 1: Aga binmaleg ed katuaan so sakey ya brother. Aliwliway impanugaw to ta buanges so tatay to. Aminsan, diad sakey ya gathering, anengneng ton oniinum na alak iray agagi. Agto itan agustoan kanian binagaan to ra ya aliway gagawaen da. Situasyon 2: Walay sakey ya sister ya inmabig ed graben sakit to. Nen nansakit so kaaro ton sister tan pareho ed samay sinakit to, labay ton tulongan ya onabig. Kanian pipiliten to may kaaro to ya gawaen to met iramay akatulong kuno ed inyabig to. Babagaan to no anto ray nepeg tan agto nepeg ya kanen tan no anto ran tambal o supplement so kaukolan ton tumaren. Situasyon 3: Walay brother ya datin membro na sakey ya relihyon. Nen nagmaliw ya Tasi, talagan nilingwanan to la so datin pananisia to. Nen naamtaan to ya linmoob ed simbaan so sakey ya agi ta inmatendi ed bansal na kanayon to, kukuestionen toy desisyon na samay agi.a

⁷ Nia ni arum ya situasyon. Situasyon 4: Aga apasal so sakey ya agi ya makanengneng na laki ya de-balbas tan bii ya aka-slacks diad saray pormal ya pantitipon. Anggano amta to met la imay pananguman ed organisasyon tayo nipaakar ed saya, ipipilit to ya aga dapat manpatubo na balbas iray brother tan nepeg ya akabestida o akapalda iray sister diad panagpulong tan diad saray pantitipon tayo. Situasyon 5: Naamtaan na sakey ya elder ya amay kabat ton brother et tinaynan toy katuaan nen nanaral ed unibersidad. Nen walay kakongregasyon ton kabataan ya plano toy mangala na atagey ya edukasyon, mapagpaga imay elder kanian kokombinsien to may kabataan tan saray atateng to ya umanen day desisyon da.

8. (a) Antoy sakey ya situasyon ya nayarin nahusgaan na sakey ya ateng so desisyon na arum ya ateng? (b) No husgaan tayo ray agagi ed desisyon da, antoy epekto to ’tan ed kongregasyon?

⁸ Niay sakey ya situasyon ya aarapen na saray atateng. Situasyon 6: Bilang ateng, seguradon pansasagpotan mon pabalegen iray ananak mo “diad disiplina tan panamilin nen Jehova.” (Efe. 6:4) Pero ompan wala ray kabat mon agagi ya singa puppulyanan da labat iray ananak da. Singa bilang, ayos labat ed sikara anggano galaw lan galaw na video games iray ananak da, cellphone la ran cellphone, tan lablabi la ra onsesempet. No nanengneng itan na anak mo, ompan ibaga tod sika ya istrikto kan maong tan mas maong ni iray atateng na kakaaro to. Siempre no ontay narengel mo, onsyodot ka tan balawen mo laingen so desisyon na arum ya atateng. On, no agtayo kompormi ed desisyon na arum, antokaman itan, ompan nahusgaan tayo la ra. Singa bilang, ompan kuestionen tayoy ipapasyar dad nanduruman lugar, panggagastos da, tan say libangan ya pipilien da. Pero agtayo komon pinunuyan so liknaan tayo. No husgaan tayo ray agagi ed saray desisyon da, naderal so pankakasakey na kongregasyon.

9. Antoy nepeg tayon tandaan? (Nengnengen met so litrato.)

⁹ No mandumaan so desisyon na duaran Kristiano, agtayon tampol iisipen ya amay sakey et duga tan amay sakey et aliwa. (Roma 14:5) Tua, no ganggan na Dios so pantongtongan, uunoren tayon amin iratan tan iilaloan nen Jehova ya “mankakasakey [tayo] ed kanonotan.” (2 Cor. 13:11) Pero no personal ya bilay tayo lay pantongtongan, tandaan tayo ya aliwan parepareho so panagnonot tan panagdesisyon tayo. Singa met itan pambiahe ed arum ya lugar. Pian makasabi kad destinasyon mo, maslak et nanduruman rota so sarag mon pampilian. Wala lad sika no iner so labay mon dalanan, depende ed situasyon mo. Ontan met ed personal ya bilay tayo ran Kristiano. Nandurumay desisyon tayo, pero saksakey so destinasyon o goal tayo—amay napaliket tayoy Aman Jehova. Kanian antokaman so desisyon na arum, agtayo ra huhusgaan.—Mat. 7:1; 1 Tes. 4:11.

AKIN ET NEPEG TAYON RESPETOEN SO DESISYON NA ARUM?

10. Base ed Santiago 4:​12, antoy agtayo nepeg ya gawaen, tan akin?

¹⁰ Nabasad Biblia iray rason no akin ya nepeg tayon respetoen so desisyon na arum. Pantongtongan tayoy pigara ed saratan. Anggapoy karapatan tayon husgaan so arum ed personal ya bilay da. (Basaen so Santiago 4:12.) Si Jehova labat so walaan na karapatan ya mangibaga no antoy nepeg tan agtayo nepeg ya gawaen ta sikato so Manangiter na Ganggan tan Ukom. Kanian antokaman so desisyon na saray agagi, eebatan da itan ed si Jehova, aliwan diad sikatayo. (Roma 14:10) Anggapoy karapatan tayon ukomen o balawen so arum lapu labat ta dumay desisyon da ed samay iisipen tayo ya dugan gawaen.b

11. Antoy makatulong pian mansiansiay pankakasakey ed kongregasyon anggano nanduruma tayo? (Nengnengen met so litrato.)

¹¹ Labay nen Jehova ya mankakasakey tayo, pero agto iilaloan ya parepareho tayo. Diad tua, labalabay to ya walay pandudumaan tayo. No onnengneng tayod kaliberliber, nanduruma tan aliwan apasakey so itsura na saray pinalsa to. Singa bilang, diad sakey ya kiew, anggapo tay duaran bulong ya eksakton mankapareho. Tan diad masulok ya waloran bilyon ya totoo ed interon mundo, anggapo tay duaran too ya eksakton pareho so itsura o ugali da. Talagan ontan so impandesinyo nen Jehova ed sikatayo. Pero anggano mandudumaan tayo, iilaloan nen Jehova ya mankakasakey tayo. Kanian no aliwan parepareho so opinyon tayo, gawaen tayoy anggaay nayarian tayo ya pansiansiaen so deen. Mas importante ed sikatayo so pankakasakey na kongregasyon nen say sarili tayon opinyon.—Roma 14:19.

PANON TAYON NIPANENGNENG YA RERESPETOEN TAYOY DESISYON NA ARUM?

12-13. No iisipen mo ya ‘aliwa lay aarapen’ na sakey ya agi, antoy nepeg mon gawaen? (Galacia 6:1; nengnengen met so kahon ya “No Agka Kompormi ed Desisyon na Arum.”)

¹² No agka kompormi ed desisyon na sakey ya agi. Tepetan moy sarilim: ‘Kasin ayan agi et aliwa lay aarapen to o duma labat so desisyon to ed samay iisipen ko ya dugan gawaen?’ No talagan aliwa lay aarapen to ta wala lay nakokontra ton ganggan na Biblia, tepetan moy sarilim: ‘Kasin kualipikado ak ya mangipetek ed sikato, o walay mas makanepegan ya mitongtong ed sikato?’ No kualipikado kan ontulong, pansagpotan mon ipetek iyan agi diad maulimek ya paraan. (Basaen so Galacia 6:1.) Panon to balet no anggapo met so nakokontra ton ganggan na Biblia, pero agkan talaga labat kompormi ed desisyon to? Lapud anggapoy nakokontra ton ganggan, agmo kukuestionen so desisyon to tan agmo la itotongtong ed arum. Karapatan toy mandesisyon parad sarili to. Respetom itan tan agmo huhusgaan.—Roma 14:​2-4.

¹³ Imanoen iyan ilustrasyon: Kaibam so kaarom ya linmad restawran. Nen panag-oorder la, kasin piliten mo ya no anto may inorder mo, sikato met lay orderen to? Siempre andi. Sikatoy manpili no antoy labay ton kanen. Tutal, sikato met so mangan. Tan seguradon agmo met labay ya piliten to ka ya pareho kayo lay orderen, lalo la no walay arum ya labay mon kanen. Ontan met diad personal ya bilay tayo. Nipanengneng tayon rerespetoen tayoy arum no paulyanan tayo ran mandesisyon parad sarili da tan agtayo ipipilit ed sikara so opinyon tayo.

14. No mandedesisyon ka, antoy nepeg mon seguroen pian mansiansiay pankakasakey ed kongregasyon? (1 Corinto 8:​12, 13)

¹⁴ No mandedesisyon ka. Pian mansiansiay pankakasakey ed kongregasyon, maabig no seguroen mo ya agnagapol so arum ed desisyon mo. (Basaen so 1 Corinto 8:​12, 13.) Ompan wala ray panaon ya isipen mon aliwa met ya makapuy so gawaen mon desisyon. Pero duga kasi ya ituloy mo itan no antam ya nagapol so agim?c (1 Cor. 10:​23, 24) Diad ontan iran situasyon, maabig no ikonsideram so nalikna na arum, anggano wala met so karapatan mo. (Roma 15:1) Pero ompan isipen mo, ‘Say amtak, respetoen tayoy desisyon na balang sakey?’ On, tua ’tan. Kaukolan ya respetoen na saray agagi so desisyon tayo, no panon ya rerespetoen tayo met so desisyon da. Pero tandaan tayo met imay bilin na Biblia ya walad Roma 12:18: “Diad anggaay nayarian yo, mikareenan kayod amin a totoo.” On, gawaen tayoy anggaay nayarian tayo ya pansiansiaen so deen tan seguroen tayo ya agpakagapolan na arum so desisyon tayo.

15. Antoy gawaen na saray elder pian mansiansiay pankakasakey ed kongregasyon? (1 Corinto 4:6)

¹⁵ Rerespetoen na saray elder so desisyon na saray agagi. No personal ya bilay so pantongtongan, agnepeg ya diktaan na saray elder iray agagi no antoy nepeg dan gawaen, tan ag-ira dapat “onlalampas ed saray bengatlan nisulat” ed Biblia. (Basaen so 1 Corinto 4:6.) Agmet ira sirin onlalampas ed no antoy akasulat ed saray publikasyon tayo ta akabase met iratan diad Biblia. No manpatulong ed saray elder so sakey ya agi, mannononot ni ran maong tan seseguroen da ya say simbawa ra et akabase ed Salita na Dios, aliwan diad sarili dan ideya. (Isa. 48:​17, 18) No gawaen irayan amin na saray elder, baleg so nitulong da pian mansiansiay pankakasakey ed kongregasyon.

16. Panon ya nipanengneng na sakey ya elder ya rerespetoen toy desisyon na ulop na mamatatken?

¹⁶ Nepeg met ya respetoen na kada elder so desisyon na ulop na mamatatken. Antis ya mandesisyon so ulop na mamatatken, manpipikasi ni rad si Jehova, kekerewen day masanton espiritu to, tan ikokonsidera da iray onaplikan prinsipyo ed Biblia. Kanian no akapandesisyon la so ulop na mamatatken, kaukolan ya suportaan na kada elder itan ya desisyon, anggano duma itan ed samay labay to komon ya nagawa. (Efe. 5:17) Maalwar met ya tutumboken na saray elder iray instruksion ya manlalapud organisasyon tayo, tan ag-ira manggagawa na sarili dan interpretasyon. Singa bilang, pian ompaway ya duga so opinyon na sakey ya elder, ompan walay ipaimano ton sentence ya inala tod sakey ya artikulo ed publikasyon tayo, pero agto balet inkonsidera so interon artikulo.

17. Antoy marakep ya resulta no respetoen tayoy desisyon na arum?

¹⁷ On, nandurumay apalabas tan ugali tayo. Atan so rason no akin ya aliwan pareparehoy opinyon tan panlabayan tayo. Pero lapud nanduruma tayo, mas maliket tan mabilabilay so kongregasyon! Agtayo sirin ompapayag ya atan laingen so panlapuan na problema. Protektaan tayoy deen na kongregasyon. Seguroen tayo ya saray desisyon tayo et agpakagapolan na arum. Respetoen tayoy desisyon na saray agagi. No pansagpotan tayon gawaen iratan ya amin, seguradon bendisyonan itayo nen Jehova, tan na-enjoy tayoy maliket ya ulopan tan pankakasakey ed kongregasyon tayo.—Sal. 133:1; Mat. 5:9.