Usar Mo ray Prinsipyo ed Biblia Pian Naipasal Moy Konsiensiam

1-2. (a) Anton regalo so inter nen Jehova ed si Adan tan Eva? (b) Anto komoy ginawa ra pian nipanengneng dan misatsalamat ira ed satan ya regalo?

WALAY espisyal ya regalo ya inter nen Jehova ed saray totoo, tan mabmabli itan ed sikatayo ran Kristiano. Atan ya regalo et say abilidad tayon mandesisyon parad sarili tayo. Aliwa tayon singa saray ayayep ya no anto labat so nisipor ya abilidad o instinct da, aman labat so gawaen da. Aliwa tayo met ya singa robot ya unor-unor labat ed no antoy aka-program ya gawaen to. Ibabaga na Biblia ya say inmunan too ya si Adan et ginawa unong ed indengan na Dios. (Gen. 1:​26, 27) On, matalino si Adan, ontan met ed asawa to ya si Eva, tan bulos iran mandesisyon parad sarili da.

² Ag-inikdan nen Jehova si Adan tan Eva na dakdakel ya ganggan. Basta say kuan tod sikara, asikasoen day dalin, panoen da itan na ananak da, tan respetoen day autoridad to. (Gen. 1:28; 2:​16, 17) Simpli labat iratan ya ganggan. No unoren iratan nen Adan tan Eva, napaliket day Jehova tan nipalikna rad sikato ya inar-aro da. Tsansa da met itan pian nipanengneng dan misatsalamat irad amin ya regalo tod sikara, kaiba lay abilidad dan mandesisyon.—Pro. 23:15.

3. Panoy impangusar nen Adan tan Eva ed abilidad dan mandesisyon?

³ Makapaermen balet ta ibabaga na Biblia ya aliway impangusar nen Adan tan Eva ed abilidad dan mandesisyon. Imbes ya ipanengneng day panangaro tan pisasalamat ed si Jehova, mas ninonot day sarili da, kanian nanrebelde ira ed sikato. (Gen. 3:​1-7) Lapud satan ya desisyon da, anggad natan et maniirap tayo ran ananak da.—Roma 5:12.

4. (a) Base ed Galacia 6:​5, antoy nepeg ya gawaen na kada sakey ed sikatayo? (b) Anto nin regalo so pantongtongan tayo ed sayan artikulo?

⁴ Komplikado so bilay natan. Kada agew, walan-wala ray kaukolan tayon desisyonan. Sakey itan ed saray responsabilidad ya agtayo nayarin ipagawa ed arum. (Basaen so Galacia 6:5.) Wala ray desisyon ya simpli labat, pero wala met iray komplikado. Panon tayon naseguro ya naliketan si Jehova ed saray desisyon tayo? Nepeg tayon bidbiren ya kaukolan tayoy tulong to. (Pro. 16:3; Jer. 10:23) Anggan si Jesus et kinerew toy tulong na Dios, anta perpekto. (Heb. 5:7) Di nagkalalo la sirin ya kaukolan tayoy tulong na Dios ta aliwa tayon perpekto. On, kakkaukolan tayoy panangigiya nen Jehova no mandedesisyon tayo. Pantongtongan tayo sirin so sakey nin regalo ya inter tod sikatayo ya ontulong pian makapandesisyon tayoy duga—say konsiensia.

ANTO TAY KONSIENSIA?

5. (a) Anto tay konsiensia? (b) Antoy nitulong na konsiensia ed sikatayo? (Roma 2:​14, 15)

⁵ Say konsiensia et say nisipor ya pakatebek ya inter nen Jehova ed sikatayo pian nibiig tayoy duga tan aliwa. Amin ya too et walaan na konsiensia, anggan saramay agda amta iray ganggan na Dios. (2 Cor. 4:2) Say konsiensia et singa judge ya walad loob tayo. Atan so manhusga ed sikatayo no aliway iisipen o gagawaen tayo. Tan atan met so mangibaga ya duga met labat may ginawa tayo. (Basaen so Roma 2:​14, 15.) No walay plaplanoen tayon gawaen pero amta tayon aliwa, warningan itayo na konsiensia tayo. (1 Sam. 26:​8-11) No amta tayo balet ya duga so gawaen tayo, dagdagen itayo na konsiensia tayo ya gawaen itan. Maong labat ta inikdan itayo nen Jehova na konsiensia! Ta anggano walay kalayaan tayon mandesisyon, agto labay ya ibaga ya automatic la ya duga iray desisyon tayo. Ontulong so konsiensia pian nalikas tayo no kasin duga o aliwa so gawaen tayon desisyon.

6. Antoy nayarin nagawa ed konsiensia tayo, tan akin et problema itan?

⁶ Say problema balet, lapud agtayo perpekto, agmet perpekto so konsiensia tayo. Nayarin naimpluensyaan itan na pamilyan binalegan tayo, kultura ed lugar tayo, tan saray mismon mauges ya pilalek tayo. Ibabaga na Biblia ya say konsiensia tayo et nayarin magmaliw ya “makapuy,” “marutak,” “agmakalikna,” o onsabi ni ingen ed punto ya magmaliw itan ya “mauges.” (1 Cor. 8:12; Tito 1:15; 1 Tim. 4:2; Heb. 10:22) No ontan so konsiensia tayo, ipahamak to tayo laingen, imbes ya tulongan to tayo—singa kiloan ya wala lay deral to tan kaukolan ya apigeren. Lanang tayo sirin ya seguroen ya limpio tan kondisyon so konsiensia tayo. (1 Ped. 3:16) Panon tayon gawaen itan?

PANON TAYON NAIPASAL SO KONSIENSIA TAYO?

7-8. (a) Antoy makatulong pian naipasal tayoy konsiensia tayo? (b) Panon itayon igiya na saray prinsipyo ed Biblia? Mangiter na ilustrasyon. (Nengnengen met so litrato.)

⁷ Panon tayon naipasal so konsiensia tayo pian nigiya to tayo ed dugan desisyon? Inagew-agew tayon basaen so Biblia pian naamtaan tayo no antoy duga tan aliwa ed pakanengneng nen Jehova. Singa inaral tayod imbeneg ya artikulo, makatulong no aralen tayo ray ganggan na Dios pian natalosan tayoy panagnonot to. Pero kaukolan tayo met ya aralen iray prinsipyo ya walad benegan na saratan ya ganggan. No diman tayo mas natatalosan iray prinsipyo ed Biblia, diman tayo met lalon natalosan so panagnonot nen Jehova.—Isa. 55:9.

⁸ Imanoen iyan ilustrasyon. Imadyin mo ya manaakar ka ed maaw-awang ya desierto ya anggapoy karsada tan anggapoy nanengneng ya karatula. Pian naamtaan mo no kasin duga so direksion ya lalaen mo, seguro onnengneng ka ed posisyon na agew o saray bitewen. Pero mas marakep no walay awit mon mapa ya wadtan iray nanduruman palatandaan diad dalan. No asabim so sakey ya palatandaan, seguradon manliket ka ta antam ya agka nababalang. Singa ontan so bilay tayo natan. Singa tayo manaakar ed kadesiertoan, tan say destinasyon o goal tayo et amay napaliket tayoy Jehova. Say Biblia so pinagka-mapa tayo ta ditan nabasa iray malinew ya instruksion no panon tayon makasabi ed destinasyon tayo. Saray prinsipyo ya wadtan et singa ra palatandaan diad dalan. No iyaplika tayo iratan ya prinsipyo, maliket tayo ta amta tayon duga so aarapen tayo, tan seguradon makasabi tayo ed destinasyon tayo.

9. Antoy sakey nin makatulong pian naipasal tayoy konsiensia tayo? (Roma 9:​1, 2)

⁹ Say sakey nin makatulong pian naipasal tayoy konsiensia tayo et say masanton espiritu na Dios. (Basaen so Roma 9:​1, 2.) Tulongan itayo na masanton espiritu pian natalosan tayoy panagnonot nen Jehova. Atan met so manpakiwas tan manpabiskeg ed sikatayo pian nagawaan tayoy panlabayan to. (Fil. 2:13) Anto balet so gawaen tayo pian ikdan to tayo nen Jehova na masanton espiritu to?

10. Antoy gawaen tayo pian ikdan to tayo nen Jehova na masanton espiritu to? (Lucas 11:​10, 13)

¹⁰ Ipikasim ed si Jehova ya ikdan to kay masanton espiritu to. (Basaen so Lucas 11:​10, 13.) Ag-isiblet nen Jehova so masanton espiritu to ed saramay onkekerew ed sikato. (Juan 3:34) No nanengneng to ya labalabay moy manpaigiya ed sikato, mabulbulos to ’tan ya iter ed sika. (Pro. 1:23; Sant. 1:5) Pero anto ni makatulong pian naipasal tayoy konsiensia tayo?

11. (a) Antoy sankaimportantian ed bilay tayo? (b) Akin et kaukolan tayon seguroen ya duga so inkipasal na konsiensia tayo?

¹¹ Paliket mon lanang si Jehova. (Pro. 8:​34, 35) Atan so sankaimportantian ed bilay tayo. No diad kada desisyon tayo et sankanonot tayoy panlabayan nen Jehova, naipasal tayoy konsiensia tayo. Nibagan duga so inkipasal na konsiensia tayo no parehoy panagnonot tayod si Jehova tan no lanang tayon ikokonsidera so liknaan to diad amin ya gagawaen tayo. Kakkaukolan tayo natan so ontan ya konsiensia ta kokkomplikado so bilay. Dakel so situasyon ya anggapoy espisipikon ibabaga na Biblia. Nayarin onlesa iratan ya situasyon no manpipili tayoy libangan, trabaho, edukasyon, o kaaro. Panon tayon naseguro ya napaliket tayoy Jehova diad ontan iran situasyon?—2 Cor. 1:12.

12. Antoy makatulong pian naseguro tayo ya igiya itayo na konsiensia tayo ed dugan dalan? (Efeso 5:10)

¹² Dalepdep mo ray nababasam ed Biblia. (Sal. 49:3) Kada no manbasa kay Biblia, isip mo no anto ran prinsipyo so naaralan mo. Ontulong itan pian natalosan moy panagnonot nen Jehova. (Basaen so Efeso 5:10.) No walay aarapen mon problema, i-research mo iray prinsipyo ya onaplikad situasyon mo. Ditan mo nanengneng no kasin say ibabaga na konsiensiam et pareho ed no antoy labay nen Jehova ya gawaen mo. (Pro. 2:​4-9, 11-13) No alikas mo ya aliwan pareho, usar mo ray prinsipyo ed Biblia pian nipetek moy konsiensiam tan napasal itan ya igiya to ka ed dugan dalan.—Heb. 5:14.

13. Antoy agtayo gagawaen? Mangiter na alimbawa.

¹³ Agmo gagawaen may akapandesisyon ka la insan mo ni labat amtaen no antoy nibaga nen Jehova. Ontan so ginawa na saramay Israelita ya atilak ed Juda nen aderal so Jerusalem nen 607 B.C.E. Oniay imbaga da ed si Jeremias: “Ibaga komon ed sikami nen Jehova a Dios mo so dalan a nepeg min panakaran tan no antoy nepeg min gawaen.” (Jer. 42:​3-6) Pero diad tua, antis to ’tan, wala lay alutoluto ed isip da ya plano dan gawaen. Nen agda agustoan imay instruksion nen Jehova, intuloy da may akauna lan plano da. Lapud satan, aliwa laingen so nansumpalan da. (Jer. 42:​19-22; 43:​1, 2, 4) Agtayo ra aaligen. Antis tayon mandesisyon, amtaen tayo la no antoy linawa nen Jehova. I-research tayo ni ray prinsipyod Biblia, tan iyaplika tayo iratan ya prinsipyo.

14. Akin et kaukolan tayon ibase ya lanang iray desisyon tayo ed saray prinsipyo ed Biblia?

¹⁴ Ibasem ya lanang iray desisyon mo ed saray prinsipyo ed Biblia. (Mat. 7:​24-29; Sant. 1:​23-25) No ibabase tayo ray desisyon tayo ed saray prinsipyo ed Biblia, ipapanengneng tayo ya labay tayoy manpaigiya ed masanton espiritu. No nanengneng nen Jehova ya uunoren tayoy panangigiya na espiritu to, lalo to tayon ikdan na masanton espiritu. (Gawa 5:32) Pero no ibaliwala o kontraen tayoy panangigiya na espiritu to, ‘napaermen’ tayoy masanton espiritu. (Efe. 4:30; Isa. 63:10; Gawa 7:51) Kanian ompan ekalen laingen nen Jehova so masanton espiritu to ed sikatayo. (Sal. 51:11; 1 Tes. 5:19) Delikado no ontan so nagawa ta kakkaukolan tayoy pakayari tan biskeg ya manlalapud masanton espiritu.—Efe. 3:16.

PANON MON NAROMOG IRAY PRINSIPYO YA ONAPLIKAD SITUASYON MO?

15-16. (a) Panon tayon naromog iray prinsipyo ya onaplikad situasyon tayo? (b) Anto ran prinsipyo so makatulong ed iyaaralan na Biblia pian nitunda toy panagsigarilyo to?

¹⁵ Man-research ka ed saray publikasyon tayo. Pian niyaplika na sakey ya too iray prinsipyo ed Biblia, kaukolan ton anapen iratan ed Kasulatan. Singa bilang, panon to no walay Bible study’m ya agmasyadon kombinsido ya mauges so pansigarilyo? Ompan say ibaga to: ‘Panon tayon amta ya aglabay na Dios so pansigarilyo anta anggapo met so nabasad Biblia ya ag-itan nayari?’ Pian naaralan na Bible study’m so mananap na saray prinsipyo tan natalosan to no akin ya mauges so mansigarilyo, ibangat mo no panon so man-research ed Watchtower ONLINE YA LIBRARYA. Ipanengneng mod sikato ya no i-search to ditan so salitan “sigarilyo” o “pansigarilyo,” ompaway iray artikulo ya pakabasaan na saray prinsipyo ed Biblia. Say sakey ya ompaway et amay artikulon “Antoy Panmoria na Dios ed Panagsigarilyo?” (Nengnengen so Hulyo 1, 2014 ya Say Panag-bantayan.) Anto ran teksto tan prinsipyo so nabasa to ditan?

¹⁶ Niay limaran prinsipyo ya abitla ed satan ya artikulo: (1) Agtayo manpapaaripen ed antokaman ya manresulta ed ipapatey. (Roma 6:16) (2) Agtayo mangiloloob ed laman tayo na antokaman ya marutak. (2 Cor. 7:1) (3) Labay nen Jehova ya interon kamarerwa so panlingkor tayod sikato. (Mat. 22:37) (4) No inaro tayoy kapara tayon too, agtayo ra labay ya napahamak lapud gagawaen tayo. (Mat. 22:39; 1 Cor. 10:24) (5) Ikdan itayo nen Jehova na biskeg pian nagawaan tayoy duga. (Fil. 4:13) Kanian anggano anggapoy espisipikon abitlad Biblia nipaakar ed panagsigarilyo, dakel ditan so prinsipyo ya makatulong ed Bible study’m pian naamtaan to no antoy nibaga nen Jehova ed satan.

17. No manplaplano lan mankasal so saninaro, panon dan naromog iray prinsipyo ya makatulong ed pandesisyon da?

¹⁷ No manplaplano lan mankasal so saninaro, panon dan naromog iray prinsipyo ya makatulong pian makapandesisyon iray duga? Baleg so nitulong na Giya ed Pan-research. Diad heading ya “Kasal tan Ponsia,” nanengneng iray artikulo ya pakabasaan na saray prinsipyo ya makatulong ed pamplano da. Singa bilang, niay anemiran prinsipyo: (1) Amin ya nagawad bansal et nepeg ya kirayewan nen Jehova. (1 Cor. 10:​31, 32) (2) Nepeg ya masimpit tan desente so panangawes tayo. (1 Tim. 2:9; 1 Ped. 3:​3, 4) (3) Agtayo aaligen iray totoo ed mundo ya labalabay day manlastog tan manpangta. (Juan 17:14; Sant. 1:27; 1 Juan 2:15, 16) (4) Nepeg ya organisado tan mauksoy so okasyon. (1 Cor. 14:40) (5) Seguroen ya ag-alablabas so panliliket ed reception tan kontrolado so pangiserbi na alak. (Gal. 5:21) (6) Mangiyasain na brother ya mangiyulo ed saray uksoyan.—Juan 2:​8, 9.

18-19. (a) Anto nin publikasyon so makatulong ed pan-research tayo? (b) No iyatendi ed saray okasyon so pantongtongan, panon mon nausar iyan publikasyon ed pandesisyon mo? (Nengnengen so kahon ya “Talosan Mo Iray Prinsipyo.”)

¹⁸ Say sakey nin makatulong ed pan-research tayo et say publikasyon ya Manpaigiya ed Saray Prinsipyo na Biblia. Akalista ditan iray teksto ya niyaplika tayo ed nanduruman situasyon. Diad kada topic, wala ray tepet tan teksto ya makatulong pian mas natalosan mo iray prinsipyo ed Biblia. Singa bilang, ompan iisipen mo no kasin atendian mo so sakey ya okasyon o selebrasyon. Diad heading ya “Okasyon; Selebrasyon,” nanengneng mo so subheading ya “Saray agseselebraan na saray Kristiano.”

¹⁹ Oniay walad leksab na satan ya subheading: “Akin et aliwan duga so onlad saray okasyon ya walay koneksion tod palson relihyon? (1Co 10:21; 2Co 6:​14-18; Efe 5:​10, 11).” Insan kayari to ’tan, wala ray abitlan alimbawa na ontan iran okasyon. Diad subheading balet ya “Selebrasyon na bansa,” wala ray akalista ya prinsipyo ya makatulong pian makapandesisyon na duga so sakey ya Kristiano no wala ray selebrasyon na gobierno, anibersaryo na saray guerra na bansa, o seremonya ya mamapagalang ed saray bayani. Misatsalamat tayo ta angitarya so organisasyon nen Jehova na onia ran nausar tayo ed pan-research pian naipasal tayoy konsiensia tayo.

SEGUROM YA DUGA SO INKIPASAL NA KONSIENSIAM

20. Antoy pakanengnengan ya duga so inkipasal na konsiensia tayo?

²⁰ Misatsalamat tayo ta inikdan itayo nen Jehova na abilidad ya mandesisyon parad sarili tayo. Pero singa inaral tayo, pian duga so pangusar tayo ed satan ya abilidad, kaukolan tayon ipasal so konsiensia tayo. Nibagan duga so inkipasal na konsiensia tayo no saray desisyon tayo et makapaliket tan mamagalang ed si Jehova. Pian nagawaan tayo itan, kaukolan tayoy tulong na masanton espiritu. Itultuloy tayo sirin ya kerewen itan ed si Jehova tan manpaigiya tayod satan. Iyaplika tayo ray prinsipyo ed Biblia pian napasal so konsiensia tayo ya ituro toy dugan dalan. On, usaren tayo irayan regalo nen Jehova diad dugan paraan pian nanengneng tayoy pakayari na Salitay Dios ed bilay tayo.—2 Tim. 3:​16, 17; Heb. 4:12.