Akin et Importante ya Natatalosan Tayo ray Prinsipyo ed Biblia?

1-2. (a) Akin et nibagan datdaan lan libro so Biblia? (b) Akin et mausa-usar nin siansia so Biblia anggad natan?

DATDAAN lan libro so Biblia. Inggapo itan ya insulat manga 3,500 taon lay apalabas, tan akompleto itan manga 2,000 taon lay apalabas. Pero anggano datdaan la, “say salita na Dios” ya nabasa ditan et mabilay tan mausa-usar nin siansia anggad natan. (Heb. 4:12; 2 Tim. 3:​16, 17) Anggano manbibilay tayo lad modernon panaon, minilyon ya totoo so mangibabagan balbaleg so nitutulong na Biblia ed sikara.

² Akin kasi et mausa-usar ni so Biblia anta datdaan la? Walay duaran rason. Unona, say mensahe ya karga na Biblia et nanlapud “mabilay a Dios,” say Amalsa ya sankarunongan ed amin. (1 Tim. 4:10; Roma 16:​26, 27) Komadua, nabasad Biblia iray prinsipyo ya agan balot ondaan. Kanian manlapu la nensaman ya anggad natan, walan-walay nitulong na Biblia ed saray totoo anggano manguuman so panaon tan anggan saray situasyon ya dadalanen da.

3. Anto ran tepet so pantongtongan tayo ed sayan artikulo?

³ No imbagan prinsipyo ed Biblia, antoy tutukoyen to ’tan? Akin et importante iratan? Panon tayon nanengneng iray prinsipyo no manbabasa tayoy Biblia? Ebatan tayo iratan ya tepet diad sayan artikulo. Pantongtongan tayo met no panon ya indanet nen Jesus so kaimportantian na saray prinsipyo.

ANTO IRATAY PRINSIPYO ED BIBLIA?

4. No imbagan prinsipyo ed Biblia, antoy tutukoyen to ’tan?

⁴ Saray prinsipyo ed Biblia et ontutukoy ed saray manunan katuaan ya akabasian na saray ganggan na Dios. No maminsan, diad sakey ya ganggan, nabitla met la no anton prinsipyo so akabasian to. (Mat. 22:37) Pero mas malaknab so prinsipyo nen say ganggan. Wala ray ganggan ya onaplika labat ed sakey ya panaon o situasyon. Pero amay prinsipyo ya akabasian to et onaplika ed anggan anton panaon o situasyon. (Sal. 119:111) Makatulong iray prinsipyo pian nanengneng tayo no antoy iisipen o nalilikna nen Jehova ed sakey ya bengatla. Diad arum ya salita, saray prinsipyo et ontutukoy ed samay rason no akin ya inter nen Jehova so sakey ya ganggan. Aga mangiter si Jehova na ganggan ya anggapoy rason. Kanian kada ganggan ya iter to, walan-walay prinsipyo ya walad benegan to ’tan. Amay ganggan, nayarin manguman o nasalatan. Amay prinsipyo balet ya akabasian to et permanente—ag-itan nauman odino ondaan.—Isa. 40:8.

5. Mangiter na ilustrasyon pian mas natalosan tayoy pandumaan na ganggan tan prinsipyo. (Nengnengen met so litrato.)

⁵ Pian mas natalosan tayoy pandumaan na ganggan tan prinsipyo, imanoen iyan ilustrasyon: No manluluto so sakey ya nanay, ompan bagaan toy melag nin anak to ya, ‘Ni, agmo didiwiten tay kaserola.’ Atan ya imbaga to et ganggan. Pero, akin et imbaga to ’tan? Niay prinsipyo ya walad benegan to ’tan: Antokaman ya ampetang, agmo bebembenan, ta no bembenan mo, napuldakan ka. Atan ya prinsipyo et aglabat onaplika ed ampetang ya kaserola. Onaplika met itan ed plantsa, dalikan, tan ed arum nin makasinit ya gamit. Tan aglabat itan onaplika diad abung, noagta anggan iner. No baleg la may anak, naaralan to met so manluto. Pero siempre, agla bagaan nen nanay to. Amta to la ya kaukolan toy manalwar pian aga napuldakan. On, anggapo la may ganggan, pero amay prinsipyo, wadman ni.

AKIN ET IMPORTANTE IRAY PRINSIPYO ED BIBLIA?

6. (a) Antoy inter nen Jehova lapud panangaro tod sikatayo? (b) Akin et nibaga tayon walay tiwala nen Jehova ed sikatayo?

⁶ Inar-aro itayo nen Jehova tan agto labay ya napahamak tayo, kanian inikdan to tayo na saray ganggan. (Sant. 2:11) Tutulongan to tayo met pian natalosan tayo ray prinsipyo ya walad benegan na saratan ya ganggan. Dakel so inter ton prinsipyo ya makatulong pian makapandesisyon tayoy duga tan nagawaan tayoy panlabayan to anggano anggapoy espisipikon ganggan ya nabasad Biblia. On, imbes ya mangiter si Jehova na ganggan parad amin ya situasyon, say inter to et prinsipyo. Akin ey? On ta walay tiwala nen Jehova ed sikatayo tan labay to ya usaren tayoy abilidad tayon mandesisyon pian nipanengneng tayoy panangaro tayod sikato.—Gal. 5:13.

7. Akin et importante ya natatalosan tayo ray prinsipyo ed Biblia? Mangiter na ilustrasyon. (Nengnengen met so litrato.)

⁷ Akin et importante ya natatalosan tayo ray prinsipyo ed Biblia? Niay sakey ya ilustrasyon. Isipen pa iray karatula diad highway. Wala ray karatula ya no nanengneng na driver, amta to lan tampol no antoy nepeg tan agto nepeg ya gawaen—singa bilang no kasin kaukolan toy ontunda o no panon kapeles so nepeg ya pampabatik to. No agto iratan unoren, manmulta. Pero wala met iray karatula ya pasakbayan to ray driver ed saray posiblin peligro diad dalan—singa bilang no say karsada et pa-zigzag o wala ray napepelag ya bato. No nanengneng itan na marunong ya driver, amta to ya kaukolan toy manalwar anggano anggapoy espisipikon batas o ganggan. Tan no mauran o makelpa, ompan tantanan toy panmaneho to pian aga narisgo. Mipadpara, papaliisan tayo ray kagagawa ya direktan isesebel nen Jehova. Pero no natatalosan tayo ray prinsipyo ya walad benegan na saratan ya ganggan, mas napakiwas tayon manalwar tan paliisan tayo met la so antokaman ya mangipeligro ed espiritualidad tayo.

8. No manbabasa tayoy Biblia, antoy ipasal tayon gawaen? (Roma 12:​1, 2)

⁸ Anto ni rason akin et agto tayo inikdan nen Jehova na ganggan parad amin ya situasyon? Labay nen Jehova ya ipasal tayoy sarili tayo ya talosan so panagnonot to. Kanian no babasaen tayoy sakey ya salaysay ed Biblia, isipen tayo no anton prinsipyo o leksion so naaralan tayod satan, no akin ya impila itan nen Jehova diad Biblia, tan no panon tayo itan ya niyaplika ed bilay tayo. No ontan so gawaen tayo, napasalan tayon usaren so ‘pakayari tayon mankatunongan.’ Kanian napaneknekan tayon mismo ed sarili tayo no antoy “maong tan makapaliket tan ayadyarin linawa na Dios.”—Basaen so Roma 12:​1, 2.a

9. Antoy maabig ya resulta no manbibilay tayo base ed saray prinsipyod Biblia? (Hebreo 5:​13, 14)

⁹ No manbibilay tayo base ed saray prinsipyo ed Biblia, ontatken tayo ed espiritual. No iyaaplika tayo ray prinsipyo, aaligen tayoy panagnonot nen Jehova, kanian lalo tayon onapit ed sikato. (Basaen so Hebreo 5:​13, 14.) Say melag ya ugaw, kaukolan mon bagaan no antoy nepeg tan agto nepeg ya gawaen. Tan ompan unoren to iratan ta agto labay so napampasnokan o nalewet. Pero si Aman Jehova, aliwan melag ya ugaw so trato tod sikatayo. Baleg so tiwala to ya gawaen tayoy panlabayan to anggano anggapoy espisipikon ganggan. No manbibilay tayo base ed saray prinsipyod Biblia, napapaliket tayoy puso to.—Sal. 147:11; Pro. 23:​15, 26; 27:11.

PANON TAYON NANENGNENG IRAY PRINSIPYO NO MANBABASA TAYOY BIBLIA?

10. Panon tayon nanengneng iray prinsipyo ed Biblia?

¹⁰ No walay nabasa tayon ganggan ed Biblia, marakep no isipen tayo ray prinsipyo o rason ya walad benegan na satan ya ganggan. No natatalosan tayo no akin ya ingganggan itan nen Jehova, diman tayo met mas natalosan si Jehova. Wala met iray naaralan tayon prinsipyo diad saray salaysay ed Biblia. Kanian legan tayon babasaen so sakey ya salaysay, isipen tayo no antoy naaralan tayo ed satan nipaakar ed si Jehova, tan no antoy nalilikna to ed sakey ya bengatla. Importante sirin ya no man-personal study tayo, paganaen tayoy isip tayo tan ipikasi tayod si Jehova ya tulongan to tayon natalosan so panagnonot to. (Pro. 2:​10-12) Tepetan moy sarilim: ‘Akin kasi et inter nen Jehova iyan ganggan? No kabusol nen Jehova iyan kagagawa, anto met kasi pakanengneng to ed arum nin kagagawa ya mipara ed saya? Anton leksion so naaralan ko ed sayan salaysay, tan panon ko yan niyaplika ed bilay ko?’ No natatalosan mo iray rason ya walad benegan na saray ganggan tan natatalosan mo met iray leksion ed saray salaysay ed Biblia, makatulong itan pian makapandesisyon kay duga—amay desisyon ya makapaliket ed si Jehova.

11. Diad samay Sermon ed Palandey, panon itayon imbangat nen Jesus pian nanengneng tayo ray prinsipyo ed Biblia? (Nengnengen met so litrato.)

¹¹ Diad samay Sermon ed Palandey, imbangat itayo nen Jesus no panon tayon nanengneng iray prinsipyo ed Biblia. Pantongtongan tayoy taloran alimbawa ya binitla to. Diad kada sakey ed saratan, say unonan binitla to et say ganggan. Pero binitla to met so prinsipyo ya walad benegan na satan ya ganggan pian mas natalosan tayoy panagnonot nen Jehova. No dalepdepen tayo irayan prinsipyo, dakel so naaralan tayo ya niyaplika tayod bilay tayo natan.

12. Anton prinsipyo so walad benegan na samay ganggan ya nabasad Mateo 5:​21, 22? (Nengnengen met so litrato.)

¹² Basaen so Mateo 5:​21, 22. “Agka mamapatey.” Anton prinsipyo so walad benegan na sayan ganggan? Aglabay nen Jehova ya busolen tayoy arum—diad kakikiwas, panagsalita, o anggan diad isip labat. Singa ibabaga nen Jesus ya anggano agka akapatey, pero kabusol moy sakey ya too, nakokontram lanlamang so prinsipyo ya walad benegan na samay ganggan. Kanian no say sakey et “maneem-em na sanok ed agi to” o bagaan toy ansasakit iran salita, wala lay “eebatan” to ed si Jehova. Akin ey? On ta saratan lanlamang ya liknaan tan kagagawa so managdag ed sakey ya too ya pateyen so kapara ton too.—1 Juan 3:15.

13. Panon tayon niyaplika imay prinsipyo ed Mateo 5:​21, 22? (Nengnengen met so litrato.)

¹³ Panon tayon niyaplika natan imay prinsipyo ed Mateo 5:​21, 22? Agtayo maneem-em na sakit na linawa. (Lev. 19:18; Job 36:13) Akin ey? On ta nayarin ompelag itan ed pambusol, ya anggad makapansalita o makapanggawa tayo lay aliwa. (Pro. 10:12) Singa bilang, ompan i-tsismis tayoy arum tan agtayo nalilikas ya dederalen tayo la manayay reputasyon da. (Pro. 20:19; 25:23) Kanian anggano anggapo ni Internet, social media, o messaging app nen panaon nen Jesus, amay prinsipyon imbaga to et onaplika ni anggad natan. No dalepdepen tayo itan ya prinsipyo, napakiwas tayon manalwar ed saray posiblin peligro ed pangusar na modernon teknolohiya. Agtayo manko-comment o manpo-post na ansasakit ya salita, tan agtayo manggagaway antokaman ya pakaderalan na sakey ya too.

14. Anton prinsipyo so walad benegan na samay ganggan ya nabasad Mateo 5:​27, 28? (Nengnengen met so litrato.)

¹⁴ Basaen so Mateo 5:​27, 28. “Agka mikakalugoran.” Anton prinsipyo so walad benegan na sayan ganggan? Aliwan say panggaway imoral labat so kabusol nen Jehova, kabusol to met so pannonot na imoral. Impaliwawa nen Jesus ya no say sakey ya laki ya wala lay asawa to et onlinggis ed arum ya bii tan pampilpilalekan to, mankakasalanan la. Kanian no walay onsebang ed nonot tayo ya imoral, gawaen tayoy anggaay nayarian tayo ya ekalen itan ya tampol. (Mat. 5:​29, 30) Ayan prinsipyo et onaplika met ed saray Kristiano ya anggapo ni asawa ra.

15. Panon tayon niyaplika imay prinsipyo ed Mateo 5:​27, 28? (Nengnengen met so litrato.)

¹⁵ Panon tayon niyaplika natan imay prinsipyo ed Mateo 5:​27, 28? Labanan tayo ray imoral ya pilalek tan agtayo itan susungloran. (2 Sam. 11:​2-4; Job 31:​1-3) Iwasan tayoy amin ya klase na pornograpiya. Agtayo irarason ya onnenengneng tayo met labat tan agtayo manggagaway imoral. Agtayo met ibabaraan ya aliwan masyadon bastos so nenengnengen tayo no ikomparad pornograpiya ya labalabay na totoo ed mundo. Diad panaon nen Jesus, anggapo ni ray gadyet, pelikula, o litrato. Pero no talosan tayon maong imay prinsipyo ya imbaga to, amta tayo la no antoy nalilikna nen Jehova ed saray imoral ya litrato tan video ya ompapaway natan. No say pannonot labat na imoral et kabusol la nen Jehova, di kabusol to met sirin so pangi-send na saray imoral ya text, litrato, tan video, tan say pibiang ed imoral iran kagagawa diad Internet. No say sakey et wala lay asawa to pero gagawaen to iraya, lolokoen to lay asawa to. Kanian no wala lay asawam, tandaan mo may prinsipyo ya imbaga nen Jesus pian talagan makapanmatoor ka ed si asawam. (Mal. 2:15) Tan balanglan wala lay asawa tayo o anggapo, makatulong iyan prinsipyo pian mas desidido tayon paliisan so antokaman ya kagagawa ya ompelag ed seksual ya imoralidad.—Pro. 5:​3-14.

16. Anton prinsipyo so walad benegan na samay ganggan ya nabasad Mateo 5:​43, 44? (Nengnengen met so litrato.)

¹⁶ Basaen so Mateo 5:​43, 44. “Arom so kaparam a too.” Anton prinsipyo so walad benegan na sayan ganggan? Labay nen Jehova ya aroen tayo so amin ya totoo. Diad panaon nen Jesus, say atalosan na saray Judio et kapara da labat ya Judio so aroen da, tan ayos labat no busolen da iray aliwan Judio. Pero amta nen Jesus ya aliwan ontan so labay ya ibaga na satan ya ganggan. Amta to ya labay nen Ama to ya aroen tayoy amin ya klase na totoo, antokaman so lahi o kultura da.—Mat. 5:​45-48.

17. Panon tayon niyaplika imay prinsipyo ed Mateo 5:​43, 44? (Nengnengen met so litrato.)

¹⁷ Panon tayon niyaplika natan imay prinsipyo ed Mateo 5:​43, 44? Lapud inaro tayoy kapara tayon too, agtayo mibabali ed saray guerra tan panlalaban ed mundo. (Isa. 2:4; Miq. 4:3) Maomaong so panagtrato tayod amin, anggan saramay dumay lahi o relihyon da. (Gawa 10:​34, 35) No asakitan tayo o saray inad-aro tayod bilay lapud imbaga o ginawa na arum, mabulos tayon mameperdona.—Mat. 18:​21, 22; Mar. 11:25; Luc. 17:​3, 4.

ITULTULOY MOY MANBILAY BASE ED SARAY PRINSIPYO ED BIBLIA

18. (a) Antoy lanang tayon gawaen? (b) Antoy pantongtongan tayo diad ontumbok ya artikulo?

¹⁸ Misatsalamat tayo ta aliwan melag ya ugaw so trato nen Aman Jehova ed sikatayo. Labay to ya iyaplika tayo ray prinsipyo ed Biblia pian makapandesisyon tayoy duga. (1 Cor. 14:20) Kanian no mandedesisyon tayo, komon ta lanang tayon “tebeken no antoy linawa nen Jehova,” tan seguroen tayo ya naliketan ed desisyon tayo. (Efe. 5:17) Gawaen tayo itan aliwan lapud natatakot tayon nadusa, noagta lapud inar-aro tayoy Jehova. Pero wala ni sakey ya inter nen Jehova ya makatulong pian makapandesisyon tayoy duga—say konsiensia. Atan so pantongtongan tayo diad ontumbok ya artikulo.