Pansiansiam ya Malet so Pankakaaro Yo nen Asawam

1. Akin et nibagan regalo nen Jehova iray maong ya kakaaro?

SARAY maong ya kaaro et regalo nen Jehova. (Sant. 1:17) Inar-aro day Dios, tan inar-aro da tayo. Maliket ira no maliket tayo, ligliwaen da tayo no maermen tayo, tan bilinen da tayo no aliwa lay aarapen tayo. Wadtan iran lanang parad sikatayo, kanian nailaloan tayo ra. Say ontan iran kakaaro et talagan ‘makapaliket ed puso’!—Pro. 27:9.

2. Akin et importantin paeleten na sanasawa so pankakaaro da? (Mateo 19:6)

² No wala lay asawam, siopay nepeg mon ituring ya sankaapitan ya kaarom? Siempre si asawam! No paeleten na sanasawa so pankakaaro da, na-enjoy da so sankaapitan ya ulopan ya nayarin niwala ed duaran too. (Basaen so Mateo 19:6.) Diad kabaliktaran balet, no napaulyanan day pankakaaro da, aliwan maliket so ulopan da. Ompan nadismaya tan nasyodotan ni ra ingen ed sakey tan sakey. Pantongtongan tayo sirin ed sayan artikulo no panon ya napaelet na sanasawa so pankakaaro da. Pero pantongtongan tayo nin unona no antoy nepeg ya gawaen na saray single ya agagi pian napilipili da so magmaliw ya best friend da legay bilay.

PANON KAN MAKAPAMPILI NA MAGMALIW YA BEST FRIEND MO LEGAY BILAY?

3-4. Antoy makatulong ed sakey ya Kristiano pian makalmoy maong ya asawa? (Proverbio 18:22)

³ No walay importante ya desisyonan tayo, iisipen tayo nin maong no anto ray maabig tan makapuy ya epekto to ’tan. Wala ray desisyon ya apektoen toy interon bilay tayo, kanian kaukolan tayon pannonotan ya maong.

⁴ No mangasawa o miasawa ka la, sakey itan ed sankaimportantian ya desisyon ya gawaen mod bilay mo. Akin ey? On ta amay napilim ya kapareha et sikato la so magmaliw ya best friend mo legay bilay. Si Aman Jehova so nanlapuan na uksoyan na panangasawa, kanian sikato so sankaabigan ya nakerewan moy simbawa no mamipili ka lay kapareha. Labay to ya makalmo kay maong ya asawa, tan amta to no antoy sankaabigan parad sika. (Basaen so Proverbio 18:22; Isa. 48:​17, 18) Impaisulat tod Salita to iray prinsipyo ya makatulong pian makaromog kay kapareha ya kapakpaknam.

5. Akin et importante ya bautismadon lingkor nen Jehova so pilien mon magmaliw ya kapareha?

⁵ Nen nampabautismo ka, nagmaliw kan kaaro nen Jehova. (Sal. 25:14) Kanian no bilang ta planom lay mangasawa o miasawa, nepeg ya say pilien mo et amay kaaro met nen Jehova. (1 Cor. 7:39) No bautismadon lingkor nen Jehova so pilien mon magmaliw ya kapareha, ipapanengneng mo ya rerespetoen moy estandarte tod panangasawa, tan naliknam ya amay apilim ya asawa et talagan nanlapud si Jehova. (Pro. 19:14) Malinlinew so bilin nen Jehova ya ‘agtayo mikakasakey ed saray agmananisia.’ (2 Cor. 6:14) No agmo unoren so bilin to, sika lanlamang so naproblema. Kanian anggano nanairapan kan makaromog diad loob na organisasyon, agka miiinaroan ed too ya agto inaroy Jehova, tan agmo irarason ya napan-Tasim lanlamang.

6-7. No wala lay inarom, anto ray kaukolan mon itepet ed sarilim?

⁶ Siempre, agto labay ya ibagan basta bautismado et magmaliw lan maong ya asawa. Kanian no wala lay inarom, maabig no kabaten mo nin maong. Tepetan moy sarilim: ‘Panoy panagtrato tod pamilya to? Kasin maasikaso tan marespeto? Siopa ray kakaaro to ey? No dumay opinyon to ed opinyon na arum, kasin aga patalo tan ipilit toy labay to, o amta toy ondengel tan manpalugar no anggapo met so nakokontran prinsipyo ed Biblia? Kasin kuarta so manunad bilay to?’

⁷ Nia ni ray itepet mod sarilim: ‘Kasin ayan agi ya kakabaten ko et talagan inar-aro toy Aman Jehova? Kasin pansasagpotan ton isulong so “balon personalidad?” Kasin natulongan to ak pian mas napalaknab ko ni so panaglingkor kod si Jehova? Kasin pareho so goal mid espiritual? Kasin nanenengneng ko la ya talagan san-best friend so turing mid sakey tan sakey no sanasawa kami la?’ (Col. 3:​9, 10) No sakey kan sister, tepetan moy sarilim: ‘Kasin ayan brother et aliwa labat ya maong ya kaaro noagta magmaliw met ya maong ya ulo na pamilya?’ (1 Cor. 11:3) No sakey kan brother, tepetan moy sarilim: ‘Kasin mapasakop iyan sister tan respetoen to ak bilang ulo to anggano wala ray kakapuyan ko?’ Siempre kaukolay panaon pian naebatan iratan ya tepet. Kanian legan ya saninaro ki ni, obserbaan tan kabaten yo lan maong so sakey tan sakey.

8-9. Antoy makatulong ed saray saninaro pian makapandesisyon iray duga? (Nengnengen met so litrato.)

⁸ Mas makapandesisyon kay duga no amtaen mo so tuan inkatoo na samay inarom. Tepetan moy arum no antoy nibaga rad sikato pian naamtaan moy ugali tan reputasyon to. Singa bilang, kasin kabkabat ya maomaong, makatalos, tan mapaabeba? Makaaral kad ginawa nen Sister Sarah ya tagad French Guiana. Oniay kunoy ginawa to antis iran nankasal nen asawa to ya si Daniel: “Nantepet-tepet ak ed arum no antoy nibaga rad si Daniel. Tinepetan ko may payunir ya brother ya kaiba ton manaayam ed saksakey ya abung. Tinepetan ko met so sakey ya elder ed kongregasyon to, saray kakaaro mi, tan saray kakongregasyon ton sister.” Anto ni sarag mon gawaen? Tepetan mo may inarom no kasin walay agawad bilay to nensaman o walay nagagawad bilay to natan ya kaukolan mon naamtaan, ta nayarin makaapekto itan ed relasyon yo no bilang ta sanasawa ki la.

⁹ Panon to no walay panduaruwam ed samay inarom tan wala ray negatibon ugali to ya naimano na saray maespiritual ya kakaarom? Agmo iratan ibabaliwala. Ikonsideram iratan ed pandesisyon mo no kasin kaukolan yo nin ituloy so pankakabatan yo o andi la.a Natan, pantongtongan tayo la no panon ya napaelet na saray sanasawa so pankakaaro da.

IKDAN MOY PANAON TAN ATENSION SO BEST FRIEND MO

10. Akin et maabig no say sanasawa et walay panaon dad sakey tan sakey?

¹⁰ Lalon onelet so pankakaaro na sanasawa no mangigana iray panaon parad sakey tan sakey anggano bip-busy ira. Pankanawnawa da itan pian napanistoryaan day agawad sanagew, nibaga rad sakey tan sakey no antoy iisipen tan nalilikna ra, nipalikna ray panangaro, tan makapanrelaks iran dua.

11. Antoy nayarin manderal ed pankakaaro na sanasawa?

¹¹ No malet ya sankaaro so turing na sanasawa ed sakey tan sakey, labalabay da ya saniba ira tan no nayari et ag-ira manaknitan. Siempre, ompan wala ray panaon ya ag-ira makapaniban magano. Pero no mabayag ya ag-ira saniba, delikado! Singa bilang, wala ray asawan laki o asawan bii ya nan-abroad kanian akaarawi rad pamilya da. Tua ompan baleg so nanaalmo da, pero lapud abayag ya agda kaibay asawa ra, aderal la laingen so relasyon da.

12-13. (a) Antoy ginawa na arum ya sanasawa pian seguradon walay panaon da ed sakey tan sakey? (Nengnengen met so litrato.) (b) Panon kaimportante so relasyon mod si asawam? (Nengnengen so kahon ya “Komapiga Dapat si Asawam ed Bilay Mo?”)

¹² Imanoen no antoy gagawaen na arum ya sanasawa pian seguradon lanang ya walay panaon da parad sakey tan sakey. Oniay imbaga nen Leah ya tagad Guam: “No walay gawaen mi nen asawak, anggad nayari et saniba kami. No walay mangitagar o mangimbitad sikami, mataltalag tay natilak so sakey.” Onia met so imbaga nen Roxanne ya tagad United States: “Diad karakel na kimey mi, no agmi iyeskedyul so panaon ya parad sikami labat ya dua, anggapoy nagawa. Importantid sikami ya walay oras mid sakey tan sakey, kanian talagan iplaplano mi.” (Ikompara so Amos 3:3.) Onia met so imbaga nen Damien ya tagad France: “Anggano mandumaay hilig mi nen asawak, inaral min labayen so hilig na kada sakey.” (Mat. 7:12) Tan onia met so imbaga nen Katie ya tagad United States: “No saniba kami nen asawak, wala ray panaon ya agkami ni man-cellphone pian aga naapag so atension mi.”

¹³ Importante ya saniba yo met ya gawaen so espiritual ya rotina yo. Oniay imbaga nen Myriam ya tagad France: “Kabangon mi kabuasan, manbasa kami Biblia nen asawak, insan mi pantongtongan no antoy alabayan mi tan no panon mi itan ya niyaplika ed bilay mi. Espisyal ed siak iman.” Onia ni inyarum to: “Labalabay ko met no saniba kamin manpikasi, ta legan kon narerengel so pikakasi nen asawak, sankaliknak ya inar-aro toy Aman Jehova.” Tan onia met so imbaga nen Katie ya abitla nen niman: “Say paborito min gawaen nen asawak et amay manulop kamid ministeryo. Amay narengel mon manpulong so asawam tan nanengneng moy kabiskeg na pananisia to, siempre lalon naar-arom. Kanian no manulop kamid ministeryo, onaapit so liknaan mi tan makakaaral kami ed sakey tan sakey.”—Pro. 27:17.

MANTULONGAN KAYO NO WALAY PROBLEMA

14-15. No walay onlesan problema, akin et nepeg ya gawaen na sanasawa so anggaay nayarian da ya protektaan so relasyon da? Mangiter na ilustrasyon.

¹⁴ Anggapo tay perpekton sanasawa, kanian amin ya sanasawa et walan-walay arapen dan problema. Ibabaga ingen na Biblia ya saray sanasawa et “nawalaay irap ed laman.” (1 Cor. 7:28) No imbagan “irap ed laman,” ontutukoy itan ed saray subok tan problema ya kaslakan ya dadalanen na saray sanasawa. No walay onlesan problema, kaukolan ya mantulongan so sanasawa pian naayos da itan tan gawaen day anggaay nayarian da pian naprotektaan day relasyon da. Akin ey?

¹⁵ Isipen pa iyan ilustrasyon. No walay balibalin bilding o mabmablin kagawaan ya aderal, anto kasi gawaen to may akanggawa? Kasin paulyanan to la? Andi! Seguradon apigeren to. Anggano gastosan toy baleg tan mangalay panaon so pangapiger, ayos labat ed sikato. Akin ey? On ta importantin maong ed sikato itan ya bilding o kagawaan. Ontan met ed relasyon na sanasawa. Importantin maong itan. Singa abitla nen niman, walan-walay onlesan problema ed relasyon na sanasawa, anggano inar-aro day sakey tan sakey. Pero tandaan, anggano diad pakanengneng yo et singa aderal la so ulopan yon sanasawa, sarag yon apigeren itan. Tua, kaukolan so sagpot, tan ompan ag-itan bastabasta naayos ya tampol. Pero no nanengneng nen Jehova ya gagawaen yoy anggaay nayarian yo ya isalbay relasyon yo, napaliket yo ta gagawaen yoy panlabayan to. (Mal. 2:16) No pabiskegen na sanasawa so relasyon da, ipapanengneng day panangaro tan respeto ed sakey tan sakey, tan nagkalalo la ed si Jehova, say lapuan na panangasawa.

16. Base ed 1 Corinto 13:​4-8a, antoy makatulong ed sanasawa no walay seryoson problema ed relasyon da? (Nengnengen met so litrato tan say kahon ya “Saray Makatulong Pian Onelet so Pankakaaro Yon Sanasawa.”)

¹⁶ No walay seryoson problema ed relasyon yon sanasawa, agyo komon iisipen ya mas marakep no mansian ki la, ta aliwan satan so solusyon. (1 Cor. 7:​10, 11) Anto sirin so dugan gawaen? Tepetan moy sarilim: ‘Panon kon napaelet so pankakaaro mi nen asawak?’ I-personal study’m so ibabaga na Biblia nipaakar ed pangipanengneng na panangaro, tan isip mo no panon mo nin nipanengneng iramay ugali ya abitlad 1 Corinto 13:​4-8a. (Basaen.) Imbes ya takasan moy problema tan isipen moy misian, manggawa kay paraan pian onapit lamet so liknaan nen asawam ed sika. Manpokus ka la ed no antoy nagawaan mo pian ompawil so datin aroan yo. Ipikasim ed si Jehova ya tulongan to ka. Man-research kad saray publikasyon tan video tayo. Patulongan ka met ed saray elder tan arum nin maespiritual ya agagi. Mantiwala kad si Jehova, say komatlo tan sankatibayan ya kabiangan na samay “taloran tili a lubir.” No unoren mo ray bilin to, seguradon “mairap a napultot” so relasyon yon sanasawa.—Ecl. 4:12.

17. Panon ya magmaliw ya maliket iramay labay da lay nawalaan na kapareha tan saramay wala lay asawa da?

¹⁷ Labay nen Jehova ya maliket so amin ya lingkor to, kaiba la iramay manplaplano lan mangasawa o miasawa tan saramay wala lay asawa da. Kanian no single ka ni tan labay mo lay nawalaan na kapareha, pilipilim so magmaliw ya best friend mo legay bilay. Tan no wala lay asawam, itultuloy mon paeleten so pankakaaro yo. No walay onlesan problema, mantiwala kad si Jehova, tan gawam so anggaay nayarian mo ya protektaan so relasyon yon sanasawa. No ontan so gawaen mo, seguradon “manliket ka ed bilay a kaibay inad-arom ya asawam.”—Ecl. 9:9.