Talosan Mo Iray Ilustrasyon ed Biblia

Dakel so ilustrasyon ya nabasad Biblia. Pero wala ray totoo ya mairap dan talosan iratan. (Mat. 13:13) Antoy makatulong pian natalosan mo so dugan kabaliksan na sarayan ilustrasyon? Salim irayan gawaen:

• Isip mo so manunan tema tan no antoy angikomparaan ed satan. Singa bilang, diad Apocalipsis 3:​3, say manunan tema et say isabi nen Jesus tan inkompara itan ed isabi na matakew.

• Isip mo no antoy pamparehoan na samay manunan tema tan samay angikomparaan. Akin kasi et pinankompara iran dua? Antoy pamparehoan da?

• Seguradom ya duga so natatalosan mo. Ta no andi, ompan aliway natalosan mo, lalo la no pigapigaray pamparehoan na samay tema tan samay angikomparaan. Singa bilang, diad samay abitlan alimbawa, onsabi si Jesus aliwan pian mantakew. Say rason no akin ya inkompara so isabi to ed isabi na matakew et lapud bigbigla itan ya nagawa tan agnatalaranan.