Imbangat Ak nen Jehova Manlapu Lad Inkaugaw Ko

Pero antis kon ituloy no antoy agawa, istoryaen ko nid sikayo no panon ya nalmo na pamilya mi so katuaan. Inyanak ak diad Calgary, Canada nen kaplesay World War II. Antis ya man-1950, walay tinmoktok ed abung mi ya kabataan ya payunir, si Donald Fraser. Akatongtong toy nanay ko, tan nampaiyaral na Biblia si nanay. Naar-aro nen nanay so katuaan, pero walay graben sakit da kanian mataltalag iran makapiaral. Inmaligwas ni ran siansia balet ed espiritual tan abautismoan ira nen 1950. Pero makapaermen ta anggapo ni duay taon et nampainawa la ra. Aliwa nin Tasi ed saman si tatay ko, pero inmabuloy ira ya walay brother ya manpaliwawa diad ponpon nen nanay.

Pigaran agew kayari na ponpon, walay alanaan ya agi ya angimbitad siak ya miaral, si Sister Alice. Maedad la iyan sister tan kabat da ak ta nen mabilay ni nanay, ipipila da ak ya miaral basta maksil ira. Impatanir kod si tatay ya miaral ak. Inmabuloy ira tan salien da met kunoy miaral “anggan maminsan labat” pian napisalamatan da imay brother ya nampaliwawa ed ponpon nen nanay. Diad saman ya labi, say aral et Theocratic Ministry School tan Service Meeting. Angalay tatay ko na kurso ed public speaking kanian dugarugad sikara iman ya aral! Pambiliban dan maong iramay nampaliwawa. Kanian manlapu lad saman, sinimba la ran onaatendi ed saman ya aral. Diad ilalabas na panaon, aatendian da met lay arum ya aral.

Nen ugaw ak, basaen ni na Theocratic Ministry School servant so ngaran na saray brother ya aka-enroll no onggapo lay aral. No narengel moy ngaran mo, say ibagam, “Wadia ak!” Aminsan, imbagak ya bitlaen da met lay ngaran ko diad onsublay ya aral. Kinomendaan da ak, pero agda ak met la tinepetan no kasin natatalosan koy ibabagak.

Say labay ko met labat et narengel koy ngaran ko. Anta manaya, no binitla da lay ngaran mo, labay ton ibaga, aka-enroll ka la tan ikdan da ka lay asainmin! Diad tinmumbok ya simba, malikeliket ak nen arengel koy ngaran ko. Say kuan kon tampol, “Wadia ak!” Kayari na aral, inasinggeran ak na saray agagi tan kinomendaan da ak. Kayari na pigaran simba, diman la agawa may abitlak diad gapo. Agko ilaloan ya ikdan da ak na asainmin ya manpaliwawa!

Anto yay nilooban ko! Nensaman, anggapoy Bible reading, kanian say asainmin mon tampol, manpaliwawa ka na anemira anggad waloran minuto. Maong labat ta tinulongan ak nen tatay ko ya manparaan. Amin-duamplo da ak ya impraktis! Kayari na asainmin ko, wala ray suhestion ya imbaga na Theocratic Ministry School servant. Akaaral ak ya maong ed satan. Diad inlabas na saray taon, tuloytuloy ak ya impasal nen Jehova. Inusar toy tatay ko, saray maespiritual ya brother tan sister, tan say organisasyon To.

TULOYTULOY AK YA IMPASAL NEN JEHOVA

Nen kakkagapok ni labat ya milan manpulong, si Sister Alice so angipasal ed siak. Diad saman ya panaon no manpulong ka, taloran teksto so ibasam ed unabung insan mo opresian na libro. No turnok lay mansalita, si Sister Alice ni so mikabat ed unabung. Igapo day tongtongan insan da ipabasa ed siak so unonan teksto. Kayarik ya basaen, siak lay mangituloy na presentasyon. Siak met la so manbasa na komadua tan komatlon teksto, insan ko la iyopresi so libro. Pero ag-abayag, naaralan ko met lanlamang so mangigapoy tongtongan. Nen abautismoan lay tatay ko nen 1954, sikada la so angipasal ed siak diad ministeryo. Anggano bukbukor da lay amabaleg ed siak, ginawa day anggaay nayarian da ya ipurek ed siak so katuaan. Disiplinado si tatay. Importantin maong ed sikara so pipiaral tan panagpulong. Kanian no eskedyul na aral, amtak ya miaral kami. Tan no Sabado tan Simbay kabuasan, amtak ya manpulong kami.

Nen maneeskuela ak ni, aliwa ak met ya matattalino. Pero diad samay 12 taon ya impanaral ko, dakel so naaralan ko ya anggad natan et nauusar ko ni. Singa bilang, dakel so naaralan kod Mathematics tan English grammar. Iramay naaralan ko ed subject ya English tan creative writing et makakatulong nid siak anggad natan ed asainmin ko diad Writing Department.

Dakel so mantetepet akin et labalabay koy musika. Mahilig ed musika iray atateng ko. Nen pitoy taon ko, nan-piano lesson ak, pero alikas to may piano teacher ko ya nanairapan ak. Kanian imbaga tod si tatay ko ya mas marakep no agak la man-piano lesson. Natatalosan ko no akin ya onmay imbaga to, ta diad saman et agak ni seryoso ed panaaral ko.

Kayari na pigaran bulan, akalmo si tatay na balon teacher ya manbangat ed siak. Pero aliwan piano lesson labat so inaral mi, pati voice lesson met. Kanian akaaral ak ya man-piano tan mangansion. Nen ugaw ak, soprano so boses ko, tan analo ak ed pigaran contest. Say planok et magmaliw ak ya music teacher pian nasuportaan koy sarilik no manpayunir ak la. Pero no ituloy ko itan, naupot so panaon ko ed panaral nipaakar ed harmony, music history, tan composition. Ta no agak manaral ya maong, agak makapasa ed eksamin! Kanian intundak lay manaral tan nan-regular payunir ak la nen 1963.

MALIKELIKET SO MANPAYUNIR!

Nen sakey taon ak lan manpapayunir, niyasain ak bilang espisyal payunir diad Kapuskasing, Ontario. Kaibak ya nan-SP ditan si Brother Daniel Skinner. Baleg so agwat na edad mi nen Kuya Dan. Dakdakel so imbangat dad siak nipaakar ed pangorganisa na kongregasyon. Aturo ak ya manlingkor ed Service Committee na kongregasyon nen 20 so edad ko, kanian kakkaukolan koy panangipasal. Makakaliket ak ta natan et ipapaseseg lamet na organisasyon tayo so pangipasal ed saray kabataan ya brother. No iter day anggaay nayarian da ed si Jehova, usaren to ra anggano ugaw ni ra!

Wala ray subok ed impanpayunir ko diad Kapuskasing. No panaoy winter, onabot ed -44 degrees Celsius so betel. “Ampetang” la tay -33 degrees Celsius! No manpulong kami nen Kuya Dan, akaran. Pero say sakey ed saray malikeliket ya agawad siak ed satan ya asainmin ko et amay nen akabat koy sakey ya sister, si Linda Cole, ya sikato manaya so magmaliw ya Sister Splane.

Masetseseg si Linda, tan dakel so RV to. Maomaong ya sister, maiter, tan makaaro. Say nanay to ya si Goldie et matoor ya sister. Nen primero, say tatay to ya si Allen et kontra ed saray Tasi. Pero aga pinaulyanan nen Goldie so pipiaral to ed Kingdom Hall. Lanang ton ipipila si Linda tan say duaran agagi to, si John tan Gordon, tan impasal to met iran manpulong. Wala ingen may panaon ya payunir iran saniina. Kalabas na saray taon, inawat lanlamang nen Allen so katuaan tan masetseseg ed kongregasyon.

Nen 1965, naimbitaan ak ya manaral na sakey bulan diad Bethel ed Canada parad Kingdom Ministry School. Nen wadman ak, inikdan da ak na application parad Gilead. Agkon balot inisip so manmisionero ta say pakaliknak et agak kualipikado parad satan. Pero impasak nin siansia may application. Naimbitaan ak ya manaral ed koma-42 ya klase. Diad Gilead, oobserbaan kami na saray instructor mi, insan ira manggaway progress report pian amta mi no anto ray kaukolan min paaligwasen. Diad samay sankaunaan ya progress report ya naawat ko, pinaseseg da ak ya samboten koy panaaral kod Gilead pian nakabisadok ya maong so organisasyon. Lapud 21 ko ni labat ed saman, dugaruga iman ya impaseseg da.

Say sakey ya labalabay ko ya inaral mid Gilead et no panon so mitongtong ed media: saray istasyon na radyo, istasyon na TV, tan dyaryo. Balbaleg manayay nitulong to ’tan ed magmaliw ya asainmin ko diad arapen. Istoryaen kod sikayo nagunoyan.

NIYASAIN AK ED SENEGAL

Kayari na Gilead, say asainmin ko et diad Senegal, Africa. Pigaran agew kayari na graduation, nambiahe ak lan tampol paonla ditan kaibay sakey nin misionero, si Michael Höhle. Diad saman ya panaon, manga 100 labat so publisher ed Senegal.

Kalabas na pigaran bulan, atawag ak ya mantrabaho ed branch office, maminsan ed sakey simba. Diad sakey ya missionary home, walay kuarto ya ginawa dan opisina, tan aman so pinagka-branch office. Say branch servant et si Brother Emmanuel Paterakis. Impuppurek dad siak ya anggano melmelag so branch office, atan so mangirerepresenta ed organisasyon nen Jehova diad interon Senegal. Aminsan, imbaga nen Brother Paterakis ya manggawa kami na sulat parad saray misionero pian napaseseg ira. Nensaman, mair-irap so manggaway dakel ya sulat. Sansakey mon i-type diad typewriter. Matrabahon maong, lalo la ta agmakapasa no walay bural. No nalingo ka, anggan sakey letra labat, uliten mo!

Diad saman ya labi, antis ak ya onsempet ed panaayaman kon missionary home, walay inderew ed siak nen Brother Paterakis ya envelope. Kuan dad siak, “David, sinulatan ka na Society.” Kalukas kod samay envelope, say karga to manaya et sakey ed saramay sulat ya in-type ko! Naaralan kod saman ya agawa ya say respetok ed organisasyon et agdapat akadepende ed kabaleg o kamelag na branch office.

Dakel so akaarok ed kongregasyon tan lanang kamin manba-bonding no Sabadoy labi. Agko iraman nalinglingwanan! Naar-arok iray agagi diman kanian anggad natan, mankukumustaan kami ni. Tan lapud akaaral ak ya mansalitay French diad Senegal, nauusar ko ’tan natan no ombibisita ak ed saray branch office ya French so salita da.

Nen 1968, wala lay tongtongan min mankasal nen Linda. Manlapu lad saman, pigaran bulan ak ya nananap na part-time ya trabaho diad Senegal pian makapanpayunir kami ditan nen Linda. Pero anggapoy aromog ko ta say aanapen dan empleyado et saray tagad man. Nen pinmawil ak ed Canada, nankasal kami, tan akaawat kami na asainmin bilang espisyal payunir diad Edmundston. Melag labat itan ya syudad diad probinsya na New Brunswick ya asingger ed probinsya na Quebec.

NAMPAYUNIR KAMI ED NEW BRUNSWICK TAN QUEBEC

Antis kamin niyasain ed Edmundston, anggapon balot so publisher ditan tan pigpigara labat so iyaaralan na Biblia. Inmawet ya Katoliko iray totoo. Amin lawarin abung et walay karatula to ya ‘Agnayari dia iray Tasi nen Jehova.’ Diad saman ya panaon, singa anggapo labat ed sikami iray ontan ya karatula, kanian ontotoktok kami nin siansia. Sinimba ya walay iyaanunsio na Katolikon simbaan diad dyaryo ya “Anapen tan erelen tayo iray Tasi nen Jehova”! Siempre amta mi no siopay tutukoyen da ta apatpatira kami met labat ya Tasi ed satan ya syudad—siak, si Linda, tan say sanasawan Victor tan Velda Norberg.

Agko nalinglingwanan imay unonan imbisita ed sikami na manangasikaso na sirkito. Kayari na sakey simba ya impiulop tod sikami, oniay imbaga to: “Seguro say nagawaan yo ni labat natan, uman yoy pakanengneng na totoo ed saray Tasi.” Inyaplika mi iman ya suhestion to. Tan epektibo! Kalkalnan anengneng na saray totoo ya mapaabeba iray Tasi nen Jehova, arawin dalin ed saray mapaatagey ya Katolikon pari. Natan et wala lay melag ya kongregasyon ed satan ya syudad.

Nen manga sakey taon mi la ed Edmundston, niyasain kami ya onsuporta ed baleg ya kongregasyon ed Quebec City. Pero anem bulan mi labat ya akaiba iray maparawes ya agagi ditan ta niyasain kami la diad kimey ed sirkito.

Atelek mi ray sirkito diad probinsya na Quebec diad loob na 14 ya taon. Dakel so naeksperiensya mi! Maples so inyaligwas na kimey diad Quebec. Diad saray kongregasyon ya bibisitaen mi, pami-pamilya so manaaral na Biblia, tan talagan pansasagpotan day nabautismoan.

AGKO NALINGLINGWANAN IRAY MAKUKULIN AGAGI

Mainomay ya aroen iray abisita min agagi ya French-Canadian. Pap-prangka ira, pero maliket iran kaiba tan singa ag-ira nakekesawan. Diad tua, antis iran onkamang ed katuaan, dakel nin subok so dalanen da, lalo la ta kapamilya dan mismo so mamapasegsegang ed sikara. Wala ray kabataan ya pinampili na saray atateng da, “Antoy labay mo, itundam tay panaaral moy Biblia ed saray Tasi, o palayasen mi ka?” Makapaliket ta dakel ed sarayan kabataan et pinili day Jehova. Seguradon pap-proud si Jehova ed sikara!

Aliwan kompleto yay istoryak no agko bitlaen iray regular tan espisyal payunir ya nanlingkor ed Quebec diad saraman ya taon. Pandinayewan koy seseg da! Dakel ed sikara et nanlapu nid arum ya lugar ed Canada. Inaral da so mansalitay French, tan inaral da met so mibagay ed saray totoo ed Quebec. Aliwa ’tan ya mainomay ta maksil so impluensya na saray Katolikon pari.

Say maslak ya teritorya na saray espisyal payunir et diad nisulinek iran pasen ya anggapo nin balot so Tasi. Anta mairap la lanti mananap na napanayaman, mas mairap so mananap na part-time ya trabaho ta kabusol na totoo iray Tasi. Anggan saray balon kasal ya SP et napilitan ya manayam ed abung ya kaibay apatira, anemira, o walora ya agagi pian dakel iran manapag ed renta. Ta no bukor da labat, aga kaya na budget da. Agnatawalan so kuli na sarayan payunir. Inyupot day nampisingan da ed panagpulong a kimey. No walay nigapo dan study, talagan tutukan da. Natan et dakel lay Tasi ed Quebec, kanian maslak ed saraman ya payunir et inmalis lad saray lugar ya mas baleg so pankaukolan.

Nen ombibisita kami ni ed saray kongregasyon, anggad nayari et mimiulop kami ed saray kabataan no Sabadoy kabuasan. Lapud nakakaistoryaan mi ra, nanaamtaan mi iray subok ya dadalanen da. Say arum ed saraman ya kabataan et misionero la natan diad arum ya bansa o manlilingkor ira diad arum ya asainmin.

Wala ray kongregasyon ya anggapoy pakasarag dan ipawil so gastos mid gasolina tan naakan. Kanian no asingger lan manampot so bulan, naupot met lay kuarta mi. No onman la, ipalima mi la ed si Jehova ta sikato met labat so makaamta ed situasyon mi. Agto kamin balot pinaulyanan. Manggawan-manggaway paraan pian makaonla kami ed ontumbok ya kongregasyon ya bisitaen mi.

DAKEL SO NAARALAN KO ED SARAY MATOOR YA BROTHER

Abitlak nen niman ya labalabay ko may inaral mid Gilead nipaakar ed no panon so mitongtong ed media. Nausar ko ’tan legan ak ya walad Quebec. Dakel so pankanawnawa ya akapangiter kami na pantasi panamegley na radyo, TV, tan dyaryo. Say kaibak ya inyasain ed sayan kimey et si Léonce Crépeault, sakey met ya manangasikaso na sirkito. Atalitali lay Léonce ed sayan asainmin. Akaaral ak ed paraan na pitotongtong to ed media lalo la ed saray boss. Imbes ya ipalikna ton singa kami propesyonal, say ibaga to: “Sir, siak tan ayay kaibak, ministro kami labat. Diad tua, no pansalita ed TV tan radyo so pantongtongan, anggapoy masyadon eksperiensya mi. Pero inyasain kami na organisasyon mi ya ipaamtad totoo so nagawan baleg ya kombension na Saray Tasi nen Jehova. Amta mi ya natulongan yo kamid saya. Pisalamatan min maong so tulong yo.” Lapud mapaabeba so pitotongtong nen Léonce, dakel ed media so mabulos ya tinmulong ed sikatayo.

Asalik met ya akatrabaho si Brother Glen How, sakey ed saray abogado tayo. Inyasain kami na branch ed saray kaso ya posiblin ibalita na media. Balbaleg so nitulong to may naaralan kod Gilead tan samay impangipasal ed siak nen Léonce. Baleg ya pribilehyok so makapikimeyan ed si Brother How. No pangidepensa ed organisasyon tayo so pantongtongan, anggapoy tatakotan to, tan anengneng ko ya talagan inar-aro toy Jehova.

Nen 1985, inyasain kami na branch office diad sirkito ed western Canada. Asingger itan ed abung nen tatay ko kanian anggan panon et naasikaso mi ra. Pero kayari na taloy bulan, nampainawa lay tatay. Tuloytuloy kamin nanlingkor ed sirkito ed western Canada anggad 1989. Insan kami akaawat na imbitasyon ya manlingkor ed Bethel diad United States. Agmi ilaloan ya taynan mi so kimey ed sirkito kayari na 19 ya taon. Diad saratan ya taon, nilasus ya abung so nanayaman mi tan nilibon panangan so imparungo ed sikami na saray maparawes ya agagi. Misatsalamat kamin maong ed amin ya nampatuloy tan amakan ed sikami.

INMALIS KAMI DIAD UNITED STATES

Kasabi mid Bethel diad Brooklyn, say asainmin ko et diad Service Department. Dakel so naaralan ko ditan! Singa bilang, naaralan ko ya kaukolan kon amtaen so amin ya detalye tan agak dapat mandedepende ed dilin pakatalos ko. Nen 1998, inyalis da ak ed Writing Department. Anggad natan, dakel ni nanaaralan ko ed sayan asainmin ko. Pigaran taon ya akatrabahok si Brother John Barr. Diad saman et sikara so coordinator na Writing Committee. Papablien kon maong so panaon ya akaibak ira tan say impangipasal dad siak. Maomaong iran too, talagan inalig day Jesus.

Ipapasen ko met ya bendisyon ya nakatrabaho iray mapaabeban brother tan sister diad Writing Department. Anggano marundunong ira, lanang dan kekerewen so tulong nen Jehova diad asainmin da ta bibidbiren da ya anggapoy nagawaan da no anggapoy tulong na espiritu to.

Baleg met ya pribilehyo mi nen Linda ya nabisita iray matoor ya agagi diad 110 ya bansa. Anengneng min mismo so panangaro na saray misionero, saray membro na Branch Committee, tan arum nin agagi ya walad full-time. Anengneng mi met so seseg tan katooran na saray publisher ta iyuuna da nin siansia so Panarian anggano walay guerra, agaylay irap na bilay ed lugar da, tan ondadalan irad panamasegsegang. Seguradon inar-aro ira nen Aman Jehova!

Diad inlabas na saray taon, nanduruman asainmin so naawat ko. Maong labat ta wadtay Linda ya masutsuporta ed siak. Sikato may too ya sankanonot ton lanang so arum, matuttulong, tan maar-aro. Marundunong met ya mangigapoy tongtongan kanian mainomay toy man-informal witnessing. Dakel so atulongan to ya onkamang ed katuaan, tan wala met iray atulongan to ya inaktibo ya pinmawil ed si Jehova. Nibagak ya talagan mabmablin regalo nen Jehova ed siak si Linda. Natan ya masiken tan akulaw kami la, misatsalamat kami ed saray ugugaw nin agagi ya ontutulong ed sikami diad pambiabiahe mi tan ed arum nin pankaukolan mi.—Mar. 10:​29, 30.

No pawilen koy apalabas ya waloran dekada, manleppuay pisasalamat ko ed si Jehova. Parehoy naliliknak ed samay alikna na salmista ya nansulat ed Salmo 71:17: “O Dios, manlapu lad inkaugaw ko et ibabangat mo ak la, tan anggad natan et iyaabawag ko ray makapakelaw a gawam.” Itultuloy ko itan ya gawaen anggad mabilay ak.