Akaawat Ak na Dakel ya Bendisyon Lapud Akaaral Ak ed Maong Iran Alimbawa

Niyanak ak ed Quebec City diad probinsya na Quebec, Canada. Say salita na maslak ya totoo ditan et French. Maong tan maar-aro iray atateng kon si Louis tan Zélia. Mabaing si tatay ko tan labalabay toy manbasa. Siak balet labalabay koy mansulat tan pangarap koy magmaliw ya journalist.

Nen manga 12 so taon ko, pinmasyar ed abung mi so katrabaho nen tatay ko ya si Rodolphe Soucy, kaiba toy kaaro to. Tasi nen Jehova ira. Anggapoy masyadon amtak ed saray Tasi tan agak interesado ed relihyon da. Balet pambiliban koy panguusar day Biblia pian ebatan iray tepet mi. Manbilib met iray atateng ko, kanian nampaiyaral kami na Biblia.

Diad saman et manaaral ak ed Catholic school. No maminsan, ibabagak ed saray kaklasek iray nanaaralan kod Bible study mi. Abalitaan itan na saray maestrok ya papari. Imbes ya usaren day Biblia pian paneknekan ya aliwa so ibabagak, inakusaan ak na sakey ed sikara diad arap na saray kaklasek ya rebelde ak kuno! Anggano makapanerbiyos iman ya agawa, diman ko alinewan ya aliwan base ed Biblia iray ibabangat dad sikami tungkol ed relihyon. Naisip ko ya kaukolan ko lay onalis ed arum ya eskuelaan. Kanian inmabuloy iray atateng ko ya man-transfer ak.

NAARALAN KON AROEN SO MINISTERYO

Intuloy koy panaaral koy Biblia balet matantan so iyaaligwas kod espiritual lapud antakot koy manpulong ed kaabungan. Maksil so impluensya na Katolikon Simbaan tan kontra iran maong ed panagpulong. Si Maurice Duplessis ya sankatageyan ya opisyal ed Quebec et kaalyado to ray papari. Sinuportaan toy panataktakot tan impangataki na totoo ed saray Tasi. Talagan diad saman et kaukolan so pakpel pian makapanpulong.

Say brother ya tinmulong ed siak pian nalabanan koy takot ko et si John Rae, ya nan-graduate ed komasiam ya klase na Gilead School. Dakel so eksperiensya nen Kuya John, sikatoy mauyamo, mapaabeba, tan mainomay ya asinggeran. Matalag to ak ya direktan simbawaen, balet dakdakel so naaralan kod maong ya alimbawa to. Nairapan si Kuya John ya man-French kanian lanang kon iibaan ed ministeryo tan ibabangat kon man-French. Apaseseg ak ed impiulop kod si Kuya John kanian nandesisyon ak ya magmaliw a Tasi nen Jehova. Nampabautismo ak nen Mayo 26, 1951, samploran taon manlapud samay unonan impakapikabat kod saray Tasi.

Maslak ed saray agagi ed melag ya kongregasyon mi ed Quebec City et payunir. Maong so alimbawa ra kanian apaseseg ak met ya manpayunir. Biblia labat so uusaren mi ed panagpulong. Anggapoy awit min literatura kanian inaral min maong ya usaren so Biblia. Tinandaan ko ray teksto ed Biblia pian nidepensak so katuaan. Balet aglabay na dakel ya basaen so Biblia no anggapoy imprimatur to, odino aliwan aprobado na Katolikon Simbaan.

Nen 1952, nankasal kami na kakongregasyon ko ya si Simone Patry. Nanayam kami ed Montreal, tan diad saman lanlamang ya taon et abendisyonan kami na anak a bii, si Lise. Akatunda ak ya agano ed pampapayunir ko kayari min nankasal nen Simone, balet pinansiansia min simpli so bilay na pamilya mi pian nasuportaan mi iray aktibidad na kongregasyon.

Kayari samploran taon, inisip ko lamet so manpayunir. Nen 1962, legan na sakey bulan ya impanaral kod Canada Bethel parad Kingdom Ministry School na saray elder, akaibak ed kuarto so brother ya si Camille Ouellette. Pandinayewan koy seseg nen Camille ed ministeryo lalo la ta wala met so pamilya to. Diad saman et matalag tay ateng ed Quebec ya makapanpayunir legan ya mamapabaleg na anak to. Balet atan so labay ya gawaen nen Camille. Legan kamin saniba, pinaseseg to ak ya pannonotan koy situasyon ko. Kayari labat na pigaran bulan, nandesisyon ak ya man-regular payunir lamet. Wala ray mangikuestion ed desisyon ko, balet intuloy ko ta manisia ak ya bendisyonan nen Jehova iray sagpot kon palaknaben so ministeryok.

PINMAWIL ED QUEBEC BILANG ESPISYAL PAYUNIR

Nen 1964, niyasain kami nen Simone ya espisyal payunir diad binalegan min lugar ya Quebec City, tan pigaran taon kamin nanlingkor diman. Medyo mas mainomay lay manpulong balet wala ni ran siansiay onkokontra.

Aminsan ya ngarem na Sabado, inaresto ak na pulis diad Sainte-Marie, melag a baley ya asingger ed Quebec City. Inawit to ak ed istasyon na pulis tan inkulong to ak lapud anggapo kunoy permit ko ya manpulong ed kaabungan. Insan da ak inawit ed judge ya say ngaran to et Baillargeon. Makapataktakot so itsura to. Tinepetan to ak no siopay abogadok. Nen imbagak ya si Glen How,a sakey a kabkabat ya abogadon Tasi, anerbiyos imay judge tan imbaga to: “Anto? Akin et sikato ni!” Kabkabat si Glen How ed pangidedepensa to ed saray Tasi diad saman a panaon. Impaamta lanlamang ed siak na korte ya imbasura la so kaso.

Lapud wala ray onkokontra ed kimey tayo diad Quebec, mairap so mananap na matukoy ya pasen ya narentaan parad aral. Say nalmo min panaralan na melag ya kongregasyon mi et daan ya garahe ya anggapoy heater to. No panaoy ambetel, manguusar kami na oil heater. Pigaran oras antis ya onggapo so aral, paliberan mi la itan tan iistoryaen mi ray makapaseseg ya eksperiensya mi.

Makapaliket ya nanengneng so inyaligwas na panagpulong a kimey diad inlabas na saray taon. Nen 1960’s, pigpigara tan angkekelag iray kongregasyon ed Quebec City, Côte-Nord, tan diad Gaspé Peninsula. Natan et masulok lan duara so sirkito ed saratan a lugar, tan balibali la ray Kingdom Hall ya panaaralan na saray agagi.

NAIMBITAAN ED PANAGBIAHEN KIMEY

Naimbitaan kami nen Simone ya manlingkor ed sirkito nen 1970. Insan nen 1973 et niyasain kami ed kimey diad distrito. Legan na saratan ya taon, dakel so naaralan ko ed saray responsablin brother ya singa si Laurier Saumurb tan David Splane.c Nanlingkor met ira ed panagbiahen kimey. Kada kayari asemblea, pantongtongan mi nen David no anto ray sarag mi nin paaligwasen ed panagbangat mi. Aminsan et oniay imbagad siak nen David: “Na-enjoy ko may sampot ya paliwawam Léonce. Marakep, balet parad talora lan paliwawa so karakel na reperensyam!” Aminen ko ya dakdakel ya impormasyon so uusaren kod paliwawak. Kaukolan kon aralen ya bawasan.

Saray manangasikaso na distrito et niyasain ya mamaseseg ed saray manangasikaso na sirkito. Balet lapud kabkabat ak na dakel ya agagi ed Quebec, labalabay day miulop ed siak diad panagpulong no bibisitaen ko ray manangasikaso na sirkito. Malikeliket ak ya nakaiba ira, balet agko masyadon nakakaiba so manangasikaso na sirkito. Kanian aminsan, oniay impanonot ed siak na sakey ya manangasikaso na sirkito: “Nakomendaan kayo ta iikdan yoy panaon iray agagi, balet agyo lilingwanan ya siak so bibisitaen yo ed sayan simba. Kaukolan ko met so panamaseseg!” Naaralan kod satan ya imbaga to ya kaukolan koy magmaliw ya balanse.

Makapaermen ta nen 1976 et walay ag-iilaloan ya agawa. Say inad-arok ya asawan si Simone et nansakit na grabe tan naandi ed bilay. Sikatoy masakripisyo tan inar-aro toy Aman Jehova kanian maliket so impaniba mi. Akatulong ed siak so impanpokus kod ministeryo pian nasarag koy ermen, tan misalsalamat ak ed si Jehova lapud sinuportaan to ak ed saman ya mairap a panaon. Ag-abayag, nankasal kami nen Carolyn Elliott, sakey ya maseseg a payunir ya English so salita to. Sikatoy inmalis ed Quebec pian manlingkor ed lugar ya baleg so pankaukolan. Makaaro si Carolyn tan walay personal ya interes tod agagi, lalo la ed saramay mabaing odino manbubukbukor. Kanian baleg so nitulong to ed siak nen kaibak lad panagbiahen kimey.

AGNALINGLINGWANAN YA TAON

Nen Enero 1978, niyasain ak ya manbangat ed unonan Pioneer Service School diad Quebec. Mannerbiyos ak ta anggapoy ideyak ed curriculum. Maong labat ta eksperiensyado lan payunir so dakel ya estudyante ed unonan klase. Anggano siak so instruktor, dakel so naaralan kod sikara!

Diad saman lanlamang ya taon, agawa so “Victorious Faith” ya Internasyonal a Kombension diad Olympic Stadium ed Montreal. Atan so sankabalegan ya kombension ya agawad Quebec ta masulok ya 80,000 so inmatendi. Niyasain ak ed News Service Department. Siak so mitotongtong ed dakel ya journalist tan maliket ak ta puro positibo so imbalita ra. Ininterbyu da kami diad TV tan radio tan no kuentaen et masulok ya 20 oras so impangipalabas da ed saratan, tan nilasus ya artikulo so im-publish da ed saray dyaryo. Baleg ya pantasi iman!

NIYASAIN ED SANANEY YA TERITORYA

Walay baleg a pananguman ya agawad bilay ko nen 1996. Kayari na dakel a taon ya impanlingkor kod saray French ya kongregasyon ed Quebec manlapu la nen abautismoan ak, akaawat ak na asainmin ya manlingkor ed distrito diad Toronto ya English so uusaren na saray kongregasyon. Pakaliknak et agak kualipikado tan antakot koy manpaliwawa ed English ta makapuy ak ya man-English. Lanang ak ya manpipikasi ed si Jehova tan naaralan koy mas manmatalek ed sikato.

No pawilen koy apalabas, nibagak ya malikeliket ak ed duay taon ya impanlingkor kod Toronto. Maanos si Carolyn ya angibangat ed siak ya man-English, tan wadtan iray agagi ya sinmuporta tan amaseseg ed siak. Dakel so nagmaliw ya kakaaro mi.

Kada no asemblea, dakel so kaukolan ya iparaan, balet kaslakan et sakey oras ak ya manpupulong ed kaabungan no labi na Biernes. Nayarin ibaga na arum, ‘Akin et manpulong ka ni anta dakdakel so kaukolan ya gawaen parad asemblea?’ Diad tua, narerelaks ak no walay nakatongtong kod ministeryo. Anggad natan, naliliketan ak no wala ak ed lawak na kimeyan.

Nen 1998, niyasain kami nen Carolyn ya espisyal payunir diad Montreal. Pigaran taon ya siak so aka-asain ya mangorganisa na special public witnessing tan siak so mitotongtong ed news media pian nipetek iray lingon impormasyon nipaakar ed Saray Tasi nen Jehova. Panliliketan mi natan nen Carolyn ya pulongan iray dayo ya agano ni ed Canada ya kaslakan ed sikara et labalabay dan naamtaan so ibabangat na Biblia.

No pawilen koy 68 taon ya impanlingkor kod si Jehova manlapud impanpabautismok, talagan abendisyonan ak. Malikeliket ak lapud naarok so ministeryo tan dakel so atulongan ko ya makaamta ed katuaan. Nen baleg la ray apok ed si Lise, nampayunir la ran sanasawa. Malikeliket ak ta agnakal so seseg to ed ministeryo. Misalsalamat ak ed saray agagi ya baleg so nitulong na maong ya alimbawa ra kanian inmaligwas ak ed espiritual tan agawaan ko ray nanduruman asainmin ko ed organisasyon. Apaneknekan ko ya nagawaan tayo labat so asainmin tayo no manmatalek tayo ed tulong na makapanyarin masanton espiritu nen Jehova. (Sal. 51:11) Lanang kon pisasalamatan si Jehova lapud inabuloyan to ak ya nawalaan na mabmablin pribilehyo ya idayew so ngaran to!—Sal. 54:6.