Sarag Yo Kasi so Ontulong?
1 Si Jehova so lawas manaanap na paraan pian tulongan iray matoor a lingkor to. (2 Awa. 16:9; Isa. 41:10, 13) Sikatoy inyaliling nen Isaias ed maaron managpastol sanen insulat to: “Tiponen to naani so saray kordero ed taklay to, tan awiten to ra ed pagew to, tan guyoren to a makalna naani so saray walaan na kilaw.” (Isa. 40:11) Usisaen tayo pa so pigaran paraan a naalig tayo so maaron panagpaga nen Jehova.
2 Tulongan Iray Balo ni: Natulongan tayo iray balo ni diad pangimbita ed sikara ed saray makapaseseg a panlilimog tayo. (Uli. 13:20) Oniay nanonotan na sakey ya agin laki nipaakar ed impanulong ed sikato na arum sanen ginmapo ya akilimog ed kongregasyon: “Aminpiga ak ya impila na sakey a pamilya ed panagaral da bilang pamilya. Legan kon onaaligwas, regular ak ya itatagar na sanasawan payunir diad sanagewan a panagpulong. Naynay min panggagayagaan iray maespiritual a pantotongtong.” Inkuan to ni: “Antis ak a nagmaliw a Kristiano, niyugalik lay ompasyar ed labi na Biernes tan Sabado. Balet say panaon ko ed saray agagi so amenek ed pankaukolan ko parad pililimog.” Say maaron panangimano na kongregasyon so tinmulong ed sayan agi pian niletneg a malet tan agnagiing ed pananisia, tan natan et sikato lay manlilingkor bilang membro na pamilyan Bethel.—Col. 2:6, 7.
3 Manpapabiskegan: Nayarin natebek tayo so pankanawnawa ya ontulong sano nidunget ed mairap a kipapasen iray agagi tayo. Kasin nayarian yon iyuksoy so pantasi panamegley na telepono a kaiba so mabeblay a manangipalapag, odino kerewen ya ibaan to kayo ed iyaaralan yo na Biblia, odino awiten so iyaaralan yo ed abung to? Kasin mankaukolan na tulong so sakey ya ateng a walaan na ankelag nin ananak sano mibibiang ed ministeryo? Walara kasi mabaing ya agagi a malabay a patulongan ed sikayo sano ondadalaw odino manggagawa na arum a nengneng na panagministeryo? Say maaron panangimano ed saray agagi tayo so managdag ed sikatayon mananap na paraan pian pabiskegen ira.—Roma 14:19.
4 Legan tayon aaligen so matamoy a panagpaga nen Jehova ed saray lingkor to, napapabiskeg tayo so sakey tan sakey, natutulongan tayo so kongregasyon a mankakasakey ed aro, tan niglogloria tayo so mangatatawen ya Ama tayo.—Efe. 4:16.